Avyakt murli for Wednesday 26 December 1979

>

26-12-79om shanti avyakt baapdaadaamdhuban

raajayogi arthaat tri-smriti swaroop

baap-daada aaj tilakdhaari bachchon ko dekh rahe hain। harek ke mastak par raajayogi arthaat‘smriti bhav’ka tilak aur saath-saath vishwa-raajya-adhikaari ka raaj-tilak। raajayogi tilak aur raajtilak donon tilak dekh rahe hain। aap sabhi bhi apne donon tilak ko sada dekhte rehte ho। baap-daada sabhi ke mastak par vishesh raajayogi tilak ki visheshta dekh rahe hain। visheshta dekhte hue antar kya dekha? kisi raajayogi ke mastak par teen bindiyon ka tilak hai। kisi ke mastak par do bindiyon ka tilak hai aur kisi par ek bindi ka bhi tilak hai। vaastav mein knowledgeful baap dvaara vishesh teen smritiyon ka teen bindiyon ke roop mein tilak diya hua hai। un teen smritiyon ko trishool ke roop mein yaadgaar banaaya hai।

yeh teen smritiyaan hain - ek svayan ki smriti, doosri baap ki smriti aur teesri drama ke knowledge ki smriti। in vishesh teen smritiyon mein saare hi gyaan ka vistaar samaaya hua hai। knowledge ke vriksha ki yeh teen smritiyaan hain। jaise vriksha ka pahle beej hota hai, us beej dvaara pahle do patte nikalte hain,phir vriksha ka vistaar hota hai aise mukhya hain beej baap ki smriti। phir do patte arthaat vishesh smritiyaan - aatma ki saari knowledge aur drama ki spashta knowledge। in teen smritiyon ko dhaaran karne vaale ‘smriti bhav’ ke vardaani ban jaate hain। in teen smritiyon ke aadhaar par maayaajeet jagatjeet ban jaate hain। teenon smritiyon ki sangamayug par visheshta hai। isliye raajayogi-tilak teen smritiyon ka arthaat teen bindi ke roop mein harek ke mastak par chamakta hai। jaise - trishool se agar ek bhaag khatma ho jaae to yathaartha shastra nahin kaha jaavega।

sampoorn vijayi ki nishaani hai - teen bindi arthaat tri-smriti swaroop। lekin hota kya hai ek hi samay par teenon smriti saath-saath aur spashta rahen ismen antar ho jaata hai। kabhi ek smriti rah jaati, kabhi do aur kabhi teen। isliye sunaaya ki koi do bindi ke tilakdhaari dekhe aur koi ek bindi ke tilakdhaari dekhe। bahut achhe-achhe bachche bhi dekhe jo nirantar teen smritia tilakdhaari bhi hain, amit tilakdhaari bhi hain arthaat jis tilak ko koi mita nahin sakta। jab smriti-swaroop ho jaate hain to amit tilkadhri ban jaate hain। nahin to baar-baar tilak lagaana padta hai। abhi-abhi mitta hai abhi-abhi lagta hai। lekin sangamayugi raajayogiyon ko nirantar avinaashi tilak- dhaari hona hain। maaya avinaashi ko vinaash bana na sake। roz amritbele is tri-smriti ke avinaashi tilak ko check karo to maaya saare din mein mitaane ki himmat nahin rakh sakegi। teen smriti-swaroop arthaat sarva samartha swaroop। yeh samartha ka tilak hai। samartha ke aage maaya ke vyartha roop samaapta ho jaate hain। maaya ke paanch roop paanch daasiyon ke roop mein ho jaayenge। parivartan roop dikhaai dega।

