Avyakt murli for Wednesday 6 February 1980

>

06-02-1980 om shanti avyakt baapdaada madhuban

"ashareeri banne ki sahaj vidhi"

aaj kalpa pahle vaale sikeeldhe ati laadle, snehi aur sahayogi, shakti swaroop bachchon se milne ke liye aaye hain। baap-daada apne sahayogi bachchon ke saath hi rehte hain। sahayog aur sneh ka atoot dhaaga sada avinaashi hai। aaj vatan mein baap-daada ati pyaare-pyaare bachchon ke sneh ki maala bana rahe the। snehi to sab ho phir bhi nambarvaar to kahenge। aaj harek bachche ki visheshtaaon ke aadhaar par number bana rahe the। kai bachchon mein visheshtaayen itni jyaada dekheen jo bilkul baap-samaan sameep ratan dekhe। kai bachche visheshtaaon ko dhaaran karne mein mehnat karne vaale bhi dekhe jo mehnat dekhkar baap ko bhi raham aata hai। mere bachche aur mehnat! kyonki sabse jyaada mehnat ashareeri banne mein dekhi।

baap-daada aapas mein bole ki ashareeri aatma ko ashareeri banne mein mehnat kyon? brahma baap bole - ``84janma chola dhaaran kar part bajaane ke kaaran part bajaate-bajaate shareerdhaari ban jaate hain।''shiv baap bole - ``part bajaaya lekin ab samay kaun-sa hai? samay ki smriti pramaan karma bhi svatah hi vaise hota hai। yeh to abhyaas hai na?'' baap bole - ``ab part samaapta kar ghar jaana hai। part ki dress to chhodni padegi na? ghar jaana hai to bhi yeh puraana shareer chhodna padega,raajya mein arthaat svarga mein jaana hai to bhi yeh puraani dress chhodni padegi। to jab jaana hi hai to bhoolna mushkil kyon? jaana hai, kya yeh bhool jaate ho? aap sabhi to jaane ke liye ever ready ho na ki ab bhi kuchh rassiyaan bandhi hui hain?ever ready ho na?''

ye to baap-daada ne seva ke liye samay diya hua hai। sevaadhaari ka part baja rahe ho। to apne ko dekho yeh shareer ka bandhan to nahin hai athva yeh puraana chola tight to nahin hai? tight dress to pasanda nahin karte ho na?drais tight hogi to ever ready nahin honge। bandhan mukta arthaat loose dress, tight nahin। order mila aur second mein gaya। aise bandhan-mukta,yogayukta bane ho? jab vaayda hi hai `ek baap doosra na koi' to bandhanmukta ho gaye na। ashareeri banne ke liye vishesh 4 baaton ka attention rakho –

1. kabhi bhi apne aapko bhulaana hota hai to duniya mein bhi ek sachchi preet mein kho jaate hain। to sachchi preet hi bhoolne ka sahaj saadhan hai। preet duniya ko bhulaane ka saadhan hai, deh ko bhulaane ka saadhan hai।

2. doosri baat sachcha meet bhi duniya ko bhulaane ka saadhan hai। agar do meet aapas mein mil jaaen to unhein na svayan ki, na samay ki smriti rehti hai।

3. teesri baat dil ke geet - agar dil se koi geet gaate hain to us samay ke liye woh svayan aur samay ko bhoola hua hota hai।

4. chauthi baat - yathaartha reet। agar yathaartha reet hai to ashareeri banna bahut sahaj hai। reet nahin aati tab mushkil hota hai। to ek hua preet 2- meet3- geet 4-reet।

ek tu jo mila saari duniya mili

in chaaron hi baaten ke aap sab to anubhvi ho na? preet ke bhi anubhvi ho। baap aur aap teesra na koi। baap mila maana sab kuchh mila baaki kaam hi kya raha। prabhu preet ke to aaj bhi bhakta keertan karte rehte hain। sirf preet ke geet mein hi kho jaate hain to socho preet nibhaane vaale kitne khoye hue honge! preet ke to anubhvi ho na? vipreet buddhi se preet buddhi ho gaye ho na?to jahaan prabhu preet hai vahaan ashareeri banna kya lagta hai? preet ke aage ashareeri banna ek second ke khel ke samaan hai। baba bola aur shareer bhoola। baba shabd hi puraani duniya ko bhoolne ka aatmik bomb hai। (bijli banda ho gai) jaise yeh switch badli hone ka khel dekha aise woh smriti ka switch hai। baap ka switch on aur deh aur deh ki duniya ki smriti ka switch oph। yeh hai ek second ka khel। mukh se baba bolne mein bhi time lagta hai lekin smriti mein laane mein kitna samay lagta hai। to preet mein rehna arthaat ashareeri sahaj banna।

