Avyakt murli for Friday 31 December 2004

>

31-12-04 om shanti avyakt baapdaadaamdhuban

“is varsha ke aarambha se behad ka vairaagya emerge karo, yahi muktidhaam ke get ki chaabi hai”

aaj navayug rachta baapdaada apne bachchon se nav varsha manaane ke liye, parmaatma milan manaane ke liye bachchon ke sneh mein apne doordesh se saakaar vatan mein milan manaane aaye hain। duniya mein to navvarsha ki mubaarak ek do ko dete hain। lekin baapdaada aap bachchon ko navayug aur naye varsha ki, donon ki mubaarak de rahe hain। naya varsha to ek din manaane ka hai। navayug to aap sangam par sada manaate rehte। aap sabhi bhi parmaatma pyaar ki aakarshan mein kheenchate hue yahaan pahunch gaye ho। lekin sabse doordesh se aane vaala kaun?double videshi?woh to phir bhi is saakaar desh mein hi hai lekin baapdaada doordeshi kitna door se aaye hain? hisaab nikaal sakte hain, kitne mile se aaye hain? to doordeshi baapdaada chaaron or ke bachchon ko chaahe saamne diamond haal mein baithe hain,chaahe madhuban mein baithe hain,chaahe gyaan sarovar mein baithe hain, gallery mein baithe hain,aap sabke saath jo door baithe desh videsh mein baapdaada se milan mana rahe hain, baapdaada dekh rahe hain sabhi kitne pyaar se, door se dekh bhi rahe hain, sun bhi rahe hain। to chaaron or ke bachchon ko navayug aur naye varsha ki padamguna mubaarak ho, mubaarak ho,mubaarak ho। bachchon ko to navayug naynon ke saamne hai na! bas aaj sangam par hai, kal apne navayug mein raajya adhikaari ban raajya karenge। itna najdeek anubhav ho raha hai? aaj aur kal ki hi to baat hai। kal tha,kal phir se hona hai। apne navayug ki, golden yug ki golden dress saamne dikhaai de rahi hai? kitni sundar hai! spashta dikhaai de rahi hai na! aaj saadhaaran dress mein hain aur kal navayug ki sundar dress mein chamakte hue dikhaai denge। navvarsha mein to ek din ke liye ek do ko gift dete hain। lekin navayug rachta baapdaada ne aap sabko golden world ki saugaat di hai, jo anek janma chalne vaali hai। vinaashi saugaat nahin hai। avinaashi saugaat baap ne aap bachchon ko de di hai। yaad hai na! bhool to nahin gaye ho na! second mein aa ja sakte ho। abhi-abhi sangam par, abhi-abhi apni golden duniya mein pahunch jaate ho ki deri lagti hai? apna raajya smriti mein aa jaata hai na!

aaj ke din ko vidaai ka din kaha jaata hai aur 12 baje ke baad badhaai ka din kaha jaayega। to vidaai ke din,varsha ki vidaai ke saath-saath aap sabne varsha ke saath aur kisko vidaai di? check kiya sada ke liye vidaai di va thode samay ke liye vidaai di? baapdaada ne pahle bhi kaha hai ki samay ki raphtaar teevragti se ja rahi hai to saare varsha ki result mein check kiya ki kya mere purushaartha ki raphtaar teevra rahi? ya kab kaise, kab kaise rahi? duniya ki haalton ko dekhte hue ab apne vishesh do svaroopon ko emerge karo, woh do swaroop hai - ek sarva prati merciful aur kalyaankaari aur doosra har aatma ke prati sada daata ke bachche maastardaata। vishwa ki aatmaayen badi shaktiheen,duhkhi,ashaanta chilla rahi hai। baap ke aage, aap poojya aatmaon ke aage pukaar rahi hai - kuchh ghadiyon ke liye bhi sukh de do, shanti de do। khushi de do, himmat de do। baap to bachchon ke duhkh, pareshaani ko dekh nahin sakte, sun nahin sakte। kya aap sabhi poojya aatmaon ko raham nahin aata ! maang rahe hain - do, do, do। to daata ke bachche kuchh anchali to de do। baap bhi aap bachchon ko saathi bana ke,master daata banaake, apne right hand banaake yahi ishaara dete hain - itni vishwa ki aatmaayen sabhi ko mukti dilaani hai। muktidhaam mein jaana hai। to he daata ke bachche apne shreshtha sankalp dvaara, mansa shaktidvaara,chaahe vaani dvaara, chaahe sambandh-samparka dvaara, chaahe shubhbhaavna-shubhkaamna dvaara, chaahe vibration vaayumandal dvaara kisi bhi yukti se mukti dilaao। chilla rahe hain mukti do,baapdaada apne right hands ko kehte hain raham karo।

