Avyakt murli for Sunday 16 February 1986

>

16-02-86om shanti avyakt baapdaadaamdhuban

golden jubilee ka golden sankalp

bhaagya vidhaata baap apne bhaagyavaan bachchon prati bole

aaj bhaagya vidhaata baap apne chaaron or ke padmaapadma bhaagyavaan bachchon ko dekh rahen hain। har ek bachche ke mastak par bhaagya ka chamakta hua sitaara dekh harshit ho rahen hain। saare kalpa mein aisa koi baap ho nahi sakta jiske itne sabhi bachche bhaagyavaan hon। nambarvaar bhaagyavaan hote hue bhi duniya ke aajkal ke shreshtha bhaagya ke aage last number bhaagyavaan bachcha bhi ati shreshtha hai। isliye behad ke baapdaada ko sabhi bachchon ke bhaagya par naaz hai। baapdaada bhi sada - vaah menre bhaagyavaan bachche, vaah ek lagan mein magan rahne vaale bachche, yahi geet gaate rehte hain। baapdaada aaj vishesh sarva bachchon ke sneh aur saahas,donon visheshtaaon ki mubaarak dene aaye hain।

har ek ne yatha yogya sneh ka return seva me dikhaaya। ek lagan se ek baap ko pratyaksha karne ki himmat pratyaksha roop me dikhaai। apna-apna kaarya umang utsaah se sampanna kiya। yeh kaarya ke khushi ki mubaarak baapdaada de rahe hain। deshvidesh ke sammukh aane vaale va door baithe bhi apne dil ke shreshtha sankalp dvaara va seva dvaara sahayogi bane hain to sabhi bachchon ko baapdaada ‘sada saphalta bhav, sada har kaarya mein sampanna bhav,sada pratyaksha pramaan bhav ka vardaan de rahe hain।’ sabhi sva parivartan ki,seva mein aur bhi aage badhne ki shubh umang utsaah ki pratigyaayen baapdaada ne suni। sunaaya tha na ki baapdaada ke paas aapki saakaar duniya se nyaari shaktishaali T.vi. hai। aap sirf shareer ke act ko dekh sakte ho। baapdaada man ke sankalp ko bhi dekh sakte hain। jo bhi har ek ne part bajaaya woh sab sankalp sahit, man ki gatividhi aur tan ki gatividhi donon hi dekhi,suni। kya dekha hoga? aaj to mubaarak dene aaye hain isliye aur baaten aaj nahin sunaayenge। baapdaada aur saath mein sabhi aapke seva ke saathi bachchon ne ek baat par bahut khushi ki taaliyaan bajaai। haath ki taaliyaan nahin,khushi ki taaliyaan bajaai ki saare sangathan mein seva dvaara abhi-abhi baap ko pratyaksha kar len, abhi-abhi vishwa mein aavaaj phail jaae… yeh ek umang aur utsaah ka sankalp sabhi mein ek tha। chaahe bhaashan karne vaale, chaahe sunne vaale, chaahe koi bhi sthool kaarya karne vaale, sabhi mein yeh sankalp khushi ke roop mein achha raha। isliye chaaron or khushi ki raunak,pratyaksha karne ka umang,vaataavran ko khushi ki lahar mein laane vaala raha। majority khushi aur nihsvaartha sneh,yeh anubhav ka prasaad le gaye। isliye baapdaada bhi bachchon ki khushi mein khush ho rahe the। samjha।

