Avyakt murli for Thursday 10 December 1992

>

10-12-92 om shanti avyakt baapdaadaamdhuban

poorvaj aur poojya ki smriti mein rahkar sarva ki alaukik paalna karo

apne roohaani social sevaadhaari bachchon prati avyakt baapdaada bole -

aaj vishwa-rachta baap apni shreshtha rachna ko dekh rahe hain। sarva rachna mein se shreshtha rachna aap brahman aatmaayen ho kyonki aap hi vishwa ki poorvaj aatmaayen ho। ek taraph poorvaj ho, saath-saath poojya aatmaayen bhi ho। is kalpa-vriksha ki foundation arthaat jad aap brahman aatmaayen ho। is vriksha ke mool aadhaar-’tana’bhi aap ho। isliye aap sarva aatmaon ke liye poorvaj ho। srishti-chakra ke andar jo vishesh dharma-pita kahlaaye jaate hain un dharma-pitaaon ko bhi aap poorvaj aatmaon dvaara hi baap ka sandesh praapta hota hai, jis aadhaar se hi samay pramaan vo dharma-pitaayen apne dharma ki aatmaon prati sandesh dene ke nimitta bante hain। jaise brahma baap great-great grand father hai, to brahma ke saath aap brahman aatmaayen bhi saathi ho। isliye aap poorvaj aatmaayen gaai hui ho।

poorvaj aatmaon ka,direct chaahe indirect,sarva aatmaon se connection hai। jaise-vriksha ki sarva taal-taaliyon ka sambandh jad se va tana se zaroor hota hai। chaahe kisi bhi dharma ki chhoti va badi taal-taaliyaan hon lekin sambandh svatah hi hota hai। to poorvaj hue na। aadha kalpa raajya-adhikaari banne ke baad phir poojya aatmaayen bante ho। poojya banne mein bhi aap aatmaon jaisi pooja aur kisi bhi dharma ke aatmaon ki nahin hoti। jaise aap poojya aatmaon ki vidhipoorvak pooja hoti hai,aise koi dharma-pita ki bhi pooja nahin hoti। baap ke kaarya mein jo aap brahman saathi bante ho,unhon ki bhi devta va devi ke roop mein vidhipoorvak pooja hoti hai। aur koi bhi dharma-pita ke saathi dharma ki paalna karne vaali aatmaon ki vidhipoorvak pooja nahin hoti, gaayan hota hai। statue (Statue) banaate hain lekin aap jaise poojya nahin bante।

aapka gaayan bhi hota hai to pooja bhi hoti hai। gaayan ki vidhi bhi aap brahman aatmaon ki sabse nyaari hai। jaise aap devaatmaaon ka gaayan bahut sundar roop se keertan ke roop mein hota hai,aarti ke roop mein hota hai,aise anya aatmaon ka gaayan isi prakaar se nahin hota। aise kyon hota? kyonki aap shreshtha rachna poorvaj aur poojya ho। aadi aatmaayen aap brahman aatmaayen ho kyonki aadi dev brahma ke sahayogi shreshtha kaarya ke nimitta bane ho। anaadi roop mein bhi param aatma ke ati sameep rahne vaale ho। aatmaon ka jo chitra dikhaate ho usmein sabse sameep aatmaayen kaunsi dikhaate ho? usmein aap ho। to anaadi roop mein bhi ati sameep ho jisko double videshi kehte hain-nearest aur dearest। aise apne ko samajhte ho?

poorvaj ka kya kaam hota hai? poorvaj sabhi ki paalna karte hain। badon ki paalna hi prasiddha hoti hai। to aap sabhi poorvaj aatmaayen sarva aatmaon ki paalna kar rahe ho? ya sirf apne aane vaale students ki paalna karte ho? va sambandh-samparka vaali aatmaon ki paalna karte ho? saare vishwa ki aatmaon ke poorvaj ho va sirf brahman aatmaon ke poorvaj ho? jo jad va tana hota hai woh saare vriksha ke liye hota hai। va sirf apne tana ke liye hi hota hai? sab taal-taaliyon ke liye hota hai na। jad athva tana dvaara saare vriksha ke patton ko paani milta hai। va sirf thodi taal-taaliyon ko paani milta hai? sabko milta hai na। last vaale patton ko bhi milta hai। itna behad ka nasha hai? va behad se had mein bhi aa jaate ho? kitni seva karni hai! har ek patte ko paani dena hai arthaat sarva aatmaon ki paalna karne ke nimitta ho।

