Avyakt murli for Thursday 10 November 1983

>

10-11-83 om shanti avyakt baapdaada madhuban

mukhya bhaai-bahnon ki meeting ke samay avyakt baapdaada ke uchchaare hue madhur anmol mahaavaakya

aaj sarva shaktiyon ka saagar baap, shakti sena ko dekh rahe hain। har ek ke mastak beech trishool arthaat trimoorti smriti ki spashta nishaani dikhaai deti hai। shakti ki nishaani trishool dikhaate hain। to harek trishooldhaari shakti sena ho na। baapdaada aur aap। yeh trimoorti sada spashta roop mein rehti hai va kabhi merge kabhi emerge hoti hai? baapdaada ke saath-saath main shreshtha shaktishaali aatma hoon, yeh bhi yaad rehta hai? isi trimoorti smriti se shakti mein shiv dikhaai dega। kai mandiron mein baapdaada ke combined yaadgaar shiv ki pratima ke saath usi pratima mein manushya aakaar bhi dikhaate hain। yeh baapdaada ka combined yaadgaar hai। saath-saath shakti bhi dikhaate hain। to is trimoorti smriti swaroop sthiti se sahaj hi saakshaatkaar moorta ban jaayenge। ab sevaadhaari moorta, bhaashan karta moorta,master shikshak bane ho। abhi saakshaat moorta banna hai। sahaj yogi bane ho lekin shreshtha yogi banna hai। tapasvi bane ho,mahaatpasvi aur banna hai।

aajkal seva kaho, tapasya kaho, padhaai kaho, purooshaartha kaho, pavitrata ki seema kaho,kis lahar mein chal rahi hai, jaante ho? sahaj yogi ke ‘‘sahaj’’shabd ki lahar chal rahi hai। lekin last samay ke pramaan vartamaan manushya aatmaon ko, vaani ki nahin lekin shreshtha vibration,shreshtha vaayumandal,jisse saakshaatkaar sahaj ho jaae,isi ki aavashyakta hai। anubhav bhi saakshaatkaar samaan hai। sunaane vaale to bahut hain jinhon ko sunaate ho vo bhi sunaane mein kam nahin। lekin kami hai saakshaatkaar karaane ki। woh nahin kara sakte। yahi visheshta, yahi naveenta, yahi siddhi, aap shreshtha aatmaon mein hai। isi visheshta ko stage par laao। isi visheshta ke aadhaar par sabhi varnan karenge ki hamne dekha,hamne paaya! hamne sirf suna nahin lekin saakshaat baap ki jhalak anubhav ki। phalaani behen va phalaana bhaai bol rahe the,yeh anubhav nahin। lekin inheen dvaara koi alaukik shakti bol rahi thi। jaise aadi mein brahma ko saakshaatkaar hua vishesh shakti ka to kya varnan kiya! yeh kaun tha, kya tha! aise sunne vaalon ko anubhav ho ki yeh kaun the? sirf points nahin sune lekin mastak beech point aaph light (Point Of Light) dikhaai de। yeh naveenta hi sabhi ki pahchaan ki aankh kholegi। abhi pahchaan ki aankh nahin khuli hai। abhi to doosron ki line mein aapko bhi la rahe hain। jaise yeh-yeh hain vaise yeh bhi hai। jaise woh bhi yeh kehte hain vaise yeh bhi kehte hain। yeh bhi karte hain। lekin yeh vo hi hain jiska ham aahvaan karte hain, jiska intajaar kar rahe hain। abhi is anubhooti ki aavashyakta hai। iska saadhan hai sirf ek shabd ko change karo। sahaj yogi ki lahar ko change karo। sahaj shabd pavitra pravritti mein nahin use karo। lekin sarva siddhi swaroop banne mein use karo। shreshtha yogi ki lahar, mahaatpasvi moorta ki lahar,saakshaatkaar moorta banne ki lahar, roohaaniyat ki lahar, ab iski aavashyakta hai। ab yeh race karo। sandesh kitnon ko diya, yeh to 7 din ke course vaalon ka kaam hai। vo bhi yeh sandesh de sakte hain। lekin yeh race karo - anubhav kitnon ko karaaya! anubhav karaana hai, anubhvi banaana hai। yeh lahar abhi chaaron or honi chaahiye। samjha।

