Avyakt murli for Wednesday 15 December 1999

>

15-12-99 om shanti avyakt baapdaadaamdhuban

sankalp shakti ke mahattva ko jaan ise badhaao aur prayog mein laao

aaj oonche te ooncha baap apne chaaron or ke shreshtha bachchon ko dekh harshit ho rahe hain kyonki saare vishwa ki aatmaon se aap bachche shreshtha arthaat highest hain। duniya vaale kehte hain highest in di world aur woh bhi ek janma ke liye lekin aap bachche highest shreshtha in di kalpa hain। saare kalpa mein aap shreshtha rahe hain। jaante ho na?apna anaadi kaal dekho anaadi kaal mein bhi aap sabhi aatmaayen baap ke najdeek rahne vaale ho। dekh rahe ho,anaadi roop mein baap ke saath-saath sameep rahne vaale shreshtha aatmaayen ho। rehte sabhi hain lekin aapka sthaan bahut sameep hai। to anaadi roop mein bhi oonche-te-oonche ho। phir aao aadikaal mein sabhi bachche dev-paddhaari devta roop mein ho। yaad hai apna daivi swaroop?aadikaal mein sarva praapti swaroop ho। tan-man-dhan aur jan chaar hi swaroop mein shreshtha hain। sada sampanna ho,sarva praapti swaroop ho। aisa dev-pad aur kisi bhi aatmaon ko praapta nahin hota। chaahe dharma aatmaayen hain,mahaatmaayen hain lekin aisa sarva praaptiyon mein shreshtha,apraapti ka naam-nishaan nahin, koi bhi anubhav nahin kar sakta। phir aao madhyakaal mein,to madhyakaal mein bhi aap aatmaayen poojya bante ho। aapke jad chitra pooje jaate hain। koi bhi aatmaon ki aise vidhipoorvak pooja nahin hoti। jaise poojya aatmaon ki vidhipoorvak pooja hoti hai to socho aise vidhipoorvak aur kiski pooja hoti hai! har karma ki pooja hoti hai kyonki karmayogi bante ho। to pooja bhi har karma ki hoti hai। chaahe dharma aatmaayen ya mahaan aatmaon ko saath mein mandir mein bhi rakhte hain lekin vidhipoorvak pooja nahin hoti। to madhyakaal mein bhi highest arthaat shreshtha ho। phir aao vartamaan antakaal mein,to antakaal mein bhi ab sangam par shreshtha aatmaayen ho। kya shreshthata hai?svayan baapdaada - parmaatma-aatma aur aadi-aatma arthaat baapdaada, donon dvaara paalna bhi lete ho,padhaai bhi padhte ho, saath mein satguru dvaara shreemat lene ke adhikaari bane ho। to anaadikaal, aadikaal,madhyamkaal aur ab antakaal mein bhi highest ho, shreshtha ho। itna nasha rehta hai?

baapdaada kehte hain is smriti ko emerge karo। man mein, buddhi mein is praapti ko dohraao। jitna smriti ko emerge rakhenge utna smriti se roohaani nasha hoga। khushi hogi, shaktishaali banenge। itna highest aatma bane hain। yeh nishchay hai pakka? ki ham hi highest,shreshtha bane the, bane hain aur sada bante rahenge। nasha hai? pakka nishchay hai to haath uthaao। teachers ne bhi uthaaya।

