Avyakt murli for Wednesday 19 December 1984

>

19-12-84om shanti avyakt baapdaadaamdhuban

sarvashreshtha, sahaj tatha spashta maarga

sarvashreshtha saathi, sahaj-saral maarga pradarshak shiv baba apne bhaagyavaan bachchon prati bole –

aaj baapdaada vishesh snehi, sada saath nibhaane vaale apne saathiyon ko dekh rahe hain। saathi arthaat sada-saath rahne vaale। har karma mein, sankalp mein saath nibhaane vaale। har kadam par kadam rakh aage badhne vaale। ek kadam bhi manmat,parmat par uthaane vaale nahin। aise sada saathi ke saath nibhaane vaale sada sahaj maarga ka anubhav karte hain kyonki baap va shreshtha saathi har kadam rakhte hue raasta spashta aur saaph kar dete hain । aap sabko sirf kadam ke oopar kadam rakhkar chalna hai। raasta sahi hai,sahaj hai,spashta hai - yeh sochne ki bhi aavashyakta nahin। jahaan baap ka kadam hai woh hai hi shreshtha raasta। sirf kadam rakho aur har kadam mein padma lo। kitna sahaj hai! baap saathi ban saath nibhaane ke liye saakaar maadhyam dvaara har kadam roopi karma karke dikhaane ke liye saakaar srishti par avatrit hote hain। yeh bhi sahaj karne ke liye saakaar ko maadhyam banaaya hai। saakaar mein follow karna va kadam par kadam rakhna to sahaj hai na। shreshtha saathi ne saathiyon ke liye itna sahaj maarga bataaya - kyonki baap saathi jaante hai ki jin saathiyon ko saathi banaaya hai,yeh bahut bhatke hue hone ke kaaran thake hue hain। niraash hain, nirbal hain। mushkil samajh dilshikasta ho gaye hain isliye sahaj se sahaj sirf kadam par kadam rakho। yahi sahaj saadhan bataate hain। sirf kadam rakhna aapka kaam hai, chalaana,paar pahunchaana, kadam-kadam par bal bharna,thakaavat mitaana yeh sab saathi ka kaam hai। sirf kadam nahin hataao। sirf kadam rakhna yeh to mushkil nahin hai na। kadam rakhna arthaat sankalp karna। jo saathi kahenge,jaise chalaayenge vaise chalenge। apna nahin chalaayenge। apna chalna arthaat chillaana! to aisa kadam rakhna aata hai na। kya yeh mushkil hai?jimmevaari lene vaala jimmevaari le rahe hain to uske oopar jimmevaari saumpane nahin aati hai? jab saakaar maadhyam ko maarga-darshan swaroop banaae sample bhi rakha phir maarga par chalna mushkil kyon? sahaj saadhan second ka saadhan hai। jo saakaar roop mein brahma baap ne jaise kiya jo kiya vahi karna hai। follow father karna hai।

har sankalp ko verify karo। baap ka sankalp so mera sankalp hai। kaapi karna bhi nahin aata? duniya vaale kaapi karne se rokte hain aur yahaan to karna hi sirf‘kaapi’hain। to sahaj hua ya mushkil hua?jab sahaj,saral,spashta raasta mil gaya to follow karo। aur raaston par jaate hi kyon ho?aur raasta arthaat vyartha sankalp roopi raasta। kamzori ke sankalp roopi raasta। kaliyugi aakarshan ke bhinna-bhinna sankalpon ka raasta। kaliyugi puraani samajh dvaara deh ahankaarvash sankalp ka raasta hai। in raaston dvaara uljhan ke jangal mein pahunch jaate ho। jahaan se jitna nikalne ki koshish karte ho utna chaaron or kaante hone ke kaaran nikal nahin paate ho। kaante kya hote hain? kahaan,kya hoga - yeh ‘kya’ka kaanta lagta। kahaan ‘kyon’ ka kaanta lagta,kahaan ‘kaise’ka kaanta lagta। kahaan apne hi kamzor sanskaaron ka kaanta lagta। chaaron or kaante hi kaante najar aate hain। phir chillaate hain ab saathi aakar bachaao! to saathi bhi kehte hain kadam par kadam rakhne ke bajaae aur raaste par gaye kyon? jab saathi saath dene ke liye svayan offer kar rahe hain phir saathi ko chhodte kyon? kinaara karna arthaat sahaara chhootna। akele bante kyon ho? had ke saath ki aakarshan chaahe kisi sambandh ki, chaahe kisi saadhan ki apne taraph aakarshit karti hai। isi aakarshan ke kaaran saadhan ko va vinaashi sambandh ko apna saathi bana lete ho va sahaara bana dete ho tab avinaashi saathi se kinaara karte ho। aur sahaara chhoot hi jaata hai। aadha kalpa in had ke sahaare ko sahaara samajh anubhav kar liya ki yeh sahaara hai va daldal hai! phansaaya, giraaya va manzil par pahunchaaya? achhi tarah se anubhav kiya na। ek janma ke anubhvi to nahin ho na। 63 janmon ke anubhvi ho। aur bhi ek-do janma chaahiye?ek baar dhokha khaane vaala dubaara dhokha nahin khaata hai। agar baar-baar dhokha khaata hai to usko bhaagyaheen kaha jaata hai। ab to svayan bhaagya vidhaata brahma baap ne sabhi braahmanon ki janma patri mein shreshtha bhaagya ki lambi lakeer kheench li hai na। bhaagya vidhaata ne aapka bhaagya banaaya hai। bhaagya vidhaata baap hone ke kaaran har brahman bachche ko bhaagya ke bharpoor bhandaar ka varsa de diya hai। to socho - bhaagya ke bhandaar ke maalik ke baalak usko kya kami rah sakti hai।

