Avyakt murli for Saturday 6 December 1975

>

06-12-75 om shanti avyakt baapdaadaamdhuban

alaukik shama par roohaani patange ban svaaha ho

vishwa ke show-case mein amoolya ratna ke roop mein prasiddhi dilaane vaale, master trikaaldarshi ki stage par sthit karaane vaale, sarva-gunon ke master saagar swaroop banaane vaale,roohaaniyat ki laali se tasveer ko chittaakarshak banaane vaale roohaani pita shiv bole :-

apne ko saari duniya ke beech chamakta hua vishesh lucky sitaara anubhav karte ho? aise lucky jinhon ka svayan baap gaayan karte hain! isse shreshtha bhaagya aur kisi ka ho sakta hai?sada aisi khushi rehti hai,jo apni khushi ko dekhte hue dekhne vaalon ke gam ke baadal va duhkh ki ghataayen samaapta ho jaayen, duhkh ko bhool sukh ke jhoole mein jhoolne lag jaayen! aise apne ko anubhav karte ho? jaise gaayan hai - paaras ke sang mein loha bhi paaras ban jaata hai;aise aap paarsamniyon ke sang se anya iron-aged aatmaayen golden ban jaayen, aisi avastha anubhav karte ho? koi bhi aatma bhikhaari ban kar aaye aur woh maalaamaal ho kar jaaye, aise apne takdeer ki tasveer roj apne darpan mein dekhte ho?kis samay dekhte ho? kya amritvele? dekhne ka time nishchit hai athva chalte-phirte jab aata hai tab dekhte rehte ho?saare din mein kitni baar dekhte ho? baar-baar dekhte ho ya ek hi baar? aajkal ka fashion hai ki baar-baar apna chehra dekhte hain। woh dekhte hain apne features aur aap dekhte ho apna future aapka features taraph attention nahin hai lekin har samay apne future ko shreshtha banaane ka hi attention hai। to apne takdeer ki tasveer dekhte ho ki hamaari tasveer mein kahaan tak roohaaniyat badhti ja rahi hai? jaise ve log laukik drishti se roop mein va shakla mein apni laali ko dekhte hain ki kahaan tak ‘laal’hue hain; aur aap sab alaukik tasveer dekhte hue ‘roohaaniyat’roopi laali ko dekhte ho।

aaj to vishesh door deshi va double videshi arthaat trikaaldarshi bachchon se vishesh milne aaye hain। yeh bhi vishesh lakka hua na। aisa lucky apne ko samajhte ho? padma-padma bhaagyashaali apne ko samajhte ho ya saubhaagyashaali ya padma-padma shabd bhi kuchh nahin hai? apne ko kya samajhte ho? kaho padma to hamaare kadmon mein samaaye hue hain। jinke kadmon mein anek padma bhare hue hon woh svayan kya hua? jaise koi bhi visheshta sunaate hain va apni shreshthata varnan karte hain to kehte hain na woh to hamaare paanv ke neeche hain, yeh hamaare aage kya hain? aise hi padma to aapke pov ke neeche hain। aise shreshtha lucky ho? sirf apne bhaagya ka hi sumiran karo to kya ban jaayenge? bhaagya ka sumiran karte-karte baap se bhi sarva-shreshtha aur baap ke bhi sir ke taaj ban jaayenge। apni sarvashreshtha sthiti ka yaadgaar chitra dekha hai?aapke sarvashreshtha bhaagya ki nishaani ka yaadgaar chitra kaun-sa hai ki jisse sarva se oonche prasiddha hote ho? viraat swaroop mein braahmanon ki sarvashreshtha yaadgaar mein choti dikhaai hai। choti se ooncha kuchh hota hai kya? shakti sena bhi aise apne ko lucky samajhti hai? yeh (meera london ki) sabse adhik apne ko lucky samajhti hai, kyonki iski apni ham-jinsa mein to yeh ek hi vishesh ratna hai na abhi।

