Avyakt murli for Wednesday 21 January 1987

>

21-01-87om shanti avyakt baapdaadaamdhuban

sva-raajya adhikaari hi vishwa-raajya adhikaari

raajaaon ke raaja banaane vaale bhaagyavidhaata bhagwan apne bahut kaal ke sva-raajya adhikaari banne ke abhyaasi bachchon prati bole

aaj bhaagyavidhaata baap apne sarva shreshtha bhaagyavaan bachchon ko dekh rahe hain। baapdaada ke aage ab bhi sirf yeh sangathan nahin hai lekin chaaron or ke bhaagyavaan bachche saamne hain। chaahe desh-videsh ke kisi bhi kone mein hain lekin behad ka baap behad bachchon ko dekh rahe hain। yeh saakaar vatan ke andar sthaan ki had aa jaati hai, lekin behad baap ke drishti ki srishti behad hai। baap ki drishti mein sarva brahman aatmaon ki srishti samaai hui hai। to drishti ki srishti mein sarva sammukh hain। sarva bhaagyavaan bachchon ko bhaagyavidhaata bhagwan dekh-dekh harshit hote hain। jaise bachche baap ko dekh harshit hote hain, baap bhi sarva bachchon ko dekh harshit hote hain। behad ke baap ko bachchon ko dekh roohaani nasha va phakhur hai ki ek-ek bachcha is vishwa ke aage vishesh aatmaon ki list mein hai! chaahe 16,000 ki maala ka last manka bhi hai, phir bhi, baap ke aage aane se,baap ka banne se vishwa ke aage vishesh aatma hai। isliye, chaahe aur kuchh bhi gyaan ke vistaar ko jaan nahin sakte lekin ek shabd‘baba'dil se maana aur dil se auron ko sunaaya to vishesh aatma ban gaye, duniya ke aage mahaan aatma ban gaye,duniya ke aage mahaan aatma ke swaroop mein gaayan-yogya ban gaye। itna shreshtha aur sahaj bhaagya hai,samajhte ho?kyonki baba shabd hai ‘chaabi'। kiski? sarva khazaanon ki, shreshtha bhaagya ki। chaabi mil gai to bhaagya va khazaana avashya praapta hota hi hai। to sabhi maataayen va paandav chaabi praapta karne ke adhikaari bane ho? chaabi lagaane bhi aati hai ya kabhi lagti nahin hai?chaabi lagaane ki vidhi hai - dil se jaanna aur maanna। sirf mukh se kaha to chaabi hote bhi lagegi nahin। dil se kaha to khazaane sada haajar hain। akhut khazaane hain na। akhut khazaane hone ke kaaran jitne bhi bachche hain sab adhikaari hain। khule khazaane hain, bharpoor khazaane hain। aise nahin hai ki jo peechhe aaye hain,to khazaane khatma ho gaye hon। jitne bhi ab tak aaye ho arthaat baap ke bane ho aur bhavishya mein bhi jitne banne vaale hain, un sabse khazaane anekaanek guna jyaada hain। isliye baapdaada har bachche ko golden chance dete hain ki jitna jisko khazaana lena hai, woh khuli dil se le lo। daata ke paas kami nahin hai, lene vaale ke himmat va purooshaartha par aadhaar hai। aisa koi baap saare kalpa mein nahin hai jo itne bachche hon aur har ek bhaagyavaan ho! isliye sunaaya ki roohaani baapdaada ko roohaani nasha hai।

sabhi ki madhuban mein aane ki, milne ki aasha poori hui। bhakti-maarga ki yaatra se phir bhi madhuban mein aaraam se baithne ki, rahne ki jagah to mili hai na। mandiron mein to khade-khade sirf darshan karte hain। yahaan aaraam se baithe to ho na। vahaan to ‘bhaago-bhaago', ‘chalo-chalo' kehte hain aur yahaan aaraam se baitho,aaraam se,yaad ki khushi se mauj manaao। sangamayug mein khushi manaane ke liye aaye ho। to har samay chalte-phirte,khaate-peete khushi ka khazaana jama kiya? kitna jama kiya hai?itna kiya jo 21 janma aaraam se khaate raho? madhuban vishesh sarva khazaane jama karne ka sthaan hai kyonki ‘yahaan ek baap doosra na koi' - yeh saakaar roop mein bhi anubhav karte ho। vahaan buddhi dvaara anubhav karte ho lekin yahaan pratyaksha saakaar jeevan mein bhi sivaae baap aur brahman parivaar ke aur koi najar aata hai kya? ek hi lagna, ek hi baaten, ek hi parivaar ke aur ekras sthiti। aur koi ras hai hi nahin। padhna aur padhaai dvaara shaktishaali banna, madhuban mein yahi kaam hai na। kitne class karte ho?to yahaan vishesh jama karne ka saadhan milta hai। isliye, sab bhaag-bhaagkar pahunch gaye hain। baapdaada sabhi bachchon ko vishesh yahi smriti dilaate hain ki sada svaraajya adhikaari sthiti mein aage badhte chalo। svaraajya adhikaari - yahi nishaani hai vishwa-raajya adhikaari banne ki।