vikaaron ka parivartit roop

kaam vikaar shubh kaamna ke roop mein aapke purooshaartha mein sahayogi roop ban jaayega। kaam ke roop mein vaar karne vaala shubh kaamna ke roop mein vishwa-sevaadhaari roop ban jaayega। dushman ke bajaae dosta ban jaayega। krodhaagni ke roop mein jo eeshvareey sampatti ko jala raha hai, josh ke roop mein sabko behosh kar raha hai, yahi krodh vikaar parivartit ho roohaani josh va roohaani khumaari ke roop mein behosh ko hosh dilaane vaala ban jaayega। krodh vikaar sahan-shakti ke roop mein parivartit ho aapka ek shastra ban jaayega। jab krodh sahan shakti ka shastra ban jaata hai to shastra sadaiv shastradhaari ki seva arth hote hain। yahi krodh agni,yogaagni ke roop mein parivartan ho jaayegi jo aapko nahin jalaayegi lekin paapon ko jalaayegi। isi prakaar lobh vikaar trustee roop ki anaasakta vritti ke swaroop mein upraam sthiti ke swaroop mein behad ki vairaagya vritti ke roop mein parivartit ho jaavegi। lobh khatma ho jaayega aur sada‘chaahiye-chaahiye’ke badle ‘ichchha maatram avidya’swaroop ho jaayenge। lobh ko ‘chaahiye’nahin kahenge lekin‘jaaiye’ kahenge।‘lena hai,lena hai’ nahin।‘dena hai,dena hai’ yeh parivartan ho jaayega। yahi lobh anaasakta vritti va dene vaala daata ke swaroop ki smriti-swaroop mein parivartan ho jaayega। isi prakaar moh vikaar vaar karne ke bajaae sneh ke swaroop mein baap ki yaad aur seva mein vishesh saathi ban jaayega। sneh ‘yaad aur seva’ mein saphalta ka vishesh saadhan ban jaayega। aise hi ahankaar vikaar deh-abhimaan se parivartit ho svaabhimaani ban jaayega। sva-abhimaan chadhti kala ka saadhan hai। dehaabhimaan girti kala ka saadhan hai। dehaabhimaan parivartit ho sva-abhimaan ke roop mein smriti-swaroop banne mein saadhan ban jaayega। isi prakaar yeh vikaar arthaat vikraal roopdhaari aapki seva ke sahayogi,aapki shreshtha shaktiyon ke swaroop mein parivartit ho jaayenge। aise parivartan karne ki shakti anubhav karte ho?in teen smritiyon ke aadhaar par paanchon ka parivartan kar sakte ho। kaam ke roop mein aaye shubh bhaavna ban jaae, tab maaya-jeet jagatjeet ka title milega। vijayi, dushman ka roop parivartan zaroor karta hai। jo raaja hoga woh saadhaaran praja ban jaayega, tab vijayi kahlaaya jaayega। mantri hoga woh saadhaaran vyakti ban jaayega tab vijayi kahlaaya jaayega। vaise bhi niyam hai ki jo jis par vijay praapta karta hai usko bandi banaakar rakhte hain arthaat gulaam banaake rakhte hain। aap bhi in paanch vikaaren ke oopar vijayi bante ho। aap inko bandi nahin banaao। bandi banaayenge to phir andar uchhlenge। lekin aap inhen parivartit kar sahayogi-swaroop bana do। to sada aapko salaam karte rahenge। vishvaprivarta na ke pahle sva-parivartan karo। sva-parivartan se vishwa-parivartan sahaj ho jaayega। parivartan karne ki shakti sada apne saath rakho। parivartan-shakti ka mahatva bahut bada hai। amritbele se raat tak parivartan shakti ko kaise use karo yeh phir sunaayenge।

aise raajayogi, tilakdhaari,bhavishya raaj-tilakdhaari,sada mastak par teen smritisva roop mein samartha rahne vaale, maaya ko bhi shreshtha shakti ke roop mein sahayogi banaane vaale, aise maaya-jeet jagatjeet kahlaane vaale,sarva shaktiyon ko shastra banaane vaale, sada shastradhaari,shreshtha aatmaon ko baap-daada ka yaad, pyaar aur namaste।

ek hi samay mein man, vachan,karma se seva karne vaale hi behad ke sevaadhaari

teachers ke saath avyakt baap-daada ki mulaakaat –

teachers arthaat baap samaan nirantar sevaadhaari। har sankalp aur bol dvaara anek aatmaon ki seva ke nimitta। vishesh seva hai ek hi samay teenon prakaar ki ikatthi seva। vaacha ke saath-saath mansa ki bhi seva saath mein ho aur karmana arthaat samparka, sang se sang ke aadhaar par bhi rang lagaane ki seva, bol dvaara bhi seva aur sankalp dvaara bhi seva। to vartamaan samay ek-ek seva alag-alag karne ka samay nahin hai। behad ki seva ki raphtaar ek hi samay teenon prakaar ki seva ikatthi ho, isko kaha jaata hai - tez raphtaar se behad ki teevragti vaali seva। teevragti se behad ke sevaadhaari bano। sirf apna had ka sthaan nahin lekin jaise baap ek sthaan par rehte bhi behad ki seva karte hain aise nimitta maatra ek sthaan hai lekin apne ko behad ki seva ke nimitta smajh vishwa ki aatmaayen sada emerge roop mein rahen,tab vishvakalyaankaari kahlaayen jaayenge। nahin to desh-kalyaankaari va centre-kalyaankaari ho jaayenge। jab harek itna-itna behad ke vishwa-kalyaankaari banenge tab vishwa ki aatmaayen apne adhikaar ko praapta kar sakengi। nahin to thode samay mein kaise pahunchege? 2-4 to nahin hai saari vishwa hai। to nimitta bani hui aatmaon ko sangathit roop mein behad ki seva ka roop emerge hona chaahiye। jaise apne sthaan ka khyaal rehta hai,plan banaate ho, practical mein laate ho,unnati ka hi khyaal chalta hai aise behad ki sarva aatmaon ke prati sada unnati ka sankalp emerge roop mein ho tab parivartan hoga।

vishwa-kalyaankaari ke oopar kitna kaarya hai, svapna mein bhi free nahin ho sakte। svapna mein bhi seva hi dikhaai de, isko kaha jaata hai full busy। kyonki saare din ka aadhaar svapna hota hai। jo din-raat seva mein busy rehte hai, unka svapna bhi seva ke arth hoga। svapna mein bhi kai nai-nai baaten,seva ke plan va tareeke dikhaai de sakte hain। to itna busy rehte ho? vyartha sankalpon se to mukta ho na? jitna busy honge,utna apne purooshaartha ke vyartha se aur auron ko bhi vyartha se bacha sakenge। har samay checking ho ki samartha hai ya vyartha। agar zara bhi vyartha ka anubhav ho to usi samay parivartan karo। nimitta bane hue ko dekh auron mein bhi samartha ke sankalp svatah hi bharte jaayenge। samjha?

