Avyakt murli for Monday 2 February 2004

>

02-02-04 om shanti avyakt baapdaadaamdhuban

“poorvaj aur poojya ke svamaan mein rah vishwa ki har aatma ki paalna karo, duaayen do,duaayen lo”

aaj chaaron or ke sarvashreshtha bachchon ko dekh rahe hain। har ek bachcha poorvaj bhi hai aur poojya bhi hai। isliye is kalpavriksha ke aap sabhi jad hain,tana bhi hain। tana ka connection saare vriksha ke taal taaliyon se, patton se svatah hi hota hai। to sabhi apne ko aisi shreshtha aatma saare vriksha ke poorvaj samajhte ho? jaise brahma ko great-great grand father kaha jaata hai, unke saathi aap bhi master great grand father ho। poorvaj aatmaon ka kitna svamaan hai! us nashe mein rehte ho? saare vishwa ki aatmaon se chaahe kisi bhi dharma ki aatmaayen hain lekin sarva aatmaon ke aap tana ke roop mein aadhaarmoorta poorvaj ho। iseelie poorvaj hone ke kaaran poojya bhi ho। poorvaj dvaara har aatma ko sakaash svatah hi milti rehti hai। jhaad ko dekho, tana dvaara,jad dvaara last patte ko bhi sakaash milti rehti hai। poorvaj ka kaarya kya hota hai?poorvajon ka kaarya hai sarva ki paalna karna। laukik mein bhi dekho poorvajon dvaara hi chaahe shaareerik shakti ki paalna,sthool bhojan dvaara va padhaai dvaara shakti bharne ki paalna hoti hai। to aap poorvaj aatmaon ki paalna, baapadvaara mili hui shaktiyon se sarva aatmaon ki paalna karna hai।

aaj ke samay anusaar sarva aatmaon ko shaktiyon dvaara paalna ki aavashyakta hai। jaante ho aajkal aatmaon mein ashaanti aur duhkh ki lahar chhaai hui hai। to aap poorvaj aur poojya aatmaon ko apne vanshaavli ke oopar raham aata hai?jaise jab koi vishesh ashaanti ka vaayumandal hota hai to vishesh roop se military ya pulis alert ho jaati hai। aise hi aajkal ke vaataavran mein aap poorvaj bhi vishesh seva ke arth svayan ko nimitta samajhte ho! saare vishwa ki aatmaon ke nimitta hain,yeh smriti rehti hai? saare vishwa ki aatmaon ko aaj aapke sakaash ki aavashyakta hai। aise behad ke vishwa ki poorvaj aatma apne ko anubhav karte ho? vishwa ki seva yaad aati hai va apne centres ki seva yaad aati hai? aaj aatmaayen aap poorvaj dev aatmaon ko pukaar rahi hain। har ek apne-apne bhinna-bhinna deviyaan va devtaaon ko pukaar rahe hain- aao, kshama karo, kripa karo। to bhakton ka aavaaj sunne aata hai?aata hai sunne ya nahin? koi bhi dharma ki aatmaayen hain, jab unse milte ho to apne ko sarva aatmaon ke poorvaj samajhkar milte ho? aise anubhav hota hai ki yeh bhi ham poorvaj ki hi taal-taaliyaan hain! inhon ko bhi sakaash dene vaale aap poorvaj ho। apne kalpa vriksha ka chitra saamne laao, apne ko dekho aapka sthaan kahaan hai! jad mein bhi aap ho, tana bhi aap ho। saath mein paramdham mein bhi dekho aap poorvaj aatmaon ka sthaan baap ke saath sameep ka hai। jaante ho na! isi nashe se koi bhi aatma se milte ho to har dharma ki aatma aapko yeh hamaare hain, apne hain,us drishti se dekhte hain। agar us poorvaj ke nashe se, smriti se, vritti se, drishti se milte ho,to unhon ko bhi apnepan ka aabhaas hota hai kyonki aap sarva ke poorvaj ho, sabke ho। aisi smriti se seva karne se har aatma anubhav karegi ki yeh hamaare hi poorvaj va eeshta phir se humein mil gaye। phir poojya bhi dekho kitni badi pooja hai,koi bhi dharmaatma,mahaatma ki aisi aap devi-devtaaon ke samaan vidhi-poorvak pooja nahin hoti। poojya bante hain lekin tumhaare jaisi vidhi-poorvak pooja nahin hoti। gaayan bhi dekho kitna vidhi-poorvak keertan karte hain,aarti karte hain। aise poojya aap poorvaj hi bante ho। to apne ko aise samajhte ho? aisa nasha hai? hai nasha?jo samajhte hain ham poorvaj aatmaayen hain, yeh nasha rehta hai, yeh smriti rehti hai woh haath uthaao। rehti hai? achha। rehti hai woh to haath uthaaya? bahut achha। abhi doosra question kaun sa hota hai? sada rehta hai?

