Avyakt murli for Sunday 10 January 1988

>

10 - 01 - 88 om shanti avyakt baapdaadaamdhuban

manan karne ki vidhi tatha manan shakti ko badhaane ki yuktiyaan

har ek bachche ki buddhi roopi jholi ko gyaan ratnon se bharne vaale ratnaagar baapdaada apne gyaani tu aatma bachchon prati bole –

aaj ratnaagar baap apne amoolya ratnon se milne aaye hain ki har ek shreshtha aatma ne kitne gyaan - ratna jama kiye arthaat jeevan mein dhaaran kiye hain? ek - ek gyaan ratna padmon se bhi jyaada moolyavaan hai! to socho, aadi se ab tak kitne gyaan ratna mile hain! ratnaagar baap ne har ek bachche ki buddhi roopi jholi mein anekaanek ratna bhar diye hain। sabhi bachchon ko ek saath ek jitne hi gyaan ratna diye hain। lekin yeh gyaan - ratna jitna sva - prati va anya aatmaon ke prati kaarya mein lagaate hain, utna yeh ratna badhte jaate hain। baapdaada dekh rahe hain - baap ne to sabko samaan diye lekin koi bachchon ne ratnon ko badhaaya hai aur koi ne ratnon ko badhaaya nahin। koi bharpoor hai;koi akhut maalaamaal hai;koi samay pramaan kaarya mein laga rahe hain, koi sada kaarya mein lagaakar ek ka padmaguna badha rahe hain; koi jitna kaarya mein lagaana chaahiye utna laga nahin sakte,isliye ratnon ki value ko jitna samajhna chaahiye utna samajh nahin rahe hain। jitna mila hai woh buddhi mein dhaaran to kiya lekin kaarya mein laane se jo sukh, khushi,shakti,shanti aur nirvighna sthiti ki praapti ki anubhooti honi chaahiye woh nahin kar paate hain। iska kaaran manan shakti ki kami hai। kyonki manan karna arthaat jeevan mein samaana,dhaaran karna। manan na karna arthaat sirf buddhi tak dhaaran karna। woh jeevan ke har kaarya mein, har karma mein lagaate hain - chaahe apne prati, chaahe anya aatmaon ke prati aur doosre sirf buddhi mein yaad rakhte arthaat buddhi se dhaaran karte hain।

jaise koi bhi sthool khazaane ko sirf tijori mein va locker mein rakh lo aur samay pramaan va sada kaam mein nahin lagaao to woh khushi ki praapti nahin hoti hai,sirf dil ka dilaasa rehta hai ki hamaare paas hai। na badhega, na anubhooti hogi। aise, gyaan ratna agar sirf buddhi mein dhaaran kiya,yaad rakha,mukh se varnan kiya - point bahut achhi hai, to thode samay ke liye achhi point ka achha nasha rehta hai lekin jeevan mein, har karma mein un gyaan ratnon ko laana hai। kyonki‘gyaan ratna bhi hain,gyaan roshni bhi hai, gyaan shakti bhi hai'। isliye agar isi vidhi se karma mein nahin laaya to badhta nahin hai va anubhooti nahin hoti hai। gyaan padhaai bhi hai, gyaan ladaai ke shreshtha shastra bhi hain। yeh hai gyaan ka moolya। moolya ko jaanna arthaat kaarya mein lagaana aur jitna - jitna kaarya mein lagaate hain utna shakti ka anubhav karte jaate hain। jaise shastra ko samay pramaan use nahin karo to woh shastra bekaar ho jaata hai arthaat uski jo value hai, woh utni nahin rehti hai। gyaan bhi shastra hai, agar maayaajeet banne ke samay shastra ko kaarya mein nahin lagaaya to jo value hai, usko kam kar diya kyonki laabh nahin liya। laabh lena arthaat value rakhna। gyaan ratna sabke paas hain kyonki adhikaari ho। lekin bharpoor rahne mein nambarvaar ho। mool kaaran sunaaya - manan shakti ki kami।

