Avyakt murli for Saturday 18 January 1975 - 2

>

18-01-75 om shanti avyakt baapdaadaamdhuban

madhuban roopi parivartan bhoomi par pavitrata ka vardaan dene vaale shiv baba seva-kendron se aaye hue vatson se bole –

madhuban ki kya mahima karte ho? kehte ho ki yeh parivartan bhoomi hai। aap sabhi parivartan bhoomi ya vardaan bhoomi mein aaye hue ho। svayan mein va anya mein vardaan ka anubhav karte ho?yahaan aana arthaat vardaan paana,parivartan karna। ab kya parivartan karna hai? jo vishesh kamjori va vishesh sanskaar samay-pratisam ya vighna roop banta hai, aisa sanskaar va aisi kamjori yahaan parivartan karke jaana hai। tabhi kahenge ki svayan mein parivartan laaya। vishesh umang, utsaah aur lagan se yahaan tak pahunchte ho to yahaan madhuban mein apni lagan ko aisi agni ka roop banaao ki jis agni mein sarva vyartha sankalp, sarva kamjoriyaan va sab rahe hue puraane sanskaar bhasma ho jaaen।

madhuban ko kaha jaata hai - ashvamegh roodra-gyaan mahaayagya। yagya mein kya kiya jaata hai? svaaha kiya jaata hai। aap bachche bhi amrit vele uth roj yagya rachte ho lagan ki agni ka। jis lagan roopi agni mein apni kamzori svaaha karte ho। lekin yeh mahaayagya hai। madhuban mein aana maana mahaayagya mein aana। madhuban ko kyon mahaayagya kaha hai? kyonki yahaan anek aatmaon ki lagan ki agni ka samooh hai। to iska laabh uthaana chaahiye na। jaise kai baar svatah pratigya karte ho, sankalp lete ho, vaise hi madhuban mein aap bhi aisi pratigya karte ho, sankalp lete ho? kya samajhte ho? kya aisi aahuti daalte ho jo aage ke liye samaapta ho jaaye? mahaayagya mein maha aahuti daalni chaahiye। saadhaaran aahuti nahin। anek aatmaon ke lagan ki agni ki saamoohik aahuti daali hai?yahaan se jaate ho, daal kar jaate ho ya ab vaapis li hai ya sochte ho ki kis prakaar ke til va jau daalen? yeh check (jaanch) karte ho ki jitni baar mahaayagya mein aate ho to mahaayagya mein aahuti daalte ho।

sampoorn samarpan hue ho ya vaapis le jaate ho? aahuti sampoorn samarpan ho jaati hai ya rah jaati hai? kya aisa to nahin sochte ki yeh puraani duniya mein kaam aayegi? aisa hota hai, kamzor aadmi haath kheench lete hain। agar aahuti daalne vaale kamzor hon to sek (taao) hone ke kaaran, aadhi aahuti baahar,aadhi andar rah jaati hai। yahaan bhi sochte hain ki karen ya na karen? hoga ya nahin hoga;kar sakenge ya nahin kar sakenge? to buddhi roopi haath aage-peechhe karte rehte ho। isliye sampoorn svaaha nahin hote ho; kinaara rah jaata hai,bikhar jaata hai। jab sampoorn svaaha nahin to sampoorn saphal nahin hota। sochte jyaada ho, karte kam ho। to phal bhi kam milega। pahle himmat kam hai,sankalp powerful nahin hai,to karma mein bal bhi nahin hoga aur iseelie phal bhi kam hi hoga। phir kya karte ho? aadha yahaan aadha vahaan bikher dete ho। to saphalta nahin hui na! abhi aap sab ko result kya hui? saphalta hui? yagya mein sampoorn aahuti rahi ya bikhar gai। aap sabki ab ki result bikharna - maana rah gaya hai। abhi to jo sochna hai woh practical mein bhar karke jaana hai ki aaj se yeh kamzori phir nahin aayegi। sampoorn samarpan karne ka saahas hai ya kam hai?vinaash na hua to?svarga na aaya phir? pahunchenge ya nahin? phir log kya kahenge?aise hoshiyaar nahin banna। sab ki yahi haalat hai! sahaj haath aage badhaate hain। sek aata hai to haath kheench lete ho। himmat aati hai,thoda-sa vighna aata hai to kadam peechhe chal padte hain। aison ki gati kya hogi? gati-sadgati ko bhi to jaante ho na?