baapdaada sabhi bachchon ko har praapti mein avinaashi dekhne chaahte hain। kabhi-kabhi nahin। kyon?javaab bahut chaturaai se dete hain,kya kehte hain?rehte to hain…,achha rehte hain। phir dheere se kehte hain thoda kabhi-kabhi ho jaata hai। dekho baap bhi avinaashi,aap aatmaayen bhi avinaashi ho na! praaptiyaan bhi avinaashi,gyaan avinaashi dvaara avinaashi gyaan hai। to dhaarna bhi kya honi chaahiye?avinaashi honi chaahiye ya kabhi-kabhi?

baapdaada abhi sabhi bachchon ko samay ke circumstance anusaar behad ki seva mein sada busy dekhne chaahte hain kyonki seva mein busy rahne ke kaaran anek prakaar ki halchal se bach jaate hain। lekin jab bhi seva karte ho,plan banaate ho aur plan anusaar praikti-kal mein bhi aate ho,saphalta bhi praapta karte ho। lekin baapdaada chaahte hain ki ek samay par teenon seva ikatthi ho, sirf vaacha nahin ho, mansa bhi ho, vaacha bhi ho aur karmana arthaat sambandh-samparka mein aate hue bhi seva ho। seva ka bhaav,seva ki bhaavna ho। is samay vaacha ke seva ki percentage jyaada hai, mansa hai lekin vaacha ki percentage jyaada hai। ek hi samay par teenon seva saath-saath hone se seva mein saphalta aur jyaada hogi।

baapdaada ne samaachaar suna hai ki is group mein bhi bhinna-bhinna varga vaale aaye hue hain aur seva ke plan achhe bana rahe hain। achha kar rahe hain, lekin teenon seva ikatthi hone se seva ki speed aur vriddhi ko praapta hogi। sabhi chaaron or se bachche pahunch gaye hain, yeh dekh baapdaada ko bhi khushi hoti hai। naye-naye bachche umang-utsaah se pahunch jaate hain।

abhi baapdaada sabhi bachchon ko sada nirvighna swaroop mein dekhne chaahte hain,kyon? jab aap nimitta bane hue nirvighna sthiti mein sthit raho tab vishwa ki aatmaon ko sarva samasyaaon se nirvighna bana sako। iske liye vishesh do baaton par underline karo। karte bhi ho lekin aur underline karo। ek to har ek aatma ko apne aatmik drishti se dekho। aatma ke original sanskaar ke swaroop mein dekho। chaahe kaise bhi sanskaar vaali aatma hai lekin aapki har aatma ke prati shubh bhaavna, shubh kaamna,parivartan ki shreshtha bhaavna,unke sanskaar ko thode samay ke liye parivartan kar sakti hai। aatmik bhaav emerge karo। jaise shuru-shuru mein dekha to sangathan mein rehte aatmik drishti, aatmik vritti, aatma-aatma se mil rahi hai, baat kar rahi hai, is drishti se foundation kitna pakka ho gaya। abhi seva ke vistaar mein,seva ke vistaar ke sambandh mein aatmik bhaav se chalna, bolna,samparka mein aana merge ho gaya hai। khatma nahin hua hai lekin merge ho gaya hai। aatmik svamaan, aatma ko sahaj saphalta dilaata hai kyonki aap sabhi kaun aakar ikatthe hue ho? vahi kalpa pahle vaale dev aatmaayen,brahman aatmaayen ikatthe hue ho। brahman aatma ke roop mein bhi sabhi shreshtha aatmaayen ho, dev aatmaon ke hisaab se bhi shreshtha aatmaayen ho। usi swaroop se sambandh-samparka mein aao। har samay check karo - mujh dev aatma, brahman aatma ka shreshtha kartavya, shreshtha seva kya hai? ``duaaon dena aur duaayen lena।''aapke jad chitra kya seva karte hain? kaisi bhi aatma ho lekin duaayen lene jaate,duaayen lekar aate। aur koi bhi agar purooshaartha mein mehnat samajhte hain to sabse sahaj purooshaartha hai,saara din drishti,vritti,bol,bhaavna sabse duaayen do, duaayen lo। aapka title hai, vardaan hi hai maha-daani,seva karte,kaarya mein sambandh-samparka mein aate sirf yahi kaarya karo -duaayen do aur duaayen lo। yeh mushkil hai kya?ki sahaj hai?jo samajhte hain sahaj hai, woh haath uthaao। koi aapka opposition kare to?to bhi dua denge?denge?itni duaaon ka stock hai aapke paas?opposition to hogi kyonki opposition hi position tak pahunchaati hai। dekho, sabse jyaada opposition brahma baap ki hui। hui na?aur position kisne number one paai?brahma ne paai na! kuchh bhi ho lekin mujhe brahma baap samaan duaayen deni hain। kya brahma baap ke aage vyartha bolne,vyartha karne vaale nahin the?lekin brahma baap ne duaayen di, duaayen li, samaane ki shakti rakhi। bachcha hai, badal jaayega। aise hi aap bhi yahi vritti drishti rakho - yeh kalpa pahle vaale hamaare hi parivaar ke,brahman parivaar ke hain। mujhe badal isko bhi badalna hai। yeh badle to main badloon, nahin। mujhe badalke badalna hai, meri jimmevaari hai। tab dua niklegi aur dua milegi।

