Avyakt murli for Monday 18 January 1999

>

18-01-99 om shanti avyakt baapdaadaamdhuban

vartamaan samay ke pramaan vairaagya vritti ko emerge kar saadhna ka vaayumandal banaao

aaj sneh ke saagar baapdaada apne ati snehi bachchon se mil rahe hain। aaj ka din vishesh sneh ka din hai। amritvele se lekar chaaron or ke bachche sneh ki lahron mein lahra rahe hain। har ek bachche ke dil ka sneh dilaaraam baap ke paas pahunch gaya। baapdaada bhi sabhi bachchon ko sneh ke response mein sneh aur samartha-pan ka vardaan de rahe hain। aaj ke din ko baapdaada yagya ki sthaapna mein vishesh parivartan ka din kehte hain। aaj ke din brahma baap gupta roop mein backbone ban apne bachchon ko saakaar roop mein vishwa ke manch par pratyaksha kiya। isliye is divas ko bachchon ke pratyakshata ka din kaha jaata hai, samartha divas kaha jaata hai, will power dene ka divas kaha jaata hai। brahma baap gupta roop mein kaarya kara raha hai। alag nahin hai, saath hi hai sirf gupta roop mein kara raha hai। yeh avyakti divas bachchon ke kaarya ko teevra gati mein laane ka divas hai। abhi bhi har ek bachche ki chhatrachhaaya ban paalna ka karttavya kar rahe hain। jaise maa bachchon ke liye chhatrachhaaya hoti hai aise hi amritvele se lekar brahma maa chaaron taraph ke bachchon ki rekh-dekh karte rehte hain। saakaar mein nimitta bachche hain lekin bhaagya vidhaata brahma maa har bachche ke bhaagya ko dekh bachchon ko vishesh shakti,himmat,umang-utsaah ki paalna karte rehte hain। shiv baap to saath mein hai hi lekin vishesh brahma ka paalna ka part hai।

aaj ke din bhaagya vidhaata brahma har bachche ko vishesh sneh ke return mein vardaan ka bhandaar bhandaari ban baantate hain। jo bachcha jitna avyakt sthiti mein sthit ho milan manaate hain us har ek bachche ko jo vardaan chaahiye woh sahaj praapta hota hai। vardaanon ka khula bhandaar hai, jo chaahiye,jitna chaahiye utna praapta hone ka shreshtha divas hai। sneh ka return hota hai - sahaj vardaan ki gift। to gift mein mehnat nahin karni padti hai,sahaj praapti hoti hai। gift maangi nahin jaati hai,svatah hi praapta hoti hai। purooshaartha se vardaan ke anubhooti ki praapti alag cheez hai lekin aaj ke din brahma maa sneh ke return mein vardaan dete hain। to aaj ke din sabhi ne sahaj vardaan praapta hone ki anubhooti ki?abhi bhi sachche dil ke sneh ka return vardaan praapta kar sakte ho। vardaan praapta karne ka saadhan hai - dil ka sneh। jahaan dil ka sneh hai, vo sneh aisa khazaana hai jis khazaane dvaara, baapdaada dvaara jo chaahe avinaashi vardaan praapta kar sakte ho। woh sneh ka khazaana har bachche ke paas hai? sneh ka khazaana hai tab to pahunche ho na! sneh kheenchakar laaya hai aur sneh mein rehna bahut sahaj hai। purooshaartha ki mehnat nahin karni padti kyonki sneh ka anubhav har aatma ko hota hi hai। sirf ab jo bikhra hua sneh tha,kuchh kahaan,kuchh kahaan tha,woh bikhra hua sneh ek ke hi saath jod liya hai kyonki pahle alag-alag sambandh tha,ab ek mein sarva sambandh hain। to sahaj sarva sneh ek se ho gaya। isliye har ek kehta hai mera baba। to sneh kisse hota hai? mere se। sabhi kehte hain na mera baba, ya daadiyon ka baba hai? mahaarthiyon ka baba hai?sabka baba hai na! aaj ke din kitne baar har ek bachche ne dil se kaha - mera baba, mera baba। sabhi ne mera-baba, mera-baba kah rooh-roohaan ki na! saara din kya kiya?sneh ke pushpa baapdaada ko arpit kiye। baapdaada ke paas sneh ke pushpa bahut badhiya se badhiya pahunch rahe the। sneh to bahut achha raha, ab baap kehte hain sneh ka swaroop saakaar mein emerge karo। woh hai samaan banna। abhi yeh samaan banne ka lakshya to sabhi ke paas hai,abhi saakaar mein lakshan dikhaai den। jis bhi bachche ko dekhen, jo bhi mile, sambandh-samparka mein aaye, unhon ko yeh lakshan dikhaai den ki yeh jaise paramatma baap,brahma baap ke gun hain, woh bachchon ke soorat aur moorat se dikhaai den। anubhav karen ki inke nayan, inke bol, inhon ki vritti va vibration nyaare hain। madhuban mein aate hain to baap brahma ke karma saakaar mein hone ke kaaran bhoomi mein tapasya, karma aur tyaag ke vibration samaaye hue hone ke kaaran yahaan sahaj anubhav karte hain ki yeh sansaar nyaara hai kyonki brahma baap aur vishesh bachchon ke vibration se vaayumandal alaukik bana hua hai। aise hi jo bachcha jahaan bhi rehta hai, jo bhi karmakshetra hai, har ek bachche se baap samaan gun, karma aur shreshtha vritti ka vaayumandal anubhav mein aaye,isko baapdaada kehte hain - baap samaan banna। jo abhi tak sankalp hai baap samaan banna hi hai,woh sankalp abhi chehre aur chalan se dikhaai de। jo bhi sambandh-samparka mein aaye unke dil se yeh aavaaj nikle ki yeh aatmaayen baap samaan hain। (beechbi cha mein khaansi aa rahi hai) aaj mike kharaab hai, milna to hai na। yeh bhi to mike hai na, yeh mike nahin chalta to yeh mike bhi kaam ka nahin। koi harja nahin yeh bhi mausam ka phal hai।