manan shakti baap ke khazaane ko apna khazaana anubhav karaane ka aadhaar hai। jaise sthool bhojan hajam hone se khoon ban jaata hai। kyonki bhojan alag hai, usko jab hajam kar lete ho to woh khoon ke roop mein apna ban jaata hai। aise manan shakti se baap ka khazaana so mera khazaana - yeh apna adhikaar, apna khazaana anubhav hota hai। baapdaada pahle bhi sunaate rahe hain - ‘apni ghot to nasha chadhe' arthaat baap ke khazaane ko manan shakti se kaarya mein lagaakar praaptiyon ki anubhooti karo to nasha chadhe। sunne ke samay nasha rehta hai lekin sada kyon nahin rehta? iska kaaran hai ki sada manan shakti se apna nahin banaaya hai। manan shakti arthaat saagar ke tale mein jaakar antarmukhi ban har gyaan - ratna ki guhyata mein jaana। sirf repeat nahin karna hai lekin har ek point ka raaz kya hai aur har point ko kis samay, kis vidhi se kaarya mein lagaana hai aur har point ko anya aatmaon ke prati seva mein kis vidhi se kaarya mein lagaana hai - yeh chaaron hi baaten har ek point ko sunkar manan karo। saath - saath manan karte practical mein us raaz ke ras mein chale jaao, nashe ki anubhooti mein aao। maaya ke bhinna - bhinna vighnon ke samay va prakriti ke bhinna - bhinna paristhitiyon ke samay kaam mein lagaakar dekho ki jo mainne manan kiya ki is paristhiti ke pramaan va vighna ke pramaan yeh gyaan ratna maayaajeet bana sakte va banaane vaala hai, woh practical hua arthaat maayaajeet bane?va socha tha maayaajeet banenge lekin mehnat karni padi va samay vyartha gaya? isse siddha hai ki vidhi yathaartha nahin thi, tab siddhi nahin mili। use karne ka tareeka bhi chaahiye, abhyaas chaahiye। jaise science vaale bhi bahut powerful bombs (shaktishaali gole) le jaate hain। samajhte hain - bas, isse ab to jeet lenge। lekin use karne vaale ko use karne ka dhang nahin aata to powerful bomb hote bhi yahaan - vahaan aise sthaan par jaakar girta jo vyartha chala jaata। kaaran kya hua? use karne ki vidhi theek nahin। aise,ek - ek gyaan - ratna ati amoolya hai। gyaan ratna va gyaan ki shakti ke aage paristhiti va vighna thahar nahin sakte। lekin agar vijay nahin hoti hai to samjho use karne ki vidhi nahin aati hai। doosri baat - manan shakti ka abhyaas sada na karne se samay par bina abhyaas ke achaanak kaam mein lagaane ka prayatna karte ho, isliye dhokha kha lete ho। yeh albelaapan aa jaata hai - gyaan to buddhi mein hai hi, samay par kaam mein laga lenge। lekin sada ka abhyaas,bahutkaal ka abhyaas chaahiye। nahin to us samay sochne vaale ko kya title denge? - kumbhakran। usne kya albelaapan kiya? yahi socha na ki aane do, aayenge to jeet lenge। to aisa sochna ki samay par ho jaayega, yeh albelaapan dhokha de deta hai। isliye har roj manan shakti ko badhaate jaao।