kisi bhi dharma ki aatmaon ko milte ho va dekhte bhi ho to ‘‘he poorvaj aatmaayen! aise anubhav karti ho ki yeh sab aatmaayen hamaare great-great grand father ki vanshaavli hai,ham brahman aatmaayen bhi master great-great grand father hain arthaat poorvaj hain,yeh sab hamaare hain?’’ va sirf brahman aatmaayen hamaari hain? jab bhaai-bhaai kehte hain to aap poorvaj aatmaayen bade bhaai arthaat baap samaan ho। is smriti ko hi practical life mein anubhav karna hai aur karaana hai। aap sabhi poorvaj aatmaon ki paalna ka swaroop kya hai? laukik jeevan mein bhi paalna ka aadhaar kya hota hai?paalna karna arthaat kisi ko bhi shaktishaali banaana। kisi bhi vidhi se,saadhan se paalna dvaara shaktishaali banaate-chaahe bhojan dvaara, chaahe padhaai dvaara। lekin paalna ka pratyakshasvaroop aatma mein shakti, shareer mein shakti aati hai। to paalna ka pratyakshasvaroop hua shaktishaali banaana।

aap poorvaj aatmaon ke paalna ki vidhi kya hai? alaukik paalna ka swaroop hai-svayan mein baap dvaara praapta hui sarva shaktiyaan anya aatmaon mein bharna। jis aatma ko jis shakti ki aavashyakta hai,uski us samay us shakti dvaara paalna karna-aisi paalna karni aati hai?poorvaj to ho na। sabhi poorvaj aatmaayen ho ki chhote ho?sabhi poorvaj hain ya koi-koi vishesh aatmaayen hain?to poorvajon ko paalna karni aati hai na। sirf centre ki paalna karte ho ya saare vishwa ki aatmaon ki paalna karte ho? sirf pravritti ki paalna karte ho va vishwa ki paalna karte ho?vartamaan samay aap poorvaj aatmaon ke paalna ki sarva aatmaon ko aavashyakta hai।

samaachaar to sab interest se sunte ho ki kya-kya ho raha hai। (aayodhya ki ghatna ke baad kai sthaanon se hinsa ke samaachaar mil rahe hain) lekin poorvaj aatmaon ne samaachaar sunne ke baad sarva ki paalna ki?ashaanti ke samay aap poorvaj aatmaon ka aur vishesh kaarya svatah hi ho jaata hai। to he poorvaj! apne paalna ki seva mein lag jaao। jaise ashaanti ke samay vishesh pulis va military samajhti hai ki yeh hamaara kaarya hai-ashaanti ko shant karna। order dvaara pahunch jaate hain aur aise time par vishesh attention se apni seva ke liye alert ho jaate hain। aap sabne halchal ka samaachaar to suna, lekin seva mein alert hue va sunne ka hi aananda liya?apna poorvajpan smriti mein aaya? sabhi aatmaon ki shanti ki shakti se paalna ki? ya yahi sochte rahe-yahaan yeh hua, vahaan yeh hua? vishesh aatmaon ki aise samay par seva ki ati aavashyakta hai। apni vritti dvaara, mansa-shakti dvaara vishesh seva ki? va jaise vidhipoorvak yaad mein rehte ho, seva karte ho, usi reeti hi kiya?aap roohaani social worker bhi ho। to roohaani social worker ne apni vishesh extra social seva ki?itni apni jimmevaari samjhi? ya programme milega to karenge? aise samay par second mein apni seva par alert ho jaana chaahiye। yahi aap poorvaj aatmaon ki jimmevaari hai।

abhi bhi vishwa mein halchal hai aur yeh halchal to samay prati samay badhni hi hai। aap aatmaon ka pharja hai-aise samay par aatmaon mein vishesh shanti ki, sahan shakti ki himmat bharna,light-house ban sarva ko shanti ki light dena। samjha,kya karna hai? abhi apni jimmevaari va pharja-adaai aur teevra gati se paalan karo jisse aatmaon ko roohaani shakti ki raahat mile, jalte hue duhkh ki agni mein sheetal jal bharne ka anubhav karen। yeh pharja-adaai kar sakte ho? door se bhi kar sakte ya jab saamne aayenge tab karenge? kar to rahe ho lekin abhi aur jaise halchal tej hoti jaati hai,to aapki seva bhi aur tej ho। samjha,poorvajon ki paalna kya hai? aise nahin ki poorvaj hain lekin paalna nahin kar sakte। poorvaj ka kaam hi hai-paalna dvaara shakti dena। shreshtha shaktishaali sthiti dvaara paristhiti ko paar karne ki shakti anubhav karaao। achha!

