गुरुवार 8 अक्टूबर 2026 की दैनिक मुरली

08-10-2026 praatahmurli om shanti "baapdaada"' madhuban

“meethe bachche - tumhein ab aavaaj se pare jaana hai isliye mukh se shiv-shiv kahne ki bhi darkaar nahin hai''

prashn:- ek baap ko hi sarvashaktimaan, gyaan ka saagar kahenge, doosron ko nahin - kyon?

uttar:- kyonki ek baap ko hi yaad karne se aatma patit se paavan ban jaati hai। baap hi hai jo patiton ko paavan bana dete hain, baaki koi bhi dehdhaari manushya paavan bana nahin sakte। baap tumhein raavan raajya se mukta kar dete hain। tum shivbaaba se shakti lete ho, jitna jaasti yaad karenge utna shakti milegi aur khaad nikalti jaayegi।

geet:- om namo shivaae…

om shanti। meethe-meethe sikeeldhe bachchon ne bhakti ki mahima suni। tum bhi mahima gaate the। ab mahima nahin gaate ho aur na tumhaare liye mahima ki jaroorat hai। jo bhagat karte hain woh tum bachche nahin kar sakte ho। tum bhagat the, ab tumko bhagwan mila hai। sabko ikattha to mil nahin sakta hai। baap sabko ikattha kaise padhaaye? yeh to ho nahin sakta। sabhi bhakta bhi ikatthe nahin ho sakte। haan, baap ko padhaana hai zaroor kyonki yeh raajayog hai। sooryavanshi, chandravanshi raajya sthaapan hona hai। bachchon ko pradarshani mein samjhaana hai, tyohaaron aadi par bhi tum bahut achhi service kar sakte ho। tumhein apne liye hi raajya sthaapan karna hai। tum shiv shakti, mahaarthi sena ho aur koi drill aadi tum nahin seekhte ho। tum roohaani drill seekhte ho। yeh drill bhaarat ki naameegraami hai। yeh hai yog ki drill। aatma ko parampita paramatma se yog lagaana hai, unse varsa lena hai। ismen ladaai ki koi baat nahin। tum baap se varsa lete ho, ismen ladaai ka connection nahin hai। tum ho behad baap ke vaaris। to baap ka bankar baap ki shreemat par chalna hai। baap ki mat ladaai aadi ki nahin hai। baap sirf kehte hain - meethe-meethe bachche tum satopradhaan the, raajya karte the ab tumko smriti aai hai। baap kehte hain - tum apne janmon ko nahin jaante ho। gaate bhi hain 84 janma manushya lete hain। 84 laakh yeh to gapode hain। bhakti maarga mein jisko jo aaya so padhte rehte hain। drama anusaar yeh bhakti maarga ki saamagri hai। satayug treta mein bhakti hoti nahin। bhakti alag hai, gyaan alag hai। tum bachchon ke sivaae aur koi rishi muni aadi ki buddhi mein yeh gyaan nahin hai। unhon ko yeh bhi maaloom nahin ki sukh alag hai, duhkh alag hai। sukh baap dete hain, duhkh raavan dete hain। jo tum sooryavanshi chandravanshi the, so 84 ka chakra lagaakar shoodravanshi banen। baap smriti dilaate hain - tum vishwa ke maalik the। tum 84 janma bhog neeche utarte, tuchchha buddhi, tamopradhaan ban gaye ho। satopradhaan vaale ko svachchha oonch buddhi kaha jaata hai। tamopradhaan ko neech buddhi kaha jaata hai। neech buddhi vaale oonch buddhi vaalon ko namaste karte hain। yeh tumko bhi maaloom nahin tha ki ham hi oonch the, ab ham hi neech bane hain। baba ne samjhaaya hai, jisne pahle number mein janma liya hoga vahi satopradhaan banega। 84 janma bhi sooryavanshi hi lenge। ab tum samajhte ho ham vishwa ke maalik the to paavan satopradhaan the। patit thode hi vishwa ke maalik ban sakte hain। unhon ki mahima dekho kitni oonchi hai। sarvagun sampanna... treta mein 14 kala sampoorn nahin kahenge। sooryavanshi ko 16 kala sampoorn kahenge। 14 kala ke peechhe sampoorn akshar nahin aayega। sampoorn 16 kala vaalon ko likhna hai। abhi tum bachche 16 kala sampoorn bante ho।