84 ka saal aa raha hai। 84 ghanton vaali shakti mashhoor hai। sabhi deviyon ki mahima hai। 84 mein ghanta to bajaayenge na tab to gaayan ho, 84 ka ghanta hai। abhi aadi-samaan saakshaatkaar ki lahar phailaao। dhoom machaao। aap saakshaat baap bano to saakshaatkaar aap hi ho jaayega। saakshaat baap banna hi saakshaatkaar ki chaabi milna hai। abhi thoda-thoda anubhav karte hain lekin yeh chaaron or lahar phailaao। jaise mele ki bhi lahar phailaate ho na? mele bahut kiye hain,samaaroh bhi bahut kiye। abhi milan samaaroh manaao। 84 ka plan banaane aaye ho। sabse pahla plan - ‘svayan ko sarva kamzoriyon se plen banaao’। tab to saakshaatkaar hoga। agar is meeting mein yeh plan practical mein aa jaae to seva aapke charnon mein jhukegi। abhi baapdaada ki yeh aash poori karni hai। aash abhi poori hui nahin hai। meeting to ho jaati hai। baapdaada ke paas chart to sabka hai na। sirf regard rakhne ke kaaran baapdaada kehte nahin hai। achha - aaj to thoda milne aaye hain,chart bataane nahin aaye hain। (daadi ko) aapki sakhi (deedi) kahaan hain? garbha mein? nimitta garbha mein hai lekin abhi bhi seva ki parikrama de rahi hai। jaise brahma baap ke saath saakaar swaroop mein jagat amba ke baad saathi rahi। vaise abhi bhi avyakt brahma ke saath hai। seva mein saatheepan ka part baja rahi hai। nimitta karmendriyon ka bandhan hai lekin vishesh seva ka bandhan hai। jaise yagya ki sthaapna ki kaarobaar pahle vishesh roop mein jagat amba ne sambhaali। jagat amba ke baad vishesh nimitta roop mein isi aatma (deedi) ko raha। saathi bhale aur bhi rahe lekin vishesh stage par aur saakaar brahma ke saath part mein rahi। abhi bhi brahma baap aur deedi ki aapas mein rooh-roohaan, manoranjan aur seva ke bhinna-bhinna part chalte rehte hain। nai srishti ki sthaapna mein bhi vishesh brahma ke saath-saath ananya aatmaon ka abhi jor-shor se part chal raha hai! jaise saakaar deedi ke vishesh sanskaar,seva ke plan ko practical mein laane ka,umang-utsaah dilaane ka raha। vaise abhi bhi vo hi sanskaar nai duniya ki sthaapna ke kaarya ko va kaarya ke arth nimitta bane hue group ko aur teevragti dene ka part chal raha hai। deedi ka vishesh bol yaad hai?umang utsaah mein laane ke liye vishesh shabd kya the? hamesha yahi shabd rahe ki kuchh aur naya karo। abhi kya ho raha hai? baar-baar poochhti thi, naveenta kya laai hai?aise abhi bhi avyakt brahma se baar-baar isi shabdon se rooh-roohaan karti thi। advance party mein bhi umang-utsaah la rahi hai। abhi tak kya kiya hai, kya ho raha hai। vo hi sanskaar abhi bhi practical mein la rahi hai। kisko bhi baithne nahin deti thi na। advance party ko bhi abhi stage par laane ka baan bhar rahi hai। kantrolar ke sanskaar the na। abhi advance party ka kantrolar hai। seva ke sanskaar abhi bhi emerge roop mein hai। samjha! abhi deedi kahaan hai? abhi to vishwa ka chakkar laga rahi hain। jab seat le lengi to bata denge। abhi woh bhi aapko sahayog dene ke bahut bade-bade plans bana rahi hai। abhi deri nahin lagegi। achha।