chaaron or ke sarva aadi dev brahma ke madadgaar aadi aatmaon ko,sarva aatmaon ke foundation poorvaj aatmaon ko,sada sarva aatmaon prati behad seva ki shreshtha vritti rakhne vaali aatmaon ko,sarva roohaani social sevaadhaari aatmaon ko baapdaada ka yaad, pyaar aur namaste।

daadiyon se mulaakaat

vartamaan samay ashaanta aatmaon ko shanti dena-yahi sabhi ka vishesh kaarya hai। merciful baap ke bachchon ko sarva aatmaon ke prati raham aata hai na। merciful kya karta hai?raham ka arth hi hai-kisi bhi prakaar ki himmat dena,nirbal aatma ko bal dena। to aatmaon ke duhkh ka sankalp to master sukhdaata aatmaon ke paas pahunchta hi hai। jaise vahaan duhkh ki lahar hai, aise hi vishesh aatmaon mein seva ki vishesh lahar chale-dena hai, kuchh karna hai। kya kiya-vo har ek ko seva ka extra chart check karna chaahiye। jaise saadhaaran seva chalti hai, vo to chalti hai। lekin vartamaan samay vaayumandal dvaara,vritti dvaara seva ka vishesh attention rakho। isi se sva ki sthiti bhi svatah hi shaktishaali ho jaayegi। aisi lahar phailaai hai? vishwa ke raaje bante hain to sarva aatmaon ke prati lahar honi hai na। vanchit koi aatma na rah jaaye। chaahe anya dharma ki aatmaayen hon lekin hain to apni vanshaavli। chaahe koi bhi dharma ki aatmaayen hain lekin jad to ek hi hai। yeh lahar hai? (nahin hai) attention please!

avyakt baapdaada ki personal mulaakaat

group nan.1

vyartha ke prabhaav mein aane vaale nahin, apna shreshtha prabhaav daalne vaale bano

sada apne ko purooshaartha mein aage badhne vaali aatma hoon-aise anubhav karte ho? purooshaartha mein kabhi bhi kabhi thaharti kala,kabhi utarti kala-aisa nahin hona chaahiye। kabhi bahut achha,kabhi achha,kabhi thoda achha-aisa nahin। sada bahut achha। kyonki samay kam hai aur sampoorn banne ki manzil shreshtha hai। to apne bhi purooshaartha ki gati teevra karni pade। purooshaartha ke teevra gati ki nishaani hai ki woh sada double light hoga, kisi bhi prakaar ka bojh nahin anubhav karega। chaahe prakriti dvaara koi paristhiti aaye, chaahe vyaktiyon dvaara koi paristhiti aaye lekin har paristhiti,sva-sthiti ke aage kuchh bhi anubhav nahin hogi। sva-sthiti ki shakti par-sthiti se bahut oonchi hai,kyon?yeh sva hai, woh par hai। apni shakti bhool jaate ho tab hi par-sthiti badi lagti hai। sada double light ka arth hi hai ki light arthaat oonche rahne vaale। halka sada ooncha jaata hai, bojh vaala sada neeche jaata hai। aadha kalpa to neeche hi aate rahe na। lekin abhi samay hai ooncha jaane ka। to kya karna hai? sada oopar।

shareer mein bhi dekho to aatma ka nivaas-sthaan oopar hai, ooncha hai। paanv mein to nahin hai na। jaise shareer mein aatma ka sthaan ooncha hai,aise sthiti bhi sada oonchi rahe। brahman ki nishaani bhi oonchi choti dikhaate hain na। choti ka arth hai ooncha। to sthool nishaani iseelie dikhaai hai ki sthiti oonchi hai। shoodra ko neeche dikhaate hain,brahman ko ooncha dikhaate hain। to braahmanon ka sthaan aur sthiti-donon oonchi। agar sthaan ki yaad hogi to sthiti svatah oonchi ho jaayegi। braahmanon ki drishti bhi sada oopar rehti hai। kyonki aatma, aatmaon ko dekhti hai,aatma oopar hai to drishti bhi oopar jaayegi। kabhi bhi kisse milte ho ya baat karte ho to aatma ko dekhkar baat karte ho, aatma se baat karte ho। aapki drishti aatma ki taraph jaati hai। aatma mastak mein hai na। to oonchi sthiti mein sthit rehna sahaj hai।