to baapdaada abhi sabhi bachchon se yeh pratyakshata chaahte hain। jaise vaani dvaara pratyakshata karte ho to vaani ka prabhaav padta hai,usse bhi jyaada prabhaav gun aur karma ka padta hai। har ek bachche ke naynon se yeh anubhav ho ki inhon ke naynon mein koi visheshta hai। saadhaaran nahin anubhav karen। alaukik hain। unhon ke man mein question uthe ki yeh kaise banen, kahaan se banen। svayan hi sochen aur poochhen ki banaane vaala kaun? jaise aajkal ke samay mein bhi koi badhiya cheez dekhte ho to dil mein uthta hai ki yeh banaane vaala kaun hai! aise apne baap samaan banne ki sthiti dvaara baap ko pratyaksha karo। aajkal majority aatmaayen sochti hain ki kya is saakaar srishti mein,is vaataavran mein rehte hue aise bhi koi aatmaayen ban sakti hain! to aap unhon ko yeh pratyaksha mein dikhaao ki ban sakta hai aur ham bane hain। aajkal pratyaksha pramaan ko jyaada maante hain। sunne se bhi jyaada dekhne chaahte hain to chaaron or kitne bachche hain, har ek bachcha baap samaan pratyaksha pramaan ban jaae to maanne aur jaanne mein mehnat nahin lagegi। phir aapki praja bahut jaldi-jaldi taiyaar ho jaayegi। mehnat, samay kam aur pratyaksha pramaan anubhav karne se jaise praja ka stamp lagta jaayega। raaje-raani to aap banne vaale hain na! baapdaada ek baat ka phir se attention dila rahe hain ki vartamaan vaayumandal ke anusaar man mein,dil se abhi vairaagya vritti ko emerge karo। baapdaada ne har bachche ko chaahe pravritti mein hai, chaahe sevaakendra par hai, chaahe kahaan bhi rehte hain, sthool saadhan har ek ko diye hain, aisa koi bachcha nahin hai jiske paas khaana, peena,rehna iske saadhan nahin ho। jo behad ke vairaagya ki vritti mein rehte hue aavashyak saadhan chaahiye, woh sabke paas hain। agar koi ko kami hai to woh uske apne albele-pan ya aalasya ke kaaran hai। baaki draamaanusaar baapdaada jaante hain ki aavashyak saadhan sabke paas hain। jo aavashyak saadhan hain woh to chalne hi hain। lekin kahaan-kahaan aavashyakta se bhi jyaada saadhan hain। saadhna kam hai aur saadhan ka prayog karna ya karaana jyaada hai। isliye baapdaada aaj baap samaan banne ke divas par vishesh underline kara rahe hain - ki saadhnon ke prayog ka anubhav bahut kiya, jo kiya woh bhi bahut achha kiya, ab saadhna ko badhaana arthaat behad ki vairaagya vritti ko laana। brahma baap ko dekha last ghadi tak bachchon ko saadhan bahut diye lekin svayan saadhnon ke prayog se door rahe। hote hue door rehna - use kahenge