Avyakt murli for Wednesday 29 November 1978

>

29-11-78om shanti avyakt baapdaadaamdhuban

santushtata se prasannata aur prashansa ki praapti

sarva khazaanon se bharpoor karne vaale sada sukhdaata baap-daada bole:-

aaj baap-daada apne vishwa mein chamakne vaali maniyon ko dekh rahe hain। harek mani ki apni-apni chamak hai। harek mani apne dvaara baap ke gunon aur karttavya ko nambarvaar pratyaksha kar rahi hai। harek mani dvaara baap-daada dikhaai deta hai। is vichitra rangat ko bhakton ne ‘‘jahaan dekhe vahaan tu hi tu’’ kah diya hai। mahaarthi mein bhi baap-daada dikhaarda dega aur last so fast mein bhi baapdaada hi dikhaai deta। harek ke mukh se ek hi baba baba shabd ka geet sunaai deta। sarva brahman aatmaon ke naynon mein ek baap noor ke samaan samaaya hua hai - iseelie brahman sansaar mein jahaan dekhe vahaan tu hi tu ka praikteekal anubhav hota hai। isi anubhav ko bhakton ne sarvavyaapi shabdon mein kaha hai - bachchon ke vartamaan samay ka anubhav paramdham nivaasi baap hai va har sankalp aur karma mein sada saath hai paramdham nivaasi saathi baap anubhav hota hai va sada saathi baap anubhav hota hai? kya anubhav hota hai saath va saathi ?sarva ke saathi sarvavyaapi nahin hua! bhakton ne shabd kaapi kiya hai - lekin kab aur kaise ka bhaavaartha bhool jaane ke kaaran gaayan badal glaani ho gai।

baap-daada sarva bachchon ke vartamaan swaroop se dhaarna swaroop ko dekhte vishesh ek baat dekh rahe hain। kaun si? sarva bachchon mein se sada santushta maniyaan kitni hain। sabse vishesh gun, jo chehre se chamke woh santushtata hai। santushtata teenon hi prakaar ki chaahiye। ek-baap se santushta। doosra-sada apne aap se santushta। teesra -- sarva sambandh aur samparka se santushta। ismen chaitanya aatmaayen aur prakriti donon aa jaate hain। santushtata ki nishaani pratyaksha roop mein prasannata dikhaai degi। sada prasannachit। is prasannata ke aadhaar par pratyaksha phal aisi aatma ki sada svatah hi sarva se prashansa hogi। visheshta hai santushtata,uski nishaani prasannata,uska pratyakshaphal prashansa। ab apne aapko dekho। prashansa ko prasannata se hi praapta kar sakte ho। jo sada svayan santushta va prasanna rehte uski prashansa harek avashya karte hain। chalte-chalte purushaarthi jeevan mein samasyaayen ya paristhitiyaan to drama anusaar aani hi hain। janma lete hi aage badhne ka lakshya rakhna arthaat pareekshaaon aur samasyaaon ka aahvaan karna। apne kie hue aahvaan ko bhool jaate ho! jab raasta tay karna hai to raaste ke nazaare na ho yeh ho sakta hai? nazaaron ko dekhte rook jaate ho isliye manzil door anubhav karte ho। nazaare dekhte hue paar karte chalna hai। lekin nazaaron ko dekh yeh kyon, yeh kya, yeh aise nahin - yeh vaise nahin in baaton mein rook jaate hain। har nazaare ko correction karne lag jaate ho। paar karne ke bajaae correction karne mein busy ho jaate ho। isliye baap ki yaad ka connection loose kar dete ho - manoranjan ke bajaae man ko murjha dete ho। vaah nazaara vaah। vaah-vaah ke bajaaye ai bahut kehte ho। ai arthaat aashcharyajnak। isliye chalte-chalte rook jaate ho। thakne ke kaaran kabhi baap se meethe-meethe ulhanen dete hue royal roop mein baap se bhi asantushta ho jaate ho - kai bachche kehte hain itna pahle kyon nahin bataaya - sahaj maarga kaha - sahan maarga to kaha nahin। sahaj maarga ke bajaae sahan karne ka maarga anubhav karte hain। lekin sahan karna hi aage badhna hai। vaastav mein sahan karna nahin hota lekin apni kamzori ke kaaran sahan anubhav hota hai। jaise aag ka gun hai jalaana - lekin uske gun ka gyaan na hone kaaran usse laabh lene ke bajaae nuksaan kar dete to sukh ke bajaae sahan karna padta hai - kyonki vastu ke bajaae svayan ko jala dete। gun ka gyaan na hone ke kaaran sukh ke bajaae sahan karna padta। vaise samasyaayen va paristhiti aane ke kaaran,unka gyaan na hone ke kaaran aage badhne ke sukh ke anubhav ke bajaae sahan karne ka anubhav karte hain।