baap bhi aaj vishesh bachchon ka vishesh bhaagya dekh harshit ho rahe hain। kaise kone-kone se videsh ke konon se bhi nikalkar ke apne ghar mein pahunch gaye hain। baap bhi ghar mein aaye hue bachchon ko, jo aadha kalpa ki aasha lagaate hue ab yahaan tak pahunch gaye hain,to bachchon ko apne thikaane par aaya dekh kar va sarva aashaayen poori hoti hui dekh kar baap bhi harshit hote hain। videshi group ki visheshta kya hai? videshiyon ko dekh kar baap bhi videshiyon ki visheshta dekhte hue vishesh harshit hote hain। kyonki bhale majority bhaaratvaasiyon ki hai lekin ab videshi kahalvaaye va kahe jaate hain। to majority mein jo pahli kvoliti hai,aane se hi patange misal shama par jal kar mar jaana usmein phir sochna nahin। suna,anubhav kiya aur chal pade। to videshiyon mein yeh kvoliti bhaaratvaasiyon se vishesh hai। bhaaratvaasi pahle question karenge, phir sochenge, phir baad mein svaaha honge। videsh se jo nikli hui aatmaayen hain unki shama par patange ke samaan svaaha hone ki visheshta hai। samjha? jaise koi door baithe bahut tadpan mein ho aur aisi tadapti hui aatma ko thikaana mil jaaye to aisi tadapti hui aatmaaen majority roop se videshi group mein dikhaai deti hain। samjha? apni visheshta ko। patanga hone ke kaaran automatically unhon ka purooshaartha ‘yaad’ aur ‘seva’ ke sivaay aur kuchh rehta nahin। isliye fast jaate hain।

aap log kab, kyon aur kya ka question karte ho? maaya ke vaar se haar khaane vaale ho ya sada vijayi ho?maaya ko haar khilaane vaale ho, na ki khaane vaale। to videshiyon ko baap ki vishesh lift bhi hai jis lift ke gift ke kaaran fast ja rahe hain। is visheshta ko sada kaayam rakhna। ‘kyon aur kya’ ke question ke bajaay sada master trikaaldarshi stage par sthit hote aur har kaarya va sankalp ko usi pramaan swaroop mein laao। jab trikaaldarshi ho to phir kyon aur kya ka question samaapta ho jaayega na? to sada master trikaaldarshi sthiti mein sthit raho, sada apne ko ek baap ki yaad mein samaaya hua baap-samaan samajhte hue chalo। jaise tatvayogi sada yahi lakshya rakhte hain ki tatva mein sama jaayen va leen ho jaayen - lekin yeh kab anubhav nahin karte hain। is samay knowledge ke aadhaar par tum samajhte ho ki baap ki yaad mein sama jaana va lavleen ho jaana, apne aap ko bhool jaana isi ko hi woh ek ho jaana kehte hain। jab lav mein leen ho jaate ho arthaat lagan mein magna ho jaate ho to baap ke samaan ban jaate ho,isi ko unhon ko sama jaana kah diya hai। to aisa anubhav karte ho?aatma baap ke lav mein apne ko bilkul khoi hui anubhav kare, kya aisa anubhav hota hai? jaise koi saagar mein sama jaay to us samay ka uska anubhav kya hoga? sivaay saagar ke aur kuchh najar nahin aayega। to baap arthaat sarvagunon ke saagar mein sama jaana। isko kaha jaata hai lavleen ho jaana arthaat baap ke sneh mein sama jaana। baap mein nahin samaana hai, lekin baap ki yaad mein sama jaana hai। kya aisa anubhav hota hai na?