behad ke vishwa ki aatmaayen sadaiv emerge honi chaahiye। jab aap log abhi emerge karo to un aatmaon ko bhi sankalp utpanna ho ki ham bhi apna bhavishya banaayen। aapke sankalp se unko sankalp emerge hoga। vishwa-kalyaankaari ka arth hi hai vishwa ke aadhaarmoorta zara bhi albelaapan vishwa ko albela bana dega। itna attention rahe।

dilli vaale bhi koi nai baaten karo। conference to bahut puraani baat ho gai hai। abhi nai invention nikaalo। kam kharcha baala nasheen। kharcha bhi kam ho result achhi nikle। ab dekhenge yu.pi. aisi invention nikaalta hai ya dilli। agar kharcha jyaada aur result kam hoti hai to aane vaale student dilshikasta ho jaate hain। abhi unko bhi utsaah mein laane ke liye kam kharcha aur achhi result nikaalo। jismen busy bhi sab ho jaaen kharcha bhi kam ho। tan aur man busy ho jaae, dhan kam lagega।

party se

1. sva-sthiti se sarva paristhitiyon par vijay :- sabhi sada sva-sthiti ke dvaara paristhitiyon ke oopar vijayi rehte ho? sangamayug par sabhi vijayi ratan ho। to vijay praapta karne ka saadhan hai - sva-sthiti dvaara paristhiti par vijay। yeh deh bhi par hai,sva nahin। to deh ke bhaan mein aana, yeh bhi svasthiti nahin hai। to check karo saare din mein sva-sthiti kitna samay rehti hai? kyonki sva-sthiti va svadharma sada sukh ka anubhav karaayega aur prakriti-dharma arthaat par-dharma ya deh ki smriti kisi-na-kisi prakaar ke duhkh ka anubhav zaroor karaayegi। to jo sada svasthiti mein hoga woh sada sukh ka anubhav karega। sada sukh ka anubhav hota hai ki duhkh ki lahar aati hai। sankalp mein bhi agar dukh ki lahar aai to siddha hai svasthiti se,svadharma se neeche aa gaye। jab naya janma ho gaya, sukhdaata ke bachche ban gaye, sukh ke saagar ke bachche sada sukh mein sampanna honge। aap sabhi master saagar ho to sampanna sthiti ka anubhav hota hai?samay ke pramaan sva ka purooshaartha। samay tez bhaag raha hai ya svayan bhi high jump de rahe ho? samay ki raphtaar ke anusaar ab high jump ke bina pahunch nahin sakte। abhi daudan ka samay gaya। high jump lagaao। purooshaartha mein ‘teevra’shabd add karo। yaad mein rehte ho, yeh koi badi baat nahin lekin yaad ke saath-saath sahajyogi, nirantar yogi ho। agar yeh nahin to yaad bhi adhoori rahegi।

vishwa-seva aur sva ki seva donon ka balance rakhne se saphalta hogi। agar svaseva ko chhod vishwa-seva mein lag jaate, ya vishwa-seva bhool sva-seva hi karte to saphalta mil nahin sakti। donon sevaayen saath-saath chaahiye। mansa aur vaacha - donon seva ikatthi hongi to mehnat se bach jaayenge। jab bhi koi sevaartha jaate ho to pahle check karo ki sva-sthiti mein sthit hokar ja rahe hain। halchal mein to nahin ja rahe hain। agar svayan halchal mein honge to sunne vaale bhi ekaagra nahin hote, anubhav nahi karte।

2. gyaan ke sarva raajon ko jaanne vaale kabhi naaraaz nahin ho sakte :- gyaan ke sarva raazon ko jaanne vaali raajayukta aatmaayen ho na?apne purooshaartha ke anusaar baap ke dvaara anek gyaan ke raajon ko jaante hue, usi mein raman karte hue aage badho। to sada raajayukta,sada yogayukta, sada sneh-yukta aise ho? gyaan ke sarva raajon ko jaanne vaale svayan se raazi rehte aur auron ko bhi raazi karne ke abhyaasi rehte hain। to sada raajayukta arthaat raazi karne vaale kabhi bhi naaraaz nahin ho sakte। aise sarva raajon ko jaanne vaale baap ke priy hain,sameep hain।

3. satguru ki kripa se maalaamaal sthiti:- jaise bhakti marga mein guru kripa gaai hui hai,to gyaan-maarga mein satguru ki kripa hai - padhaai। padhaai ki kripa se satguru maalaamaal bana dete hain। jiske oopar satguru ki kripa ho gai, woh sada mukta aur jeevanmukta ban gaya।’’