Avyakt murli for Monday 5 March 2012

05-03-12 om shanti avyakt baapdaada madhuban

“ab chaaron or duhkh ashaanti badh rahi hai isliye apne vishwa kalyaani swaroop ko pratyaksha karo, mansa seva badhaao, baap ke sang ke rang se double holi bano”

aaj baapdaada har bachche ke bhaagya ki rekhaayen dekh rahe hain। mastak mein chamakte hue sitaare ki rekha, naynon mein sneh aur shakti ki rekha, hothon mein muskaan ki rekha, paanv mein har kadam mein padam ki rekha dekh rahe hain। aap sabhi bhi apne bhaagya ki rekhaayen dekh harshit hote ho na! dil mein yahi gaate vaah mera bhaagya! har ek ka mastak us divya sitaare se chamakta hua dekh baapdaada bhi khush ho rahe hain aur yahi dil mein geet gaate vaah bachche vaah! bachchon ke dil se kya geet sun rahe hain? vaah baba vaah! to bachche bhi vaah! baap bhi vaah! to yeh saari sabha kya ho gai? vaah! vaah! vaah! to apne bhaagya ko dekh sada aise hi harshit raho jaise abhi sab harshit ho rahe hain। yeh bhaagya ab sangamayug mein hi milta hai। sangamayug ke har ghadi ki bahut badi value hai। sangamayug ki ek ghadi avinaashi ho jaati hai kyonki har ghadi ka 21 janmon ke saath sambandh hai। ab ki ek ghadi ka sanbandha 21 janmon ke saath hai। to check karo ek ghadi agar vyartha gai to ek janma ki baat nahin 21 janma ke sambandh ki baat hai isliye baapdaada bachchon ko samay prati samay attention khinchava rahe hain ki sangamayug ki ek ghadi ko bhi ek sankalp ko bhi vyartha nahin gavaao kyonki ek janma vyartha nahin ganvaaya lekin 21 janma mein vyartha ganvaaya। sangamayug ka mahatva har samay yaad rakho।

baapdaada ne vyartha samay aur vyartha sankalp ka homework sabhi ko diya tha। to sabhi ne homework kiya? jo samajhte hain hamaara attention raha aur bahut karke saphalta bhi praapta hui, lakshya ka lakshan tak parinaam hai, woh haath uthaana। achha। paandav utha rahe hain? bada haath uthaao। abhi sabhi ne kaam nahin kiya hai। sangamayug ke mahatva ko agar sada buddhi mein yaad rakho ki avinaashi baap dvaara yeh kaarya mila hai। har ghadi avinaashi banne ki hai kyonki avinaashi baap ne yeh vardaan diya hai। to sahaj hi ho jaayega।

baap ne sunaaya ki har ek brahman bachche ke kadam mein padam ki rekha hai। socho kadam mein padam ki rekha to kitne padmon ke liye sangamayug par golden chance hai। har ek ko yeh apna bhaagya smriti mein rakhna hai। kai bachche sochte hain ki baapdaada kya chaahte hain? baapdaada yahi chaahte hain ki ek-ek bachcha double raaja ban jaaye। abhi svaraajya adhikaari aur bhavishya mein vishwa raajya adhikaari। koi bhi bachcha double raaja banne mein kam nahin ho। to har ek bachcha double raajya adhikaari ho na! kaandh hilaao। to har bachcha double raajya adhikaari hai, kaandh hilaao। to baap ko kitni khushi hoti hai।

baapdaada har bachche ka record roz dekhte hain। to kya dekhte hain? har ek apne dil mein to jaan gaye honge। raajya adhikaari bane to hain lekin abhi jo svaraajya adhikaari ho, svaraajya adhikaari arthaat man-buddhi sanskaar ko apne control mein chalaane vaala। jab chaahe jaise chaahe vaise adhikaar mein rahe। jaise yeh sthool karmendriyaan haath hain, paanv hain apne control mein rehte hain aise man buddhi sanskaar jab chaahe jaise chaahe ruling power aur controlling power ho। abhi dekhne mein nambarvaar bahut hain। hain yeh bhi mere। man main nahin hai, mera hai। sanskaar mere hain। buddhi meri hai। to controlling power ruling power nambarvaar hai। baapdaada samay ki soochna bhi samay prati samay dete rahe hain, us samay ke anusaar aap logon ka ek-ek ka svamaan hai vishwa kalyaankaari। ab samay pramaan har ek bachche ko vishwa kalyaani swaroop ko pratyaksha karne ka samay hai। chaaron or duhkh ashaanti badh rahi hai। aapke bhaai aapki bahinen, parivaar duhkhi ho rahe hain to aapko apne parivaar par raham nahin aata!