videsh party ko dekh baapdaada unhon ke bhavishya ko dekh rahe hain। videsh party ka bhavishya kya hai? satayug ka nahin, satayug ka bhavishya to raaja-raani hai lekin sangam ka bhavishya kya hai? (baap ko pratyaksha karne ka) lekin woh kab karenge?unki date kya hai? jab tak date fix nahin karenge tab tak powerful plan nahin banega। videshiyon dvaara hi bhaarat ke kumbhakran jaagne hain। agar aap log bhi sochenge ki kar lenge to woh bhi kahenge - ‘haan, jaag jaayenge।’ isliye jagaane vaalon ko fullforce se apna powerful plan banaana pade। is varsha yeh-yeh karna hi hai tab woh bhi sochenge ki is varsha ke andar jagna hi hai। abhi jagaane vaalon ka bhi samay nishchit nahin hai। isliye jaagne vaalon ke paas bhi samay nishchit nahin hai। jaise jagaane vaale sochte hain - karna to hai,aise woh bhi sochte hain, jaagna to hai ant mein jaag jaayenge। isliye videshiyon ka bhavishya kya raha? bhaarat ke naami-graamiyon ko jagaana hai। yeh hai videshiyon ka bhavishya। saadhaaran kumbhakran nahin lekin naami-graami kumbhakarnon ko jagaana hai। jis ek ke jagaane se anek jag jaayen usko kehte hain naami-graami। dharni athva stage to taiyaar hoti ja rahi hai। ab sirf paartadhaariyon ko part bajaana hai lekin part bhi hero part,saadhaaran part se nahin hoga। hero part bajaane se kumbhakran bhi jaag kar ‘hiar-hiar’karenge। achha!

aise takdeer jagaane ke nimitta bane hue jaagti jyoti, sada svayan ke aur samay ke moolya ko jaanne vaale,aise amoolya ratna, vishwa ke showcase mein vishesh prasiddha hone vaale sarva-siddhi swaroop, har sankalp ko swaroop mein laane vaale baap-samaan sarva gunon ko seva aur swaroop mein laane vaale, aisi vishesh aatmaon ko baapdaada ka yaad-pyaar aur namaste।

groups se mulaakaat

samay ki sameepta ki nishaani hai ki har kadam mein sada saphalta samaai ho। saphalta hogi athva nahin yeh svapna mein bhi sankalp nahin aayega। har kaarya karne ke peechhe nishchit roop se saphalta dikhaai degi। karen athva nahin karen aur hoga ya nahin, yeh sankalp bhi nahin uthega। jo hona hi hai vahi automatically hota rahega। saphalta braahmanon ke raaste mein phoolon ke samaan aajaan karti hai। jaise koi bhi bada aadmi aata hai to uske raaste mein phool ko bichha dete hain aur usse unhon ka svaagat karte hain। to jaise vishesh aatma hote jaate hain vaise saphalta phoolon ke sadrishya aajaan karti hai। aahvaan karti hai ki saphalta-moortta mujhe apnaaven। svayan ko aahvaan nahin karna padta saphalta ka। lekin saphalta-moortta ka saphalta aahvaan karti hai। yeh pharka pad jaata hai। achha!

mahaavaakyon ki vishesh baaten

1. sada aisi khushi mein raho ki aapki khushi ko dekhte hue dekhne vaalon ke gam ke baadal va duhkh ki ghataayen samaapta ho jaayen aur ve sukh ke jhoole mein jhoolne lag jaaen।

2. apni alaukik tasveer ko dekhte hue roohaaniyat roopi laali sada dekhte raho ki kahaan tak chehre mein roohaani laali badhi hai?

3. viraat roop mein braahmanon ki yaadgaar choti dikhaai gai hai jo ki aapke sarvashreshtha bhaagya ki nishaani yaadgaar chitra hai।

4. videsh se jo nikli hui aatmaayen hain unki shama par patange ke samaan svaaha hone ki vishesh visheshta hai।

5. sada master trikaaldarshi ki sthiti mein rahne se saare question samaapta ho jaayenge।

6. sada apne ko ek baap ki yaad mein samaaya hua baap-samaan samajhte hue chalo। baap mein nahin samaana hai lekin baap ki yaad mein sama jaana hai।