knowledgeful hote hue agar koi na kare to kya kahenge? inko vaapis liya to kya gati hogi?jaan-boojh karke bhi agar na kare to kya kahenge?light roop aur might roop hote hue bhi kyon nahin kar paate ho? kaaran kya hai? knowledge tumhaari buddhi tak hai;samajh tak hai। theek hai - jaante ho, lekin knowledge ko practical mein laana aur samaana nahin aata hai। bhojan hai, khaate bhi hain। parantu khaana alag baat hai, kha kar hajam karna alag baat hai। samaate nahin ho,hajam nahin hota,ras nahin banta aur shakti nahin milti। jeebh tak kha liya to ras nahin banega,shakti nahin milti। samaane ke baad hi shakti ka swaroop banta hai। samaaya nahin to jeebh-ras hai। samaaya to shakti hai। sunne ka ras aaya, samajh mein aaya, samjha kintu samaaya nahin, practical mein nahin laaya। jitna dhaarna mein aata hai, sanskaar ban jaata hai tab hi practical saphalta ka swaroop dikhaai padta hai। knowledgeful ka arth kya hai? knowledgeful ka arth hai harek karmendriyon mein knowledge sama jaae। kya karna hai aur kya nahin? to dhokha khaane ki baat rahegi?okhe aur vritti dhokha nahin khaayengi jab aatma mein knowledge aa jaati hai to sarva indriyon mein knowledge sama jaati hai। jaise bhojan se shakti bhar jaati hai to shakti ke aadhaar se kaam hota hai। abhi knowledge ko samaana hai। harek karmendriyon ko knowledgeful banaao।

har varsha aate ho, kehte ho ki abhi karoonga। vaayda karke jaate ho। abhi kab poora hoga? kya kaaran hai? jo tum sochte ho aur jo karma karte ho, usmein antar kyon? kaaran kya? sochte ho full karne ki baat, aur hoti hai aadhi -itna antar padne ka kaaran kya hai? plan bhi khoob rachte ho, umang bhi khoob laate ho aur samajh kar vaayda karte ho। sab baaten aayengi hi, lekin practical aur samajh mein antar aa jaata hai - iska kaaran kya hai? sanskaaron ki aahuti karke jaate ho, phir sab kahaan se aaya? svaaha karke jaate ho phir kyon aata hai? deh-abhimaan,albelaapan vaapis kyon laut aata hai,kaaran kya hai? kaaran hai ki sankalp karke jaate ho svaaha karne ka,lekin sankalp ke saath-saath (jaise beej bote ho,baad mein sambhaal karte ho) parantu ismen jo sambhaal chaahiye woh sambhaal nahin rakhte ho। samay-pramaan unki aavashyakta rakhni chaahiye, aap beej daal kar albele ho jaate ho। sochte ho ki baba ko diya, ab baba jaane, yeh baba ka kaam hai। aap uski paalna nahin karte ho। to vaacha aur mansa par attention chaahiye। jaise beej bo kar paani daalte ho ki beej pakka ho jaaye। beej ko roj-roj paani dena hota hai,vaise hi sankalp roopi beej ko revise karna hai। usmein kami rah jaati hai aur aap nishchinta ho jaate ho - aaraam pasand ho jaate ho। aaraam pasanda ke sanskaar nahin,magar chintan ka sankalp hona chaahiye,ek-ek sanskaar ki chinta lagni chaahiye। purooshaartha ki ek bhi kami ka daag bahut bada dekhne mein aata hai। phir hamesha khyaal aata hai ki chhota-sa daag meri value kam kar dega। chintan chinta ke roop mein hona chaahiye। woh nahin to albelaapan hai। kehte ho, karte nahin ho। jo peechhe ki yukti hai use practical mein laao, aaraam-pasandi devta stage ka sanskaar hai,woh jyaada kheenchata hai। sangamayug ke brahman ke sanskaar jo tyaag moorta ke hain, woh kam emerge hote hain। tyaag-bina bhaagya nahin banta achha,kar lenge,dekha jaayega - yeh aaraam pasandi ke sanskaar hain।‘‘zaroor karoonga’’,ye braahmanpan ke sanskaar hain। laukik padhaai mein jisko chinta rehti hai, woh paas hota hai। uski neend fit jaati hai। jo aaraam-pasanda hain ve paas kya honge?abhi sochte ho ki practical karna hai। chinta lagni chaahiye, shubh chintan, sampoorn banne ki chinta, kamjori ko door karne ki chinta aur pratyaksha phal dene ki chinta।

is murli ke vishesh gyaan-bindu

1. madhuban hai avinaashi roodra gyaan mahaayagya। is mahaayagya mein apni lagan ko aisi agni banaao jis agni mein sab vyartha sankalp,sarva kamjoriyaan va sab rahe huye puraane sanskaar bilkul bhasma ho jaayen।

2. buddhi mein knowledge to hai lekin knowledgeful nahin bane ho। knowledgeful ka arth hai ki har ek karmaindriyon mein knowledge sama jaaye। to jaise bhojan khaane se,saath hi samaane arthaat hajam karne se shareer mein shakti aati hai vaise hi tumhaari aatma shaktishaali banti hai।

3. jitna gyaan dhaarna mein aata hai woh sanskaar ban jaata hai tab hi practical saphalta ka swaroop dikhaai padta hai।