Avyakt murli for Monday 12 December 1983

>

12-12-83 om shanti avyakt baapdaada madhuban

ekaagrata se sarva shaktiyon ki praapti

ekaagrata ke sva-abhyaasi, svaraajya adhikaari, shreshtha aatmaon ke prati baapdaada bole:-

aaj sabhi milan manaane ke ek hi shuddh sankalp mein sthit ho na। ek hi samay, ek hi sankalp- yeh ekaagrata ki shakti ati shreshtha hai। yeh sangathan ki ek sankalp ki ekaagrata ki shakti jo chaahe woh kar sakti hai। jahaan ekaagrata ki shakti hai vahaan sarva shaktiyaan saath hain। isliye - ekaagrata hi sahaj saphalta ki chaabi hain। ek shreshtha aatma ke ekaagrata ki shakti bhi kamaal kar dikha sakti hai to jahaan anek shreshtha aatmaon ke ekaagrata ki shakti sangathit roop mein hai woh kya nahin kar sakte। jahaan ekaagrata hogi vahaan shreshthata aur spashtata svatah hogi। kisi bhi naveenta ki invention ke liye ekaagrata ki aavashyakta hai। chaahe laukik duniya ki invention ho,chaahe aadhyaatmik invention ho। ekaagrata arthaat ek hi sankalp mein tik jaana। ek hi lagan mein magan ho jaana। ekaagrata anek taraph ka bhatkaana sahaj hi chhuda deti hai। jitna samay ekaagrata ki sthiti mein sthit honge utna samay deh aur deh ki duniya sahaj bhooli hui hogi। kyonki us samay ke liye sansaar hi woh hota hai, jismen hi magan hote। aise ekaagrata ki shakti ke anubhvi ho? ekaagrata ki shakti se kisi bhi aatma ka message us aatma tak pahuncha sakte ho। kisi bhi aatma ka aahvaan kar sakte ho। kisi bhi aatma ki aavaaz ko catch kar sakte ho। kisi bhi aatma ko door baithe sahayog de sakte ho। woh ekaagrata jaante ho na! sivaae ek baap ke aur koi bhi sankalp na ho। ek baap mein saare sansaar ki sarva praaptiyon ki anubhooti ho। ek hi ek ho। purooshaartha dvaara ekaagra banna woh alag stage hai। lekin ekaagrata mein sthit ho jaana,woh sthiti itni shaktishaali hai। aisi shreshtha sthiti ka ek sankalp bhi baap samaan ka bahut anubhav karaata hai। abhi is roohaani shakti ka prayog karke dekho। ismen ekaanta ka saadhan aavashyak hai। abhyaas hone se last mein chaaron or hangaama hote hue bhi aap sabhi ek ke ant mein kho gaye to hangaame ke beech bhi ekaanta ka anubhav karenge। lekin aisa abhyaas bahut samay se chaahiye। tab hi chaaron or ke anek prakaar ke hangaame hote hue bhi aap apne ko ekaantavaasi anubhav karenge। vartamaan samay aise gupta shaktiyon dvaara anubhvi-moortta banna ati aavashyak hai। aap sabhi abhi bhi apne ko bahut busy samajhte ho lekin abhi phir bhi bahut free ho। aage chal aur busy hote jaayenge। isliye aise bhinna-bhinna prakaar ke sva-abhyaas,sva-saadhna abhi kar sakte ho। chalte-phirte sva-prati jitna bhi samay mile abhyaas mein saphal karte jaao। din-pratidin vaataavran pramaan emergency kesej jyaada aayenge। abhi to aaraam se davaai kar rahe ho। phir to emergency kesej mein samay aur shaktiyaan thode samay mein jyaada kesej karne padenge। jab challenge karte ho ki avinaashi nirogi banne ki ek hi vishwa ki hospital hai to chaaron or ke rogi kahaan jaayenge?emergency kesej ki line hogi। us samay kya karenge?amar bhav ka vardaan to denge na। sva abhyaas ke oxygen dvaara saahas ka shvaas dena padega। hopeless case arthaat chaaro or ke dil shikasta ke kesej jyaada aayenge। aisi hopeless aatmaon ko saahas dilaana yahi shvaas bharna hai। to phataaphat oxygen dena padega। us sva abhyaas ke aadhaar par aisi aatmaon ko shaktishaali bana sakenge! isliye phursat nahin hai, yeh nahin kaho। phursat hai to abhi hai phir aage nahin hogi। jaise logon ko kehte ho phursat milegi nahin,lekin phursat karni padegi। samay milega nahin lekin samay nikaalna hai। aise kehte ho na! to sva-abhyaas ke liye bhi samay mile to karenge, nahin। samay nikaalna padega। sthaapna ke aadikaal se ek vishesh vidhi chalti aa rahi hai। kaus si?phuri-phuri taalaab (boond-boond se taalaab) to samay ke liye bhi yahi vidhi hai। jo samay mile abhyaas karte-karte sarva abhyaas swaroop saagar ban jaayenge। second mile woh bhi abhyaas ke liye jama karte jaao, second- second karte kitna ho jaayega! ikattha karo to aadha ghanta bhi ban jaayega। chalte-phirte ke abhyaasi bano। jaise chaatrak ek-ek boond ke pyaase hote hain। aise sva abhyaasi chaatrak ek-ek second abhyaas mein lagaaven to abhyaas swaroop ban hi jaayenge।