revise course mein va avyakt, jo roj sunte ho,to manan shakti ko badhaane ke liye roj koi - na - koi ek vishesh point buddhi mein dhaaran karo aur jo 4 baaten sunaai, us vidhi se abhyaas karo। chalte - phirte,har karma karte - chaahe sthool karma karte ho,chaahe seva ka karma karte ho lekin saara din manan chalta rahe। chaahe business karte ho va daphtar ka kaam karte ho, chaahe sevaakendra mein seva karte ho lekin jis samay bhi buddhi thoda free ho to apne manan shakti ke abhyaas ko baar - baar daudaao। kai kaam aise hote hain jo karma kar rahe hain, uske saath - saath aur bhi soch sakte hain। bahut thoda samay hota hai jo aisa kaarya hota hai jismen buddhi ka full attention dena hota hai, nahin to double taraph buddhi chalti rehti hai। aisa samay agar apni dincharya mein note karo to beech - beech mein bahut samay milta hai। manan shakti ke liye vishesh samay mile tab abhyaas karenge - aisi koi baat nahin hai। chalte - phirte bhi kar sakte ho। agar ekaanta ka samay milta hai to bahut achha hai। aur maheenta mein jaae har point ke spashteekran mein jaao, vistaar mein laao to bahut maja aayega। lekin pahle point ke nashe ki sthiti mein sthit ho ke karna, phir bor nahin honge। nahin to sirf repeat kar lete hain, phir kehte - yeh to ho gaya, ab kya karen?

jaise kai svadarshan - chakra chalaane mein hansaate hain na - chakra kya chalaayen, 5minute mein chakra poora ho jaata hai! sthiti ka anubhav karne nahin aata hai to sirf repeat kar lete hain - satayug, treta,dvaapar,kaliyug,itne janma,itni aayu,itna samay hai…bas, poora ho gaya। lekin svadarshan chakradhaari banna arthaat knowledgeful,powerful sthiti ka anubhav karna। point ke nashe mein sthit rehna,raaz mein raazayukta banna - aisa abhyaas har point mein karo। yeh to ek svadarshan chakra ki baat sunaai। aise,har gyaan ki point ko manan karo aur beechbi cha mein abhyaas karo। aise nahin sirf aadha ghanta manan kiya। samay mile aur buddhi manan ke abhyaas mein chali jaae। manan shakti se buddhi busy rahegi to svatah hi sahaj maayaajeet ban jaayenge। busy dekh maaya aape hi kinaara kar legi। maaya aaye aur yuddha karo, bhagaao; phir kabhi haar,kabhi jeet ho - yeh cheenti maarga ka purooshaartha hai। ab to teevra purooshaartha karne ka samay hai,udne ka samay hai। isliye manan shakti se buddhi ko busy rakho। isi manan shakti se yaad ki shakti mein magna rehna - yeh anubhav sahaj ho jaayega। manan - maayaajeet aur vyartha sankalpon se bhi mukta kar deta hai। jahaan vyartha nahin,vighna nahin to samartha sthiti va lagan mein magna rahne ki sthiti svatah hi ho jaati hai।

kai sochte hain - beejroop sthiti ya shaktishaali yaad ki sthiti kam rehti hai ya bahut attention dene ke baad anubhav hota hai। iska kaaran agle baar bhi sunaaya ki leakage hai,buddhi ki shakti vyartha ke taraph bant jaati hai। kabhi vyartha sankalp chalenge, kabhi saadhaaran sankalp chalenge। jo kaam kar rahe hain usi ke sankalp mein buddhi ka busy rehna - isko kehte hain saadhaaran sankalp। yaad ki shakti ya manan shakti jo honi chaahiye woh nahin hoti aur apne ko khush kar lete ki aaj koi paap karma nahin hua, vyartha nahin chala, kisko duhkh nahin diya। lekin samartha sankalp, samartha sthiti, shaktishaali yaad rahi? agar woh nahin rahi to isko kahenge saadhaaran sankalp। karma kiya lekin karma aur yog saath - saath nahin raha। karma kartta bane lekin karmayogi nahin bane। isliye karma karte bhi, ya manan shakti ya magna sthiti ki shakti, donon mein se ek ki anubhooti sada rahni chaahiye। yeh donon sthitiyaan shaktishaali seva karaane ke aadhaar hain। manan karne vaale, abhyaas hone ke kaaran jis samay jo sthiti banaane chaahen woh bana sakenge। link rahne se leakage khatma ho jaayegi aur jis samay jo anubhooti - chaahe beejroop sthiti ki, chaahe pharishte roop ki, jo karna chaaho woh sahaj kar sakenge। kyonki jab gyaan ki smriti hai to gyaan ke simran se gyaandaata svatah hi yaad rehta। to samjha, manan kaise karna hai?kaha tha na ki manan ka phir sunaayenge। to aaj manan karne ki vidhi sunaai। maaya ke vighnon se sada vijayi banna va sada seva mein saphalta ka anubhav karna,iska aadhaar ‘manan shakti'hai। samjha?achha!