abhi samay jaldi se parivartan ki or ja raha hai,ati mein ja raha hai lekin samay parivartan ke pahle aap vishwa parivartak shreshtha aatmaayen sva parivartan dvaara sarva ke parivartan ke aadhaarmoorta bano। aap bhi vishwa ke aadhaarmoorta,uddhaarmoorta ho। har ek aatma lakshya rakho -mujhe nimitta banna hai। sirf teen baaton ka sva mein sankalp maatra bhi na ho, yeh parivartan karo। ek - parchintan। doosra - pardarshan। svadarshan ke bajaae pardarshan nahin। teesra - parmat ya parsang, kusang। shreshtha sang karo kyonki sangadosh bahut nuk-saan karta hai। pahle bhi baapdaada ne kaha tha - ek par-upkaari bano aur yeh teen par kaat do। par darshan, par chintan, parmat arthaat kusang,par ka phaaltu sang। par-upkaari bano tab hi duaayen milengi aur duaayen denge। koi kuchh bhi de lekin aap duaayen do। itni himmat hai? hai himmat?to baapdaada chaaron or ke sarva centres vaale bachchon ko kehte hain - agar aap sab bachchon ne himmat rakhi,koi kuchh bhi de lekin humein duaayen deni hain, to baapdaada is varsha extra aapko himmat ke, umang ke kaaran madad denge। extra madad denge। lekin duaayen denge to। mix nahin karna। baapdaada ke paas to saara record aata hai na! sankalp mein bhi duaaon ke badle aur kuchh na ho। himmat hai? hai to haath uthaao। karna padega। sirf haath nahin uthaana। karna padega। karenge?madhuban vaale,teachers karenge?achha,extra marks jama karenge?mubaarak ho। kyon?baapdaada ke paas advance party baar-baar aati hai। woh kehti hai ki humein to advance party ka part diya, woh baja rahe hain lekin hamaare saathi advance stage kyon nahin banaate? abhi uttar kya den?kya uttar den?advance stage aur advance party ka part, jab donon milen tab to samaapti hogi। to woh poochhte hain to kya javaab den?kitne saal mein banengi? sab mana liya, silver jubilee, golden jubilee, diamond jubilee sab mana liya। abhi add-vaans stage ceremony manaao। uski date fix karo। paandav bataao, date hogi uski? pahli line vaale bolo। date fix hogi ki achaanak hoga?kya hoga?achaanak hoga ki ho jaayega? bolo, kuchh bolo। soch rahe hain kya? nivzra se poochh rahe hain?ceremony hogi ya achaanak hoga?aap daadi se poochh rahe ho? yeh daadi ko dekh raha hai ki daadi kuchh bole। aap bataao, ramesh ko kehte hain bataao? (aakhir to yeh hona hi hai) aakhir bhi kab? (aap date bataao, us date tak kar lenge)achha - baapdaada ne ek saal ki extra date di hai। himmat se extra madad milegi। yeh to kar sakte hain na,yeh karke dikhaao phir baap date fix karega। (aapka direction chaahiye to is 2004 ko aisa mana lenge) matlab yeh hai ki abhi itni taiyaari nahin hai। to advance party ko abhi ek varsha to rehna padega na। achha। kyonki abhi se lakshya rakhenge- karna hi hai,to bahutkaal add ho jaayega kyonki bahutkaal ka bhi hisaab hai na!agar ant mein karenge to bahutkaal ka hisaab theek nahin hoga। isliye abhi se attention please। achha - abhi sabhi varga vaale kahenge ki hamko bhi sunna hai।