sva abhyaas mein albele mat bano। kyonki ant mein vishesh shaktiyon ke abhyaas ki aavashyakta hai। usi practical papers dvaara hi number milne hain। isliye first division lene ke liye sva abhyaas ko fast karo। usmein bhi ekaagrata ke shakti ki vishesh practice karte raho। hangaama ho aur aap ekaagra ho। silence ke sthaan aur paristhiti mein ekaagra hona yeh to saadhaaran baat hai, lekin chaaron prakaar ki halchal ke beech ek ke ant mein kho jaao arthaat ekaantavaasi ho jaao। ekaantavaasi ho ekaagra sthiti mein sthit ho jaao - yeh hai mahaarthiyon ka mahaan purooshaartha। naye-naye bachchon ke liye to bahut sahaj saadhan hai। ek hi baat yaad karo aur ek hi baat sabhi ko sunaao। to ek baat yaad karna va sunaana mushkil to nahin hai na। bahut baaten to bhool jaate ho lekin ek baat to nahin bhoolegi na। ek baat se bedaapaar ho jaayega। ek ki yaad mein raho,ek hi ki mahima karte raho, ek ke hi geet gaate raho। aur ek ka hi parichay dete raho। yeh to sahaj hai na ki yeh bhi mushkil hai। jahaan ek hai vahaan ekras sthiti svatah ban jaati hai। aur chaahiye hi kya! ekras sthiti hi chaahiye na। to bas, ek shabd yaad rakho। ek ka geet gaana hai, ek ko yaad karna hai, kitna sahaj hai? naye-naye bachchon ke liye sahaj shortcut raasta bata rahe hain। to jaldi pahunch jaayenge। yahi chaahte ho na। aaye peechhe hain lekin jaaven aage to yahi shortcut raasta hai, isse chalo to aage pahunch jaayenge। maataaon ko to sab baaton mein sahaj chaahiye na। kyonki bahut thaki hui hain,janma-janma ki, to sahaj chaahiye। kitne bhatke ho? 63janmon mein kitne bhatke ko! to bhatki hui aatmaon ko sahaj maarga chaahiye। sahaj maarga apnaane se manzil par pahunch hi jaayenge। samjha- achha।