maataayen to sada khushi ke jhoole mein jhoolti hain,jhoolti hain na! maataaon ko bahut nasha rehta hai,kya nasha rehta hai? hamaare liye baap aaya hai। nasha hai na! dvaapar se sabhi ne neeche giraaya, isliye baap ko maataaon par bahut pyaar hai aur khaas maataaon ke liye baap aaye hain। khush ho rahe hain, lekin sada khush rehna। aise nahin abhi haath utha rahe hain aur train mein jaao to thoda-thoda nasha utarta jaae, sada ekras,avinaashi nasha ho। kabhi-kabhi ka nasha nahin,sada ka nasha sada hi khushi pradaan karta hai। aap maataaon ke chehre sada aise hone chaahiye jo door se roohaani gulaab dikhaai do kyonki is vishwa vidyaalay ki jo baat sabko achhi lagti hai,visheshta dikhaai deti hai woh yahi ki maataayen roohaani gulaab samaan sada khila hua pushpa hain aur maataayen hi zimmevaari uthaae,maataayen itna bada kaarya kar rahi hain। chaahe mahaamandaleshvar bhi hain lekin woh bhi samajhte hain ki maataayen nimitta bani hain aur aise shreshtha kaarya sahaj chala rahi hain। maataaon ke liye kahaavat hai - sach hai nahin, lekin kahaavat hai – do maataayen bhi ikatthe koi kaarya karen, bada mushkil hai। lekin yahaan kaun nimitta hain? maataayen hi hain na! jab bhi milne aate hain to kya poochhte hain? maataayen chalaati hain, aapas mein ladti nahin hain? khitkhit nahin karti hain?lekin unhon ko kya pata ki yeh saadhaaran maataayen nahin hain, yeh paramatma dvaara bani hui aatmaayen,maataayen hain। parmaatma-vardaan inhon ko chala raha hai। aise to nahin ki bhaai (paandav) samajhte hain ki maataaon ka maan hai, hamaara nahin hai kya। aap ka bhi gaayan hai, 5paandav gaaye hue hain। shaktiyon ke saath, 7sheetlaayen dikhaate hain to ek paandav bhi dikhaate hain। aur paandavon ke bina maataayen nahin chala sakti, maataaon ke bina paandav nahin chala sakte। donon bhujaayen chaahiye lekin maataaon ko bahut gira diya tha na,isliye baap maataaon ko jo duniya asambhav samajhti hai, woh sambhav karke dikha rahe hain। aap khush ho na maataaon ko dekh karke? ya nahin? khush hain na! agar maataaon ko baap nimitta nahin banaata to naya gyaan, nai system hone kaaran paandavon ko dekhkar bahut hangaama hota। maataayen dhaal hain kyonki naya gyaan hai na। nai baaten hain। lekin bahnon ke saath bhaai sada hi saath hain। paandav apne kaarya mein aage hain aur bahnen apne kaarya mein aage hain। donon ki raay se har kaarya nirvighna ban chal raha hai।

