Avyakt murli for Friday 2 October 1981

>

02-10-81 om shanti avyakt baapdaada madhuban

"sada milan ke jhoole mein jhoolne ka aadhaar"

sarva jhamelon se chhudaane vaale, sarva praapti swaroop banaane vaale gyaan saagar shiv baba bole:-

aaj chaaron or ke yaad mein rahne vaale bachchon ko baapdaada saakaar va aakaar mein sammukh dekhte hue yaad ka respond padamguna yaad pyaar de rahe hain। koi tan se, koi man se ek hi milan ke sankalp mein,ek hi yaad mein sthit hain। baapdaada khazaana to de hi chuke hain। saakaar dvaara, aakaar avyakt roop dvaara sarva khazaanon ke maalik bana chuke hain। jab sarva khazaanon ke maalik ban gaye to baaki kya rah gaya hai? kuchh raha hai? baapdaada to sirf maaliko ko maalekam salaam karne aaye hain। dekhne mein to master ban hi gaye ho, baaki kya rah gaya hai!

sunne ka hisaab nikaalo aur sunaane vaale ka bhi hisaab nikaalo। athaah sun liya, athaah suna liya। sunte-sunte sunaane vaale bhi ban gaye। to sunaane vaalon ko kya sunna hai? aap logon ka hi geet hai, anubhav ka geet gaate ho, ‘‘paana tha vo pa liya- ab kaam kya baaki raha। yeh geet kiska geet hai? brahma baap ka hai va braahmanon ka bhi hai? yahi geet hai na aapka? to baap bhi poochhte hain- kaam kya baaki raha? baap aap mein sama gaye aur aap baap mein sama gaye,jab sama gaye to baaki kya rah gaya? sama gaye ho ya sama rahe ho? kya kahenge? sama gaye va sama rahe ho? nadi aur saagar ka mela to ho hi gaya na! samaana arthaat milan manaana। to milan to mana liya na? saagar ganga se alag nahin, ganga saagar se alag nahin। ganga saagar ka avinaashi mela hai। sama gaye arthaat samaan ban gaye। samaan banne vaalon ko baapdaada bhi sneh ki mubaarak dete hain।

is baari baapdaada sirf dekhne aayen hai। maaliko ki aagya maankar milne ke liye aa gaye hain। maaliko ko na nahin kar sakte hain। to ''ji haajar’’ ka paath padhkar haajar ho gaye hain। aise hi tat tvam। baapdaada aadikaal se ''tat tvam’’ka vardaan hi de rahe hain। sankalp aur swaroop donon mein tattvam ke vardaani ho। dharma aur karma donon mein tattvam ke vardaani ho। aise vardaani sada sameep aur samaan ke anubhvi hote hain। baap-daada aise sameep aur samaan bachchon ko dekh harshit hote hain। amritbele se lekar din ke samaapti samay tak sirf ek shabd dharma aur karma mein laao to sada milan ke jhoole mein jhoolte rahenge। jis milan ke jhoole mein prakriti aur maaya donon hi aapke jhoole ko jhulaane vaale, daasi ban jaayenge। sarva khazaane aapke is shreshtha jhoole ke shrringaar ban jaayenge। shaktiyon ko,gunon ko,mehnat se dhaaran nahin karna padega,lekin yeh svayan aapka shrringaar ban aapke saamne svatah aisa milan ka jhoola, jismen baap aur aap, samaan arthaat samaaye hue hon। aise jhoole mein sada jhoolne ka aadhaar ek shabd - ''baap samaan’’

samaan nahin to sama nahin sakte। agar samaana nahin aata to sangamayug ko ganvaaya। kyonki sangamayug hi nadi-saagar ke samaane ka mela hai। mela arthaat samaana। milan manaana। to samaana aata hai? mela nahin manaate to kya karte? jhamela karte। to ya hai jhamela ya hai mela। bachche kehte hain akela hoon lekin baap kehte akela hona hi nahin hai। jisko akela kehte ho usmein bhi saath hai। sangam yug hai hi combined rahne ka yug। baap se to akele nahin ho sakte na! sada ke saathi hain। baaki chhote-chhote bachche jhamele mein phans jaate hain। aur jhamele bhi anek hain,ek nahin। mela ek hai jhamele anek। to mele mein raho to jhamele samaapta ho jaaen। ab to sampannata ke praalabdhi bano। alpakaal ki praalabdha ko samaapta kar sampoornata ke sampannata ki praalabdha ko anubhav mein laao। achha-

aise baap samaan, sada baap ke milan manaane ke jhule mein jhoolne vaale, paana tha va pa liya- aise sarva praapti swaroop, sada har sankalp aur bol mein, karma mein ji hajoor aur ji haajar karne vaale, aise sarvashreshtha aatmaon ko,saakaar dvaara va aakaar dvaara milan manaane vaale desh videsh ke sarva bachchon ko, baalak so maaliko ko baap ka maalekam salaam va yaad pyaar। saath-saath shreshtha aatmaon ko namaste।