abhi baapdaada yahi ishaara de rahe hain sva purooshaartha ke saath vishwa seva jaise vaacha ki seva vartamaan samay achhi dhoomdhaam se kar rahe ho। baapdaada khush hai, yeh 75 varsha ki jubilee ne sabhi ke man mein majority seva ka umang laaya hai। baapdaada dekh karke khush hai lekin abhi mansa seva ki bhi aavashyakta hai kyonki sabhi taraph vishwa kalyaankaari banna hai usmein mansa vaacha aur karmana arthaat chalan aur chehre se teenon hi seva ki abhi aavashyakta hai। roz check karo teenon sevaaon mein kitni percent seva ki? vaacha mein to baapdaada ne bhi certificate diya lekin abhi mansa sookshm vibrations dvaara aatmaon ke duhkh ashaanti ka sahaara banna pade। kya aapko taras nahin aata? baapdaada ko to bachchon par chaahe kaise bhi hain lekin phir bhi bachche to hain na, taras aata hai। to abhi har bachche ko sirf centre kalyaani nahin, zone kalyaani nahin vishwa kalyaani banna hai। to baapdaada abhi yahi attention dila rahe hain apne bhakton ka kalyaankaari bano kyonki yeh sangamayug ka bahut bada mahatva hai। abhi sangamayug mein jo chaahe jitna chaahe utna baap se sahayog mil sakta hai। to suna kya karna hai abhi? mansa seva ko badhaao। apne kaarya ke pramaan jaise traffic control ka time fix kiya hua hai aise hi har ek ko mansa seva ka bhi time fix karna chaahiye। jab jyaada duhkh hoga us samay sabhi ka attention us halchal mein hoga lekin abhi mansa seva ka samay hai isliye har bachche ko apne vishwa kalyaani ka swaroop emerge karna hai।vishwa kalyaan mein sva kalyaan svatah aur sahaj ho jaayega kyonki agar man free hai to vyartha aata hai lekin man busy hoga to vyartha sahaj hi samaapta ho jaayega। to baapdaada jab chakra lagaake chaaron or desh videsh ke agyaani bachchon ko dekhte hain to taras aata hai isliye aap sab bhi ab duhkh harta sukh karta bano।