baapdaada har roz bachchon ke bhinna-bhinna kaarya dekhte rehte hain। naye-naye plan bante hi rehte hain। samay to sabko yaad hai। yaad hai? 99 ka chakkar bhi poora ho gaya na! kya sochte the, 99 aa gaya, 99 aa gaya। lekin aap sabke liye seva karne ka varsha,nirvighna rahne ka varsha mila। dekho 99 mein hi maun bhatthiyaan kar rahe ho na! duniya ghabraati hai aur aap, jitna woh ghabraate hain utna hi aap sabhi yaad ki gahraai mein ja rahe ho। man ka maun hai hi - gyaan saagar ke tale mein jaana aur naye-naye anubhvon ke ratna laana। jo baapdaada ne pahle bhi ishaara diya hai - sabse bada khazaana hai jo vartamaan aur bhavishya banaata hai, woh hai shreshtha khazaana, shreshtha sankalp ka khazaana। sankalp shakti bahut badi shakti hai jo aap bachchon ke paas hai - shreshtha sankalp ki shakti। sankalp to sabke paas hain lekin shreshtha shakti, shubh-bhaavna,shubh-kaamna ki sankalp shakti, man-buddhi ekaagra karne ki shakti - yeh aapke paas hi hai। aur jitna aage badhte jaayenge is sankalp shakti ko jama karte jaayenge,vyartha nahin ganvaayenge,vyartha ganvaane ka mukhya kaaran hai - vyartha sankalp। vyartha sankalp, baapdaada ne dekha hai majority bachchon ke saare din mein vyartha abhi bhi hai। jaise sthool dhan ko economy se use karne vaale sada hi sampanna rehte hain aur vyartha ganvaane vaale kahaan-na-kahaan dhokha kha lete hain। aise shreshtha shuddh sankalp mein itni taakat hai jo aapke catching power,vibration catch karne ki power, bahut badh sakti hai। yeh wireless,yeh telephone… jaise yeh science ka saadhan kaarya karta hai vaise yeh shuddh sankalp ka khazaana, aisa hi kaarya karega jo london mein baithe hue koi bhi aatma ka vibration aapko aise hi spashta catch hoga jaise yeh wireless ya telephone,T.vi. yeh jo bhi saadhan hain…kitne saadhan nikal gaye hain, isse bhi spashta aapki catching power, ekaagrata ki shakti se badhegi। yeh aadhaar to khatma hone hi hain। yeh sab saadhan kis aadhaar par hain? light ke aadhaar par। jo bhi sukh ke saadhan hain majority light ke aadhaar par hain। to kya aapki aadhyaatmik light,aatma light yeh kaarya nahin kar sakti! jo chaaho vibration najdeek ke, door ke catch kar sakenge। abhi kya hai, ekaagrata ki shakti man-buddhi donon hi ekaagra ho tab catching power hogi। bahut anubhav karenge। sankalp kiya - nihsvaartha,svachchha, spashta woh bahut quick anubhav karaayega। silence ki shakti ke aage yeh science jhukegi। abhi bhi samajhte jaate hain ki science mein bhi koi missing hain jo bharni chaahiye। isliye baapdaada phir se underline kara raha hai ki antim stage,antim seva - yeh sankalp shakti bahut fast seva karaayegi। iseelie sankalp shakti ke oopar aur attention do। bachaao, jama karo। bahut kaam mein aayegi। prayogi is sankalp ki shakti se banenge। science ka mahattva kyon hai? prayog mein aati hai tab sab samajhte hain haan science achha kaam karti hai। to silence ki power ka prayog karne ke liye ekaagrata ki shakti chaahiye aur ekaagrata ka mool aadhaar hai - man ki kantroling power, jisse manobal badhta hai। manobal ki badi mahima hai,yeh riddhi-siddhi vaale bhi manobal dvaara alpakaal ke chamatkaar dikhaate hain। aap to vidhipoorvak,riddhi-siddhi nahin, vidhipoorvak kalyaan ke chamatkaar dikhaayenge jo vardaan ho jaayenge,aatmaon ke liye yeh sankalp shakti ka prayog vardaan siddha ho jaayega। to pahle yeh check karo ki man ko kantrol karne ki kantroling power hai? second mein jaise science ki shakti, switch ke aadhaar se,switch on karo, switch aaph karo - aise second mein man ko jahaan chaaho,jaise chaaho,jitna samay chaaho, utna kantrol kar sakte hain? bahut achhe-achhe svayan prati bhi aur seva prati bhi siddhi roop dikhaai denge। lekin baapdaada dekhte hain ki sankalp shakti ke jama ka khaata abhi saadhaaran attention hai। jitna hona chaahiye utna nahin hai। sankalp ke aadhaar par bol aur karma automatic chalte hain। alag- alag mehnat karne ki zaroorat hi nahin hai, aaj bol ko kantrol karo, aaj drishti ko attention mein laao, mehnat karo, aaj vritti ko attention se change karo। agar sankalp shakti powerful hai to yeh sab svatah hi kantrol mein aa jaate hain। mehnat se bach jaayenge। to sankalp shakti ka mahattva jaano।

yeh bhatthiyaan vishesh iseelie karaai jaati hain,aadat pad jaae। yahaan ki aadat bhavishya mein bhi attention de karte rahen tab avinaashi ho। samjha। kya mahatva hai? aapke paas bada oonche-te-ooncha khazaana baap ne diya hai। yeh shreshtha sankalp,shubh-bhaavna,shubh-kaamna ke sankalp ka khazaana hai? sabko baap ne diya hai lekin jama nambarvaar karte hain aur prayog mein laane ki shakti bhi nambarvaar hai। abhi bhi shubh-bhaavna va shubh-kaamna iska prayog kiya hai? vidhi poorvak karne se siddhi ka anubhav hota hai?abhi thoda-thoda hota hai। aakhir aapke sankalp ki shakti itni mahaan ho jaayegi - jo seva mein mukh dvaara sandesh dene mein samay bhi lagaate ho, sampatti bhi lagaate ho,halchal mein bhi aate ho, thakte bhi ho…lekin shreshtha sankalp ki seva mein yeh sab bach jaayega। badhaao। is sankalp shakti ko badhaane se pratyakshata bhi jaldi hogi। abhi 62-63 varsha ho gaye hain, itne samay mein kitni aatmaayen banaai hain? 9laakh bhi poore nahin hue hain। aur saare vishwa ko sandesh pahunchaana hai to kitni karod aatmaayen hain?abhi tak bhi bhagwan inhon ka teacher hai,bhagwan inhon ko chala raha hai, karaavanhaar paramatma kara raha hai…yeh spashta nahin hua hai। achha kaarya hai aur shreshtha kaarya kar rahe hain yeh aavaaz to hai lekin karaavanhaar abhi bhi gupta hai। to yeh sankalp-shakti se har ek ke buddhi ko parivartit kar sakte ho। chaahe aho prabhu kahke pratyaksha ho,chaahe baap ke roop mein pratyaksha ho। to baapdaada abhi bhi phir se attention dilaata hai ki sankalp shakti ko badhaao aur prayog mein laate raho। samjha। achha –