abhi tak hisaab nikaalo। chaahe mega programme kiya hai, chaahe conference ki hai, chaahe bhaarat mein ya videsh mein centre bhi khole hain lekin total vishwa ke aatmaon ki sankhya ke hisaab se kitni percent mein aatmaon ko mukti ka raasta bataaya hai? sirf bhaarat kalyaankaari ho ya videsh mein jo bhi 5 khanda hain, to jahaan-jahaan sevaakendra khole hain vahaan ke kalyaankaari ho va vishwa kalyaankaari ho? vishwa ka kalyaan karne ke liye har ek bachche ko baap ka hand,right hand banna hai । kisko bhi kuchh diya jaata hai to kisse diya jaata hai? haathon se diya jaata hai na। to baapdaada ke aap hands ho na,haath ho na। to baapdaada right hands se poochhte hain, kitni percent ka kalyaan kiya hai? kitni percent ka kiya hai? sunaao,hisaab nikaalo। paandav hisaab karne mein hoshiyaar hain na? iseelie baapdaada kehte hain ab sva-purushaartha aur seva ke bhinna-bhinna vidhiyon dvaara purushaartha teevra karo। sva ki sthiti mein bhi chaar baaten vishesh check karo - isko kahenge teevra purushaartha।

ek baat - pahle yeh check karo ki nimitta bhaav hai? koi bhi royal roop ka main pan to nahin hai? meraapan to nahin hai?saadhaaran logon ka main aur mera bhi saadhaaran hai, mota hai lekin brahman jeevan ka mera aur main pan sookshm aur royal hai। uski bhaasha maaloom hai kya hai? yeh to hota hi hai,yeh to chalta hi hai। yeh to hona hi hai। chal rahe hain,dekh rahe hain। to ek nimitta bhaav,har baat mein nimitta hain। chaahe seva mein,chaahe sthiti mein,chaahe sambandh-samparka mein, chehra aur chalan nimitta bhaav ka ho। aur uski doosri visheshta hogi - nirmaan bhaavna। nimitta aur nirmaan bhaav se nirmaan karna। to teen baaten suni - nimitta, nirmaan aur nirmaan aur chauthi baat hai - nirvaan। jab chaahe nirvaandhaam mein pahunch jaayen। nirvaan sthiti mein sthit ho jaayen kyonki svayan nirvaan sthiti mein honge tab doosron ko nirvaandhaam mein pahuncha sakenge। abhi sabhi mukti chaahte hain chhudaao,chhudaao chilla rahe hain। to yeh chaar baaten achhi percent mein practical jeevan mein hona arthaat teevra purushaarthi। tab baapdaada kahenge vaah। vaah! bachche vaah! aap bhi kaho vaah! baba vaah! vaah! drama vaah! vaah! purushaartha vaah! lekin pata hai abhi kya karte ho? pata hai? kabhi vaah! kehte ho kabhi why kehte ho। vaah! ke bajaae why,aur why ho jaata hai haay। to why nahin,vaah! aapko bhi kya achha lagta hai, vaah। achha lagta hai ya why? kya achha lagta hai vaah। kabhi plaai nahin karte ho? galti se bhi aa jaata hai। double foreigners why-why kehte hain? kabhi-kabhi kah dete ho?

jo double foreigners kabhi bhi why nahin kehte woh haath uthaao। bahut thode hain। achha - bhaaratvaasi jo vaah! vaah! ke bajaae kyo-kya kehte hai woh haath uthaao। kyo-kya kehte ho? kisne chhutti di hai aapko? saskaaro ne? puraane saskaaro ne aapko why ki chhutti de di hai aur baap kehte hai vaah! vaah! kaho। why-why nahin। to abhi naye varsha mein kya karenge? vaah। vaah! karenge?ya kabhi-kabhi why kahne ki chhutti de de?why achha nahin hai। jaise vaai ho jaati hai na,to kharaab ho jaata hai na। to why vaai hai, yeh nahin karo। vaah! vaah! kitna achha lagta hai। haan bolo, vaah। vaah! vaah!