kai bachche rooh-roohaan karte hue baap se poochhte hain ki ‘ham bhavishya mein kya banenge,raaja banenge ya praja banenge?'baapdaada bachchon ko respond karte hain ki apne aapko ek din bhi check karo to maaloom pad jaayega ki main raaja banoonga va saahookaar banoonga va praja banoonga। pahle amritvele se apne mukhya teen kaarobaar ke adhikaari, apne sahayogi, saathiyon ko check karo। woh kaun? 1. man arthaat sankalp shakti। 2. buddhi arthaat nirnay shakti। 3. pichhle va vartamaan shreshtha sanskaar। yeh teenon vishesh kaarobaari hain। jaise aajkal ke jamaane mein raaja ke saath mahaamantri va vishesh mantri hote hain, unheen ke sahayog se raajya kaarobaar chalti hai। satayug mein mantri nahin honge lekin sameep ke sambandhi,saathi honge। kisi bhi roop mein,saathi samjho va mantri samjho। lekin yeh check karo - yeh teenon sva ke adhikaar se chalte hain?in teenon par sva ka raajya hai va inhon ke adhikaar se aap chalte ho? man aapko chalaata hai ya aap man ko chalaate hain? jo chaaho, jab chaaho vaisa hi sankalp kar sakte ho? jahaan buddhi lagaane chaaho, vahaan laga sakte ho va buddhi aap raaja ko bhatkaati hai? sanskaar aapke vash hain ya aap sanskaaron ke vash ho? raajya arthaat adhikaar। raajya-adhikaari jis shakti ko jis samay jo order kare, woh usi vidhipoorvak kaarya karte va aap kaho ek baat,woh karen doosri baat? kyonki nirantar yogi arthaat svaraajya adhikaari banne ka vishesh saadhan hi man aur buddhi hai। mantra hi‘manmanaabhav'ka hai। yog ko buddhiyog kehte hain। to agar yeh vishesh aadhaar stambha apne adhikaar mein nahin hain va kabhi hain,kabhi nahin hai;abhi-abhi hain,abhi-abhi nahin hain; teenon mein se ek bhi kam adhikaar mein hai to isse hi check karo ki ham raaja banenge ya praja banenge? bahutkaal ke raajya adhikaari banne ke sanskaar bahutkaal ke bhavishya raajya- adhikaari banaayenge। agar kabhi adhikaari, kabhi vasheebhoot ho jaate ho to aadha kalpa arthaat poora raajya-bhaagya ka adhikaar praapta nahin kar sakenge। aadha samay ke baad tretaayugi raaja ban sakte ho, saara samay raajya adhikaari arthaat raajya karne vaale royal family ke sameep sambandh mein nahin rah sakte। agar vasheebhoot baarbaar hote ho to sanskaar adhikaari banne ke nahin lekin raajya adhikaariyon ke raajya mein rahne vaale hain। woh kaun ho gaye? woh hui praja। to samjha, raaja kaun banega, praja kaun banega? apne hi darpan mein apne takdeer ki soorat ko dekho। yeh gyaan arthaat knowledge darpan hai। to sabke paas darpan hai na। to apni soorat dekh sakte ho na। abhi bahut samay ke adhikaari banne ka abhyaas karo। aise nahin ant mein to ban hi jaayenge। agar ant mein banenge to ant ka ek janma thoda-sa raajya kar lenge। lekin yeh bhi yaad rakhna ki agar bahut samay ka ab se abhyaas nahin hoga va aadi se abhyaasi nahin bane ho, aadi se ab tak yeh vishesh kaaryakartta aapko apne adhikaar mein chalaate hain va dagmag sthiti karte rehte hain arthaat dhokha dete rehte hain, duhkh ki lahar ka anubhav karaate rehte hain to ant mein bhi dhokha mil jaayega। dhokha arthaat duhkh ki lahar zaroor aayegi। to ant mein bhi pashchaataap ke duhkh ki lahar aayegi। isliye baapdaada sabhi bachchon ko phir se smriti dilaate hain ki raaja bano aur apne vishesh sahayogi karmachaari va raajya kaarobaari saathiyon ko apne adhikaar se chalaao। samjha?