jab aisi sthiti ho jaati hai to neeche ki baaton se, neeche ke vaayumandal se sada hi door rahenge, uske prabhaav mein nahin aayenge। achha prabhaav padta hai ya kharaab bhi pad jaata hai? agar pravritti mein kharaab vaayumandal ho,phir kya karte ho? prabhaavit hote hain? kharaab ko achha banaane vaale ho ya prabhaav mein aane vaale ho?kyonki maaya bhi dekhti hai ki-achha,anguli to pakad li hai। anguli ke baad haath pakdegi,haath ke baad paanv pakad legi। isliye prabhaav mein nahin aana। prabhaav mein aane vaale nahin, shreshtha prabhaav daalne vaale। to brahman aatma arthaat sada double light, oonche rahne vaale। isi smriti se aage udte chalo। achha!

sabhi khush rehte ho na। duhkh ki lahar to nahin aati?kyonki jo duhkhadhaam chhod chale unke paas duhkh ki lahar kaise aa sakti। sangam par duhkhadhaam aur sukhdhaam-donon ka gyaan hai। donon ke knowledgeful shaktishaali aatmaayen hain। galti se bhi duhkhadhaam mein ja nahin sakte। sada khush rahne vaalon ke paas duhkh ki lahar kabhi aa nahin sakti। achha! seva aur sva-unnati-donon ka balance rakho। aise nahin-seva mein masta ho gaye to sva-unnati bhool gaye। seva ka shauk jyaada hai। lekin donon ka balance। samjha?

achhe chal rahe hain lekin sirf achhe tak nahin rehna,aur achhe te achhe।

group nan.2

anek bhaavon ko samaapta kar shreshtha aatmik bhaav dhaaran karo

sabse sahaj aage badhne ki vidhi kya hai?aage to sabhi badh rahe ho lekin sabse sahaj vidhi kaunsi hai? yog bhi sahaj ho jaaye,uski vidhi kya hai? sabse sahaj vidhi hai-’’mera baba’’। aur kuchh bhi yaad na ho, har samay ek hi baat yaad ho -’’mera baba’’। kyonki man va buddhi kahaan jaati hai? jahaan meraapan hota hai। agar shareer-bhaan mein bhi aate ho to kyon aate ho?kyonki meraapan hai। agar ‘‘mera baba’’ ho jaata to svatah hi mere taraph buddhi jaayegi। sahaj saadhan hai-’’mera baba’’। meraapan na chaahte hue bhi yaad aata hai। jaise chaahte nahin ho ki shareer yaad aave,lekin kyon yaad aata hai? meraapan kheenchata hai na,na chaahte bhi kheenchata hai। jab yeh sada nishchay aur smriti mein rahe- ‘‘mera baba’’-to purooshaartha ki mehnat karne ke bajaae svatah hi meraapan kheenchega। to sahaj saadhan kya hua? iseelie‘ek’ ko hi yaad karo। ‘ek’ ko hi yaad karna sahaj hota hai।

jitna-jitna gahra sambandh juta hua hoga utni yaad sahaj hogi aur sahaj baat hi nirantar hoti hai। agar sahaj nahin hoga to nirantar nahin hoga। koi bhi mehnat ka kaam nirantar nahin kar sakte। saara din-raat koi ko mehnat ka kaam do to majboori se karega,lekin pyaar se nahin karega। to baapdaada sahaj karke deta hai। sahaj ke kaaran nirantar hona mushkil nahin hai। jo sada is smriti mein rehte hain unki nishaani kya hogi? ve sada khush rahenge। kyonki baap se praapti hoti hai। to praapti ki khushi hoti hai na। to ‘‘mera baba’’ ki smriti ki practical nishaani ‘khushi’hai। koi bhi baat ho jaaye lekin khushi nahin jaaye। kyonki praapti ke aage woh baat kya lagegi?kuchh bhi nahin lagegi। baap ka arth hi varse ki praapti hai। baap ka sambandh kyon pyaara lagta hai? kyonki varsa milta hai। to baap kehna arthaat varse ki yaad svatah hi aati hai। baap mila,varsa mila-to khushi hogi na। alpakaal ki praapti ki bhi khushi hoti hai। to yeh to avinaashi praapti hai, iski khushi bhi avinaashi honi chaahiye। to khush rehte ho? ya kabhi-kabhi rehte ho? sada khush rehte ho?jo apni cheej hoti hai woh kabhi bhoolti nahin hai। chaahe chhoti-si cheej bhi apni hai,to bhoolegi?to yeh ‘khushi’apna khazaana hai। baap ka khazaana so apna khazaana। apni cheej bhool nahin sakti। to nirantar yogi banna sahaj hai na। is sahaj vidhi se auron ko bhi sahaj praapti kara sakte ho। kyonki jab apne ko khushi praapta hoti to doosron ko khushi avashya denge। jisko koi achhi cheej milti hai to woh doosron ko dene bina nahin rah sakte।