yeh bhi bachchon ko samjhaaya hai ki yeh gyaan ati sahaj hai, isse sahaj koi baat hoti nahin। baba merciful hai na। baba jaante hain bachche bhakti mein dhakke kha-khaakar thak gaye honge isliye dikhaaya hai dropdi ke paanv dabaaye। baba ke paas budhi-budhi maataayen aati hain। baba kehte hain tum bhakti ke dhakke khaakar thake hue ho, isliye baba abhi tumhaari thak sab door kar dete hain। bhakti mein raam-raam japte, maala pherte rehte hain। baba ka paadriyon se bhi samparka raha hai। paadri bhi Bible lekar baith samjhaate rehte hain। bahut Christian ban jaate hain। yahaan maala aadi pherne ki baat nahin। baap kehte hain - apne ko aatma samajh baba ko yaad karo। shiv-shiv mukh se kehna nahin hai। ham to aavaaj se pare jaane vaale hain। baba bahut sahaj yukti bataate hain ki mujhe yaad karo to khaad nikal jaae aur grihastha vyavhaar mein rehte pavitra banna hai। kamal phool bada naameegraami hai। unki badi panchaayat hoti hai, parantu phir bhi nyaara aur pyaara rehta hai। tum bhi vishay saagar mein rehte nyaare pyaare raho। yeh vishay saagar hai, isko nadi nahin kahenge।

tum bachche abhi kitna samajhdaar bante ho, isi samajh se tum mahaaraajkumaar ban jaate ho। tumko to bahut khushi honi chaahiye। purushaartha karna chaahiye, bachcha athva bachchi donon ki aatma ko purushaartha karna hai। laukik sambandh mein baap ka varsa sirf bachchon ko milta hai, bachchi ko nahin। yahaan sab aatmaon ko varsa milta hai। baap samjhaate hain yaad ki yaatra se hi tum oonch pad pa sakte ho। pradarshani mein pahle-pahle baap ka parichay dena hai phir unke baad hai baap ka varsa। pahle yeh nishchay bithaao ki yeh tumhaara behad ka baap hai। unko samjhaana hai bhagwan ek hai - brahma, vishnu, shankar bhi bhagwan nahin hain, devta hain। bhagwan patit-paavan niraakaar baap hai। unki mahima hi alag hai। aajkal pradarshani mein trimoorti par samjhaana hota hai। woh baap, yeh daada। varsa unse milta hai। woh niraakaar hai unse varsa kaise mile! woh hai sabka rachayita। brahma vishnu shankar bhi rachna hain। rachna ko rachta se hi varsa mil sakta hai। woh to niraakaar baap is dvaara varsa dete hain। rachta sabka ek hai isliye gaaya jaata hai sarva ka sadgati daata ek। usko gyaan saagar kaha jaata hai। baaki woh sab shaastron ki authority hain। yeh hai gyaan saagar khud authority। world almighty authority khud kehte hain ki main vedon shaastron ko jaanta hoon aur tumko saar samjhaata hoon। yeh sab hai bhakti maarga ki saamagri jo satayug treta mein hoti nahin। bhakti se hi seedhi neeche utarni hoti hai। sarvashaktimaan ek baap ko hi gaaya jaata hai। unke saath yog lagaane se hi ham pavitra ban jaate hain to sarvashaktimaan hua na। ham sabko patit se paavan bana dete hain। raavanraajya se mukta kar dete hain। tum ab shivbaaba se shakti le rahe ho। jitna jaasti yaad karenge utna shakti milegi aur khaad nikal jaayegi। tumko din-raat yahi phurna rehna chaahiye ki patit se paavan, tamopradhaan se satopradhaan ban jaayen। maaya ke toofaan aayenge। baba kehte hain khabardaar rehna chaahiye। tumhaari maaya ke saath yuddha hai। phaaltu vikalpa bahut aayenge। jo kabhi agyaan mein nahin aaye honge woh bhi aayenge। tum yuddha ke maidaan mein ho। mehnat saari yaad ki yaatra mein hai। bhaarat ka yog naameegraami hai। yog ke liye hi baba samjhaate hain ki tum apne ko aatma samajh baap ko yaad karo। aise aur koi manushya samjha na sake। woh kah dete hain sab bhagwan ke roop hain। jidhar dekhta hoon - paramatma hi paramatma hai। baap samjhaate hain tum aatma ho, 84 janma bhogte ho। agar sab paramatma hain to kya paramatma janma-maran ke chakra mein aate hain? aatma ek shareer chhod doosra leti hai। aatma mein achhe bure sanskaar rehte hain। achhe sanskaar vaalon ki mahima gaate hain। bure sanskaar vaalon ko kehte hain paapi neech। baba pavitra banne ki sahaj yukti bataate hain। mansa, vaacha, karmana kisko duhkh nahin dena hai। apne ko bhi duhkh nahin dena hai। koi bhi vikarma, chori aadi nahin karna chaahiye। agar kahaan jhooth bolna padta hai to baba se raay poochho। sabse bada paap hai - kaam kataari chalaana, woh mat chalaao।