aaj to sabhi holi manaane aaye hain। duniya vaalon ki holi aur aapki holi mein kitna antar hai। lekin baapdaada ne pahle bhi kaha ki aapke bhakta aap logon ke kiye hue kaarya ko copy karne mein hoshiyaar hain kyonki yeh sab vidhiyaan dvaapar mein aane vaali aatmaon ne banaai hain। to pahla pahla janma tha na isliye unhon ki buddhi bhi jaise niyam hai pahle satopradhaan phir rajo tamo mein aate hain, to us samay unhon ki buddhi apne hisaab se sato thi isliye aapki ek-ek visheshta ko, aap sada utsaah mein khushi mein rehte ho usko utsav ke roop mein manaana shuru kiya hai। jaise shivraatri par bhi bataaya na copy karne mein kitne hoshiyaar hain। aise abhi bhi aap sada sangam par utsaah mein rehte ho to aapka utsaah unhonne utsav ke roop mein yaadgaar banaaya hai। to holi mein kya karte hain? aapne bhi apne jeevan ko ranga hai lekin aapka rang kaun sa hai? aap sabhi ka rang hai baap ke sang ka rang। to saara samay baap ke sang ke rang mein rehte ho na! to unhonne bhi rang to banaaya lekin body conscious hai na! to sthool rang bana diya hai। lekin aap sabhi sada yeh kalyaankaari sangam mein is rang mein, sang ke rang mein rehte ho na! rang lagaaya hai na! sang ka rang lag gaya aur holi english mein pavitrata ko kaha jaata hai। to sang ke rang mein aap holi arthaat pavitra bante ho। pavitra bane hain na! pavitrata ka vrat sabhi ne liya hai na pakka! nambarvaar bhale hain lekin brahman banna arthaat pavitrata ka vrat lena kyonki baap sada pavitra hai। hai hi pavitra swaroop। banna nahin padta। swaroop hi pavitrata hai। to holi ki visheshta jaante ho kya hai? pavitra to aap bante ho lekin aap sang ke rang mein double pavitra bante ho। pavitra dharma pitaayen, mahaan aatmaayen bante hain lekin woh sirf aatma ko pavitra banaate hain। shareer aur aatma donon hi pavitra woh aap bhavishya mein bante ho। shuru se leke dekho dvaapar se jo bhi aaye hain pavitra bane hain lekin double pavitra koi nahin bana hai। shareer bhi pavitra aatma bhi pavitra। aap jab bhavishya mein raajya adhikaari banenge to aatma aur shareer donon pavitra honge। saara chakra ghoomo। dvaapar se aaye hain, dvaapar se ab tak dekho, koi double pavitra bana hai! to kyon aap double pavitra, itne mahaan bane hain? kyonki aapko rang kaunsa laga hai? paramatma ke sang ka rang laga hai। to jaise param aatma pavitra hai to aap bhi 21 janma double pavitra rehte ho। chaahe dharmapita aaye lekin woh bhi double pavitra nahin। aapka bhaagya hai kyonki aap rehte hi paramatma ke sang mein ho। sang ka rang itna pakka rehta hai jo double pavitra ban jaate ho। aur holi ka doosra arth hai ho li। ho gaya, jo beeta so beeta। ho li। to ho li karna aata hai? jo ho chuka woh ho chuka। ho li shabd ka arth kya nikalta? beeti so beeti। isse aap double holi 21 janma rehte ho। ek janma nahin kyonki sangam ke ek ek second ka connection 21 janmon ka hai। yahaan aapne agar ek second ya ek minute saphal kiya to 21 janma aapka saphal rahega। guarantee hai। to aisi holi manaai hai? holi karna aata hai? jo beeta woh beet gaya, ho li। aur teesri roop rekha kya karte hain? pahle jalaate hain phir manaate hain। to aapne kya kiya? yog agni se apne kamzoriyon ko, sanskaaron ko jo anek janmon ke ulte sanskaar hain usko yog agni se jalaaya hai na! jalaaya hai ki abhi bhi jala rahe hain? jalaaya hai? jo samajhte hain hamne yog agni se apne pahle ke sanskaar jalaaya hai, jal gaye woh haath uthaao। jal gaye ki abhi bhi aate hain? thoda-thoda to aate hain? baapdaada ke paas jab apna chart bhejte hain na to kehte hain bahut to chale gaye, chatur hain na kahne mein। kehte hain bahut to khatma ho gaye, kabhi-kabhi thoda emerge ho jaata hai। lekin jalna maana jalna। jalne ke baad naam nishaan hi nahin rehta। maarne ke baad shareer ka yaadgaar to dikhaai deta hai, lekin jalne ke baad samaapta ho jaata hai। jaise raavan ko bhi dekho sirf maara nahin jalaaya bhi। jo bilkul naam nishaan khatma। to aap bhi sab apne ko note karo sanskaaron ko maara hai ya jalaaya hai? bhasma kiya hai? puraane sanskaar ko agar jalaaya nahin, to beech-beech mein emerge ho jaate hain। lekin bhakton ne copy sab ki hai। aap jalaate ho woh bhi jalaate hain phir manaate hain। bina jalaane ke manaate nahin hain। to aap to sanskaaron ko jalaate hue holi ban gaye ho। koi ban rahe ho, koi ban gaye ho। to aapne holi manaai? baap ke sang ke rang ki। abhi sang mein baithe ho na to sang ke rang ki holi mana li na! manaai? haath uthaao। mana li। holi manaana arthaat holi banna, pavitra banna। jaise baap vaise bachche hain। agar maanon aapka koi sanskaar jo jala nahin hai, emerge ho jaata hai to achha lagta hai? sankalp aata hai na ki abhi teevra purooshaartha se isko jalaana hi hai। maarna nahin hai, kya hai koi-koi sanskaar ko maara hai, to mare hue mein kabhi jaan phir se aa jaati hai। agar jala do to phir kabhi nahin aayega।