mera bhaagya kya hai- sochne ki bhi aavashyakta nahin kyonki bhaagyavidhaata baap ban gaya to bachche ko bhaagya ke jaaydaad ki kya kami hogi! bhaagya ke khazaane ke maalik ho gaye na। aise bhaagyavaan kabhi dhokha nahin kha sakte hain। isliye sahaj raasta - kadam par kadam uthaao। svayan hi svayan ko uljhan mein daalte ho, saathi ka saath chhod dete ho। sirf yeh ek baat yaad rakho ki - ham shreshtha saathi ke saath hain। verify karo। to sada svayan se satisfy rahenge। samjha sahaj raasta। sahaj ko mushkil nahin banaao। sankalp mein bhi kabhi mushkil anubhav nahin karna। aise dridh sankalp karne aata hai na ki vahaan jaakar phir kahenge ki mushkil hai। baapdaada dekhte hain ki naam ‘sahaj yogi’ hai aur anubhav mushkil hota hai। maante apne ko adhikaari hain aur bante adheen hain। hain bhaagyavidhaata ke bachche aur sochte hain - pata nahin mera bhaagya hai va nahin। shaayad yahi mera bhaagya hai। isliye apne aapko jaano aur sada svayan ko har samay ke saathi samajh chalte chalo। achha –

aise sada har kadam par kadam rakhne vaale, follow father karne vaale, sada har sankalp mein saathi ka saath anubhav karne vaale, sada ek saathi doosra na koi, aise preet nibhaane vaale, sada sahaj yogi, shreshtha bhaagyavaan vishesh aatmaon ko baapdaada ka yaadapyaar aur namaste।’’

avyakt baapdaada ki personal mulaakaat - kumaariyon se

1. kumaariyaan arthaat kamaal karne vaali। saadhaaran kumaariyaan nahin, alaukik kumaariyaan ho। laukik is lok ki kumaariyaan kya karteen aur aap alaukik kumaariyaan kya karti ho?raat din ka pharka hai। woh deh abhimaan mein rah auron ko bhi deh abhimaan mein giraateen aur aap sada dehi abhimaani ban svayan bhi udti aur doosron ko bhi udaati - aisi kumaariyaan ho na! jab baap mil gaya to sarva sambandh ek baap se sada hain hi। pahle kahne maatra the,abhi practical hai। bhakti maarga mein bhi gaayan zaroor karte the ki sarva sambandh baap se hain lekin ab practical sarva sambandhon ka ras baap dvaara milta hai। aise anubhav karne vaali ho na। jab sarva ras ek baap dvaara milta hai to aur kahaan bhi sankalp ja nahin sakta। aise nishchay buddhi vijayi ratna sada gaaye aur pooje jaate hain। to vijayi aatmaayen hain,sada smriti ke tilakdhaari aatmaayen hain,yeh smriti rehti hai? itni kumaariyaan kaun-si kamaal karenge? sada har karma dvaara baap ko pratyaksha karengi। har karma se baap dikhaai de। koi bol bhi bolo to aisa bol ho jo us bol mein baap dikhaai de। duniya mein bhi koi bahut achha bolne vaale hote hain to sab kehte hain - isko sikhaane vaala kaun? uske taraph drishti jaati hai। aise aapke har karma dvaara baap ki pratyakshata ho। aisi dhaarnaamoorta divyamoorta yeh visheshta hai। bhaashan karne vaale to sabhi bante hain। lekin apne har karma se bhaashan karne vaale woh koto mein koi hote hain। to aisi visheshta dikhaayegi na। apne charitra dvaara baap ka chitra dikhaana। achha –