vairaagya। lekin kuchh hai hi nahin aur kahe ki hamko to vairaagya hai,ham to hain hi vairaagi, to woh kaise hoga। woh to baat hi alag hai। sab kuchh hote hue knowledge aur vishwa-kalyaan ki bhaavna se,baap ko, svayan ko pratyaksha karne ki bhaavna se abhi saadhnon ke bajaae behad ki vairaagya vritti ho। jaise sthaapna ke aadi mein saadhan kam nahin the, lekin behad ke vairaagya vritti ki bhatthi mein pade hue the। yeh 14 varsha jo tapasya ki, yeh behad ke vairaagya vritti ka vaayumandal tha। baapdaada ne abhi saadhan bahut diye hain,saadhnon ki abhi koi kami nahin hai lekin hote hue behad ka vairaagya ho। vishwa ki aatmaon ke kalyaan ke prati bhi is samay is vidhi ki aavashyakta hai kyonki chaaron or ichchhaayen badh rahi hain,ichchhaaon ke vash aatmaayen pareshaan hain,chaahe padmapti bhi hain lekin ichchhaaon se woh bhi pareshaan hain। vaayumandal mein aatmaon ki pareshaani ka vishesh kaaran yeh had ki ichchhaayen hain। ab aap apne behad ki vairaagya vritti dvaara un aatmaon mein bhi vairaagya vritti phailaao। aapke vairaagya vritti ke vaayumandal ke bina aatmaayen sukhi, shant ban nahin sakti,pareshaani se chhoot nahin sakti। aap vriksha ki jad hain, braahmanon ka sthaan vriksha mein kahaan dikhaaya hai?jad mein dikhaaya hai na! to aap foundation hain, aapki lahar vishwa mein phailegi isliye baapdaada vishesh saakaar mein brahma baap samaan banne ki vidhi, vairaagya vritti ki taraph vishesh attention dila raha hai। har ek se anubhav ho ki yeh saadhnon vash nahin, saadhna mein rahne vaale hain। hote hue vairaagya vritti ho। aavashyak saadhan use karo lekin jitna ho sakta hai utna dil ke vairaagya vritti se, saadhnon ke vasheebhoot hokar nahin। abhi saadhna ka vaayumandal chaaron or banaao। samay sameep ke pramaan abhi sachchi tapasya va saadhna hai hi behad ka vairaagya। seva ka vistaar is varsha mein bahut kiya। is varsha chaaron or bade-bade programme kiye aur seva se sahayogi aatmaayen bhi bahut bane hain,sameep aaye hain, samparka mein aaye hain,lekin kya sirf sahayogi banaana hai? yahaan tak rakhna hai kya? sahayogi aatmaayen achhi-achhi hain, ab un sahayogi quality vaali aatmaon ko aur sambandh mein laao। anubhav karaao,jisse sahayogi se sahaj yogi ban jaaen। iske liye ek to saadhna ka vaayumandal aur doosra behad ki vairaagya vritti ka vaayumandal ho to isse sahaj sahayogi sahaj yogi ban jaayenge। unhon ki seva bhale karte raho lekin saath mein saadhna, tapasya ka vaayumandal aavashyak hai।