aaj maataaon ka chance hai, ek maataaon ka group aur medeesin (medical) vaale, do varga hain। maataayen kya kamaal karengi?member to ban gai? mahila varga ki member ho, achhi baat hai na! lekin jo bhi member bane hain, achha kiya hai। abhi aap sabki list government ko bhejenge, kyon bhejenge? darna nahin। inkamtaiksa vaale nahin aayenge aapke paas। iseelie bhejenge ki yeh sab maataayen abhi jagat maataayen ban, jagat ko sudhaarengi। yeh kaarya karengi na? to government ko aapka naam bhejen ki itni maataayen duniya ko svarga banaane vaali hain? bhejen,haath uthaao,darte to nahin ho। darna nahin lekin yeh dhyaan rakhna ki agar aapki aisi inkvaayri karen to pahle aapka ghar svarga bana hai kyonki pahle ghar phir vishwa। to koi bhi maata ke paas aakar dekhe to ghar mein sukh-shanti hai?to dikhaai dega, ghar svarga banaasar?ya vishwa ko svarga banaayengi, ghar ko nahin। pahle ghar ko banaayengi tabhi doosron par bhi prabhaav padega। nahin to kahenge ghar mein kalah laga pada hai, svarga kahaan hai। to iseelie maataaon ko aisa vaayumandal banaana hai jo koi bhi dekhe to yahi dikhaai de ki maataaon ne parivartan achha kiya hai। achha jo member hain woh haath uthaao। kitne member hain? (ek hazaar aaye hain) ek hazaar bhi bahut hain। to jinhonne haath uthaaya member hain, unhon ke ghar mein sukh-shanti hai? haan,woh haath uthaao। khadi ho jaao। samajh mein aaya ya aise hi khadi ho gai। ghar svarga hai? ghar mein shanti hai? achha - inhon ka photo nikaalo। achha hai।

aapki teacher ko aapke ghar mein bhejen dekhne ke liye। vaise to himmat vaali hain, koi ne samjha hai, koi ne nahin bhi samjha hai। achha hai। agar koi bhi thodi khitkhit ho to abhi jaakar pahle ghar ko theek karna phir vishwa ki seva kar sakengi। theek hai na। jinhonne nahin haath uthaaya woh bhi karna - shubh-bhaavna se, javaab nahin dena, krodh nahin karna, isse bhi pharka pad jaata hai। dekho yagya ki history mein aise bahut drishtaanta hain, bahut maarte the, maarte hain na। to bahut maataaon ki shubh-bhaavna se seva karne se woh baap ke bachche ban gaye। to aap bhi sochengi ki hamaare ghar mein to ladaai hoti hai, maarte bhi hain, yeh hota hai woh hota hai lekin jab koi badal sakte hain to aap nahin badal sakti ho! shubh-bhaavna aur apni chalan parivartan ho jaati to woh bhi narma ho jaate hain। garam nahin hote, narma ho jaate hain। isliye maataayen pahle apne gharon ko,bachchon ko theek karo। achha nahin maante hain lekin pyaar se chalen,gyaan ki glaani nahin karen, itna to ho sakta hai na। chalo krodhi hain,kya bhi hain,aadten kharaab hain lekin yeh to kahen ki maata ji bahut achhi hain। ham aise hain lekin maata achhi hai। itna prabhaav to ho। badli hona chaahiye na। phir dekho seva kitni phailti hai। theek hai maataayen। bahut achha, dekho aapke varga ko bhi chance mila hai na। to lucky ho gai na। achha –