sada apne ko jaise baap nyaara aur pyaara hai,aise nyaare aur pyaare anubhav karte ho?baap sabka pyaara kyon hai? kyonki nyaara hai। jitna nyaara bante hain utna sarva ka pyaara bante hain। nyaara kisse? pahle apni deh ki smriti se nyaara। jitna deh ki smriti se nyaare honge utne baap ke bhi pyaare aur sarva ke bhi pyaare honge। kyonki nyaara arthaat aatma-abhimaani। jab beech mein deh ka bhaan aata hai to pyaaraapan khatma ho jaata hai। isliye baap samaan sada nyaare aur sarva ke pyaare bano। aatma roop mein kisko bhi dekhenge to roohaani pyaar paida hoga na। aur dehbhaan se dekhenge to vyakta bhaav hone ke kaaran anek bhaav utpanna honge-kabhi achha hoga,kabhi bura hoga। lekin aatmik bhaav mein, aatmik drishti mein,aatmik vritti mein rahne vaala jiske bhi sambandh mein aayega ati pyaara lagega। to second mein nyaare ho sakte ho? ki time lagega?jaise shareer mein aana sahaj lagta hai, aise shareer se pare hona itna hi sahaj ho jaaye। koi bhi puraana svabhaav-sanskaar apni taraph aakarshit nahin kare aur second mein nyaare ho jaao। saare din mein, beech-beech mein yeh abhyaas karo। aise nahin ki jis samay yaad mein baitho us samay ashareeri sthiti ka anubhav karo। nahin। chalte-phirte beech-beech mein yeh abhyaas pakka karo-’’main hoon hi aatma!’’ to aatma ka swaroop jyaada yaad hona chaahiye na! sada khushi hoti hai na! kam nahin honi chaahiye, badhni chaahiye। iska saadhan bataaya-mera baba। aur kuchh bhi bhool jaaye lekin ‘mera baba’ yeh bhoole nahin। achha!

ab koi aisi nai invention nikaalo jo ‘‘kam kharcha baala nasheen’’ho। kharcha bhi kam ho, aavaaj bhi jyaada phaile। jaise koi samay tha pradarshani ki invention nikaali, mele ki invention nikaali। yeh naveenta thi na। lekin ab to puraani baat ho gai। aise koi nai invention nikaalo jo sabhi kahen ki hamko bhi aise karna hai। jaise abhi shanti-anubhooti ki nai baat nikaali to sab achha anubhav karte hain na। aise seva ki koi nai invention nikaalo। conference hona ya mela hona-yeh abhi puraani list mein aa gaya। to koi naveenta karke dikhaana। samjha?

svayan ko bhi aage badhaao aur seva ko bhi aage badhaao। kyonki sunaaya na-abhi behad ki seva karni hai! sarva dharma ki aatmaon ko bhi sandesh pahunchaana hai। to kitni seva abhi rahi hui hai! abhi teevra gati se seva ko badhaao। lekin sva ki unnati pahle, baad mein seva। sirf seva nahin। svaunnati aur seva ki unnati-jab donon saath hongi tab seva ki saphalta avinaashi hogi। nahin to thode samay ki saphalta hogi। achha! abhi dekhenge ki kya naveenta nikaalte ho?