achha - to doordesh mein sun rahe hain, dekh rahe hain - bhaarat mein bhi videsh mein bhi,un bachchon se bhi poochhte hain vaah! vaah! karte ho ya why,why karte ho? abhi vidaai ka din hai na! aaj varsha ke vidaai ka last de hai। to sabhi sankalp karo - why nahin kahenge। sochenge bhi nahin। kveshchan mark nahin,aashcharya ki maatra nahin,bindi। question mark likho,kitna tedha hai aur bindi kitni sahaj hai। bas naynon mein baap bindu ko sama do। jaise naynon mein dekhne ki bindi samaai hui hai na! aise hi sada naynon mein bindu baap ko sama lo। samaane aata hai? aata hai ya fit nahin hoti hai?neeche oopar ho jaati hai ' to kya karenge?vidaai kisko denge?why ko?kabhi bhi aamarya ki nishaani bhi nahin aave, yeh kaise! yeh bhi hota hai kya! hona to nahin chaahiye, kyo hota hai! kyesan mark nahin, aarbya ki maatra bhi nahin। bas baap aur main। kai bachche kehte hain yeh to chalta hi hai na! baapdaada ko bahut ramneek baaten roohrihaan mein kehte hain, saamne to kah nahin sakte hain na। to roohrihaan mein sabkuchh kah dete hain। achha kuchh bhi chalta hai lekin aapko chalna nahin hai, aapko udna hai to chalne ki baaten kyon dekhte ho, udo aur udaao। shubh bhaavna, shubh kaamna aisi shaktishaali hai jo beech mein sirf why nahin aave, sivaae shubh bhaavna, shubh kaamna ke, to itni powerful hai jo kisi ashubh bhaavna vaale ko bhi shubh bhaavna mein badal sakte ho। second number - agar badal nahin sakte ho to bhi aapki shubh bhaavna, shubh kaamna avinaashi hai,kabhi-kabhi vaali nahin, avinaashi hai to aapke oopar ashubh bhaavna ka prabhaav nahin pad sakta hai। question mein chale jaate ho,yeh kyon ho raha hai? yeh kab tak chalega?kaise chalega?isse shubh bhaavna ki shakti kam ho jaati hai। nahin to shubh bhaavna,shubh kaamna is sankalp shakti mein bahut shakti hai। dekho, aap sabhi aaye baapdaada ke paas। pahla din yaad karo, baapdaada ne kya kiya?chaahe patit aaye, chaahe paapi aaye, chaahe saadhaaran aaye,bhinna- bhinna vritti vaale, bhinna-bhinna bhaavna vaale aaye, baapdaada ne kya kiya?shubh bhaavna rakhi na! mere ho, master sarvashaktivaan ho, diltakhta nasheen ho, yeh shubh bhaavna rakhi na, shubh kaamna rakhi na,usse hi to baap ke ban gaye na। baap ne kaha kya ki he paapi kyon aaye ho? shubh bhaavna rakhi, mere bachche,master sarva shaktivaan bachche, jab baap ne aap sabke oopar shubh bhaavna rakhi, shubh kaamna rakhi to aapke dil ne kya kaha? mera baba। baap ne kya kaha? mere bachche। aise hi agar shubh bhaavna,shubh kaamna rakhege to kya dikhaai dega?mera kalpa pahle vaala meetha bhaai, meri sikeeldhi behen। parivartan ho jaayega।