abhi chaaron or powerful tapasya karni hai, jo tapasya mansa seva ke nimitta banen, aisi powerful seva abhi tapasya se karni hai। abhi mansa seva arthaat sankalp dvaara seva ki touching ho,uski aavashyakta hai। samay sameep aa raha hai, nirantar sthitiyaan aur nirantar powerful vaayumandal ki aavashyakta hai। baap samaan banna hai to pahle behad ki vairaagya vritti dhaaran karo। yahi brahma baap ki ant tak visheshta dekhi। na vaibhav mein lagaav raha,na bachchon mein… sabse vairaagya vritti। to aaj ke din ka baap samaan banne ka paath pakka karna। bas brahma baap samaan banna hi hai। aisa dridh nishchay avashya aage badhaayega।

baaki sabhi bachche sochte honge ki aaj prize milna hai। abhi dekho chaaron or ke bachche to hain nahin,to sirf aap aaye hue ko prize den! prize to hai hi parantu baapdaada kehte hain - har ek saare varsha mein sarva bandhanon se mukta rahe! list nikaali thi na। kitne bandhan nikaale the? (18)achha to 18 hi bandhan se svapna tak bhi mukta, svapna mein bhi koi bandhan ki roop-rekha na aai ho, isko kaha jaata hai - mukta। to haath to bahut sahaj uthaate hain, baba ko pata hai haath uthvaayenge to bahut prakaar ke haath uthenge lekin phir bhi baapdaada kehte hain ki jis checking se aap haath uthaane ke liye taiyaar hain, baapdaada ko pata hai kitne taiyaar hain, kaun taiyaar hain। abhi bhi aur antarmukhi ban sookshm checking karo। achha koi ko duhkh nahin diya, lekin jitna sukh ka khaata jama hona chaahiye utna hua? naaraaz nahin kiya, raazi kiya?vyartha nahin socha lekin vyartha ke jagah par shreshtha sankalp itne hi jama hue? sabke prati shubh bhaavna rakhi lekin shubh bhaavna ka response mila? woh chaahe badle nahin badle, lekin aap usse santushta rahe?aisi sookshm checking phir bhi apne aapki karo aur agar aisi sookshm checking mein paas ho to bahut achhe ho। aisi paas aatmaayen apne-apne sevaakendra par chaaron or centre par apna naam, result sab baaton mein kitna percent raha?sukh kitne ko diya? raazi kitne rahe? naaraaz ko raaji kiya? ki jo raazi hai usko hi raazi kiya? to yeh sab checking karke paas with honour hain, to apna naam, apne teacher ko likh karke do aur teacher jo chhote-chhote centre hain,unhon ke oopar jo badi bahinen mukrar hain, woh unhon se paas karaaven phir zone ke paas sab naam aaven। zone ke paas sab naam ikatthe karo phir woh zone vaali aisi paas vaali aatmaon ke naam madhuban mein bhejen,phir inaam milega। phir taali bajaayenge। jo aise paas with honour honge usko to prize milna hi chaahiye, woh milegi lekin sachchi dil se,sachche baap ko apna sachcha potaamel bataana aur prize lena kyonki baapdaada ke paas sabke sankalp to pahunchte hain na। to jo haath uthaane vaale hain na, usmein baapdaada ne dekha ki mix bahut hain aur bina samajh ke haath utha dete hain। to koi mix vaale haath utha den aur baapdaada prize nahin deve to achha nahin hai। isliye kaayde-pramaan agar paas with honour hain to uski to bahut-bahut mahima hai aur aise ka naam to sabhi braahmanon mein prasiddha hona chaahiye na। achha hai, majority ne mehnat achhi ki hai,attention raha hai parantu sampoorn ki baat hai। jinhonne mehnat ki hai,unhon ko aaj prize ke bajaae mubaarak de rahe hain। phir prize denge। theek hai na! achha –