abhi hai maideekal varga। haath uthaao। global hospital vaale bhi haath uthaao, woh bhi medical wing hai। double videshiyon mein koi hain। maideekal wing bahut sahaj seva kar sakta hai,kyon? jab patient aate hain, aapke paas to patient hi aayenge। to patient hamesha doctor ko bhagwan ka roop samajhte hain aur bhaavna bhi hoti hai। agar doctor kisko kehta hai ki yeh cheez nahin khaani hai,to dar ke maare nahin khaayenge aur koi guru kahega to bhi nahin maanenge। to maideekal vaalon ko sahaj seva ka saadhan hai jo bhi aave unko samay mukrar karna padta hai, kyonki kaam ke samay to aap kuchh kar nahin sakte, lekin koi aisa vidhi banaao jo patient thoda bhi interested ho, unko ek time bulaakar aur unhon ko 15 minute aadha ghanta bhi parichay do to kya hoga, aapki seva badhti jaayegi। sandesh dena woh aur baat hai,sandesh se khush hote hain lekin raajayogi nahin bante hain। sandesh aap logon ne kitne baar diya hai। abhi bhi dekho yaatraayen nikaal rahe ho na! to sandesh kitnon ko milega। koi ne parche chhapaaye hai, koi ne koi rooprekha rakhi hai, function rakha hai, lekin jab tak thoda time bhi kisko anubhav nahin hota tab tak student nahin ban sakta। aap dekho jo bhi jyaada result nikalti hai seva ki,jo yog shivir karte hain aur ek saptaah samparka mein aate hain, yog dvaara koi anubhav karaate hain to woh regular bante hain। to aap log bhi koi aisi vidhi banaao,jo student banen। kyonki 9laakh jo banenge to sirf sandesh vaale nahin, 9 laakh satayug ki pahli praja hai। to sirf sandesh vaale nahin, regular kuchh na kuchh anubhooti karne vaale banenge। to aisi vidhi banaao। sandesh vaale bhi chaahiye,kyonki last mein 33 karod devtaayen kehte hain। kaliyug ant tak woh bhi chaahiye lekin pahle9 laakh to taiyaar karo। aap jaayenge to praja peechhe aayegi kya! praja bhi to chaahiye jis par raajya karo। to pahle kuchh na kuchh anubhav karaao। jisko koi bhi anubhav hota hai woh chhod nahin sakte hain। baaki kaam to achha hai,kiske dukh ko door karna। kaarya to bahut achha karte ho,lekin sada ke liye nahin karte ho। davaai khaayenge to beemaari hategi,davaai banda to beemaari phir se aa jaati hai। to aisi davaai do, jo beemaari ka naam nishaan nahin ho,woh hai meditation। phir bhi doctors ya narsej ya koi bhi kaam karne vaale chaahiye zaroor। to baapdaada khush hote hain। jab doctors ikatthe hote hain to baapdaada bhi khush hote hain ki brahman parivaar mein bhi kaam mein aayenge na। jitna samay naajuk aayega, utni beemaariyaan bhi to badhengi na। to doctors to achhe achhe chaahiye। to doctors se baapdaada poochhte hain - ki maideekal kaarya mein to achhe ho lekin `maideesin aur maideeteshan' - aap doctors ka donon mein balance hai? jitna is kaarya mein busy ho aur progress karte jaate ho,itna hi maideeteshan mein bhi badhta jaata hai। badhta hai?jo samajhte hain hamaara balance rehta hai,maideeteshan aur maideesin ka kaam karne mein,woh haath uthaao। balance hai?inhon ka bhi photo nikaalo। yeh sab kaam mein aane vaale hain iseelie aapka photo nikaal rahe hain। achha।