to aaj jalaana hai ya maara hua hi theek hai? jalaane ki shakti hai? hai shakti? sankalp kar sakte hain? kai kehte hain baapdaada se roohrihaan karte hain na। bahut meethi meethi roohrihaan karte hain, kehte hain baba hamne to bahut koshish ki, phir phir aa jaata hai। chaahta nahin hoon lekin aa jaata hai। kaaran pata hai? jalaate ho, baapdaada dekhte hain, purooshaartha bahut karte hain lekin purooshaartha ke saath dridh sankalp ki aavashyakta hai। dridhta saphalta ki chaabi hai। jo dridh sankalp kiya jaata hai, dridh ka arth hi hai phir vaapas nahin aayega। phir pata hai bahut meethi meethi baaten karte hain। jab phir aa jaata hai na to kya kehte hain? roohrihaan to sabhi karte hain na! bahut meethi roohrihaan karte hain kehte hain chaahte to nahin hai, aa jaata hai। to shakti kam hai na! dridhta kam hai na! dridh sankalpadhaari bano। karna hi hai। aur us dridh sankalp ko roz check karo kis kaaran se phir dridhta mein kamzori aai? aur us circumstance ke oopar vishesh attention dete raho ki yeh phir se nahin aave। master sarvashaktivaan ke seat par baithke us sankalp ko, sanskaar ko samaapta karo। kai bachche kehte hain ki ham kai baar anubhav karte hain ki kabhi-kabhi jab koi shakti chaahte hain na to us samay par vo shakti nahin aati। vaise shakti hai lekin samay par kabhi shakti ko emerge karte hain na to bhi nahin aati। hai master sarvashaktimaan। title kya hai aapka? master sarvashaktimaan aur kehte kya hain? shakti samay par nahin aati। kaaran? apne master sarvashaktimaan ki seat par set nahin hote। abhi daphtar mein bhi jaao to jo karne vaale ko authority hogi woh order karega to maante hain na। aisa doosra koi kahe to maanenge kya? to aapki seat hai master sarvashaktimaan। us seat par set nahin hote to aahvaan karte bhi shakti samay par nahin aati। iske liye baapdaada ne baar-baar kaha hai apne man ko busy rakho। kabhi kis shakti ko saare din mein emerge rakho। kabhi kisi shakti ko emerge karke dekho ki uski taakat kya hai? aise anubhav karte rahenge, apni seat par set rahenge to shakti aapke aage sada ji haajir hogi। aapki shakti hai na! to holi manaai? aap to sada holi manaate rehte। sada baap ke sang ka rang lagaate hi rehte। rang mein range hue hain na? achha।

baapdaada ka jo kaarya mila hai, us kaarya ko agar koi ne abhi tak nahin bhi kiya hai to baapdaada vishesh ek saptaah dete hain extra। jo date hai woh to hai lekin ek saptaah extra dete hain ki is homework ko poora karna hi hai। ho sakta hai? ho sakta hai? haath uthaao। karna padega haath uthaaya। haath aisa achha uthaate ho jo baapdaada khush ho jaata hai lekin karna hi hai kyonki abhi samay ki gati ko dekh rahe ho। aur baapdaada to bahut samay se achaanak ki warning de rahe hain isliye abhi baapdaada har bachche ko ek svamaan dete hain - har bachcha dridh sankalpadhaari vishesh aatma bano। sankalp kiya aur hua, isko kaha jaata hai dridh sankalp। kehte hain dridh sankalp kiya lekin dridhta maana hi saphalta। agar saphalta nahin hai to dridhta nahin kahenge। to abhi dridhta bhav! yeh apna vishesh svamaan roz amritvele smriti mein laana aur us vidhi poorvak aage badhna। abhi do tarna hain, in do tarna mein kya karenge? kya karenge? bolo। pahli line bolo kya karenge? karna hi hai। karenge nahin, karna hi hai। bahutkaal ka baap samaan banna, bahut samay ki praapti hai। sangamayug ka samay bahut pyaara hai, ek second nahin hai ek second ek varsha ki praapti samaan hai isliye baapdaada kehte hi rehte hain ek second bhi vyartha nahin jaaye। ek sankalp bhi vyartha nahin jaaye। samartha bano aur samartha banaao। theek hai na! theek hai teachers। teachers kaandh hila rahi hain।

baapdaada ka teachers ke oopar bahut pyaar hai। hai to sabhi bachchon ke oopar phir bhi teachers jimmevaar hain na! baapdaada ki dil ko poorn karne vaali kaun? kaun? kaho ham teachers। haath uthaao। haan dekho kitni teachers hain? are vaah! achha। holi bhi manaai abhi kya karna hai?