doosri baat thi ki sabhi zone vaalon ko march tak mike laana hai, sabhi ko yaad to hai। to pahle march mein baapdaada zone vaalon se result lenge,kisne aur kis quality ka mike taiyaar kiya। aap kahenge yeh mike hai lekin hoga chhota mike। samjho jis nagar ka mike nikla,usi nagar ka mike hai, zone ka bhi nahin hai,to usko chhota mike kahenge na। to aisa kaun sa mike taiyaar kiya hai, woh baapdaada poochhenge। agar koi zone vaale last mein nahin bhi aa sake to apni chitki last tarna mein likhkar bhejen, aaven to zone ke hedas ko nimantran hai। agar nahin aa sakte hain,na aane ka koi aisa kaaran hai to apni chitki bhej denge to bhi chalega। phir baapdaada un sabhi mike ke sangathan ka programme rakhenge, jismen sabhi taraph ke mike stage par aayenge। unhon ka vishesh programme rakhenge, aise nahin ki march mein mike bhi lekar aaven। mike ko vahaan hi rahne do,aap aana। jo mike hai unhon ko to dhoomdhaam se mangaayenge na। unhon ki svaagat bhi to achhi karni hai na। to unhon ka special programme rakhenge aur phir prize denge number one, tu,three। theek hai। zone vaalon ko spashta hua?march mein result laani hai। achha।

abhi kya yaad rakha?kaun si baat ko underline kiya? behad ka vairaagya। abhi aatmaon ko ichchhaaon se bachaao। bichaare bahut duhkhi hain। bahut pareshaan hain। to abhi merciful bano। raham ki lahar behad ke vairaagya vritti dvaara phailaao। abhi sabhi oonche te oonche paramdham mein baap ke saath baith sarva aatmaon ko raham ki drishti do। vibration phailaao। phaila sakte hain na? to bas abhi paramdham mein baap ke saath baith jaao। vahaan se yeh behad ke raham ka vaayumandal phailaao। (baapdaada ne drill karaai) achha।

chaaron or ke sarva ati snehi bachchon ko,sarva chaaron or ke saadhna karne vaale shreshtha aatmaon ko,baapdaada ko saare din mein bahut pyaare-pyaare,meethe-meethe dil ke geet sunaane vaale, rooh-roohaan karne vaale shaktiyon ke,gunon ke vardaan se jholi bharne vaale, baapdaada ko sabke geet, khushi ke geet sneh ke geet, roohaani nashe ke geet,meethi-meethi baaten bahut-bahut dil ko lubhaane vaali sunaai di aur baapdaada bhi sunne aur milne mein lavleen the। to aise dil ke sachche, dil ke aavaaz sunaane vaale bachche mahaan hain aur sada mahaan rahenge,aise meethemeethe bachche sada behad ke vairaagya vritti ko apnaane vaale, dridh nishchay buddhi bachchon ko baapdaada ek ke badle padmaguna return sneh de rahe hain। dilaaraam ke dil par rahne vaale sabhi bachchon ko bahut-bahut yaadapyaar aur namaste।

jo baahar bhi sun rahe hain unhon ko bhi baba dekh rahe hain aur baapdaada door nahin dekhte hain lekin sabhi taraph ke bachchon ko sammukh dekh yaadapyaar aur mubaarak aur yaad saugaat va yaad patron ka return kar rahe hain ki sada udti kala mein udne vaale bachche sada aabaad hain,sada hi aabaad rahenge। achha।

daadi ji se

aaj ke din ko smriti divas kehte hain,to smriti mein kya raha?samartha ka vardaan yaad raha? aapko to direct will kar li na?achha part baja rahi ho। baapdaada dekh rahe hain, vriddhi bhi bahut ho rahi hai aur yeh vriddhi bhi seva ka saboot hi hai। to bachchon ki seva ko dekh baapdaada to khush hote hain। baap gupta ho gaye,abhi sabhi ke mukh par kya hai? abhi to sabhi ke mukh par saamne bachche hi hain। brahmaakumaariyaan bahut achha kaam kar rahi hain to abhi bachche pratyaksha hue। abhi baap pratyaksha hona hai। baap ne pahle bachchon ko pratyaksha kiya। abhi baap pratyaksha honge to phir to samaapti ho jaayegi na। isliye pahle bachche pratyaksha ho rahe hain phir baap honge। phir bhi bahut achha,seva ka umang-utsaah achha hai, abhi nirvighna banaane ki jyaada lahar phailaao। yeh bhi lahar phail jaayegi to sahaj ho jaayega।

aaj sabhi taraph achha vaayumandal tha (sabhi sneh mein doobe hue the) din ka mahattva hota hai। is din ka bhi mahattva hai। (daadi jaanki ne khaas yaad diya hai)