Avyakt murli for Tuesday 7 November 1989

> 07-11-89 om shanti avyakt baapdaadaamdhuban

teenon sambandhon ki sahaj aur shreshtha paalna

avyakt baapdaada apne bachchon prati bole –

aaj vishwa-snehi baapdaada chaaron or ke vishesh baap-snehi bachchon ko dekh rahe hain। baap ka sneh aur bachchon ka sneh donon ek-do se jyaada hi hai। sneh man ko aur tan ko alaukik pankh lagaae sameep le aata hai। sneh aisa roohaani aakarshan hai jo bachchon ko baap ki taraph aakarshit kar milan manaane ke nimitta ban jaata hai। milan mela chaahe dil se, chaahe saakaar shareer se-donon anubhav sneh ki aakarshan se hi hota hai। roohaani parmaatma-sneh ne hi aap braahmanon ko divya janma diya। aaj abhi-abhi roohaani sneh ki searchlight dvaara chaaron or ke brahman bachchon ki snehmayi soorten dekh rahe hain। chaaron or ke anek bachchon ke dil ke sneh ke geet, dil ka meet baapdaada sun rahe hain। baapdaada sarva snehi bachchon ko chaahe paas hain, chaahe door hote bhi dil ke paas hain,sneh ke return mein vardaan de rahe hain –

‘‘sada khushanseeb bhav! sada khushnuma bhav। sada khushi ki khuraak dvaara tandaroosta bhav! sada khushi ke khazaane se sampanna bhav!''

roohaani sneh ne divya janma diya, ab vardaata baapdaada ke vardaanon se divya paalna ho rahi hai। paalna sabhi ko ek dvaara,ek hi samay,ek jaisi mil rahi hai। lekin mili hui paalna ki dhaarna nambarvaar bana deti hai। vaise vishesh teenon sambandh ki paalna ati shreshtha bhi hai aur sahaj bhi hai। baapdaada dvaara varsa milta,varse ki smriti dvaara paalna hoti - ismen koi mushkil nahin। shikshak dvaara do shabdon ki padhaai ki paalna mein bhi koi mushkil nahin। satguru dvaara vardaanon ke anubhooti ki paalna - ismen bhi koi mushkil nahin। lekin kai bachchon ke dhaarna ki kamzori ke kaaran samay-prati-samay sahaj ko mushkil banaane ki aadat ban gai hai। mehnat karne ke sanskaar sahaj anubhav karne se majboor kar dete hain aur majboor hone ke kaaran,dhaarna ki kamzori ke kaaran parvash ho jaate hain। aise parvash bachchon ki jeevanleela dekh baapdaada ko aise bachchon par raham aata hai। kyonki baap ke roohaani sneh ki nishaani yahi hai-koi bhi bachche ki kami,kamzori baap dekh nahin sakte। apne parivaar ki kami apni kami hoti hai, isliye baap ko ghrina nahin lekin raham aata hai। baapdaada kabhi-kabhi bachchon ki aadi se ab tak ki janmapatri dekhte hain। kai bachchon ki janmapatri mein raham-hi-raham hota hai aur kai bachchon ki janmapatri raahat dene vaali hoti hai। apni aadi se ab tak ki janmapatri check karo। apne aapko dekh karke jaan sakte ho - teenon sambandh ke paalna ki dhaarna sahaj aur shreshtha hai?kyonki sahaj chalna do prakaar ka hai-ek hai vardaanon se sahaj jeevan aur doosri hai laaparvaahi,don't-care - isse bhi sahaj chalte hain। vardaanon se va roohaani paalna se sahaj chalne vaali aatmaayen careful hongi, don't-care nahin hongi। lekin attention ka tension nahin hoga। aisi careful aatmaon ka samay, saadhan aur circumstance pramaan brahman parivaar ka saath,baap ki vishesh madad sahayog deti hai। isliye sab sahaj anubhav hota hai। to check karo-yeh sab baaten meri sahayogi hain? in sab baaton ka sahayog hi sahajyogi bana deta hai। nahin to kabhi chhota sa circumstance,saadhan, samay,saathi aadi bhale hote cheenti samaan hain lekin chhoti cheenti mahaarthi ko bhi moorchchhit kar deti hai। moorchchhit arthaat vardaanon ki sahaj paalna ki shreshtha sthiti se neeche gira deti hai। majboor aur mehnat-yeh donon moorchchhit ki nishaani hain। to is vidhi se apni janmapatri ko check karo। samjha kya karna hai?