achha jo bhi varga vaale aaye hain, jinhonne bhi meeting ki hai,sabhi utho। achha। yeh teachers bhi aaye hain। sabhi ikatthe hokar baithe ho bahut achha kiya। graam vaale haath uthaao। yeh graam vaale aage baithe hain। achha media vaale haath uthaao। achha- heart vaalon ne apne oopar title rakha hai, dil vaale। to dilvaala group utho। achha yeh dil vaale hain। title achha rakha hai na! achha inhonne plan bahut achha banaaya hai। baapdaada ke paas samaachaar pahuncha hai। baapdaada samajhte hain ki practical ka anubhav prabhaav jaldi daalta hai isliye jo plan banaaya hai vo baapdaada ko pasanda hai। achha hai is seva ko badhaao aur is dvaara chaaron or aavaaj phailaao। himmat achhi rakhi hai। sangathan banaaya hai, yeh bahut achha kiya hai। yeh dil vaale unko baapdaada title dete hain ``anubhav ke authority vaale।''achha hai।

achha jo bhi varga aaye hain, sabhi utho।(media wing,business wing,transport wing, rural devlapmenta wing tatha CAD group ki meentig chal rahi hai) meetings to bahut achhi ki hai lekin baapdaada ki ek baat abhi tak koi bhi varga vaale ne nahin ki hai। yaad aata hai kaun si? (geeta ke bhagwan ko siddha karne ki) ye geeta vaali baat chhodo, woh to baapdaada ne kaha bhi hai ki yeh baat bahut shreshtha hai parantu yeh bahut sambhaal kar karni hai। pahle ek group aisa taiyaar karo jo aapke saathi banen। aur woh mike banen aur aap might bano। pahle aisa koi taiyaar karo। jo bhi varga seva kar rahe ho,kar rahe ho uski mubaarak hai। lekin har ek varga se kaun si vishesh aatmaayen jo seva mein aage badh saken woh abhi tak baapdaada ke saamne nahin aayi hain। chalo saamne nahin aaven, list to aave। abhi tak list bhi nahin aai hai। unhon ka sangathan, har ek varga ke nikle hue sangathan mein aaven। woh bhi nahin kiya hai। pahle list nikaalo abhi tak ke varga ki seva se hamaari seva mein sahayogi saathi kaun-kaun bane hain! to baapdaada dekhe ki aavaaj kitne tak pahuncha hai। jaise dekho medical dil vaalon ne practical example dikhaaya hai aur practical mein aavaaj phail raha hai, government bhi maan rahi hai। aise koi taiyaar karo। kar rahe ho bahut achha,karte chalo। result nikaalo। suna। jo bhi varga aaye hain unhon ko aisa karna hai। achha।

seva ka tarna eastern, nepaal, taamilnaadu ka hai:- teenon ko chance mila hai। achha teenon ki teachers khadi ho jaaen। teachers to bahut hain, itne hi centres honge na! jab teachers ki sankhya itni hai to centres ki sankhya bhi itni hi hogi na। achha hai, sabse bada vistaar ka zone hai aavaaj phailaane ka, agar teenon jagah par aavaaj pahunch jaae, to kitni seva aatometakli sahaj ho jaayegi।

abhi baapdaada ki yahi sabhi bachchon ko shubh raay hai va shreemat hai ki aisa group taiyaar karo jo yeh aavaaj phailaaye ki yahi parmaatma kaarya hai। aisa group taiyaar karo jo nirbhay hokar, nirsankoch baap ko pratyaksha kare, dridhta se bole, authority se bole। aajkal ke jamaane mein sthool authority bhi kaam mein aati hai। laukik authority aur parmaatma authority donon authority vaale aavaaj phaila sakte hain। to aisa group taiyaar karo। chaahe har varga apne-apne varga se taiyaar kare,chaahe koi bhi kare lekin abhi authority se bolne vaale nikaalo। jinke aavaaj ka, anubhav ka, authority ka prabhaav pade। samjha kya karna hai?