aise sada shreshtha yogi, sada mahaan tapasvi moorta, saakshaat baap ban baap ka saakshaatkaar karaane vaale,chaaron or ‘‘hamne dekha hamne paaya’’is praapti ki lahar phailaane vaale, aise mahaan tapasvi moorton ko desh-videsh ke sarva snehi,seva mein magna rahne vaale sarva bachchon ko baapdaada ka yaad-pyaar aur namaste।’’

meeting vaalon se:-meeting to ho hi gai। meeting hoti hai vishwa ko baap ke sameep laane ke liye। sirf sandesh dene ke liye nahin। sameep laane se sang ka rang lagta hai na। jitna baap ke sameep aate hain utna sang ka rang lagta hai। jahaan sunna hai vahaan kuchh sunna hota - kuchh bhoolna hota lekin jo sameep aa jaate vo baap ke sameep hone se roohaani rang mein range rehte hain। to abhi kya seva hai? sameep laane ki। sandesh to de diya। messenger ban ke message dene ka part to bajaaya। lekin abhi kya banna hai?shaktiyon ko sadaiv kis roop mein yaad karte hain? sab shakti sena ho na! shaktiyon ko hamesha ‘maa’ke roop mein yaad karte hain,paalna lene ke sankalp se yaad karte hain। message to bahut diya aur abhi aur bhi dene vaale taiyaar ho gaye, abhi chaahiye paalna vaale। jo vishesh nimitta hain unhon ka kaarya abhi har second baap ki paalna mein rehna aur sarva ko baap ki paalna dena। jaise chhote bachche hote hain to sada paalna mein rahne ke kaaran kitne khush rehte hain। kuchh bhi ho lekin paalna ke neeche hone ke kaaran kitne khush rehte hain। aise aap sabhi sarva aatmaon ko prabhu paalna ke andar chalne ka anubhav karaao। woh samjhen ki ham prabhu ki paalna ke andar chal rahe hain। yeh humein prabhu ke paalna ki drishti de rahe hain। to abhi paalna ki aavashyakta hai। to paalna karne vaale ho ya messenger ho?messenger to aajkal bahut kahlaane lag pade hain। messenger banna bahut common baat hai। lekin abhi jo bhi aayen woh aise anubhav karen ki ham eeshvareey paalna ke andar aa gaye। isi ko hi kaha jaata hai - ‘sambandh mein laana’।

sabhi ananya hain na। ananya arthaat jo anya na kar saken woh karke dikhaane vaale। jo sab karte vo hi kiya to badi baat nahin। paalna ka arth hai unhon ko shaktishaali banaana, unhon ke sankalpon ko, shaktiyon ko emerge karna,umang- utsaah mein laana। har baat mein shakti roop banaana। isi roop ki paalna ab jyaada chaahiye। chal rahe hain,lekin shaktishaali aatmaayen bankar chalen vo abhi aavashyak hai। jo koi naye bhi aaven to eeshvareey shakti ki anubhooti zaroor karen। vaani ki shakti ki anubhooti to ho rahi hai lekin yahaan eeshvareey shakti hai, woh anubhav karaao। stage par aate ho to yaad rehta hai - bhaashan karna hai lekin yeh jyaada yaad rahe, bhaashan nimitta hai,eeshvareey shakti ki bhaasna deni hai। vaani mein bhi eeshvareey shakti ki bhaasna aave। isko kaha jaata hai - nyaaraapan। speech bahut achhi ki to yeh speaker ke roop mein dekha na। yeh eeshvareey alaukik aatmaayen hain is roop mein dekhen। yeh mahsoosta karaani hai। yeh bhaasna hi eeshvareey beej daal deti। phir woh beej nikal nahin sakta। ek second ka bhi kisko anubhav ho jaata hai to woh ant tak mehnat nahin leta। eeshvareey jhalak ka anubhav jisne aate hi kiya unka chalna, seva karna woh aur hota hai। jo sirf sunkar prabhaavit hote unka chalna aur hota hai, jo sirf pyaar mein hi chalte rehte unka chalna aur hai। bhinna-bhinna prakaar hain na। to abhi pahle svayan ko sada eeshvareey paalna mein anubhav karo tab auron ko anubhav ho। seva mein chal rahe hain lekin seva bhi paalna hai। eeshvareey paalna mein chal rahe hain। seva shaktishaali banaati hai to yeh bhi eeshvareey paalna hai na। lekin yeh emerge rahe। yeh dridh sankalp karna chaahiye। ananya arthaat baap samaan sample। achha –