baapdaada yahi dekhte hain ki kaun-kaun kitne svaraajya-adhikaari bane hain? achha। to sab kya banne chaahte ho?raaja banne chaahte ho? to abhi svaraajya- adhikaari bane ho va yahi kehte ho ban rahe hain, ban to jaayenge? ‘ge-ge' nahin karna। ‘jaayenge',to baap bhi kahenge - achha, raajya-bhaagya dene ko bhi dekh lenge। sunaaya na - bahut samay ka sanskaar abhi se chaahiye। vaise to bahut-kaal nahin hai, thoda-kaal hai। lekin phir bhi itne samay ka bhi abhyaas nahin hoga to phir last samay yeh ulhana nahin dena - hamne to samjha tha, last mein hi ho jaayenge। isliye kaha gaya hai - kab nahin,ab। kab ho jaayega nahin,ab hona hi hai। banna hi hai। apne oopar raajya karo, apne saathiyon ke oopar raajya karna nahin shuru karna। jiska sva par raajya hai, uske aage abhi bhi sneh ke kaaran sarva saathi bhi chaahe laukik,chaahe alaukik sabhi ‘ji hajoor', ‘haan-ji'kehte hue saathi bankar ke rehte hain, snehi aur saathi ban ‘haan-ji' ka paath practical mein dikhaate hain। jaise praja raaja ki sahayogi hoti hai, snehi hoti hai, aise aapki yeh sarva karma-indriyaan,vishesh shaktiyaan sada aapke snehi,sahayogi rahengi aur iska prabhaav saakaar mein aapke seva ke saathiyon va laukik sambandhiyon,saathiyon mein padega। daivi parivaar mein adhikaari ban order chalaana,yeh nahin chal sakta। svayan apni karma-indriyon ko order mein rakho to svatah aapke order karne ke pahle hi sarva saathi aapke kaarya mein sahayogi banenge। svayan sahayogi banenge, order karne ki aavashyakta nahin। svayan apne sahayog ki offer karenge kyonki aap svaraajya-adhikaari hain। jaise raaja arthaat daata, to daata ko kehna nahin padta arthaat maangana nahin padta। to aise svaraajya-adhikaari bano। achha। yeh mela bhi drama mein noondh tha। ‘vaah drama'kar rahe hain na। doosre log kabhi ‘haay drama' karenge,kabhi ‘vaah drama' aur aap sada kya kehte ho? vaah drama! vaah! jab praapti hoti hain na, to praapti ke aage koi mushkil nahin lagta hai। to aise hi, jab itne shreshtha parivaar se milne ki praapti ho rahi hai to koi mushkil, mushkil nahin lagega। mushkil lagta hai? khaane par thaharna padta hai। khaao to bhi prabhu ke gun gaao aur queue mein thahro to bhi prabhu ke gun gaao। yahi kaam karna hai na। yeh bhi rehearsal ho rahi hai। abhi to kuchh bhi nahin hai। abhi to aur vriddhi hogi na। aise apne ko mould karne ki aadat daalo,jaisa samay vaise apne aapko chala saken। to pat (jameen) mein sone ki bhi aadat pad gai na। aise to nahin - khatiya nahin mili to neend nahin aai? tent mein bhi rahne ki aadat pad gai na। achha laga?thandi to nahin lagti? abhi saare aabu mein tent lagaayen? tent mein sona achha laga ya kamra chaahiye?yaad hai, pahle-pahle jab paakistaan mein the to mahaarthiyon ko hi pat mein sulaate the? jo naameegraami mahaarthi hote the, unhon ko haal mein pat mein tiphuti (teen foot) dekar sulaate the। aur jab brahman parivaar ki vriddhi hui to bhi kahaan se shuru ki? tent se hi shuru ki na। pahle-pahle jo nikle, woh bhi tent mein hi rahe। tent mein rahne vaale saint (mahaatma) ho gaye। saakaar part ke hote bhi tent mein hi rahe to aap log bhi anubhav karenge na। to sabhi har reeti se khush hain?achha,phir aur 10,000manga ke tent denge, prabandha karenge। sab nahaane ke prabandha ka sochte ho, woh bhi ho jaayega। yaad hai, jab yeh haal bana tha to sabne kya kaha tha? itne nahaane ke sthaan kya karenge?isi lakshya se yeh banaaya gaya, abhi kam ho gaya na। jitna banaayenge utna kam to hona hi hai kyonki aaikhar to behad mein hi jaana hai। achha।