to is varsha mein kuchh karke dikhaana। sirf haath nahin uthaana। haath uthaana bahut sahaj hai। man ka haath uthaana kyonki bahut kaam raha hua hai। baapdaada to najar karte hain,vishwa ki aatmaao ke oopar to bahut taras padta hai। ab prakriti bhi tang ho gai hai। prakriti khud tang ho gai hai,to kya karen? aatmaon ko tang kar rahi hai। aur baap bachchon ko dekhke taras mein aa jaate hain। aap sabko taras nahin aata? sirf khabar sunkar chup ho jaate ho,bas, itni aatmaayen chali gaeen। vo aatmaayen sandesh se to vanchit rah gai। abhi to daata bano, merciful bano। yeh tab hoga, raham tab aayega jab is varsha ke aarambha se apne mein behad ki vairaagya vritti emerge karo। behad ki vairaagya vritti। yeh deh ki, dehbhaan ki smriti, yeh bhi behad ke vairaagya ki kami hai। chhoti-chhoti had ki baaten sthiti ko dagmag karti hai,kaaran? behad ki vairaagya vritti kam hai,lagaav hai। vairaagya nahin hai lagaav hai। jab bilkul behad ke vairaagi ban jaayenge, vatti mein bhi vairaagi,drishti mein bhi behad ke vairaagi, sambandh-samparka mein, seva mein sabmen behad ke vairaagi… tabhi muktidhaam ka darvaaja khulega। abhi to jo aatmaayen aa rahi hain phir janma lengi,phir duhkhi hogi। ab muktidhaam ka get kholne ke nimitta to aap ho na? brahma baap ke saathi ho na! to behad ki vairaagya vritti hai get kholne ki chaabi। abhi chaabi nahin lagi hai, chaabi taiyaar hi nahin ki hai। brahma baap bhi intajaar kar raha hai, advance party bhi intajaar kar rahi hai, prakriti bhi intajaar kar rahi hai, tang ho gai hai bahut। maaya bhi apne din ginti kar rahi hai । abhi bolo he master sarvashaktivaan,bolo kya karna hai?

is varsha mein koi naveenta to karenge na! naya varsha kehte hain to naveenta to karenge na। abhi behad ke vairaagya ki,muktidhaam jaane ki chaabi taiyaar karo। aap sabhi ko bhi to pahle muktidhaam mein jaana hai na। brahma baap se vaayda kiya hai - saath chalenge, saath aayenge, saath mein raajya karenge, saath mein bhakti karenge। to abhi taiyaari karo, is varsha mein karenge ki doosra varsha chaahiye? jo samajhte hain is varsha mein attention please,baar-baar karenge woh haath uthaao। karenge?phir to advance party aapko bahut mubaarak degi। woh bhi thak gaye hain। achha - teachers kya kehti hain? pahli line kya kehti hai? pahle to pahli line ke paandav aur pahli line ki shaktiyaan jo karenge woh haath uthaao। aadha haath nahin, aadha uthaayenge to kahenge aadha karenge। lamba haath uthaao। achha। mubaarak ho, mubaarak ho। achha - double videshi haath uthaao। ek do mein dekho kisne nahin uthaaya hai। achha, yeh sindhi group bhi haath utha raha hai, kamaal hai। aap bhi karenge? sindhi group karenge?tab to double mubaarak ho। bahut achha। ek do ko saath dekar, shubhbhaavna ka ishaara dete,haath mein haath milaate karna hi hai। achha। (sabha mein koi ne aavaaj ki) sab baith jaao, nothing new।

madhuban nivaasi:-madhuban vaale haath uthaao,achha oopar bhi jo sun rahe hain woh haath utha rahe hain। desh-videsh vaale haath utha rahe hain। achha hai। sangathan mein shakti hai, ek do ko shubh bhaavna ka ishaara, bolna nahin, bolenge to jhagda ho jaayega। shubh bhaavna ka ishaara do। shubh bhaavna ka ishaara dena jaante ho na,shubh bhaavna ka ishaara de sakte ho?