golden jubilee bhi mana li na! abhi aage kya manaayenge? diamond jubilee yahaan hi manaayenge ya apne raajya mein manaayenge?golden jubilee kislie manaai?golden duniya laane ke liye manaai na। is golden jubilee se kya shreshtha golden sankalp kiya?doosron ko to golden thoughts bahut sunaayen। achhe-achhe sunaayen। apne prati kaun-sa vishesh sunahri sankalp kiya? jo poora varsha har sankalp har ghadi golden ho। log to sirf golden morning ya golden night kah dete ya golden evening kehte hain। lekin aap sarvashreshtha aatmaon ki har second golden ho। golden second ho, sirf golden morning ya golden night nahin। har second aapke donon naynon mein golden duniya aur golden light ka sweet hom ho। woh golden light hai, woh golden duniya hai। aise hi anubhav ho। yaad hai na - shuru-shuru mein ek chitra banaate the। ek aankh mein mukti doosri aankh mein jeevanmukti। yeh anubhav karaana yahi golden jubilee ka golden sankalp hai। aisa sankalp sabhi ne kiya ya sirf drishya dekh-dekhkar khush hote rahen। golden jubilee is shreshtha kaarya ki hai। kaarya ke nimitta aap sabhi bhi kaarya ke saathi ho। sirf saakshi ho dekhne vaale nahin, saathi ho। vishwa-vidyaalay ki golden jubilee hai। chaahe ek din ka bhi vidyaartha ho। uski bhi golden jubilee hai। aur hi bani banaai jubilee par pahunche ho। banaane ki mehnat inhonen ki aur manaane ke samay aap sab pahunch gaye। to sabhi ko golden jubilee ki baapdaada bhi badhaai dete hain। sabhi aise samajhte ho na! dekhne vaale to sirf nahin ho na! banne vaale hain ya dekhne vaale! dekha to duniya mein bahut kuchh hai lekin yahaan dekhna arthaat banna। sunna arthaat banna। to kya sankalp kiya?har second golden ho। har sankalp golden ho। sada har aatma ke prati sneh ke, khushi ke sunahri pushpa ki varsha karte raho। chaahe dushman bhi ho lekin sneh ki varsha dushman ko bhi dosta bana degi। chaahe koi aapko maan de va maane na maane। lekin aap sada svamaan mein rah auron ko snehi drishti se, snehi vritti se aatmik maan dete chalo। woh maane na maane aapko lekin aap usko meetha bhaai, meethi behen maante chalo। woh nahin maane, aap to maan sakte ho na! woh patthar phenke,aap ratna do। aap bhi patthar na phenko kyonki aap ratnaagar baap ke bachche ho। ratnon ki khaan ke maalik ho। multi-multi-malteemiliniyar ho। bhikhaari nahin ho jo socho - woh de tab doon। yeh bhikhaari ke sanskaar hain। daata ke bachche kabhi lene ka haath nahin phailaate। buddhi se bhi yeh sankalp karna ki yeh karen to main karoon, yeh sneh de to main doon। yeh maan deve to main doon। yeh bhi haath phailaana hai। yeh bhi royal bhikhaareepan hai। ismen nishkaam yogi bano। tab hi golden duniya ki khushi ki lahar vishwa tak pahunchegi। jaise vigyaan ki shakti, saare vishwa ko samaapta karne ki saamagri bahut shaktishaali banaai hai। jo thode samay mein kaarya samaapta ho jaae। vigyaan ki shakti aise refine vastu bana rahi hai। aap gyaan ki shakti vaale aise shaktishaali vritti aur vaayumandal banaao jo thode samay mein chaaron or khushi ki lahar, srishti ke shreshtha bhavishya ki lahar,bahut jaldi se jaldi phail jaae। aadhi duniya abhi aadha mari hui hai। bhay ke maut ki shaiyya par soi hui hai। usko khushi ki lahar ki oxygen do। yahi golden jubilee ka golden sankalp sada emerge roop mein rahe। samjha kya karna hai?abhi aur gati ko teevra banaana hai। ab tak jo kiya woh bhi bahut achha kiya। abhi aage aur bhi achhe te achha karte chalo। achha।

double videshiyon ko bahut umang hai। abhi hain to double videshiyon ka chance। pahunch bhi gaye hain bahut। samjha! abhi sabhi ko khushi ki toli khilaao। dil khush mithaai hoti hai na! to khoob dilkhush mithaai baanto। achha - sevaadhaari bhi khushi mein naach rahe hain na! naachne se thakaavat khatma ho jaati hai। to seva ki ya khushi ki dance sabhi ko dikhaai? kya kiya? dance dikhaai na! achha –

sarvashreshtha bhaagyavaan, vishesh aatmaon ko,har second,har sankalp sunahri banaane vaale sabhi aagyaakaari bachchon ko, sada daata ke bachche ban sarva ki jholi bharne vaale sampanna bachchon ko, sada vidhaata aur vardaata ban sarva ko mukti va jeevanmukti ki praapti karaane vaale,sada bharpoor bachchon ko baapdaada ka sunahri sneh ke sunahri khushi ke pushpon sahit yaadapyaar, badhaai aur namaste।’’

party se - sada baap aur varsa donon yaad rehta hai? baap ki yaad svatah hi varse ki bhi yaad dilaati hai aur varsa yaad hai to baap ki svatah yaad hai। baap aur varsa donon saath-saath hain। baap ko yaad karte hain - varse ke liye। agar varse ki praapti na ho to baap ko bhi yaad kyon kare! to baap aur varsa yahi yaad - sada hi bharpoor banaati hai। khazaanon se bharpoor aur dukh darda se door। donon hi phaayda hain। duhkh se door ho jaate aur khazaanon se bharpoor ho jaate। aisi praapti sadaakaal ki, baap ke bina aur koi kara nahin sakta। yahi smriti sada santushta,sampanna banaayegi। jaise baap saagar hai, sada bharpoor hai। kitna bhi saagar ko sukhaae phir bhi saagar samaapta hone vaala nahin। saagar sampanna hai। to aap sabhi sada sampanna aatmaayen ho na! khaali honge to kahaan lene ke liye haath phailaana padega। lekin bharpoor aatma sada hi khushi ke jhoole mein jhoolti rehti hai, sukh ke jhoole mein jhoolti rehti hai। to aisi shreshtha aatmaayen ban gaye। sada sampanna rehna hi hai। check karo mile hue shaktiyon ke khazaane ko kahaan tak kaarya mein lagaaya hai!

sada himmat aur umang ke pankhon se udte raho aur doosron ko udaate raho। himmat hai umang utsaah nahin to bhi saphalta nahin। umang hai himmat nahin to bhi saphalta nahin। donon saath rahen to udti kala hai। isliye sada himmat aur umang ke pankhon se udte raho। achha।