naye bhi baithe hain aur mahaarthi bhi baithe hain। donon saamne hain। sabse jyaada sameep gujraat hai na। sameep ke saath sahayogi bhi gujraat vaale hain। sahayog mein gujraat ka number raajasthaan se aage hain। aabu raajasthaan hai? vaise raajasthaan nazdeek hai na। raajasthaan ke raaje bhi jaagen to kamaal karenge। abhi gupta hain। phir pratyaksha ho jaayenge। gujraat ka janma kaise hua,pata hai?gujraat ko pahle sahayog diya gaya। sahayog ke jal se beej pada hua hai। to phal bhi sahayog ka hi niklega na। gujraat ko direct baapdaada ke sankalp ke sahayog ka paani mila hai। isliye phal bhi sahayog ka hi nikalta hai। samjha! gujraat vaale kitne bhaagyavaan ho! gujraat mein baapdaada ne centre khola hai। gujraat ne nahin khola hai। isliye na chaahte hue bhi sahaj hi sahayog ka phal nikalta hi rahega। aapko mehnat nahin karni padegi। kisi bhi kaarya mein aapko mehnat nahin karni padegi। dharni sahayog ke phal ki hai। achha-

sabhi sva abhyaas ke chaatrakon ko, sada ekaantavaasi ekaagrata ki shakti- shaali aatmaon ko,sada sva abhyaas ke shaktiyon dvaara sarva ko dil shikasta se sada dil khush banaane vaale, sada sarva shaktiyon ko practical mein lagaane vaale,aisi shreshtha sva abhyaasi, svaraajya adhikaari shreshtha aatmaon ko,mahaaveeron ko aur naye-naye bachchon ko, sabhi ko baapdaada ka yaad-pyaar aur namaste।’’

ek aate aur ek jaate। aane jaane ka mela hai। baapdaada bhi sabhi bachchon ko dekh khush hote hain। naye hain, chaahe puraane hain,bhaasha jaante hain va nahin jaante hain, murli samajhte hain va nahin samajhte hain, lekin hain to baap ke। phir bhi pyaar se pahunch jaate hain। baap kis baat ka bhookha hai? pyaar ka। samajhdaari ka bhookha nahin। baap pyaar dekhte hain, dil ka pyaar hai! jitna hi bhole-bhaale hain utna hi sachcha pyaar hai, chaturaai ka pyaar nahin hai। isliye bholebhaale bachche sabse priy hain। jaise knowledgeful ka title hai vaise bholaanaath ka bhi title hai, donon ka yaadgaar hai,naye-naye bachche bhaavna vaale achhe hain। achha

party ke saath avyakt baapdaada ki personal mulaakaat

1. sada apne ko double light pharishta samajhte ho? pharishta arthaat double light। jitna-jitna halkaapan hoga utna svayan ko pharishta anubhav karenge। pharishta sada chamakta rahega, chamakne ke kaaran sarva ko apni taraph svatah aakarshit karta hai। aise pharishte - jiska deh aur deh ki duniya ke saath koi rishta nahin। shareer mein rehte hi hain seva ke arth, na ki rishte ke aadhaar par। deh ke rishte ke aadhaar par nahin rehte, seva ke sambandh ke hisaab se rehte ho। sambandh samajhkar pravritti mein nahin rehna hai, seva samajhkar rehna hai। ghar wahin hai, parivaar vahi hai, lekin seva ka sambandh hai। karmabandha ke vasheebhoot hokar nahin rehte। seva ke sambandh mein kya, kyoon nahin hota। kaisi bhi aatmaaen hain,seva ka sambandh pyaara hai। jahaan deh hai vahaan vikaar hain। deh ke sambandh se vikaar aate hain,deh ke sambandh nahin to vikaar nahin। kisi bhi aatma ko seva ke sambandh se dekho to vikaaron ki utpatti nahin hogi। aise pharishte hokar raho। rishtedaar hokar nahin। jahaan seva ka bhaav rehta hai vahaan sada shubh bhaavna rehti hai, aur koi bhaav nahin। isko kaha jaata hai - ‘ati nyaara aur ati pyaara, kamal samaan’। sarva purooshon se uttam pharishta bano tab devta banenge।