achha - baapdaada khush hai jo baapdaada ne diamond haal banvaaya hai,usko saphal kar rahe hain iseelie saphalta bhav। har second ko, har sankalp ko, har bol ko,har kadam ko,har vastu ko saphal karo aur saphal karaao। 12 baje ke baad is naye varsha mein baapdaada ki taraph se pahla vardaan apne ko dena - saphalta bhav। sankalp bhi asphal nahin ho kyoki aapka ek shubh sankalp vishwa ka kalyaan karne vaala hai। itna amoolya hai। ek-ek second vishwa kalyaan ka aadhaar hai। iseelie saphal karo saphalta moorta bano। bas yeh check karo second jo beeta, sankalp jo chala, saphal hua? to sabhi aaj majority pat mein baithe hai,yeh patraaniyaan hain, yeh koch raaniyaan hai, koch raane hain, kursi raane aur kursi raaniyaan aur aap patraani ho। maja hai na। thak to nahin gaye hain? kyonki aaj lamba samay hai na! aur teen baje se leke jagah pakad lete hain। baapdaada sab dekhta rehta hai। jo 3 - 4 baje se haal mein aaye hain woh haath uthaao। TV. mein dekho kitne hain? saare hi haath utha rahe hain। koi 3 baje koi 4 baje aaye। teen baje aane vaalon ko trilokeenaath ka vardaan hai। bhakti mein bahut kiya hai na,to saal mein ek baari yahaan bhi kar lete hain। apne raajya mein yeh nahin hoga। lekin vahaan na baap aayega,na aap aayenge। baithege kahaan। abhi maja le lo। pat mein nahin baithe ho,baapdaada to aapko diltakhta par dekh rahe hain। lekin drishya bahut achha lag raha hai। sab bindu hokar baithe hain। sardi lag rahi hai? sardi bhaag gai na! achha। (aaj haal mein 15 - 16 hajaar bhaai bahne baithe hai)

abhi- abhi ek second mein bindu ban bindu baap ko yaad karo aur jo bhi koi baate ho usko bindu lagaao। laga sakte ho? bas ek second mein “main baba ka,baba mera।''achha।

seva ka tarna- mahaaraashtrah achha - har zone ko seva ka golden chance milta hai। in 15 - 2० dino mein sachche braahmanon ki seva kar apne punya ki kothiyaan bhar dete hain kyonki achhi seva karte hain to sabke dil se kya nikalta hai?bahut achha,bahut achha,bahut achha। to yeh duaayen punya ke khaate mein jama ho jaati hai। to kisi ko bhi punya ka khaata jama karna sahaj hai, yogbal se to hota hi hai lekin yeh karma karte bhi agar punya ka khaata jama karna hai to karmayogi sthiti mein yagya seva karo to aapka khaata bharpoor ho hi jaayega। yeh sahaj vidhi hai। mahaaraashtra to hai, mahaaraashtra ki sankhya bhi maha hai। centres bhi jyaada hain, geeta paathshaalaayen to beshumaar hain। achha hai। baapdaada to dekhte hain jo bhi apne sva-ichchha se apne ko seva mein jeevan sahit samarpan karte hain, un sabhi samarpit bachchon ko shareer nirvaah ka saadhan avashya sahaj praapta hota hai। khaao,pio prabhu ke gun gaao। seva karte hain,bhaashan karte hain, course karaate hain, yeh kya hai?prabhu ke gun hi to gaate hain। aur daal roti dene ke liye to baapdaada bandha hua hai। 36 prakaar ka bhojan nahin khilaayega, woh kabhi-kabhi khila dega। to bahut achha - chaahe trustee banke bhi seva kar rahe hain, agar trustee hai,sachche trustee, matlab ke trustee nahin, sachche trustee hain to baapdaada kabhi bhookha nahin rakh sakta। daal roti zaroor khilaayega kyoki baapdaada bhookha rehta hai kya?jab baapdaada bhookha nahin rehta, sabhi bhog lagaate hain। aap sabhi bhog lagaate hain na, chaturaai to nahin karte,ek gitti khilaao, baaki bhool jaao, nahin। agar trustee hain to bhi baapdaada bandha hua hai। to mahaaraashtra jitne maha hai utne vaaris bhi mahaan hai? hai na!