group nan.2

pharishta banna hai to sarva lagaav ki janjeeron ko samaapta karo

baap samaan niraakaari aur aakaari-isi sthiti mein sthit rahne vaali aatmaayen anubhav karte ho?kyonki shiv baap hai niraakaari aur brahma baap hai aakaari। to aap sabhi bhi saakaari hote hue bhi niraakaari aur aakaari arthaat avyakt sthiti mein sthit ho sakte ho। ya saakaar mein jyaada aa jaate ho? jaise saakaar mein rehna natural ho gaya hai, aise hi main aakaari pharishta hoon aur niraakaari shreshtha aatma hoon-yeh donon smritiyaan natural hon। kyonki jisse pyaar hota hai, to pyaar ki nishaani hai samaan banna। baap aur daada-niraakaari aur aakaari hain aur donon se pyaar hai to samaan banna padega na। to sadaiv yeh abhyaas karo ki abhi-abhi aakaari,abhi-abhi niraakaari। saakaar mein aate bhi aakaari aur niraakaari sthiti mein jab chaahen tab sthit ho saken। jaise sthool karmendriyaan aapke control mein hain। aankh ko va mukh ko band karna chaaho to kar sakte ho। aise man aur buddhi ko usi sthiti mein sthit kar sako jismen chaaho। agar pharishta banne chaahen to second mein pharishta bano-aisa abhyaas hai ya time lagta hai?kyonki halchal jab badhti hai to aise samay par kaunsi sthiti banaani padegi?aakaari ya niraakaari। saakaar dehdhaari ki sthiti paas hone nahin degi, fail kar degi। abhi bhi dekho-kisi bhi halchal ke samay achal banne ki sthiti pharishta swaroop ya aatma-abhimaani sthiti hi hai। yahi sthiti halchal mein achal banaane vaali hai। to kya abhyaas karna hai? aakaari aur niraakaari। jab chaahen tab sthit ho jaae-iske liye saara din abhyaas karna pade, sirf amritvele nahin। beech-beech mein yeh abhyaas karo।

pharishta sada hi oopar se neeche aata hai,phir neeche se oopar ud jaata hai। pharishta second mein ooncha kyon ud jaata? kyonki uska koi lagaav nahin hota-na deh se, na deh ki puraani duniya se। to check karo ki lagaav ki koi janjeeren rahi hui to nahin hain? agar koi bhi lagaav ki janjeer va dhaaga laga hua hoga to ud sakenge? woh rassi va dhaaga kheenchakar neeche le aayega। to pharishta arthaat jiska puraani duniya se koi rishta nahin ho। aise hai ya thoda-thoda rishta hai? mote-mote dhaage khatma ho gaye। sookshm koi rah to nahin gaye? bahut maheen dhaage hain। aise na ho-mote-mote ko dekhkar samjho ki svatantra ho gaye aur jab udne lago to neeche aa jaao। to sookshm reeti se check karo। ansh-maatra bhi nahin ho। sunaaya tha na ki kai bachche kehte hain-ichchha nahin hai koi cheej ki lekin achha lagta hai। to yeh kya hua? ansh-maatra ho gaya na। jo cheez achhi lagegi woh apni taraph aakarshit karegi na। to ‘ichchha’ hai mota dhaaga aur ‘achha’ hai sookshm dhaaga। mota to khatma kar diya,lekin sookshm hai to udne nahin dega।

baap se pyaar arthaat baap samaan banna। roz pharishte ki baat sunte ho na। sirf sunte ho ya ban gaye ho?ban rahe hain ya ban gaye hain?kab tak banenge? vinaash tak? usse pahle banenge to uska hisaab hai। aise nahin-10 saal mein vinaash hoga to9 saal ke baad ek saal mein ban jaao। aise nahin karna। bahutkaal ka chaahiye। agar thode samay ka abhyaas hoga to thode samay to sthit honge lekin bahutkaal nahin ho sakenge, mehnat karni padegi। abhi mehnat kar lo,to us samay mehnat nahin karni padegi। agar mehnat karte-karte chale gaye to result kya hogi? kahaan jaayenge-sooryavansh mein ya chandravansh mein?to check karo aur change karo। jo kami ho usko bharte jaao। sampanna bano। sadaiv yaad rakho ki baap ko pyaar ka saboot dena hai-samaan banna hai। sada apne ko baap samaan banaane ka abhyaas aur teevra gati se badhaao। achha!