2. sabhi begampur ke baadshaah, gamon se pare sukh ke sansaar ka anubhvi samajhte hue chalte ho? pahle duhkh ke sansaar ke anubhvi the,abhi duhkh ke sansaar se nikal sukh ke sansaar ke anubhvi ban gaye। abhi ek sukh ka mantra milne se, duhkh samaapta ho gaya। sukhdaata ki sukh swaroop aatmaaen hain,sukh ke saagar baap ke bachche hain, yahi mantra mila hai। jab man baap ki taraph lag gaya to duhkh kahaan se aaya! jab man ko baap ke sivaae aur kahaan lagaate ho tab man ka duhkh hota। ‘manmanaabhav’hain to duhkh nahin ho sakta। to man baap ki taraph hai ya aur kahaan hain? ulte raaste par lagta hai, tab duhkh hota hai। jab seedha raasta hai to ulte par kyon jaate ho?jis raaste par jaane ki mana hai us raaste par koi jaae to government bhi danda daalegi na। jab raasta banda kar diya to kyon jaate ho?jab tan bhi tera, man bhi tera, dhan bhi tera, mera hai hi nahin to duhkh kahaan se aaya। tera hai to duhkh nahin। mera hai to duhkh hai। tera-tera karte tera ho gaya।

3. ‘sada ek bal aur ek bharosa’ - isi sthiti mein rehte ho? ek mein bharosa arthaat bal ki praapti। aise anubhav karte ho? nishchaybuddhi vijayi, isi ko doosre shabdon mein kaha jaata hai - ‘ek bal, ek bharosa’। nishchay buddhi ki vijay na ho yeh ho nahin sakta। apne mein hi jara-sa sankalp maatra bhi sanshay aata ki yeh hoga ya nahin hoga, to vijay nahin। apne mein baap mein aur drama mein poora-poora nishchay ho to kabhi vijay na mile, yeh ho nahin sakta। agar vijay nahin hoti to zaroor koi na koi paaeenta mein nishchay ki kami hai। jab baap mein nishchay hai to svayan mein bhi nishchay hai। master hai na। jab master sarvashaktivaan hain to drama ki har baat ko bhi nishchaybuddhi hokar dekhenge! aise nishchay buddhi bachchon ke andar sada yahi umang hoga ki meri vijay to hui padi hai। aise vijayi hi - vijay maala ke manke bante hain। vijay unka varsa hai। janma-siddha adhikaar mein yeh varsa praapta ho jaata hai।

maataaon se

baapdaada bhi maataaon ko sada hi namaskaar karte hain kyonki maataaon ne sada seva mein aage kadam rakha hai। baapdaada maataaon ke gun gaate hain - kitni shreshtha maataaen ban gai, jo baapdaada bhi dekh harshit hote hain। bas,sada apne isi bhaagya ko smriti mein rakh khush raho। man mein khushi ka geet sada bajta rahe aur maataaon ko kaam hi kya hai! brahman ban gaye to gaana aur naachna yahi kaam hai। man se naacho,man se geet gaao। ek-ek jagat maata agar ek-ek deepak jagaaye to kitne deepak jag jaayenge! jag ki maataayen jag ke deepak jaga rahi ho na। deepak jagte-jagte deepmaala ho hi jaayegi। achha –

prashn:- seva ka sahaj saadhan athva sarva ko aakarshit karne ka sahaj saadhan va purooshaartha kaunsa hai?

uttar:-harshitmukh chehra! jo sada harshit rehta woh svatah hi sarva ko aakarshit karta hai। aur sahaj hi seva ke nimitta bhi ban jaata hai। harshitmukhta khushi ki nishaani hai। khushi ka chehra dekh svatah poochhenge kya paaya, kya mila! to sada khushi mein raho। kya the, kya ban gaye, isse hi seva hoti rahegi।

prashn:- tilak ka arth kya hai? kis tilak ko dhaaran karo to sada nashe aur khushi mein rahenge?

uttar:-tilak ka arth hai - ‘smriti swaroop’। to sada smriti rahe ki ham takhtansheen hain। ham woh sikeeldhi aatmaayen hain jo prabhu takhta ke adhikaari bani hain। is tilak ko dhaaran karne se sada khushi aur nashe mein rahenge। vaise bhi kaha jaata hai - ‘takhta aur bakhta’। takhtansheen banne ka bakhta arthaat bhaagya mila। to sada shreshtha takhta aur bakhta vaali aatmaaen hain, yahi nasha aur khushi sada rahe।