sarva gyaansaagar ke gyaani tu aatma bachchon ko, sada manan shakti dvaara sahaj maayaajeet banne vaali shreshtha aatmaon ko,sada manan shakti ke abhyaas ko aage badhaane vaale,manan se magna sthiti ka anubhav karne vaale, sada gyaan ke ratnon ka moolya jaanne vaale,sada har karma mein gyaan ki shakti ko kaarya mein laane vaale, aise sada shreshtha sthiti mein rahne vaale vishesh va amoolya ratnon ko baapdaada ka yaadapyaar aur namaste।''

party se avyakt baapdaada ki mulaakaatah - svayan ko teevra purooshaarthi aatmaayen anubhav karte ho?kyonki samay bahut teevragti se aage badh raha hai। jaise samay aage badh raha hai,to samay par manzil par pahunchne vaale ko kis gati se chalna pade? samay kam hai aur praapti jyaada karni hai। to thode samay mein agar jyaada praapti karni ho to teevra karna padega na। samay ko dekh rahe ho aur apne purooshaartha ki gati ko bhi jaante ho। to samay agar tej hai aur apni gati tej nahin hai to samay arthaat rachna aap rachta se bhi tej hui। rachta se rachna tej chali jaae to use achhi baat kahenge?rachna se rachta aage hona chaahiye। sada teevra purooshaarthi aatmaayen ban aage badhne ka samay hai। agar aage badhte koi saaeed scene ko bhi dekh rookte ho,to rookne vaale theek samay par pahunch nahin sakenge। koi bhi maaya ki aakarshan sidescene hai। sidescene par rookne vaala manjal par kaise pahunchega? isliye sadaiv teevra purooshaarthi ban aage badhte chalo। aise nahin samay par pahunch hi jaayenge,abhi to samay pada hai। aise sochkar agar dheemi gati se chalenge to samay par dhokha mil jaayega। bahut kaal ka teevra purooshaartha ka sanskaar ant mein bhi teevra purooshaartha ka anubhav karaayega। to sada teevra purooshaarthi। kabhi teevra, kabhi kamzor,nahin। aise nahin thodi - si baat hui kamzor ban jaao। isko teevra purooshaarthi nahin kahenge। teevra purooshaarthi kabhi rookte nahin, udte hain। to udte panchhi ban udti kala ka anubhav karte chalo। ek - do ko bhi sahayog de teevra purooshaarthi banaate chalo। jitni auron ki seva karenge utna svayan ka umang - utsaah badhta rahega।

vidaai ke samay (daadi jaanki ji videsh mein jaane ki chhutti baapdaada se le rahi hain)h -desh - videsh mein seva ka umang - utsaah achha hai। jahaan umang - utsaah hai,vahaan saphalta bhi hoti hai। sada yeh attention rakhna hai ki pahle apna umang - utsaah ho, sangathan ki shakti ho। sneh ki shakti,sahayog ki shakti ho to saphalta usi anusaar hoti hai। yeh hai dharni। jaise dharni theek hoti hai to phal bhi aisa hi nikalta hai aur agar tempreri (asthaayi) dharni ko theek karke beej daal do to phal bhi thode samay ke liye milega, sadaakaal ke liye phal nahin milega। to saphalta ke phal ke pahle sada dharni ko check karo। baaki jo karte hain unka jama to ho hi jaata hai। abhi bhi khushi milti hai aur bhavishya to hai hi। achha!