sab taraph ke bachche pahunch gaye hain। to yeh bhi behad ke haal ka shringaar ho gaya hai। neeche bhi baithe hain। (bhinna-bhinna sthaanon par murli sun rahe hain) yeh vriddhi hona bhi to khushanseebi ki nishaani hai। vriddhi to hui lekin vidhipoorvak chalna। aise nahin, yahaan madhuban mein to aa gaye,baba ko bhi dekha, madhuban bhi dekha, abhi jaise chaahen vaise chalen। aise nahin karna। kyonki kai bachche aise karte hain aajab tak madhuban mein aane ko nahin milta hai, tab tak pakke rehte hain, phir jab madhuban dekh liya to thode albele ho jaate hain। to albele nahin banna। brahman arthaat brahman jeevan hai, to jeevan to sada jab tak hai, tab tak hai। jeevan banaai hai na। jeevan banaai hai ya thode samay ke liye brahman banen hain? sada apne brahman jeevan ki visheshtaayen saath rakhna kyonki isi visheshtaaon se vartamaan bhi shreshtha hai aur bhavishya bhi shreshtha hai। achha। baaki kya raha? toli। (vardaan) vardaan to vardaata ke bachche hi ban gaye। jo hain hi vardaata ke bachche, unhon ko har kadam mein vardaata se vardaan svatah hi milta rehta hai। vardaan hi aapki paalna hai। vardaanon ki paalna se hi pal rahe hain। nahin to,socho, itni shreshtha praapti aur mehnat kya ki। bina mehnat ke jo praapti hoti hai, usko hi ‘vardaan'kaha jaata hai। to mehnat kya ki aur praapti kitni shreshtha! janma-janma praapti ke adhikaari ban gaye। to vardaan har kadam mein vardaata ka mil raha hai aur sada hi milta rahega। drishti se, bol se, sambandh se vardaan hi vardaan hai। achha।

abhi to golden jubilee manaane ki taiyaari kar rahe ho। golden jubilee arthaat sada golden sthiti mein sthiti rahne ki jubilee mana rahe ho। sada real gold, jara bhi alaaen (khaad) mix nahin। isko kehte hain‘golden jubilee'। to duniya ke aage sone ke sthiti mein sthit hone vaale sachche sone pratyaksha hon,iske liye yeh sab seva ke saadhan bana rahe hain। kyonki aapki golden sthiti golden ej ko laayegi, svarna sansaar ko laayegi jiski ichchha sabko hai ki abhi kuchh duniya badalni chaahiye। to sva-parivartan se vishwa-parivartan karne vaali vishesh aatmaayen ho। aap sabko dekh aatmaon ko yeh nishchay ho, shubh ummeeden hon ki sachmuch, svarna duniya aai ki aai! sample ko dekh karke nishchay hota hai naahaan,achhi cheez hai। svarna sansaar ke sample aap ho। svarna sthiti vaale ho। to aap sample ko dekh unhon ko nishchay ho ki ‘haan, jab sample taiyaar ho to avashya aisa hi sansaar aaya ki aaya।'aisi seva golden jubilee mein karenge na। na-ummeed ko ummeed dene vaale banna। achha।

sarva svaraajya-adhikaari, sarva bahutkaal ke adhikaar praapta karne ke abhyaasi aatmaon ko, sarva vishwa ke vishesh aatmaon ko,sarva vardaata ke vardaanon se palne vaale shreshtha aatmaon ko baapdaada ka yaadapyaar aur namaste।