abhi is varsha mein baapdaada sabhi zone mein kitne-kitne vaaris quality hain,woh list banaayenge, un vaarison ki ceremony karenge। teachers to jaanti hain na! dekhenge, ismen number one kaun sa zone hai? mahaaraashtra hoga na! bahut achha। pakke vaaris kaun hain,kitne hain?aur is varsha mein yeh jo mega programme kiya hai woh to bahut achha kiya। kitne programme hue hain? kahaan- kahaan hue hain? (15 - 16 hue hain) baapdaada ne dekha koi-koi programme to zone ne milkar kiya hai lekin koi-koi programme ek centre ya aaspaas uske connection vaalon ne kiya hai, woh kaun-se hain? (maingalor, sambalpur,vilaaspur,poona, mehsaana) to kamaal ki na unhonne। woh aaye hain 7kaun aayen hai?poona vaale utho। poona ki teachers utho। poona ne bhi kamaal ki। theek hai। sartiphiket achha liya। achha - mehsaana। kar liya hai? mubaarak ho। bilaaspur ke bhaai aaye hain, unko bhi mubaarak ho। sambhalpur vaala koi hai?thode- thode aaye hain, usko bhi mubaarak hai,himmat rakhkar kiya aur saphalta paai। to saphalta ki mubaarak ho। achha। yeh to hua, abhi baapdaada kya chaahte hain? sabhi vargon ki seva to hui lekin abhi baapdaada chaahte hain ki har varga ne jo bhi aadi se ant tak seva ki hai, jaise baapdaada ne mike bulaaye,the to nambarvaar mike, sabhi powerful nahin the, thode medium the। lekin abhi baapdaada yeh chaahte hain ki itna samay jo varga ki seva ki, usmein aai pi ya VIP har zone se kitne nikle hain jo kahe ki knowledge ko main maanta hoon। sirf yeh mahima nahin kare - yeh kaarya bahut achha hai aur koi kar nahin sakta, yeh nahin kahe lekin knowledge ko maanta hoon। aise knowledgeful group baapdaada dekhne chaahte hai। clear hua। to is varsha mein last tarna aayega na usmein har varga vaale jo aise aai .pi. hon, vi. aai pi. ka to bhaagya thoda peechhe hain lekin aai .pi. jo knowledge ko maanta ho, aisa group baapdaada ke saamne laao। woh seva kare। unko seva ke nimitta banaayenge। theek hai! abhi agle varsha ka yeh hom work hai varga vaalon ko kyonki koi na koi varga to aata hi hai।

cultural wing:- achha - cultural vaale jab cultural dikhaate ho to usmein aur kya siddha karte ho?jo bhi cultural karte ho usmein aapke chalan chehre aur karma se kya character dikhaai deta hai,yeh shreshtha character vaale hain, yeh dikhaai deta hai?haan karo ya na? haan to haath hilaao। achha dono lakshya rakhte ho। kyonki cultural programme to sabhi karte hain lekin aap jo cultural dikhaate ho ya programme karte ho usmein sirf cultural nahin ho lekin naitik moolya bhi samaaye hue hon, character ho। usse kya hoga' dekhne vaalon ko sahaj hi aakarshan hogi ki ham bhi character dhaaran karen। to is vidhi se,kyonki kai gyaan sunne nahin chaahte hain, seedha gyaan nahin sunenge lekin aapke cultural se woh character seekh jaaye। aisa kar bhi rahe ho aur bhi lakshya rakho ki kam se kam dekhne vaale jo hain unko naitik value ka ishaara to mile, aakarshan to ho, hamko karna hai। baaki achha kar rahe hain। jo bhi varga kar rahe hain baapdaada har varga ke purushaartha aur result ko dekh khush hain। aur is vargeekran ki seva ke baad kai bhaai-bahinon ko chance mila hai,seva ke kshetra mein aage aane mein aur busy rehte hain। isliye baapdaada ko vargon ki seva achhi lagti hai। sabhi kar rahe hain। kabhi koi varga aata hai, kabhi koi varga aata hai to sabhi theek hai? bahut theek ya theek hai?bahut theek?teevra purushaarthi ya purushaarthi kya hai? achha chal rahe hain ya ud rahe hain?kya kahenge?abhi udna hai aur udaana hai। chalne ka time poora ho gaya। jaise bailgaadi ka season poora ho gaya, kaaren aa gai hai। pahle to bailgaadiyon mein hi jaate the। to abhi chalne ka samay poora hua, abhi udna hai। achha।