achha - sada teenon sambandhon ki paalna mein palne vaale,sada santushtamni ban santushta rahne aur santushtata ki jhalak phailaane vaale, sada fast purushaarthi ban svayan ko first janma mein first adhikaar praapta karaane vaale,aise khushanseeb bachchon ko vardaata baap ka yaadapyaar aur namaste।

party se mulaakaat

sabhi door-door se aaye hain। sabse door se to baapdaada aate hain। aap kahenge-hamko to mehnat lagti hai। baapdaada ke liye bhi,behad mein rahne vaale aur had mein pravesh ho-yeh bhi to nyaari baat ho jaati hai। phir bhi loan lena hota hai। aap log ticket lete ho baap loan leta hai। sabhi ko vardaan mile?chaahe 7-8taraph se aaye ho lekin har zone ka koi-na-koi hai hi। isliye sab zone yahaan haajir hain। videsh bhi aur desh bhi hai। international group ho gaya na। achha।

tamilnaadu group:- sabse bada group tamilnaadu hai। tamilnaadu ki visheshta kya hai? sneh ke vibration ko catch karte hain। baap se sneh avinaashi lift ban jaati hai। seedhi pasanda hai ya lift pasanda hai? seedhi hai mehnat, lift hai sahaj। to sneh mein kabhi bhi albele nahin hona, nahin to lift jaam ho jaayegi। kyonki agar light banda ho jaati hai to lift ka kya haal hota hai? light banda hone se,connection khatma hone se jo sukh ki anubhooti honi chaahiye woh nahin hoti। to sneh mein albelaapan hai to baap se current nahin milegi, isliye phir lift kaam nahin karegi। sneh achha hai, achhe mein achha karte rehna। to is lift ki gift ko saath le jaana।

maisoor group:- maisoor ki visheshta kya hai? maisoor nivaasi bachchon ko baapdaada gift de rahe hain -’’sangamayug ki suhaavni mausam ka phal''। sangamayug ka phal kya hai? mausam ka phal jo hota hai woh meetha hota hai। bina mausam ka phal kitna bhi badhiya ho lekin achha nahin hota। to maisoor nivaasi bachchon ko sangamayug ke mausam ka phal hai ‘‘pratyakshaphal''। abhi-abhi shreshtha karma kiya aur abhi- abhi karma ka pratyaksha phal mila। isliye sada apne ko is nashe ki smriti mein rakhna ki ham sangamayug ke mausam ka pratyakshaphal khaane vaale hain,praapta karne vaale hain। vaise bhi vriddhi achhi kar rahe hain। tamilnaadu mein bhi vriddhi bahut achhi ho rahi hai।

eastern zone group:- east se kya nikalta hai? soorya nikalta hai na। to eastern zone vaalon ko baapdaada ek vishesh pushpa de rahe hain। woh hai visheshta ke aadhaar par। ‘‘sooryamukhi''jo sada hi soorya ki sakaash mein khila hua rehta hai। mukh soorya ki taraph hota hai isliye sooryamukhi kaha jaata hai aur uski soorat bhi dekhenge to jaise soorya ki kirnen hoti hain - aise chaaron or uski pankhudi kirnon ke samaan saarkil mein hoti hain। to sada gyaan-soorya baapdaada ke sammukh rahne vaale, kabhi bhi gyaansu rya se door hone vaale nahin। sada sameep aur sada sammukh। isko kehte hain sooryamukhi phool। to aise sooryamukhi pushpa ke samaan sada gyaan-soorya ke prakaash se svayan bhi chamakne vaale aur doosron ko bhi chamkaane vaale - yeh hai eastern zone ki visheshta। vaise bhi dekho gyaan soorya eastern zone se pragat hua hai। praveshta to hui na! to eastern zone vaale sabko apne raajya,din mein le jaane vaale, roshni mein le jaane vaale hain।

banaaras group:- banaaras ki visheshta kya hai? har ek mein roohaani ras bharne vaale। bina ras nahin,ras ke bina nahin hain। lekin sarva mein roohaani ras bharne vaale, sabhi ko parmaatma-sneh ka, prem ka ras anubhav karaane vaale। kyonki jab baap ke prem ke ras mein bharpoor ho jaate hain to aur sarva ras pheeka lagta hai। aatmaon mein parmaatma-prem ka ras bharne vaale। kyonki vahaan bhakti ka ras bahut hai। bhakti ke ras vaalon ko parmaatma-prem ras ka anubhav karaane vaale। sada jyaada ras kismen hota hai? banaaras vaale sunaao। rasgulle mein। dekho naam hi pahle ras se shuru hota hai। to sada gyaan ka rasgulla khaane vaale aur khilaane vaale। to sadaiv amritvele pahle man ko,mukh ko rasgulle se meetha banaane vaale aur auron ko bhi man se aur mukh se meetha banaane vaale। isliye banaaras ko mithaai de rahe hain - rasgulla।

bambai group:- baambe ko pahle se hi vardaan mila hua hai - nardesaavar arthaat sabhi ko saahookaar banaane vaala। nardesaavar ka arth hi hai jo sada dhan se sampanna rehta hai। baambe vaalon ki visheshta hai -’’gareeb ko saahookaar banaane vaale''jo baap ka title hai -’’gareeb nivaaj।'' to baambe vaalon ko bhi baapdaada title de rahe hain -’’gareeb-nivaaj baap ke bachche,gareebon ko saahookaar banaane vaale।''isliye sada svayan bhi khazaanon se sampanna aur auron ko bhi sampanna banaane vaale। isliye visheshta hai gareeb nivaaj baap ke sahayogi saathi। to baambe vaalon ko title de rahe hain। mithaai nahin,title।