party ke saath personal mulaakaat

ham har kalpa ke adhikaari aatmaayen hain, sirf ab ke nahin,anek baar ke adhikaari hain - yeh khushi rehti hai? aadha kalpa baap ke aage bhikhaari ban maangate rahe lekin baap ne ab apna bana liya, bachche ban gaye। bachcha arthaat adhikaari। adhikaari samajhne se baap ka jo bhi varsa hai, woh svatah yaad rehta hai। kitna bada khazaana hai! itna khazaana hai jo khaate khutta nahin hai aur jitna aaainron ko baanto utna badhta jaata hai! aisa anubhav hai?parmaatma-varse ke adhikaari hain - isse bada nasha aur koi ho sakta hai? to yeh avinaashi geet sada gaate raho aur khushi mein naachte raho ki ham paramatma ke bachche parmaatma- varse ke adhikaari hain। yeh geet gaate raho to maaya saamne aa nahin sakti, maayaajeet ban jaayenge। yahi vishesh vardaan yaad rakhna ki parmaatma-varse ke adhikaari aatmaayen hain। isi adhikaar se bhavishya mein vishwa ke raajya ka adhikaar svatah milta hai। shaktiyaan sada khush rahne vaali ho na? kabhi koi duhkh ki lahar to nahin aati?duhkh ki duniya chhod di,sukh ke sansaar mein pahunch gaye। duhkh ke sansaar mein sirf seva ke liye rehte, baaki sukh ke sansaar mein। baap ke adhikaar se sab sahaj ho jaata hai।

sadaiv apne ko mahaaveer arthaat mahaan aatma anubhav karte ho? mahaan aatma sada jo sankalp karenge, bol bolenge vo saadhaaran nahin hoga, mahaan hoga। kyonki oonche-te-oonche baap ke bachche bhi oonche, mahaan hue na। jaise koi aajkal ki duniya mein vi.aai.pi. ka bachcha hoga to woh apne ko bhi vi.aai.pi. samjhega na। to aap se ooncha to koi hai hi nahin। to aise, oonche-to-oonche baap ki santaan oonche-te-oonchi aatmaayen hain - yeh smriti sada shaktishaali banaati hai। ooncha baap, oonche ham, ooncha kaarya - aisi smriti mein rahne vaale sada baap samaan ban jaate hain। to baap samaan bane ho? baap har bachche ko ooncha hi banaate hain। koi ooncha, koi neecha nahin, sab oonche-te-oonche। agar apni kamzori se koi neeche ki sthiti mein rehta hai to uski kamzori hai। baaki baap sabko ooncha banaata hai। saare vishwa ke aage shreshtha aur oonchi aatmaayen aapke sivaae koi nahin hain,isliye to aap aatmaon ka hi gaayan aur poojan hota hai। abhi tak gaayan, poojan ho raha hai। kabhi bhi koi mandir mein jaayenge to kya samjhenge?koi bhi mandir mein moorti dekhkar kya samajhte ho? yeh hamaari hi moorti hai। sirf baap nahin pooja jaata, baap ke saath aap bhi pooje jaate ho। aise mahaan ban gaye! ek baar nahin,anek baar bane hain aajhaan yeh nasha hoga vahaan maaya ki aakarshan apne taraph aakarshit nahin kar sakegi, sada nyaare honge। sabhi apne aap se santushta ho?jaise baap sunaate hain,vaise hi anubhav karte hue aage badhna - yeh hai apne aap se santushta rehna। ‘‘oonche-te-oonche'' - yahi vishesh vardaan yaad rakhna। yaad karna sahaj hai ya mushkil lagta hai? sahaj smriti svatah aati rahegi। maaya kahaan rok nahin sakegi,sada aage badhte rahenge।

sada apne ko har kadam mein padmon ki kamaai jama karne vaale padmaapadma bhaagyavaan samajhte ho? jo bhi kadam yaad mein uthaate ho,to ek second ki yaad itni shaktishaali hai jo ek second ki yaad padmon ki kamaai jama karne vaali hai। agar saadhaaran kadam uthaate hain,yaad mein nahin uthaate to kamaai nahin hai। yaad mein rahkar kadam uthaane se padmon ki kamaai hai। aur har kadam mein padma to kitne padma ho gaye! isliye padmaapadma bhaagyavaan kaha jaata hai। padma to aapke aage kuchh bhi nahin hai। lekin is duniya ke hisaab se kahne mein aata hai। to jab kisi ki achhi kamaai hoti hai to uske chehre ki phalak hi aur ho jaati hai। gareeb ka chehra bhi dekho aur raajkumaar ka chehra bhi dekho, kitna pharka hoga! uske shakla ki jhalak-phalak aur gareeb ke chehre ki jhalak- phalak mein raat-din ka pharka hoga। aap to raajaaon ka bhi raaja banaane vaale baap ke direct bachche ho। to kitni jhalak-phalak hai! shakla mein woh padmon ki kamaai ka nasha dikhaai deta hai ya gupta rehta hai?roohaani nasha,roohaani khushi jo koi bhi dekhe to anubhav kare ki yeh nyaare log hain, saadhaaran nahin hain। to sada yahi vardaan smriti mein rakhna ki ham anek baar padmaapadmapti bane hain। achha।