baapdaada ko har varga ka mahattva hai kyonki jaise shareer mein ek ang bhi nahin ho, kam ho to kami mahsoos hoti hai na। aise yeh har varga bahut-bahut mahattvapoorna hai। to doctors ka varga bhi baapdaada ko sevaadhaari group dekhne mein aata hai। sirf thoda samay is seva ko bhi dete raho। kai doctors kehte hain hamko phursat hi nahin hoti hai। phursat nahin hoti hogi phir bhi kitne bhi busy hon, apna ek card chhapa ke rakho, jismen yeh ishaara ho,attraction ka koi slogan ho, to aur aage sapha chaahte ho to yeh yeh edresez hain,jahaan aap rehte ho vahaan ke centres ki address ho। yahaan jaakar anubhav karo, card to de sakte। jab parcha likhkar dete ho yeh davaai lena,yeh davaai lena। to parcha dene ke samay yeh card bhi de do। ho sakta hai koi koi ko teer lag jaae kyonki doctor ki baat maante hain aur tension to sabhi ko hota hai। ek prakriti ki taraph se tension, parivaar ki taraph se tension aur apne man ki taraph se bhi tension। to tension free life ki davaai yeh hai,aisa kuchh usko attraction ki chhoti si baat likho to kya hoga, aapki seva ke khaate mein to jama ho jaayega na। aise kai karte bhi hain,jo nahin karte hain woh karo। double doctor ho single thode hi ho। double doctor ho to double seva karo। sab apne apne sthaan par seva mein theek ho,koi khitkhit to nahin hai?sab theek ho?achha। theek nahin vaale to uthaayenge nahin, sharma aayega na। lekin double seva se laukik seva bhi theek ho jaati hai kyonki seva ka bhi bal hai,jaise yog ka bal hai, gyaan ka bal hai, divya gunon ka bal hai, dhaarna ka bal hai…vaise hi seva ka bhi bal hai। chaar hi subject mein100-100 marks hain। to chaar hi subject va chaar hi bal agar jama ho jaata hai to marks to badh jaayengi na। chalo koi mein 50 ho,koi mein 75ho lekin total mein to badh jaayega na। to chaar hi subject mein marks jama karte chalo। yeh nahin socho ki ismen to thodi hain, kai bachche javaab dete hain। baap kehte hain na chart rakho to kehte hain chart rakhne ki koshish ki, us din chart hi kharaab tha isliye likha hi nahin। hai to bahaana। achha chart kharaab hai aur hi likhne se sudhrega na। baaten banaane mein to hoshiyaar hain। to samjha। doctors ko first number aana hai ya peechhe peechhe aana hai। first aayenge na। to first aane ke liye yeh attention rakho, marks badhaao kyonki vahaan satayug mein to doctors banna hi nahin hai। raaja banna hai na। raajayogi ho। to raajayogi ho,raaja banna hai to attention bhi rakhna padega। achha।

jo heart ka course kar rahe hain, woh haath uthaao। heart to theek hai na। doctor kahaan hai? (sateesh gupta ko) achha hai agar sahaj saadhan se theek ho jaata hai, to double phaayda hai। davaai bhi hai aur maideeteshan bhi hai। to double khaata ek chuktu hota hai, ek jama hota hai,achha phaayda hai। agar samajhte hain bahut achha hai to ek haath uthaao। yeh bhi achha research hai। aise hi theek ho jaaen to achha hai na! yeh bhi dekho koi bhi search karte hain to yeh bhi kya hai?sankalp shakti se hi invention hoti hai। koi bhi invention ka aadhaar ekaagrata se sankalp shakti hoti hai। isliye inhon ko to bahut achha chance mil jaata hai। madhuban bhi mil jaata, beemaari bhi khatma ho jaati aur maideeteshan mein bhi badhte jaate। achha।

baambe ke sevaadhaari utho। yeh seva ka chance achha lagta hai? isi bahaane se seva se braahmanon ki pahchaan milti hai। brahman parivaar mein parichay ho jaata hai aur behad mein aane ka chance hai। seva ka bal bhi kam nahin hai। dekho jo bhi puraane,jisko daadiyaan kehte ho, inhon mein extra bal hai। kiska bal hai? seva ka। (khaansi aai) baaja kharaab ho jaata hai na!