seva ka tarna raajasthaan ka hai:- chhota nahin hai, bada hai raajasthaan। aap kaho raajasthaan to aabu ka kamra hai। to aabu bada hai na uska kamra hai to bada hi hoga na। baapdaada raajasthaan par khush hai kyonki raajasthaan mein bachpan se jo vahaan nikli woh abhi tak amar hain। seva mein amar hain। shareer mein nahin, seva mein। aur raajasthaan ne pahle-pahle aadi mein vaaris quality nikaali। jo baapdaada ko un vaaris quality ka drishtaanta dene mein sahaj tha aur jaise gujraat najdeek hai, aise raajasthaan to aabu ka bada kamra hai। jab bhi bulaayen to kya kahenge?haazir। ji haan haazir। baapdaada har zone ki visheshta dekh rahe hain aur yeh jo system banaai hai woh bahut achhi banaai hai। kisne banaai? munni ne। (daadi ji ne banaai) daadi to thi hi daadi। lekin jo bhi mahaarthi gaye hain unki visheshta yeh hai amritvele haazir ho jaate hain। amritvele ka milan chhoda nahin hai। jaise yahaan bhi niyam mein chalke chalaaya। kahne se nahin, chalke chalaaya, aise hi sabhi ko umang utsaah mein laaya। to yeh system bhi bahut achhi hai। aap sabko pasanda hai na। chance hai। abhi dekho pahle baari jo aaye hain raajasthaan se, woh haath uthaao। jo pahle baari madhuban mein aaye hain raajasthaan ke, woh haath uthaao। achha chance hai। itni sankhya raajasthaan ki, vaise to aapko list anusaar aana hota hai lekin abhi freedom hai, sevaadhaariyon ko chance milta hai isliye baapdaada daadi ko mubaarak de, ya aap sabko mubaarak de। daadi ne banaaya aap log practical mein aa rahe hain iske liye aapko bhi mubaarak। achha।

abhi raajasthaan ek kamaal karna। number pahle vaaris quality baba ke saamne laana। baapdaada ne dekha ki sabhi vargon ne apne-apne samparka vaalon ki majority list di hai। lekin sahayogi to hain ab aage kya karenge? sahayogiyon ko yagya snehi banaao। jab yagya snehi banenge to har kaarya mein sabhi sahayogi banenge। list badi achhi-achhi likhi hai। majority samay prati samay list dete rahe hain। majority list achhi hai abhi bhi do chaar varga ki list aai hai aaj bhi। lekin ab snehi banaao arthaat ham yagya ke hi hain aise pakke nishchaybuddhi banaao। sahayogi hain usmein to kahenge ham hain hi sahayogi, lekin snehi jo bhi yagya ke niyam kaarya hain usmein snehi banenge। varga vaalon ne kaarya achha kiya hai। baapdaada ne varga vaalon ko bhi mubaarak di hai। raajasthaan maana raaja banke raaja banaane vaale। praja nahin raaja banaane vaale। raajasthaan hai na, to kamaal karega na raajasthaan।

do wings aai hain - medical wing aur transport wing:- mubaarak ho। baapdaada ne dekha jo bhi varga bani hain woh apne apne kshetra mein kaarya achha kar rahi hain। abhi donon wing ne bhi apni list bheji hai। baapdaada ne dekhi aur mubaarak de rahe hain ki achhe-achhe sambandh-samparka mein aaye hain। lekin baapdaada ne samay ke pramaan aaj yeh bhi kaha ki sahayogi hai lekin ab yagya snehi banaao। vaaris quality banaao। jo bhi sahayogi hain unhon ko apne zone mein, baapdaada ne pahle bhi kaha hai list to aai hai achha hai lekin har ek zone ek-ek varga ko apne bhinna-bhinna sthaan ke sahayogi ya snehi aatmaon ko ikaththa karo। teen din ka unko samparka mein laao, rahen, meeting karen aur aage ke programme banaayen। to har zone jahaan bhi unke hain, sabhi zone se koi bade sthaan par jahaan bhi zone mein ho, sahayogiyon ko ikaththa karke unki meeting karo aur unhon ko vishesh ek bal bharo aur aage badhne ka। jo ab tak kiya uski mubaarak do aur aage badhne ka plan banaake do kyonki unhon ko bhi aage badhne ki vidhi sunaani padegi। to sabhi zone milke ek-ek varga ka jahaan vishesh sthaan hai vahaan ikaththa karo। phir dekhenge us sangathan mein kitne aate hain, kya aage chaahte hain? aise samparka mein laayenge to vaaris ban jaayenge। baaki in donon varga jo khade hue hain unki bhi baapdaada ne bhi result dekhi, achhi hai isliye baapdaada donon hi vargon ko mubaarak de rahe hain।