dharma netaaon ki seva ka plan

dharma netaaon ke liye vishesh woh roop chaahiye -kyonki dharma ki baaton mein to ve bhi hoshiyaar hain। pyaar se sunte bhi hain lekin apne mein practical ki kami mahsoos karte hain। yeh saakshaatkaar karen jo aaj sunaaya, woh practical anubhav karen ki hamaare saamne yeh koi saadhaaran roop nahin hai tab woh jhuken। anubhav ke peechhe jhuk sakte hain। vaani se nahin। woh to kahenge aap bhi bahut achha kaarya karte ho, aapko bhi aasheervaad milti rahe। yeh kahkar khush kar denge। lekin samjhen yeh koi vishesh hain। jismen jo kamzori hoti hai unke aadhaar par usko teer lagaana - yeh hai vijay paana। shaastra mein bhi gaayan hai devtaaon ne vijay praapta ki tab, jab unhein kamzori ka pata pada yeh bhi aadhyaatmik baat hai। to dharma netaayen bhi aayenge zaroor lekin aisi koi naveenta dekhenge tab। abhi sirf kehte hain ki gyaan achha hai। aap bhi theek hain,ham bhi theek hain, aisa kah paani daal dete hain। system ke oopar prabhaavit hote hain lekin unheen ke mukh se jab yeh nikle ki yeh ek hi raasta hai। anek raaste hain usmein aapka bhi ek raasta hai,yeh badal jaae। jab yeh touch ho ki yahaan se hi mukti aur jeevan mukti mil sakti hai tab jhuken। to abhi koi naveenta honi chaahiye।

pravritti mein bahut lag gaye ho। lekin jaise auron ko sunaate ho - pravritti mein bhi rehna hai aur pravritti mein rehte nivritta bhi rehna hai। to yahi paath apne ko roj padhaao। pravritti to badhni hi hai lekin usmein rehte nivritta rehna yeh aavashyakta hai। ismen thoda attention aur andar line karna pade। harek apni-apni seva mein busy ho gaye ho lekin behad vishwa ka nasha chaahiye। yeh sab sambhaalte hue buddhi behad seva ke liye free honi chaahiye। tan-man-dhan, buddhi sab rachna mein jyaada lagi rehti hai। jaise saakaar baap ko dekha,kaarobaar chalaate bhi sada apne ko free rakha। kabhi bhi busy hone ki rooprekha chehre par nahin aai। chaahe jimmevaari brahman parivaar ki rahi lekin buddhi mein kya tha?behad! shakti deni hai, paalna karni hai। aatmaon ko jagaana hai, yahi dhun rahi। to abhi woh hona chaahiye। uski kami hai। ananya bachchon ko milkar aisa vaataavran banaana hai। harek baap samaan light house ho। jahaan jaave - unko light mile, shakti mile, umang-utsaah mile, jo kaam saadhaaran aatmaayen karti woh nahin karna hai। saakaar baap ka bol,sankalp, drishti,vritti nyaari rahi na। saadhaaran nahin। to aisi stage banaao। iske liye seva rooki hui hai। kharcha jyaada, mehnat jyaada, nikalte kitne hain!