isliye sahaj maarga ke bajaae sahan karne ka maarga anubhav karte hain। aise bachche baap se arthaat baap ke gyaan se va gyaan ke dhaarna maarga se asantushta rehte hain। saath-saath svayan se bhi asantushta rehte hain - svayan se asantushta to sarva ke sambandh aur samparka se bhi asantushta। is kaaran prasanna arthaat sada khushi nahin rehti। abhi-abhi santushta arthaat prasannachitta। abhi-abhi asantushta। isliye sangamayug ka vishesh khazaana ateendriy sukh ka anubhav nahin kar paate ho। to aaj se sada santushta aur prasannata ka vishesh vardaan svayan bhi lo aur auron ko bhi do। aise hi baap ki va apne aapki prashansa kar sakenge। prashansa ka shreshtha saadhan bhi har brahman ki prasannata hai। koi bhi kaarya ki prashansa sarva ki prasannata par aadhaar rakhti hai। is yagya ki antim aahooti sarva braahmanon ki sada prasannata। pratyakshata arthaat prashansa ka aavaaz goonjega arthaat vijay ka jhanda lahraayega। samjha ab kya karna hai। sada prasanna raho aur sada sarva ko prasanna karo। achha –

aise sada baap ke aagyaakaari sada santushta aur prasanna rahne vaale sarva ko sada prasannta ka vardaan dene vaale mahaadaani - vardaani bachchon ko baap-daada ka yaad pyaar aur namaste!

baambe nivaasiyon ko vishesh roop se baap-daada yaad pyaar de rahe hain –

baambe nivaasiyon mein himmat aur umang bahut achha hai। baambe nivaasiyon ko dekh baap ke saath prakriti ne bhi svaagat kiya hai ( kyonki thandi bahut ho gai hai ) prakriti ne abhyaas karaaya hai - ant mein aane vaale paper ka pahle se hi anubhav karaake pakka mazboot banaaya hai isliye ghabraana nahin। baambe nivaasiyon ka baap se pyaar hai na। baap-daada ka bhi bachchon se vishesh pyaar hai। baambe nivaasi ab sada santushtata aur prasannata ka paper number one mein paas karenge - bahut achha hai - aap saath chhodo to bhi baap-daada nahin chhodenge। vishesh baambe aur dehli mein aadi ratan jyaada hai - vishwa seva ki sthaapna ke kaarya mein baambe aur dehli ka vishesh sahayog hai। samay par sahayogi banne vaalon ka mahattva hota hai - isliye sahayogi bachchon se baap ka bhi sneh hai। achha –

party se –

1. sada ‘‘vijayi bhav’’ke vardaani moortta ho?vardaata ne jo vardaan diya usi vardaan ko sada jeevan mein laana yeh harek ka apna kaam hai। is vardaan ko jeevan mein samaana arthaat vardaani swaroop banna। aise bane ho ?mahaaveer ko bhi vardaani kehte hain - aur shaktiyon ko bhi vardaani kehte hain। ab aapke jad chitron dvaara anek bhakta vardaan praapta kar lete hain to chaitanya mein to vardaanon se jholi bharne vaale ho na? mahaaveer ho na ? mahaaveer arthaat sada vijayi। jab avinaashi baap hai to vardaan bhi avinaashi hai। alpakaal ke liye nahin। sirf sambhaalna aapka kaam hai,dena baap ka kaam hai। sambhaalne aata hai na, ki chori ho jaati hai। sirf ek baat yaad rakho ki leta nahin hoon lekin daata hoon, abhi lene ke din samaapta ho gae - abhi daata ban dene ka samay hai। maangana to bachpan mein hota - vaanaprasthi kahen chhota-sa khilauna de do - yeh achha lagega?thodi shakti de do - thodi madad karo - yeh khilauna maangate ho। ab svayan tripta aatma bano - daata ke bachche aur maangata ho to dekhne vaale kya kahenge। saphalta ka saadhan hai svayan sada saphalta moortta bano। svayan ki vritti vibration phailaati hai aur vibration ke aadhaar par sarva ko anubhooti hogi। isliye kaarya karne ke pahle vishesh svayan ki vritti ke attention ki bhatthi chaahiye। isse hi vibration dvaara anekon ki vritti ko parivartan kar sakenge। pahle yeh attention rakhna - sada khushi ke jhoole mein jhoolte raho - harshit mukh anekon ko apne taraph aakarshit karta hai।

kumaariyon ko dekhte hue h

kumaariyon par bahut badi zimmevaari hai। ek anekon ke kalyaan prati nimitta ban sakti hai। brahmaakumaari woh jo vishwa ke kalyaan ke nimitta bane। behad vishwa ke kalyaankaari na ki had ke। lagan mein kami hai to vighna apna kaam karega। agar aag tez hai to kichda bhasma ho jaaega। lagan hai to vighna nahin rah sakta, karmayog se karma bhog bhi parivartan ho jaata, parivartan karna apni himmat ka kaam hai। kumaariyon mein to sadaiv baap-daada ki ummeed hai। achha -

is murli ka saar

1. sarva brahman aatmaon ke naynon mein ek baap noor ke samaan samaaya hua hai। isi anubhav ko bhakton ne ‘‘sarvavyaapi’’shabdon mein kaha hai।

2. visheshta hai santushtata,uski nishaani hai prasannata aur uska pratyaksha phal hai prashansa। apni kamzori ke kaaran sahaj maarga sahanmaarga anubhav hota hai। samasyaaen va paristhiti aane par gyaan na hone ke kaaran sukh ka anubhav ki bajaae sahan karne ka anubhav hota hai।

3. is yagya ki antim aahuti sarva braahmanon ki prasannata hai।