mohabbat mein mehnat nahin

aise sabse sachcha meet jo shmashaan ke aage bhi saath jaae। shareerdhaari meet to shmashaan tak hi jaayenge to ve duhkh harta sukh karta nahin ban sakenge। thodaabhut duhkh ke samay sahayogi ban sakte hain। sahayog de sakte hain lekin duhkh har nahin sakte। to sachcha meet mil gaya hai na? sada isi avinaashi meet ke saath raho to mohabbat mein mehnat khatma ho jaayegi। jab mohabbat karna aata hai to mehnat kyon karte ho? baap-daada ko kabhi-kabhi hansi aati hai। jaise kisi ko bojh uthaane ka abhyaas hota hai usko aaraam se bithaao to woh baith nahin sakta। baar-baar bojh ki taraph bhaagta hai aur phir saans bhi phoolta hai,to pukaarte hain - `chhudaao'!to sada preet aur meet mein raho to mehnat samaapta ho jaayegi। meet se kinaara nahin karo। sada ke saathi ban karke chalo।

aise hi baap-daada dvaara praapta hui sarva praaptiyon ke, gunon ke sada geet gaate raho। baap ki mahima va aapki mahima ke kitne geet hain is geet mein saaz bhi automatically chalte hain। jitna-jitna gunon ki mahima ke geet gaayenge to khushi ke saaz saath-saath svatah bajte rahenge। yeh bhi geet gaane vaale aaye hain (bharat vyaas aadi aaye hain) aapke saaz to doosre hain। yeh khushi ke saaz hain। ye kabhi kharaab nahin hote jo repair (Repair) karna pade। to sada aise geet gaate raho। yeh geet gaana to sabko aata hai na। to sada geet gaate raho to sahaj hi ashareeri ban jaayenge। baaki rahi reet - yathaartha reet second ki reet hai। main ashareeri aatma hoon yeh sabse sahaj yathaartha reet hai। sahaj hai na। jaise baap ki mahima hai ki woh mushkil ko sahaj karne vaala hai। aise hi baap samaan bachche bhi mushkil ko sahaj karne vaale hain। jo vishwa ki mushkil ko sahaj karne vaale hain woh svayan mushkil anubhav karen yeh kaise ho sakta hai! isliye sada sarva sahajyogi।

aham nahin, vaham nahin lekin raham karo

sangamayugi braahmanon ke mukh se `mehnat'hai va `mushkil hai' - yeh shabd mukh se kya lekin sankalp mein bhi nahin aa sakta। to is varsha ka vishesh attention`sada sahaj yogi'। jaise baap ko bachchon par raham aata hai vaise svayan par bhi raham karo aur sarva prati bhi merciful bano। title`merciful'ka to aap sabka bhi hai na?apna title yaad hai na? lekin merciful banne ke badle ek chhoti-si galti karte ho। raham bhaav ke bajaae aham bhaav mein aa jaate ho। to raham bhool jaate ho। koi aham bhaav mein aa jaate hain। koi vaham bhaav mein aa jaate hain। pata nahin, pahunch sakenge ki nahin pahunch sakenge? yathaartha maarga hai ya nahin hai - aise anek prakaar ke svayan ke prati vaham bhaav aur kabhi-kabhi knowledge ke prati vaham bhaav। isliye raham ka bhaav badal jaata hai। samjha? dilshikasta nahin bano lekin sada diltakhtansheen bano। to samjha is varsha mein kya karna hai?is varsha ka homework de rahe hain। `sahajyogi bano। merciful bano aur diltakhtansheen bano'। to sada bhaagya-vidhaata baap aise aagyaakaari bachchon ko amritvele roj saphalta ka tilak lagaate rahenge। yeh bhi tilak ka gaayan hai na ki bhakton ko bhagwan tilak lagaane aaya to is varsha aagyaakaari bachchon ko svayan baap aapke sevaasthaan arthaat teertha sthaan par saphalta ka tilak dene aayenge। baap to roj chakra lagaane aate hi hain। agar bachche soye hue hon, woh unki gaphlat hai।

jaise deepaavli mein jagah-jagah jyoti jagaakar rakhte hain, saphaai bhi karte hain,aahvaan bhi karte hain। `svachchhata, prakaash aur aahvaan'। woh lakshmi ka aahvaan karte aur yeh lakshmi ke rachayita ka aahvaan hai। to jyoti jagaakar baitho tab to baap aayenge। kaeeyon ko jagaate bhi hain phir so jaate hain। aavaaj bhi anubhav karte hain phir bhi albelepan ki neend mein so jaate hain। satayug mein sona hi sona hai। double sona hai। isliye abhi jaagti jyoti bano। aise nahin ki sone ke sanskaar se vahaan sona milega। jo jaagega woh sona paayega। albelepan ki neend bhi tab aati hai jab vinaashkaal bhool jaate ho। bhakton ki pukaar suno। duhkhi aatmaon ke duhkh ki pukaar suno। pyaasi aatmaon ke praarthana ki aavaaj suno। to kabhi bhi neend nahin aayegi। to is varsha albelepan ki neend ko talaak dena। tab bhakta log aap saakshaatkaar moortiyon ka saakshaatkaar karenge। to is varsha saakshaatkaar moortta ban bhakton ko saakshaatkaar karaao। aise chakravarti bano।

aise sada preet nibhaane vaale, sada sachche meet ke saath rahne vaale,sada praaptiyon aur gunon ki mahima ke geet gaane vaale, sada second ki yathaartha reet dvaara sahajyogi banne vaale, aise sada merciful,mushkil ko sahaj banaane vaale nidraajeet,chakravarti bachchon ko baapdaada ka yaad-pyaar aur namaste।