abhi samay ke pramaan advance party bhi jor kar rahi hai to saakaar vaalon ko to aur jyaada tej hona chaahiye। hona sab achaanak hai, date nahin bataai jaayegi। paper zaroor aane hain। aap logon ke thoughts ko check karne vaale bhi aayenge। paper lene aayenge। jitni pratyakshata hogi utna yeh sab papers aayenge। is yog aur us yog,is gyaan aur us gyaan mein kya antar hai woh life ki practical ki checking karenge। vaani ki nahin। uske liye pahle se hi itni taiyaari chaahiye। 84mein kuchh na kuchh to hoga hi। papers aayenge। aavaaz phailaane ki taiyaari ka yahi saadhan hai। jaise shuru-shuru mein abhyaas karte the, chal rahe hain lekin sthiti aisi ho jo doosre samjhen ki yeh koi light ja rahi hai। unko shareer dikhaai na deve। jab pahle-pahle mitra-sambandhiyon ke paas gaye to kya paper tha,woh shareer ko na dekhen, light dekhen। beti na dekhen lekin devi dekhen। yeh paper diya na। agar sambandh ke roop se dekha, beti-beti kaha to fail। to aisa abhyaas chaahiye। samay to bahut kharaab aa raha hai lekin aap ki aisi sthiti ho jo doosron ko sadaiv light ka roop dikhaai de,yahi safety hai। andar aaven aur light ka kila dekhen। apne eeshvareey seva mein lagne vaali sampatti bhi aisi hi kyon jaaven, unhein almaari nahin dikhaai de lekin light ka kila dekhen। itna abhyaas chaahiye। shakti roop ki jhalak badhaani chaahiye। saadhaaran nahin dikhaai de। yeh lakshya rahe। vaar to kai prakaar ke honge - aatmaon ke vaar honge,buri drishti vaalon ke vaar honge,calamities ke vaar honge,beemaariyon ka vaar hoga lekin in sabse bachne ka saadhan hai - ananya banna। arthaat jo anya na kar saken woh karna। sirf yeh yaad rakhon ki main ananya hoon to bhi pyaare aur nyaare rahenge। achha-

videshi bachchon ko yaad-pyaar dete hue

sabhi double videshi bachchon ko vishesh yaad pyaar baapdaada padmaguna return mein de rahe hain। sabhi ne jo bhi patra aur samaachaar likhe hain uski return mein sabhi bachchon ko purooshaartha teevra karne ki mubaarak ho aur saath-saath purooshaartha karte agar koi side-scene aa bhi jaati hai to usmein ghabraane ki koi baat nahin hai। jo bhi side-scene aati hai usko yaad aur khushi se paar karte chalo। vijay va saphalta to aap sabka janma-siddha adhikaar hai। sidescene paar kiya aur manzil mili। isliye koi bhi badi baat ko chhota karne ke liye svayan bade te badi stage par sthit ho jaao to badi bhi baat svayan chhoti svatah ho jaayegi। neeche ki sthiti mein rahkar aur oopar ki cheez ko dekhte ho tab badi lagti hai to oonchi stage par sthit hokar ke kisi bhi badi cheez ko dekho to chhoti anubhav hogi। jab bhi koi paristhiti aati hai ya kisi bhi prakaar ka vighna aata hai to apni shreshtha sthiti mein, oonche te oonchi sthiti mein sthit ho jaao। baap ke saath baith jaao to baap ke sang ka rang bhi sahaj lag jaayega। saath bhi mil jaayega। aur oonchi stage ke kaaran sab baaten bahut chhoti-si anubhav hongi,isliye ghabraaon nahin। dilshikasta nahin ho lekin sada khushi ke jhoole mein jhoolte raho to sada hi saphalta aapke saamne aayegi। saphalta milegi ya nahin yeh sochna bhi nahin padega। lekin saphalta svayan hi aapke saamne aayegi। prakriti saphalta ka haar svayan hi pahnaayegi। paristhiti badalkar vijay ka haar ho jaayegi। iseelie bahut himmat vaale hain, umang vaale hain, utsaah mein rahne vaale hain, yeh beech-beech mein thoda-sa hota bhi hai to usko socho nahin। samay beet gaya,paristhiti beet gai phir uska sochna vyartha ho jaata hai। isliye jaise samay beet gaya vaise apni buddhi se bhi beeti so beeti,jo beeti so beeti karte hain woh sada hi nishchinta rehte hain। sada hi umang-utsaah mein rehte hain isliye baapdaada vishesh aise umang utsaah mein rahne vaale,himmat vaale bachchon ko vishesh amritvele yaad karte hain। aur vishesh shakti dete hain,usi samay apne ko paatra samajh woh shakti lenge to bahut hi achhe anubhav honge।