kullu-manaali group:- kullu manaali ki visheshta kya hai? kullu mein devtaaon ka mela lagta hai jo aur kahin nahin lagta। to kullu aur manaali vaalon ko devtaaon ke milan ka sthaan kaha jaata hai। to devta ka arth hi hai ‘‘divyagundhaari''। divyagunon ki dhaarna ka yaadgaar devta roop hai। to devtaaon ke pyaar ka, milan ka symbol is dharni ka hai। isliye baapdaada aise dharni ke nivaasi bachchon ko vishesh divyagunon ka guldasta gift mein de rahe hain। isi divyagunon ke guldaste dvaara chaaron or aatma aur paramatma ka mela karte rahenge। woh devtaaon ka mela karte hain, aap divyagunon ke guldaste dvaara aatma-paramatma ka mela mana bhi rahe ho lekin aur jor-shor se mela manaao jo sab dekhen। devtaaon ka mela to devtaaon ka raha lekin yeh mela to sarvashreshtha mela hai। isliye divyagunon ke khushboodaar guldaste ki gift ko sada apne saath rakho।

meeting vaalon ke prati:- meeting vaale kislie aaye hain? setting karne। programme ki setting, speakers ki setting। seating kar setting karne ke liye aaye ho। jaise speech ke liye set kiya hai ya programme banaaya hai, aise hi speakers ya jo bhi aane vaale observer hain,unhon ko abhi se aise shreshtha vibration do jo woh sirf speech ki stage thode time ke liye set nahin karen lekin sada apne shreshtha stage par set ho jaaen। isliye baapdaada meeting vaalon ko avinaashi setting ki masheen gift mein dete hain jisse set karte rehna। aajkal to machinery yug hai na। manushyon dvaara jo kaarya bahut samay leta hai vo machinery dvaara sahaj aur jaldi ho jaata hai। to abhi apne setting ki machinery aise prayog mein laao jo bahut jaldi-se-jaldi setting hoti jaae। kyonki apni sunahri duniya va sukhmay duniya ke plan anusaar seat to sabki set karni hai na। praja ko bhi set karna hai to praja ki praja ko bhi set karna hai। raaje-raani to set ho rahe hain lekin royal family hai, saahookaar phaimileej hain,phir praja hai, daas-daasi hain - kitni setting karni hai! to ab setting ki machinery ko meeting vaale vishesh fast banaao। fast banaana arthaat apne ko fast purushaarthi banaana। yeh uska switch hai। masheen ka switch hota hai na। to fast machinery ka switch hai-fast purushaarthi banna arthaat fast setting ki machinery ko on karna। badi jimmevaari hai। to abhi apne raajdhaani ke setting ki machinery ko fast karo।

double videshi group:- double videshi bachche aajkal satellite ki yojna kar rahe hain। baap ko pratyaksha karne ki dhun mein bahut achhe aage badh rahe hain। isliye baapdaada ‘sada set double light rahne' ki gift de rahe hain। vo satellite ka programme karne ka soch rahe hain aur baapdaada sada set double light ki gift de rahe hain। sada apni double light ki sthiti mein set rahne vaale - aise double videshi bachchon ko baapdaada dilaaraam apne dil ka sneh gift mein de rahe hain। America nivaasi bachche vishesh yaad kar rahe hain। bahut achhe umang-utsaah se vishwa mein seva karne ka saadhan achha bana hai। yu.N. bhi seva ki saathi bani hui hai। bhaarat seva va foundation hai। isliye bhaarat ka bhi vishesh serviceable saathi (jagdeesh ji) gaye hue hain। foundation bhaarat hai aur pratyakshata ke nimitta videsh। pratyakshata ka aavaaj door se bhaarat mein nagaada bankar ke aayega। bachchon ke vibration aa rahe hain। vaise to landan nivaasi bhi saathi hain,Australia vaale bhi vishesh seva ke saathi hain, aphreeka bhi kam nahin। sabhi deshon ka sahayog achha hai। baapdaada deshvidesh ke har ek nimitta bane hue sevaadhaari bachchon ko apni-apni visheshta pramaan vishesh yaadapyaar de rahe hain। har ek ki mahima apni-apni hai। ek-ek ki mahima varnan karen to kitni ho! lekin baapdaada ke dil mein har ek bachche ki visheshta ki mahima samaai hui hai।

madhuban nivaasi sevaadhaari bhi seva ke himmat ki madad dene vaale hain। isliye jaise baap ke liye gaaya hua hai-’’himmate bachche madde baap'', isi reeti se jo bhi seva chalti hai, season chalti hai-to madhuban nivaasi bhi himmat ke stambha bante hain aur madhuban vaalon ki himmat se aap sabko rahne, khaane, sone,nahaane ki madad milti hai। isliye baapdaada sabhi madhuban nivaasi bachchon ko himmat ki mubaarak de rahe hain। achha।