2. kumaariyon ka jhunda hain। sena taiyaar ho rahi hai। woh to left-right karte, aap sada right hi right karte। yeh saina kitni shreshtha hai,shanti dvaara vijayi ban jaate। shanti se hi svaraajya pa lete। koi halchal nahin karni padti hai। to pakki shakti sena ki shaktiyaan ho,saina chhodkar jaane vaali nahin। svapna mein bhi koi hila na sake। kabhi bhi kisi ke sangadosh mein aane vaali nahin। sada baap ke sang mein rahne vaale, doosre ke sang mein nahin aa sakte। to saara group bahaadur hai na! bahaadur kya karte hain?maidaan par aate hain। to ho sabhi bahaadur lekin maidaan par nahin aai ho। bahaadur jab maidaan par aate hain to dekha hoga ki bahaadur ki bahaaduri mein band bajaate hain। aap bhi jab maidaan par aayengi to khushi ki band bajegi। kumaariyaan sada hi shreshtha takdeervaan hain। kumaariyon ko seva ka bahut achha chance hai aur milne vaala bhi hai। kyonki seva bahut hai aur sevaadhaari kam hain। jab sevaadhaari seva par niklenge to kitni seva ho jaayegi। dekhenge kumaariyaan kya kamaal karti hain। baambe ki kumaariyaan to baambe bomb chhodne vaali kumaariyaan hongi na। saadhaaran kaarya to sab karte hain lekin aap vishesh kaarya karke dikhaao। kumaariyaan ghar ka shrringaar ho। laukik mein kumaariyon ko kya bhi samjhen lekin paarlaukik ghar mein kumaariyaan mahaan hain। kumaariyaan hain to centre ki raunak hai। maataaon ke liye bhi vishesh lift hai। pahle maata guru hai। baap ne maata guru ko aage kiya hai tab bhavishya mein maataaon ka naam aage hai। achha!

teachers ke saath - teachers arthaat baap samaan। jaise baap vaise nimitta sevaadhaari। baap bhi nimitta hai to sevaadhaari bhi nimitta aatmaayen hain। nimitta samajhne se svatah hi baap samaan banne ka sanskaar practical mein aata hai। agar nimitta nahin samajhte to baap samaan nahin ban sakte। to ek nimitta, doosra sada nyaara aur pyaara। yeh baap ki visheshta hai। pyaara bhi banta aur nyaara bhi rehta। nyaara bankar pyaara banta hai। to baap samaan arthaat ati nyaare aur ati pyaare। auron se nyaare aur baap se pyaare। yeh samaanta hai। baap ki yahi do visheshtaaen hain। to baap samaan sevaadhaari bhi aise hain। isi visheshta ko sada smriti mein rakhte hue sahaj aage badhti jaayengi। mehnat nahin karni padengi। jahaan nimitta hain vahaan saphalta hai hi। vahaan mera-pan aa nahin sakta। jahaan mera-pan hai vahaan saphalta nahin। ‘nimitta bhaav saphalta ki chaabi hai।’ jab had ka laukik mera-pan chhod diya to phir aur mera kahaan se aaya। mera ke bajaae ‘baba-baba’kahne se sada safe ho jaate। mera centre nahin baba ka centre। mera jigyaasu nahin - baba ka। mera khatma hokar tera ban jaata। tera kehna arthaat udna। to nimitta shikshak arthaat udti kala ke example। jaise aap udti kala ke example bante vaise doosre bhi bante hain। na chaahte bhi jiske nimitta bante ho unmein woh vibration svatah aa jaate hai। to nimitta shikshak, sevaadhaari sada nyaare hain, sada pyaare hain। kabhi bhi koi paper aave to usmein paas hone vaale hain। nishchaybuddhi vijayi hain।

2. sabhi roohaani gulaab ho na। motiya ho ya gulaab?jaise gulaab ka pushpa sab pushpon mein se shreshtha gaaya jaata hai aise roohaani gulaab arthaat shreshtha aatmaayen। roohaani gulaab sada roohaaniyat mein rahne vaala, sada roohaani nashe mein rahne vaala। sada roohaani seva mein rahne vaala - aise roohaani gulaab ho। aajkal ke samay pramaan roohaaniyat ki aavashyakta hai। roohaaniyat na hone ke kaaran hi yeh sab ladaai jhagde hain। to roohaani gulaab ban roohaaniyat ki khushbu phailaane vaale। yahi brahman jeevan ka occupation hai। sada isi occupation mein busy raho।

party se

sada svayan ko double light pharishta anubhav karte ho। pharishta arthaat jiski duniya hi ‘ek baap’ ho। aise pharishte sada baap ke pyaare hain। pharishta arthaat deh aur deh ke sambandhon se aakarshan ka rishta nahin। nimitta maatra deh mein hain aur deh ke sambandhiyon se kaarya mein aate hain lekin lagaav nahin। kyonki pharishton ke aur koi se rishte nahin hote। pharishte ke rishte ek baap ke saath hain। aise pharishte ho na। abhi-abhi deh mein karma karne ke liye aate aur abhi- abhi deh se nyaare! pharishte second mein yahaan, second mein vahaan। kyonki udne vaale hain। karma karne ke liye deh ka aadhaar liya aur phir oopar। aise anubhav karte ho?agar kahaan bhi lagaav hai, bandhan hai to bandhan vaala oopar nahin ud sakta। woh neeche aa jaayega। pharishte arthaat sada udti kala vaale। neeche oopar hone vaale nahin। sada oopar ki sthiti mein rahne vaale। pharishton ke sansaar mein rahne vaale। to pharishta smriti swaroop bane to sab rishte khatma। aise abhyaasi ho na। karma kiya aur phir nyaare। lift mein kya karte hain?abhi-abhi neeche abhi-abhi oopar। neeche aaye karma kiya aur phir switch dabaaya aur oopar। aise abhyaasi। achha - om shanti।