baapdaada ne pahle bhi kaha hai ab samay naajuk aaya ki aaya isliye abhi kam se kam samparka vaalon ko yagya snehi to banaao। doctors ka bhi samaachaar suna। achha kar rahe hain। lekin abhi doctors aur bhi apne doctors ki sankhya ko snehi sahayogi banaate jaao। plan achha banaaya hai, baapdaada ne suna hai। usse vriddhi ho sakti hai। naam phail sakta hai aur doosri wing vaale bhi achha chaaron or jo vi.aai.pi nikaale hain usse siddha hota hai ki connection achhe rakhe hain। ab connection vaalon ko sambandh mein laao। rah nahin jaave। samay samaapti ka aave aur sahayogi ke sahayogi rah jaaye, isliye ab sambandh mein laao। sameep sambandh mein laao। baapdaada ne dekha ki jab se varga bane hain, tab se seva chaaron or phaili achhi hai। saadhan achha banaate hain lekin baapdaada sabhi zone ko bhi kehte hain abhi vaaris banaane ki vidhi ko thoda aur teevra karo। nahin to ulhana milega। ham sahayogi rah gaye। aap plan zaroor banaao phir jiska jo bhaagya hoga। aur nikal sakte hain baapdaada ne list dekhi sabhi apne-apne samay par list dete hain to list anusaar sameep hain, inmen se nikal sakte hain। abhi yeh koshish karo। achha।

(medical wing silver jubilee mana rahi hai, usmein 8 group seva ke banaaye hain) achha hai banaaya hai। aage badhte chalo। achha।

double videshi 1000 aaye hain, 65 deshon se:- sabhi dekho, aapko dekh karke sab kitne khush ho rahe hain। baap ne kahaan-kahaan se 65 deshon se dhoondhakar nikaala hai। aap sabko bhi khushi aur nasha hai na to hamko baap ne dhoondh liya। aur baapdaada ne dekha is baari sabhi ne milke jo nimitta bane hain, un sabne bahut bahut bahut achhi nimitta banne ki seva ki hai। baapdaada ek-ek ka naam nahin lete lekin jo bhi nimitta banen unhonne seva mein saphalta sabke dilon mein aisa umang dilaaya hai jo apne sthaan mein jaake apne sthaan ko bhi aise hi refresh karenge। to jo seva ke nimitta banen unko baapdaada bahut bahut mubaarak de rahe hain। system bhi achhi banaai hai aur janak bachchi ne to sabhi ko dil mein umang aur utsaah extra bhar liya। har ek ka chehra dikhaai de raha hai ki jo shakti ikatthi ki woh chehre par aa rahi hai। sabke chehre khushnuma dikhaai de rahe hain aur abhi jo bhaarat aur videsh milke seva ki hai, uski result bhi achhi hai। bhaarat vaale videshiyon ko prerna denge aur videsh vaale bhaarat ko prerna denge। milke karne se apne mein bhi umang aata hai aur sunne vaalon mein bhi umang aata hai videsh vaale itna kar rahe hain, ham bhaarat mein hote bhi nahin kar rahe hain। feel karte hain aur bhaarat vaale videsh mein jaate to woh bhi feel karte hain ki ham yahaan rehte apna nahin banaaya, umang mein aakarke aage badhte, baapdaada ko yeh jo plan banaaya hai, teen chaar programme milke banaaye hain, bade-bade programme usmein baapdaada ne dekha vaayumandal mein pharka padta hai kyonki sab prakaar ki aate hain na। Christian bhi muslim bhi, jo bhi bhinna bhinna dharma ke hain woh sab prakaar ke ikatthe dekhte hain to samajhte hain ki sachmuch vishwa ek ho sakta hai isliye aapki training baapdaada ko achhi lagi। mehnat vaalon ko baapdaada khaas mubaarak de raha hai। abhi videsh vaale bhi vaaris quality laana kyonki samay achaanak ka hai। to jitne bhi aatmaon ka kalyaan kar sako, jitna kar sako utna karte jaao phir samay nahin milega। abhi samay hai, kam se kam baap ka ghar to dekh len। baap ka parichay to le len। taras aata hai na! to bahut achha kar bhi rahe hain lekin baapdaada ko abhi ek baat yaad aa rahi hai ki shuru-shuru mein bhaarat ke andar koi vi.aai.pi laate the to akhbaaron mein naam padta tha aur akhbaar vaale interest se aate the। government ko dekhna padta hai vi.aai.pi ko, to government bhi prabhaavit hoti hai, abhi woh nahin kiya hai। aap aaye ho uski to mubaarak। programme mein saathi bante hain, yeh baapdaada achha maante hain। ab unhon ko bhi laao to government ke thode kaan khulen। jaise abhi dekhte hain ki yeh jo 75 varsha ki jubilee hai, is jubilee ne bhaarat vaalon ko achha jagaaya hai। pahle jo samajhte the brahmaakumaariyaan pata nahin kya karti hain, abhi unhon ke mukh se nikla hai ki kamaal hai brahmaakumaariyon ke 75 varsha। aur doosri kamaal hai ki yahaan bahinen hi nimitta bani hain aur bahnon ne itna kaarya kiya hai, to unhon ko yeh aashcharya lagta hai aur abhi najdeek aane ki dil hoti hai। milen, sunen aur aapke mukhya jo subject hain, aap aatma ho, woh is jubilee ke kaaran sab taraph samajhte hain ki aatma samajhne se yeh ekmat ho sakte hain। to jaise is jubilee ne kamaal ki hai na, aise aur karte jaao aur sabhi ko sandesh pahunchaane ke liye bhi jo T.vi. aur radio ne sahayog kiya hai, usko bhi baapdaada mubaarak de rahe hain। jo ghar baithe sab dekhte hain, vaise to kai bahaana dete the, chaahte hain lekin time nahin hai, abhi ghar baithe bhi dekhne se dheere-dheere jaagte jaate hain। to jo bhi kar rahe ho woh achha ho raha hai aur hota rahega। uski mubaarak ho।

