मम्मा की मुरली - gyan-sitar-10

२८.१२.५८

pavitra pravritti se nivriti nahin lekin maaya se nivriti rakho

om shanti। paramatma ki knowledge siddha karti hai ki pravritti maarga anaadi se hi chala aata hai । rachta aur rachna - yeh do akshar bhi pravritti ko siddha karte hain। paramatma creator hai to kiska ? creation ka। bhagwan ke sanskaar hi pravritti ke hain। bhal niraakaar hai parantu rachna ka rachta to hai na। paramatma apne sanskaaron mein hi pravritti vaala hai। to isse siddha hai anaadi pravritti hai। woh paramatma ki anaadi pavitra pravritti kaunsi hai, uska knowledge khud hi bataate hain। aise nahin, pravritti sukh aur duhkh ki hai। paramatma ki pravritti hi sukh ki hai। jis rachna ke liye usko rachta kaha jaata hai। sukh-duhkh, haar-jeet – donon ko milaakar pravritti nahin kahi gai hai। paramatma ki pravritti hai hi sukh ki। duniya samajhti hai - yeh duhkh sukh pravritti mein hota hi aaya hai, hota rahega। parantu nahin, paramatma sukh ki rachna rachte hain । usmein duhkh-sukh ki baat nahin, woh to praalabdha hai। vahaan janmana, marna, shareer mein rehna - sab pavitrata ke aadhaar se hota hai। duniya jaanti hi nahin ki janmana pavitrata se bhi ho sakta hai। is baat ko asambhav samajhti hai। parantu paramatma kehte hain – meri anaadi rachna thi hi pavitra pravritti । baaki sab rachna hai maaya ki। maaya ki rachna mein aadi-madhya-ant duhkh hai। woh hai apvitra rachna । is khel ko samajhna hai। yeh rachna hai ५ bhooton ki, ismen duhkh-sukh donon mila hua hai। alpakaal ka sukh to duhkh ki baraabri mein hi rakhenge। paramatma ki anaadi rachna mein hai hi pavitrata। aadi-madhya-ant sukh ki praapti rehti hai।

manushya samajhte hain -- nivritti se hi pavitrata hogi । parantu nivritti rakhni hai maaya se। aise nahin, pravritti se nivritti rakhni hai। pravritti hai tab to pavitrata shabd aata hai na। part hi na ho to pravritti shabd bhi kyon kahen ? ab ham jaante hain – paramatma ki pavitra pravritti ki department alag hai, maaya ki department alag hai। pavitra pravritti mein rahne ki ab knowledge milni hai। pavitrata ko pravritti kahenge, pravritti ko pavitrata kahenge। ab ham maaya ki apvitra pravritti se nikal rahe hain। paramatma kehte hain ki maaya ki pravritti mein anek janma bitaaye, ab unse nivritta hona hai। ulti-sulti pravritti se nivritta hona hai aur pavitra pravritti mein aana hai। duniya ne dekhi hi yeh maaya ki pravritti hai। paramatma ki pavitra pravritti ke sanskaar hi in aatmaon se gaayab hain। bahut janmon se maaya ki mail chadhi hui hai। isliye samajh nahin sakte hain ki pravritti bhi pavitrata ke aadhaar par kabhi chali hai aur chal sakti hai। manushya aatma ke liye punarjanma to jarur hai। parantu iska matlab yeh nahin ki punarjanma hai hi duhkh dene vaala । aadi-madhya-ant sukh dene vaale punarjanma hamaare hote hain।

ab ham jaante hain ki aatma ki original stage yeh hai। to sadaakaal sukh bhogte hain। paramatma jo ruhon ka baap hai unke hi sanskaar hain sthaapna-vinaash-paalna karna। woh samajhte hain ki yeh stage bhi neeche ki hai। oopar vaali stage mein kuchh nahin hai। parantu ham jaante hain ki paramatma hai hi sanskaar vaala । sthaapna-paalna-vinaash-- yeh paramatma ke sanskaar hain, aatma ke nahin। aatma is kaarya arth nimitta nahin ban sakti hai। is vikaari pravritti ka vinaash aur pavitra pravritti ki sthaapna karna paramatma ka hi kaam hai। yeh sanskaar us ek hi supreme ruh ke hain। woh ruh ab apna kaarya kar rahe hain। ismen haath paanv se kuchh karna nahin hai। paramatma karma bhi yahi sikhlaate hain ki pavitra bano aur banaao। yeh samajh ki baat hai। kaha jaata hai na - samajh se kaam lo। samajh hogi to maaloom rahega -- kya karma karna hai। pahle gyaan peechhe karma । samajh kar kaam karna hota hai। samajh se hi ham jaante hain ki shreshtha karma kya hai ? to rachta aur rachna, beej aur jhaad siddha karte hain pravritti ko । beej mein jhaad hai na। beej hai hi pravritti vaala। paramatma creator hai, unki rachna pravritti ki hai। ab ham is knowledge ko jaante hain ki yeh hai hi pravritti ka foundation । apvitra pravritti ki jad ko nikaal pavitra pravritti ki jad ko lagaana paramatma ka hi kaam hai, jo ab kar rahe hain।