jyoorista wing:- achha - achhe-achhe aaye hain, mubaarak ho। judge aur vakeel to aavaaj bulanda karne vaale hote hain na, to abhi aisa koi practical ka plan banaao jo aap bhi spirichualiti ka aavaaj bulanda dikhaao। jo sabki najar mein aaye ki saadhaaran vakeel, saadhaaran judge aur spirichual judge ya vakeel mein kitna antar hai। ho jaayega, baapdaada ne suna - geeta ke bhagwan ka bhi soch rahe hain। socho। isme koi ko nimitta banaana padega। koi judge ho, koi dharmaatma ho,dono group mein se do chaar ko taiyaar karo,seva mein,maidaan mein aana padega। aapas mein meeting karo, sabhi judge aur religious vaale milkar meeting karke koi plan socho। donon hi milkar raay karo। phir kuchh kar sakenge। ho jaayega, hona to hai hi। mubaarak ho। jo bhi aaye hain,unhon ko bhi vishesh mubaarak ho।

double videshi to shaantivan va madhuban ka vishesh shrringaar hain। baapdaada dekhte hain ek-ek bachcha vishesh double hero hai। ratna bhi hai aur hero part bajaane vaale bhi hain। to har ek videshi double hero hai। dekho kitne deshon mein aur vahaan se hi taiyaar hoke vahaan hi seva kar rahe hain। kitne deshon se aaye hue hain? (45 deshon se) achha, 45 desh vaale haath uthaao। jo bhinna- bhinna desh se aaye hain, unmein se ek-ek haath uthaao। chhota bachcha bhi haath hila raha hai। mubaarak ho। achha। 45 desh vaalon ko padmaapdam mubaarak ho। (chhotebachchon ki retreat chal rahi hai) sabhi dekho yeh bachchon ka group kitna achha hai। kitne desh ke bachche hain? (15 desh ke 28 bachche hain) geet sunaao। (bachchon ne geet gaaya main baba ka, baba mera) achha - sabhi bachche amritvela karte ho? jo bachche amritvela karte hain woh haath uthaao। achha jo kabhi-kabhi karte hain woh haath uthaao। kabhi-kabhi vaale jyaada hain। achha – ladaai-jhagda karte ho? jo ladaai nahin karta hai woh haath uthaao। to abhi yahaan se jaane ke baad ladaai nahin karna kyonki bahmaakumaar ho na। to brahmaakumaar,baba mera,mai baba ka kaha to ladaai nahin karna hai। nahin to baba mera nahin hoga। abhi ladaai karenge?(nahin) abhi parivartan karenge। abhi teachers sab report dena to ladaai-jhagda kiya hai ya nahin kiya? baaki mubaarak ho। achha hai,phir bhi purushaartha achha kiya hai isliye padamguna mubaarak ho। (videsh ka youth group bhi aaya hai) (mera baba ka sign board dikha rahe hain) bahut achha,taali bajaao। baapdaada ne suna to result mein youth group ne purushaartha mein bahut guhyata laai hai। to yeh purushaartha mein jo sooksham mein gaye, to sada purushaartha mein aage se aage badhte rehna,peechhe nahin hona', aage badhte rehna aur udte rehna। mubaarak ho, mubaarak ho,mubaarak ho। achha -

(daadi jaanki ne baapdaada se poochha- vishwa ki karodon aatmaon ko is saal mein mesej kaise mile, mera baba hai yeh anubhav kaise hoh uske liye kya plan banen?)

uske liye koi group banaao, aisa koi chhota group banaao jo is baat par manan kare kyonki vidhiyaan to sunaai, har ek ko chaahe mansa sankalp dvaara, chaahe vritti vibration dvaara, chaahe vaani dvaara,chaahe sambandh samparka dvaara har ek ko lakshya rakhna hai ki saare din mein kitni aatmaon ki seva ki? chaahe mansa ki, chaahe vritti vibration se ki, vaani draara ki,programme dvaara ki ya sambandh samparka se ki ya chalan chehre se ki, har ek ko note karna chaahiye ki mere seva ki result saare din ki kya rahi? aur ek group banaao jo soche, seva ke bina rah nahin sake। usko dekh kar sab follow karenge। lekin sva sthiti aur seva ki sthiti donon ka balance ho। phir seva bahut badhegi aur doosron ko bhi umang aayega ki balance hai। sirf seva karte hain to kehte hai, yeh to bolne vaale hai hi। lekin aisa chhota group banaao jo yeh paan ka beeda uthaave ki ham sva- sthiti aur seva ki vidhiyon se seva karenge। ek eksaampal ho group, phir woh jaise kehte hain na ek deepak se deevaali ho jaati hai, vaise ek group se vriddhi hoti jaayegi। achha।