aur sthaapna mein seva ki hai। aap sab jo yahaan baithe ho woh aadi mein, inhon ki mehnat, sahanshakti,tyaag vritti, inhon ka phal aap ho। inhon ko bal mila aapko phal mila। sabhi ki histriyaan to suni hain na। kya nahin tyaag kiya! aap to bane banaaye aadhaar par aa gaye ho। makkhan inhonne nikaala aap khaane par aa gaye। achha lagta hai na। aadi ke paandav bhi hain,unhonne bhi tyaag kiya hai। abhi bhi dekho jahaan bhi programme hota hai, abhi tak bhi kehte koi daadiyaan aa jaaen। to daadiyon ka tyaag ka bhaagya to hai na। tyaag ki histriyaan to, kahaaniyaan to bahut hain na। abhi bhi sevaadhaari seva chaaron or karne vaale bahut hain,yeh aadi hain aur aap abhi ke sevaadhaari bhi achhe achhe hain। kitne-kitne centres khole hain? baapdaada to ek-ek ki mahima karna shuru kare to kitni raaten lag jaaen! aur ek-ek ki mahima hai, har ek ki visheshta hai aur rahegi। achha।

jo baapdaada ne abhyaas sunaaya, man second mein ekaagra ho jaae, kyonki samasya achaanak aati hai aur usi samay agar manobal hai, to samasya samaapta ho jaati hai lekin samasya ek padhaai padhaane vaali ban jaati hai। isliye sabhi man buddhi ko abhi-abhi ekaagra karo। dekho hota hai। (drill) aise saare din mein abhyaas karte raho। achha।

chaaron or ki shreshtha aatmaon ko,aadi madhya aur ant mein shreshtha part bajaane vaali aatmaon ko, sada apne shreshtha sankalp ki vidhi ko anubhav karne vaale, sada sahaj yogi ke saath-saath prayogi banne vaale, sada sankalp ki shakti dvaara sarva shaktiyon ko badhaane vaale,man aur buddhi par niyantran rakhne vaale, sada prayogi bachchon ko baapdaada ka yaadapyaar aur namaste।

desh videsh ke bachchon ko bhi baapdaada dekh rahe hain। sankalp dvaara jo yaadapyaar ya rooh-roohaan karte hain woh baapdaada ke paas pahunch jaata hai। abhi bhi jo science ke bal dvaara sun rahe hain, un sabhi bachchon ko har desh ke ek ek bachche ko yaadapyaar। janak bachchi ko bhi vishesh baapdaada yaadapyaar de rahe hain kyonki man se yahaan hai,tan se vahaan hai। to sabhi ko,ek-ek ko vishesh yaadapyaar। achha, yog bhatti ka programme bahut achha chal raha hai।

(haal mein sabhi bhaai-bahnon ko drishti dene ke pashchaat baapdaada ke saamne sabhi daadiyaan baithi hain)

sada apne ko baapdaada ke naynon ke noor samajhte ho na?naynon mein sada samaaye hue,naynon mein samaane se sada hi drishti mein samaaye rahenge। yeh bhi baap aur bachchon ko sangamayug ke suhej hain। milna, sunna,khaana peena,yeh sangam ke suhej hain। aise hi suhej manaate-manaate apne ghar chale jaayenge। phir raajya mein aayenge। brahma baap ke saath raajya karna। achha hai। duniya vaale sochte rehte aur aap sada manaate rehte। koi soch nahin hai, kya hoga, kaise hoga। kisi prakaar ka soch nahin hai। achha।

jayanti behen se - yeh aa gai। achha part mila hai। ek desh se doosre desh mein,doosre se teesre, udte rehte, udaate rehte। achha। baapdaada khush hai। theek hai।

daadiyon se - aap logon ke sahayog se hi saara kaarobaar chal raha hai। sahayogi vishesh bhujaayen hain। achha hai,group achha mila hai। (mohini behen se) group mein ho na। sab saathi hain। sabke saath se kaarya chal raha hai। paandav bhi saathi achhe mile hain। company hai na yeh bhi। to achhi company ke kaarobaar sambhaalne vaale bhi hain,sevaadhaari bhi hain, sabka haath hain। aise nahin foreign mein hain to yagya mein haath nahin hai। ek-ek bachche ka haath yagya seva mein laga hua hai। chaahe kahaan bhi rehte ho, desh mein rehte ho ya videsh mein lekin aap ek-ek brahman ke haath se yagya chal raha hai। yagya rachne vaale brahman ho। samajhte ho na ham yagya rachne vaale hain? baalak so maalik hain। achha।