baap kehte hain - bachche haathon se kaam karte buddhi ka yog mere se lagaao। (hath kaar de... buddhi yaar de) baba surgeon bhi hai। sabki beemaari ek jaisi ho na sake। karma bhi ek jaise ho na saken। to kadam-kadam par poochhna chaahiye। manzil badi bhaari hai। amarnaath ki yaatra par jaate hain to kehte hain amarnaath ki jay, badreenaath ki jay। he badreenaath hamaari raksha karna। ab tumko teertha yaatra aadi kuchh nahin karna hai। yeh gyaan ki baaten baap hi samjhaate hain। unka hi part hai। tum bhi baba ke saath-saath paartadhaari ho। jitna jo padhega utna oonch pad milega। ismen koi ki badaai nahi। badaai ek ki hi hai, jo sarva manushyon ko sadgati deta hai। sarva bachchon ko patit se paavan banaate hain। drama mein mujhe bhi part mila hua hai। 5 tatvon ko bhi apna-apna part mila hua hai, so bajaana hai। dharti ko uthalna hai, vinaash hona hai। tumhaara bhi drama mein part hai, ismen badaai kya hai। raajya karte-karte patit ban gaye। tum bhi pahle kya the? worth not a penny। ab tum vishwa ke maalik bante ho, yeh tumhaara part hai phir bhi hamko aisa banna hi hai। isme badaai ki va mahima ki koi baat nahin। yeh drama bana hua hai। baba bhi aakar apna part bajaate hain। bhagat log badaai dete, mahima gaate, woh kaam ham nahin kar sakte। yahaan to baap ko yaad karna hai। baba is drama ka raaz to bada wonderful hai! jo koi ko pata nahin। baba ham satayug mein yeh bhi bhool jaayenge! bada vichitra drama hai। aise-aise apne se baaten karo। koi paartadhaari achha part bajaate hain to taali bajaate hain। ham bhi kehte hain meethe baba ka, shivbaaba ka bahut achha part hai। ham bhi baba ke sang achha part bajaate hain। kitna achhi reeti samjhaate hain, phir bhi kinhon ko samajh mein nahin aata to samajh jaate hain ki hamaari raajdhaani mein inhon ko aana nahin hai। yeh bhi jaante hain jo brahman bane the vahi brahman ban phir devta banenge। devtaaon mein bhi praja aadi sab banenge। sabko anaadi part mila hua hai। srishti bhi ek hi hai, woh chalti rehti hai। god is one, creation is one। vahi chakra phirta rehta hai। manushya khoj karte hain, dekhen moon mein kya hai! unke oopar kya hai! unke oopar hai sookshm vatan। vahaan kya dekhenge? light hi light। bahut koshish karte hain - science ki bhi had hai na। maaya ki bhi bahut pomp hai। science sukh ke liye bhi hai to duhkh ke liye bhi hai। vahaan aeroplane kabhi girenge nahin। duhkh ki baat nahin। yahaan to duhkh hi duhkh hai। chor loot jaate, aag jala deti। vahaan makaan bahut bade hote। saare aabu jitni jameen ek-ek raaja ki hogi। tum aaye ho svargavaasi banne। baba ko yaad karo to khaad nikle। tum sab aashik ho, ab maashook tumko kehte hain - maamekam yaad karo to amarpuri ke maalik ban jaayenge। vahaan akaale mrityu hota nahin। satayug mein hai shreshthaachaari duniya, yeh hai bhrashtaachaari duniya। kitne bi.ke. baap se varsa le rahe hain। tum bhi varsa le lo। agar shreemat par nahin chalenge to oonch pad nahin pa sakenge। har 5 hajaar varsha ke baad baba svarga banaane aate hain। kaliyug mein dher manushya, satayug mein thode, to vinaash zaroor hoga, isliye mahaabhaarat ladaai saamne khadi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) mansa, vaacha, karmana kisi ko bhi duhkh nahin dena hai। bure sanskaaron ko nikaal abhi achhe sanskaar dhaaran karne hain। koi vikarma na ho iska dhyaan rakhna hai।

2) is vichitra drama mein apne shreshtha bhaagya ko dekhte hue apne aapse baaten karni hai ki ham bhagwan ke saath paartadhaari hain। kitna achha hamaara part hai।

vardaan:- sneh ke return mein samaanta ka anubhav karne vaale sarvashakti sampanna bhav

jo bachche baap ke sneh mein sada samaaye hue rehte hain unhein sneh ke response mein baap samaan banne ka vardaan praapta ho jaata hai। jo sada snehayukta aur yogayukta hain woh sarva shaktiyon se sampanna svatah ban jaate hain। sarva shaktiyaan sada saath hain to vijay hui padi hai। jinhen smriti rehti ki sarvashaktimaan baap hamaara saathi hai, woh kabhi kisi bhi baat se vichlit nahin ho sakte।

slogan:- purushaarthi jeevan mein jo sada santushta aur khush rahne vaale hain vahi khushanseeb hain।

ye avyakt ishaare - paropkaar ki bhaavna se sampanna ban apkaari par bhi upkaar karo

is samay aisa paropkaari group chaahiye jo dene vaala daata ho। jaise sampanna raajaayen sada praja ko dene vaale hote hain। sampanna raajaaon ka haath kabhi bhi lene vaala nahin hoga, dene vaala hoga। aap bachche to svarga ke vishwa mahaaraaja ban daata roop ka part bajaane vaale ho to abhi se vahi sanskaar svayan mein bharo।