sabhi ko varsha ka hom work to yaad hai na,jo baapdaada ne kaha ki is varsha mein kya vidaai deni hai aur badhaai manaani hai, woh yaad hai na? abhi baapdaada bhi dekhenge ek maas ki result mein sirf yahaan yeh likhe ki itni parsentej seva ki, 40 percent,80percent, 20 percent, 10 percent… sirf percentage likhe lamba-chauda patra nahin likhe, phir baapdaada first number vaalon ko inaam denge। lekin balance sva aur seva ka balance, santushtata prasanta ka balance। theek hai। sab result likhenge, sirf parsentej likhna meethi daadi, yogayukta daadi, lamba nahin likhna,bas parsentej likhna kyonki padhne ka time nahin hota hai। phir saare braahyan parivaar mein jo ek maas ki result bhejenge aur number one aayenge usko baapdaada inaam denge। theek hai?pasanda hai?samajh mein aaya?maataaon ko samajh mein aaya?teachers ko samajh mein aaya?peechhe vaalon ko samajh mein aaya? haath uthaao peechhe vaale। achha -

abhi chaaron or ke sarva naye yug ke maalik bachchon ko,chaaron or ke naye varsha manaane ke umang-utsaah vaale bachchon ko sada udte rehna aur udaate rehna, aise udti kala vaale bachchon ko, sada teevra pukpaartha dvaara vijay maala ke manke banne vaale vijayi ratnon ko baapdaada ka naye varsha aur naye yug ki duaaon ke saath-saath padam guna thaaliyaan bhar-bhar ke mubaarak ho, mubaarak ho। ek haath ki taali bajaao। achha।

daadeeji se:- tabiyat kaisi bhi hai lekin sambhaal rahi ho bahut achha। achha sambhaal rahi ho। aapki daadiyon ki unity aur chehra aur chalan usko dekh karke sabki paalna ho rahi hai। baap ka to pahle din se haath aur saath hai hi hai। achha- (jaanki daadi se) videsh theek hai ? raajasthaan ki jo teachers aai hain woh uthe।

raajasthaan ki teen bahnen:-trimoorti aai hain। sahaj ho gaya na! sahaj hua, himmat badhi? abhi to nahin kahengi bada mushkil hai। abhi 10 guna karke dikhaana। raajasthaan ko paristaan banaana hi hai। iseelie himmat rakhkar badhte chalo। abhi aavaaj phailaana। abhi aavaaj phailaaya hai, abhi jin vi.aai.pi. ki edresej hain unko sneh milan mein bulaao, abhi loha garam hai usmein jo bhi banaane chaahe ban jaayega। to har ek sthaan jo bhi jaypur mein najdeek hai, usmein bulaao। aur vaise bhi raajasthaan mein beech-beech mein sneh milan rakho,bahmaabhojan khilaao। braahmanon ka to rakhna hi hai lekin vi.aai.Ps ka rakho। IPs ko khada karo to raajasthaan aage jaayega। baaki achha kar liya,mubaarak ho,sahaj ho gaya। mubaarak ho। (baba ko mubaarak ho) daadiyon ko mubaarak do। achha kiya। aise hi milkar karna, is saal mein do teen programme karo। kabhi yeh kare, kabhi yeh kare। achha।

nirmalshaanta daadi se:-aapki shakla suhaani (sundar) lag rahi hai। beemaar nahin lag rahi hai। (beemaar thode hi hoon) achha hai। bahut achha। (rukmani behen se) - yeh bhi bahut achhi mehnat karti hai। thak to nahin gai। bahut achhi dil se seva ki, uski mubaarak hai, mubaarak hai।

raatri 12 baje ke pashchaat baapdaada ne sabhi bachche ko naye varsha 2005 ki badhaaiyaan di

chaaron or ke sabhi sikeeldhe, laadle,takhtansheen,svaraajya adhikaari bachchon ko naye varsha aur nav yug ki badhaaiyaan ho,badhaaiyaan hon। sada hi is varsha sabko badhaaiyaan deni hain aur badhaaiyaan leni hain - isi lakshya se lakshan dhaaran kar udte rehna, udaate rehna। mubaarak ho, mubaarak ho, mubaarak ho ।