group nan.3

sada maalikpan aur baalakpan ke nashe mein rahne vaali shreshtha aatmaayen anubhav karte ho?jab chaaho maalikpan ki sthiti mein sthit ho jaao aur jab chaaho to baalakpan ki sthiti mein sthit ho jaao-aisa anubhav hai? ya jis samay baalak banna ho us samay maalik ban jaate aur jis samay maalik banna ho us samay baalak ban jaate? jab chaaho, jaise chaaho vaisi sthiti mein sthit ho jaao-aise hai?kyonki yeh double nasha sada hi nirvighna banaane vaala hai। jab bhi koi vighna aata hai to us samay jis sthiti mein sthit hona chaahiye,usmein sthit na hone kaaran vighna aata hai।

vighna-vinaashak aatmaayen ho ya vighna ke vash hone vaali ho? sadaiv yeh smriti mein rakho ki hamaara title hi hai ‘vighna-vinaashak’। vighna-vinaashak aatma svayan kaise vighna mein aayegi? chaahe koi kitna bhi vighna roop bankar aaye lekin aap vighna vinaash karenge। sirf apne liye vighna-vinaashak nahin ho lekin saare vishwa ke vighna-vinaashak ho। vishwa-parivartak ho। to vishwa-parivartak shaktishaali hote hain na। shakti ke aage koi kitna bhi shaktishaali ho lekin woh kamjor ban jaata hai। vighna ko kamjor banaane vaale ho, svayan kamjor banne vaale nahin। agar svayan kamjor bante ho to vighna shaktishaali ban jaata hai aur svayan shaktishaali ho to vighna kamjor ban jaata hai। to sada apne master sarvashaktivaan swaroop ki smriti mein raho।

suna to bahut hai, baaki kya raha? banna। sunne ka arth hi hai banna। to ban gaye ho?baap bhi aise shaktishaali bachchon ko dekh harshit hote hain। laukik mein bhi baap ko kaunse bachche pyaare lagte hain? jo aagyaakaari,follow father karne vaale honge। to aap kaun ho? follow father karne vaale ho। follow karna sahaj hota hai na। baap ne kaha aur bachchon ne kiya। sochne ki bhi aavashyakta nahin। karen,nahin karen,achha hoga,nahin hoga-yeh sochne ki bhi aavashyakta nahin। follow karna sahaj hai na। har karma mein kya-kya follow karo aur kaise karo-yeh bhi sabhi ko spashta hai। jo har kadam mein follow karne vaale hain unko kya nasha rehta hai? yeh nishchay ka nasha rehta hai ki har karma mein saphalta hui hi padi hai। hogi ya nahin hogi-nahin। hui hi padi hai। kyonki kalpa pahle bhi paandavon ki vijay hui na। paandavon ne kya kiya? bhagwan ki mat par chale arthaat follow kiya to vijay hui। to vahi kalpa pahle vaale ho na। to yeh nishchay svatah hi nasha dilaata hai। koi bhi baat mushkil nahin lagegi। to sada hi sahaj aur shreshtha praapti ka anubhav karte chalo। maalik so baalak hain-yeh double nasha samay pramaan practical mein laao। kabhi koi khitkhit bhi ho jaaye to bhi khushi kam na ho। sada khush raho। achha!

group nan.4

sirf kalyaankaari nahin, vishwa-kalyaankaari bano

apne ko sada sangamayugi kalyaankaari aatmaayen anubhav karte ho? sangamayug ek hi is srishti-chakra mein aisa yug hai jo chadhti kala ka yug hai। aur yug dheere-dheere neeche utaarte hain। satayug se kaliyug mein aate ho to kitni kalaayen kam ho jaati hain? to sabhi yugon mein utarte ho aur sangamayug mein chadhte ho। chadhne ke liye bhi lift milti hai। sabhi ko lift mili hai na। beech mein atak to nahin jaati hai? aise to nahin-kabhi atak jaao, kabhi latak jaao। aisi lift milti hai jo kabhi bhi na latkaane vaali hai, na at-kaane vaali hai। dekho, kitne lucky ho jo kalyaankaari yug mein aaye aur kalyaankaari baap mila। aapka bhi occupation hai vishwa-kalyaankaari। to baap bhi kalyaankaari,yug bhi kalyaankaari,aap bhi kalyaankaari aur aapka occupation bhi vishwa-kalyaankaari। to kitne lucky ho! achha, yeh lakka kitna samay chalega? saara kalpa ya aadha kalpa?jo kehte hain aadha kalpa, woh haath uthaao। jo kehte hain saara kalpa, woh haath uthaao। sabhi right ho। kyonki aadha kalpa raajya karenge, aadha kalpa poojya banenge। to yeh bhi lakka hi hai।