baapdaada ne dekha hai ki abhi seva ka umang bhi sabhi mein jaag raha hai, ham bhi karen, ham bhi karen। yeh umang aaya hai। jab umang aa gaya na to jahaan umang hai, utsaah hai vahaan saphalta hai hi hai isliye jo aap sammukh ho unhon ko aur jo door baithe dekh rahe hain, sun rahe hain, un sabhi chaaron or ke bachchon ko baapdaada bahut-bahut dil ka pyaar aur saath mein dil mein sada rahne ki mubaarak de rahe hain।

abhi dil lag gai hai, yahaan aabu mein rahne ki dil lag gai hai! achha hai। videshiyon ko dekhke to parivaar bhi khush hota hai। aur 65 deshon se dekho kismen aaye ho? pyaar ke vimaan mein aaye ho na।

pahli baar bahut aaye hain:- pahli baar aane vaalon ko double mubaarak de rahe hain, kyon? kyon double mubaarak de rahe hain? kyonki samay ke haahaakaar ke pahle apna bhaagya bana diya। aho prabhu, aho prabhu kahne ke bajaae mera baba to kaha isliye baapdaada aane vaalon ko dekh khush hai। bachche aa gaye, aa gaye, aa gaye। dekho aadha class to pahle baari ka hai। abhi teevra purooshaartha karna padega। purooshaarthi nahin banna teevra purooshaarthi banna। abhi bhi agar teevra purooshaartha kiya to teevra purooshaartha se aage badh sakte ho। margin teevra purooshaartha ki hai। saadhaaran purooshaartha ka time gaya aur baapdaada har ek aane vaale bachchon ko chakra lagaate dekhte hain, ki bachche aage badh rahe hain ya dheele aage badh rahe hain। baapdaada chakra chaaron or lagaate hain। aap to chaaron or nahin ja sakte lekin baapdaada to roz chakra lagaate hain। baba ke saath jo aapke advance party ke vishesh gaye hain na woh bhi baapdaada ke saath chakra par nikalte hain। aap logon ko dekh karke khush hote hain hamaare bhaai, hamaari behen aa gaye, aa gaye isliye aage badhte chalo, saare parivaar ki aapko mubaarak hai। achha।