amritvele susti aa jaati hai:- khushi ki points ka manan kam karte hain। agar manan saara din chalta rahe to amritvele bhi vahi manan kiya hua khazaana saamne aane se khushi hogi to susti nahin aayegi। lekin saara din manan kam hota hai us samay manan karne ki koshish karte hain to manan nahin hota hai kyonki buddhi fresh nahin hoti hai। phir na manan hota, na anubhav hota,phir susti aati hai। amritvele ko shaktishaali banaane ke liye saare din mein bhi, shreemat milti hai usi pramaan chalna bahut aavashyak hai to saara din manan karte chalo। gyaan ratnon se khelte chalo to vahi khushi ki baaten yaad aane se neend chali jaayegi aur khushi mein aise hi anubhav karenge jaise abhi praapti ki khaan khul gai। to jahaan praapti hoti hai vahaan need nahin aati hai। jahaan praapti nahin vahaan neend aati va thakaavat hoti hai va susti aati hai। praapti ke anubhav mein raho, uska connection hai saare din ke manan par। achha-

jinhonne bhi yaad-pyaar ka sandesh bheja hai unhon ko sammukh to milna hi hai lekin abhi bhi jo door baithe bhi baapdaada sammukh dekh rahe hain aur sammukh dekhkar hi baat kar rahe hain। abhi bhi sammukh ho phir bhi sammukh rahenge। sabhi ko naam sahit, samaachaar ke respond sahit yaad-pyaar। sada teevra umang, teevra purooshaartha mein rehna hai aur auron ko bhi teevra purooshaartha ke vibration dete hue vaayumandal hi teevra purooshaartha ka banaana hai। purooshaartha nahin, ‘teevra purooshaartha’। chalne vaale nahin, udne vaale। chalne ka samay poora hua ab udo aur udaate chalo। achha-

84 ke,conference ki saphalta ke liye - jitna ho sake silence ka vaataavran rahe, eeshvareey gyaan hai, eeshvar ka sthaan hai yeh anubhav karke jaaen। total aisa vaataavran ho,anubhooti karaane ka lakshya rahe। points ki chataabeti mein na jaakar,bolte-bolte anubhav karaate jaao। lakshya rakho sabhi ke mukh se kahlaana hai ki - ‘yeh eeshvareey raasta hai’। eeshvar aa gaya hai। bahut achha hai yeh to kehte hain lekin eeshvar padha raha hai,yeh kahen। gyaan achha hai lekin gyaandaata kaun hai, usko anubhav karen। abhi yeh foundation daalo। jab beej oopar aa jaae tab samaapti ho। beej oopar nahin aaya to vriksha parivartan kaise ho? jab is sthaan par apni roochi se aa rahe hain to sthaan ki jo visheshta hai woh dekhen uska anubhav karen। aap unki vyu (View) ko dekhkar apni (View) vyu change na karo lekin aapki vyu ko dekhkar woh apni vyu change karen - aisa plan banaao। jab lakshya rehta ki bhaashan karna hai to paaintsa taraph attention jaata lekin baap ko pratyaksha karne ka lakshya ho to baap hi dikhaai dega। jaisa lakshya hoga vaisi result niklegi। achha-