chaahe chhota group laao lekin sabhi ke saamne to aaye। jo bhi varga vaale baithe ho,vo sabhi varga vaale bolen ki hamaare varga mein aise koi taiyaar hain? koi aisa nikla hai, woh haath uthaao। jis varga mein aisa koi nikla hai,taiyaar hai woh haath uthaao। hai koi?koi nahin। abhi taiyaar kar rahe hain। business vaali(yogini behen)utho। (do bhaaeeyon ne kuchh samaachaar sunaaya)achha।

abhi roohaani drill yaad hai? ek second mein apne poorvaj stage mein aae paramdham nivaasi baap ke saath-saath light house ban vishwa ko light de sakte ho? to ek second mein sabhi chaaron or desh-videsh mein sunne vaale,dekhne vaale light house ban vishwa ke chaaron or sarva aatmaon ko light do, sakaash do,shaktiyaan do। achha।

chaaron or ke vishwa ke poorvaj aur poojya aatmaon ko,sada daata ban sarva ko duaayen dene vaale mahaadaani aatmaon ko, sada dridhta dvaara svaprivartan se sarva ka parivartan karne vaale vishwa parivartak aatmaon ko, sada light house ban sarva aatmaon ko light dene vaale sameep aatmaon ko baapdaada ka yaadapyaar aur dil ki duaaon sahit namaste।

mohini behen se - chance lene vaale chancellor ban jaate hain।

shaantaamni daadi se -(tabiyat theek nahin hai)hisaab chuktu ho raha hai। (grahchaari hai)aap jaise ratna ko grahchaari nahin ho sakti। shuru se vardaanon se pali ho, isliye aage badhti rahengi। badh rahi ho। koi baat nahin hai। kam nahin hongi,aage jaayengi।(daadi ratan-mohini, manohar daadi, mohini behen, eeshu daadi,munni behen sab baapdaada ke saamne hain) dekho aap sabhi vishesh sahayogi aatmaayen ho,baapdaada jab donon ko (daadi ji,daadi jaanki ji ko) yaad bhejte hain to aap sabhi saath mein zaroor hote hain kyonki sahayogi ho na! hain na sahayogi? aapka part inhon se jyaada seva ka hai। shuru se leke behad ki seva ke nimitta aap log bane ho। isliye aap sabhi ke mahatva se inhon ka bhi mahatva hai। sada apne ko baap ke sameep ratna samjho। samajhte bhi ho lekin aur ati sameep hain,sada sameep rahenge,yeh guarantee hai। hai na guarantee?achha hai,part achha baja rahi ho। chaahe naam vishesh aatmaon ka aata hai lekin aap sab usmein samaaye hue hain। alag kuchh nahin kar sakte hain। aapse yagya ki shobha hai। isliye apne ko bahut bade jimmevaar samjho। jimmevaari hai। baapdaada jimmevaar aatmaon ke roop mein dekhte hain। theek hai na! sab vishesh hain, visheshtaayen bhi hain। un vishesh-taaon se sabko chalaao aur aage badhaao। achha।

daadi ji, daadi jaanki ji se:- achha hai, donon daadiyaan bahut achhi paalna kar rahe ho। achhi paalna ho rahi hai na! bahut achha। seva ke nimitta bani hui hai na!to aap sabko bhi daadiyon ko dekhke khushi hoti hai। khushi hoti hai na!jimmevaari ka sukh bhi to milta hai na! sabki duaayen kitni milti hain। sabhi ko khushi hoti hai, (donon daadiyaan baapdaada ko gale lagi)jaise yeh dekhkar khushi hoti hai vaise inhon jaise banke kitni khushi hogi kyonki baapdaada ne nimitta banaaya hai to koi visheshta hai tab nimitta banaaya hai। aur vahi visheshtaayen aap har ek mein aa jaaen to kya ho jaayega?apna raajya aa jaayega। jo baapdaada date kehte hain na,woh aa jaayegi। abhi yaad hai na date fix karni hai। har ek samjhe mujhe karni hai। to sabhi nimitta ban jaayenge to vishwa ka navnirmaan ho hi jaayega। nimitta bhaav,yeh gunon ki khaan hai। sirf har samay nimitta bhaav aa jaae to aur sabhi gun sahaj aa sakte hain kyonki nimitta bhaav mein main pan nahin hai aur main pan hi halchal mein laata hai। nimitta banne se mera pan bhi khatma, tera,tera ho jaata hai। sahajyogi ban jaate hain। to sabhi ka daadiyon se pyaar hai, baapdaada se pyaar hai,to pyaar ka return hai - visheshtaaon ko samaan banaana। to aise lakshya rakho। visheshtaaon ko samaan banaana hai। kisi mein bhi koi visheshta dekho,visheshta ko bhale follow karo। aatma ko follow karne mein donon dikhaai denge। visheshta ko dekho aur usmein samaan bano। achha।