aaj madhuban vaalon ko vishesh baapdaada ek baat ki mubaarak de rahe hain। kaun si baat? sabhi ne abhi tak seva bahut achhi pyaar se ki hai। kitna bhi bada parivaar aaya lekin seva mein nimitta to madhuban vaale bante hain। chaahe har zone sahayogi bante hain lekin phir bhi jo permanent rehte hain unke sahayog ke bina to nahin kar sakte। isliye ek-ek madhuban vaasi sirf neeche vaale nahin, oopar vaale bhi, hospital bhi, jinhonne bhi sahayog diya hai, aur athak banke sahayog de rahe hain, iseelie ek-ek bachcha apne naam se baapdaada ka yaadapyaar sveekaar karna। achha। jo madhuban vaale hain woh utho, jo bhi baithe hain yahaan। to khaas mubaarak ho। achha।

chaaron or ke holiest bachchon ko jo har kadam mein mera baba mera baba kehte hue ud rahe hain, aur sada apne teevra purooshaartha dvaara aage badh rahe hain aur badhaate rehte hain aise baapdaada ke dil ke noore ratna ko baapdaada bahut bahut bahut bahut dil ka pyaar de rahe hain। saath mein holi ki mubaarak bhi de rahe hain kyonki vaastav mein aap hi holi ho aur koi double holi to bante nahin। aap hi double holi bante ho iseelie padamguna mubaarak ho, mubaarak ho।

daadi jaanki se:- parivaar se dil ka pyaar achha hai। sabhi khush hote hain। jo dil se karte hain na to khushi hoti hai। athak banke kar rahi ho, aise hi chalte chalo। baapdaada to har bachche ko sakaash deta hai। har bachche ko chala raha hai aur bachche jo baapdaada chala rahe hain, unka response bhi dete hain। achha dete hain।

mohini behen:- theek hai, chalaane to aa gaya hai। tabiyat mein abhi taakat nahin hai to thoda-thoda jaise aap chala rahi ho woh achha chala rahi ho, aise chal jaayega। aise nahin samjho nahin chalega, chalega। lekin aapko tareeka aa gaya hai, is par baapdaada khush hai। (seva ka programme bana, main ja nahin saki) kyonki pahle bhi aana jaana kiya। koi bhi programme banaao bhale lekin thoda samay rest karke phir banaao। abhi samajh gai ho na। seva karengi, aisi koi baat nahin hai, jab jaana ho to uske 15 din pahle rest karo। jaana hai, lekin apne ko taiyaar karo, extra kuchh nahin karo। jaise direction hai usi anusaar chalo। theek karengi, niklengi।

neelu behen bhi hospital ki yaatra karengi:- himmat rakhi hai aur shakti bhi hai। hai na shakti। baapdaada ne di hai aur aapne jama ki hai। us shakti se koi badi baat nahin hai। aise hi lagega kuchh hua nahin, koi takleeph nahin। seva ka meva to milega na। achha hai।

pardaadi se:- yeh to vaah! vaah! hai na। dekho abhi iska photo nikaalo, beemaar lagti hai? birth de ki mubaarak ho। yeh kamaal hai ki inka chehra sada aise lagta hai jaise kuchh hai nahin। shakla suhaani hai। kehti hai na double baap hai, to double vardaan hai।

nirver bhaai aur teenon bhaaeeyon se:- (katak vaalon ki yaad di) sabko yaadapyaar dena। sabko umang hai, achha hai। aavaaj to phailta hai na। (puri ke mahaaraaja bhi madhuban aana chaahte hain) abhi aayenge, bahut aayenge।

aap teenon milke raay karte ho? raay karna phir daadiyon ko sunaao, pahle aapas mein raay karo। yeh achha karte ho, jaise aaj kiya hai na। aise raay nikaalke phir inhon ko saath mein sunaao। achha karte ho।

ramesh bhaai se:- tabiyat theek hai na। tabiyat ki sambhaal karna। halka nahin chhodo। aur sada aise samjho ki baba ke saath chal raha hoon। baba ke saath kaam kar raha hoon, akela nahin। (anila behen ki yaad di, woh hospital mein hai) uski tabiyat thodi hai।

(soneepat ki jameen par kaam badhaana hai) achha hai, us taraph seva to shuru ho। banaana programme achha hai seva ka vistaar ho raha hai।

bhoopaal bhaai se:- saakshi hoke sab yagya ka kaarya nimitta banke karte chalo। baba ka saath to hai hi। akela to koi kar nahin sakta। baap saath hai hi। achha hai।

mohini behen ki seva par jo bahne hain, unke prati baapdaada ne kaha ki, baba jaante hain, dekho koi bhi seva karte hain baba ki di hui seva hai। baap ne di hai। to pahle baap phir seva। achha hai।