double videshi poojya banenge? aapke mandir hain?dekho, ek hi devta dharma hai jiske 33karod gaaye aur pooje jaate hain। aap usmein to ho hi na। achha, aabu mein apna mandir dekha hai? usmein aapki moorti hai? number lagaakar aaye ho ki yeh meri hai?jab baap ko follow karne vaale ho, to jaise baap brahma poojya banenge,to follow karne vaale bhi avashya poojya hi banenge। saara kalpa brahma baap ke saath raajya ka, pooja ka aur poojya banne ka-sab part bajaayenge। aisa nishchay hai? pooja bhi brahma baap ke saath shuru karenge। kiski pooja shuru karenge? aapne pooja ki hai?apni bhi pooja ki hai?devtaaon ki pooja ki to apni ki na। isliye gaaya hua hai-aape hi poojya, aape hi pujaari। itna brahma baap se pyaar hai jo sada hi saath rahenge। lekin kaun saath rahega? jo follow karne vaale hain। to jo bhi karma karte ho woh check karo ki brahma baap samaan shreshtha karma hai ya saadhaaran karma hai? jab vishesh karma karne vaale banenge tab hi vishesh brahma aatma ke saath part bajaayenge।

sada main vishwa-kalyaankaari aatma hoon-is smriti mein rahne se jo bhi karma karenge woh kalyaankaari karenge। kalyaankaari samajhne se sangamayug jo kalyaankaari hai woh bhi yaad aata hai aur kalyaankaari baap bhi svatah yaad aata hai। sirf kalyaankaari nahin, vishwa-kalyaankaari banna hai। sabse bade bhaagya ki nishaani yeh hai jo sangamayug par saadhaaran aatma bane ho। agar saahookaar hote to baap ke nahin bante, sirf kaliyug ki saahookaari hi bhaagya mein milti। to saadhaaran banna achha hai na। sthool dhan se saadhaaran ho lekin gyaan-dhan se saahookaar ho। to khushi hai na ki baap ne saare vishwa mein se humein apna banaaya। saara din khushi mein rehte ho?murli roz sunte ho? kabhi miss to nahin karte? miss karte ho to follow father nahin hua na। brahma baap ne ek din bhi murli miss nahin ki। achha!

madhuban nivaasi aur global hospital vaale-donon hi apni achhi seva kar rahe hain। ye global vaale shareeron ko nirogi banaae aatma ko shaktishaali bana rahe hain aur madhuban nivaasi sabhi ko santushta karne ki seva kar rahe hain। donon ki seva baapdaada dekh harshit hote hain। sevaadhaari bhi athak ban seva mein sada aage badhte rehte hain। sabhi ko seva ki mubaarak! saalgaanv mein bhi achhi pyaar se seva kar rahe hain,aapke pyaar ki seva saphalta ko sameep la rahi hai। neeche talahti vaale bhi achhi seva kar rahe hain। double videshi bhi achhi seva kar rahe hain। achhi kar rahe hain aur achhi rahegi। videsh mein bhi achhi seva ka umang hai। bhaarat aur videsh mein seva vriddhi ko praapta kar rahi hai aur teevra gati se vriddhi ko praapta karna hi hai। achha!

double videshi bhaai-bahnon prati baapdaada ka sandesh

sab seva ki lagan mein magna rahne vaale hain। sva-unnati aur seva ki unnati-donon ka balance badhaate hue aage badh rahe hain aur badha rahe hain। seva bhi ho rahi hai aur yaad mein bhi baithte hi hain। lekin abhi balance ke oopar aur attention dilaate chalo। kabhi seva mein bahut aage chale jaate, kabhi sva-unnati ki bhi lagna lag jaati hai। lekin donon saath-saath hon to saphalta sahaj aur jo chaahte hain vahi ho jaati hai। to yahi attention dilaate rehte ho na। jinko balance rakhna aata hai ve sada duaae lete hain aur duaae dete hain। balance ki praapti hai-blessing। balance vaale ko blessing nahin mile-yeh ho nahin sakta। to balance ki nishaani hai-blessing। yadi nahin milti to balance ki kami hai। aap sabhi ki paalna kisse hui? duaaon se aage badhe na। ki mehnat karni padi? maata,pita aur parivaar ki duaaon se sahaj aage badhte gaye aur abhi bhi duaae mil rahi hain। mahaarthiyon ki paalna kya hai?duaae na। aapko kitni duaae milti hain! to mahaarthi ki paalna hi duaae hain। achha!