praan avyakt baapdaada ki madhur mulaakaat party ke saath :-

karnaatak zone-

1. sabhi sada saakshi sthiti mein sthit ho, har karma karte ho?jo saakshi ho karma karte hain unhein svatah hi baap ke saatheepan ka anubhav bhi hota hai। saakshi nahin to baap bhi saathi nahin isliye sada saakshi avastha mein sthit raho। deh se bhi saakshi। jab deh ke sambandh aur deh ke saakshi ban jaate ho to svatah hi is puraani duniya se saakshi ho jaate ho। dekhte hue, samparka mein aate hue sada nyaare aur pyaare। yahi stage sahaj yogi ka anubhav karaati hai। to sada saakshi isko kehte hain - saath mein rehte hue bhi nirlep। aatma nirlep nahi hai lekin aatmaabhimaani stage nirlep hai arthaat maaya ke lep va aakarshan se pare hai। nyaara arthaat nirlep। to sada aisi avastha mein sthit rehte ho? kisi bhi prakaar ki maaya ka vaar na ho। baap par balihaar jaane vaale maaya ke vaar se sada bache rahenge। balihaar vaalon par vaar nahin ho sakta। to aise ho na?jaise first chance mila hai vaise hi balihaar aur maaya ke baar se pare rahne mein bhi first। first ka arth hi hai fast jaana। to is sthiti mein sada first। sada khush raho,sada khush nasheeb raho। achha।

2. jaise baap ke gunon ka varnan karte ho vaise svayan mein bhi ve sarva gun anubhav karte ho? jaise baap gyaan ka saagar, sukh ka saagar hai vaise hi svayan ko bhi gyaan-swaroop,sukh-swaroop anubhav karte ho?har gun ka anubhav sirf varnan nahin lekin anubhav। jab sukh-swaroop ban jaayenge to sukh-swaroop aatma dvaara sukh ki kirnen vishwa mein phailengi kyonki master gyaan soorya ho to jaise soorya ki kirnen saare vishwa mein jaati hain vaise aap gyaan soorya ke bachchon ki gyaan, sukh,aananda ki kirnen sarva aatmaon tak pahunchengi। jitne oonche sthaan aur sthiti par honge utna chaaron aur svatah phailti rahengi। to aise anubhvi moortta ho। sunna-sunaana to bahut ho gaya, abhi anubhav ko badhaao। bolna arthaat swaroop banna,sunna arthaat swaroop banna।

3. sada khushi ke khazaanon se khelne vaale ho na? khushi bhi ek khazaana hai jis khazaane dvaara anek aatmaon ko maala-maal bana sakte ho। aajkal vishesh isi khazaane ki aavashyakta hai। aur sab hain lekin khushi nahin। aap sabko to khushiyon ki khaan mil gayi hai। anginat khazaana mil gaya hai। khushi ke khazaane mein bhi variety hai na! kabhi kis baat ki khushi,kabhi kis baat ki khushi। kabhi baalak pan ki khushi to kabhi maalikpan ki khushi। kitne prakaar ke khushi ke khazaane mile hain! vo varnan karte hue auron ko bhi maalaamaal bana sakte ho। to in khazaanon ko sada kaayam rakho। aur sada khazaanon ke maalik bano।

sada baap dvaara mili hui shaktiyon ko kaarya mein lagaate raho। baap ne to shaktiyaan de di hain। ab sirf unhein kaarya mein lagaao। sirf mil gaya hai, ismen khush nahin raho lekin jo mila hai vo svayan ke prati aur sarva ke prati use karo to sada maalaamaal anubhav karenge।

4. sab vardaani aatmaayen ho na? is samay vishesh bhaarat mein kiski yaad chal rahi hai? vardaaniyon ki। devi arthaat vardaani, deviyon ko vishesh vardaani ke roop mein yaad karte hain,to aisa mahsoos hota hai ki humein yaad kar rahe hain?anubhav hota hai? bhakton ki pukaar mahsoos hoti hai ki sirf knowledge ke aadhaar se jaante ho?ek hai jaanna,doosra hai anubhav hona। to anubhav hota hai? vardaani moortta banne ke liye visheshta kaun-si chaahiye?aap sab vardaani ho na! to vardaani ki visheshta kya hai? ve sada baap ke samaan aur sameep rahne vaale hogen। agar kabhi baap samaan aur kabhi baap samaan nahin lekin svayan ke purooshaathi to vardaani nahin ban sakte। kyonki baap purooshaartha nahin karta lekin sada sampanna swaroop mein hai to agar bahut purooshaartha karte hain to purooshaarthi chhote bachche hain, baap samaan nahin। samaan arthaat sampanna। aise sada samaan rahne vaale sada vardaani hogen।

achha, om shanti।