Daily Murli for Thursday 18 January 2018

18/01/18 praatahmurli om shanti "baapdaada"' madhuban

pitaashri ji ke punya smriti divas par sunaane ke liye baapdaada ke madhur mahaavaakya

prashn:- hriday ko shuddh banaane ke liye kaun sa shauk hona chaahiye?

uttar:- hriday ko shuddh banaana hai to yogi banne banaane ka shauk hona chaahiye। yog ki sthiti se hi hriday shuddh banta hai। agar deh mein moh hai, deh abhimaan rehta hai to samjho hamaari avastha bahut kachchi hai। dehi-abhimaani bachche hi sachcha diamond bante hain isliye jitna ho sake dehi-abhimaani banne ka abhyaas karo। baap ko yaad karo।

om shanti। bachche jaante hain abhi bhagwan sammukh baithkar hamko gyaan ke geet sunaate hain va gyaan ki dance karaate hain। is gyaan dance se tum devtaaon muaaphik sada sukhi aur harshit rahenge। bhagwan ko hi behad ka baap va vishwa ka rachayita kaha jaata hai। aatma samajhti hai baba hamaare liye svarga ki saugaat laaye hain। vahi rachayita hai। svarga ka maalik banaane ke liye raajayog sikhaate hain। kehte hain baap ko aur vishwa ke maalikapne ko yaad karo। baap behad ka maalik hai to zaroor behad ki badi duniya hi rachenge। tum bachchon ke liye saari vishwa hi ghar hai arthaat part bajaane ka sthaan hai। behad ka baap aakarke behad ka vishwa athva ghar banaate hain, woh hai svarga। to aise baap ka bachchon ko kitna shukriya maanna chaahiye। vishwa ka rachta baap direct samjha rahe hain ham tumko vishwa ka maalik banaane aaya hoon to tumhaara svabhaav bahut first class chaahiye। tumhaari chalan aisi honi chaahiye jo sab kahen ki yeh to jaise devta hai। devtaayen naameegraami hain। kehte hain inka svabhaav ekdam devtaai hai। bilkul meethe shant svabhaav ke hain। to aise bachchon ko baap bhi dekh khush hote hain। baba svarga ka maalik banaane aate hain to tumhein kitna madadgaar banna chaahiye। service mein aapehi lag jaana chaahiye। aise nahin main thak gaya hoon, phursat nahin hai। samay par sab kaam karne mein kalyaan hai। yagya service ka izaapha shivbaaba dete hain। baba bachchon ki daivi chalan dekhte hain to kurbaan jaate hain।

meethe bachche, tum jaante ho hamko padhaane vaala kaun hai! is chaitanya dibbi mein chaitanya heera baitha hai, vahi sat-chit aananda swaroop hai। sat baap tumhein sachchi-sachchi shreemat dete hain। baap ke bane ho to kadam-kadam shreemat par chalna hai। chup rehna hai aur padhna hai, ek baap ko yaad karna hai। ghadi-ghadi is badge ko dekhte raho to baap aur varse ki yaad aayegi। yaad se hi tum jaise saare vishwa ko shanti ka daan dete ho। har ek bachche ko apni praja bhi banaani hai, vaaris bhi banaane hain। murli koi bhi miss nahin karni chaahiye। baba bahut pyaar se samjhaate hain - meethe bachche apne par raham karo, koi avagya nahin karo।

baap ki dil andar bachchon ko sada sukhi banaane ki kitni first class aash rehti hai ki bachche laayak ban svarga ke maalik banen। jo khushboodaar phool hain woh kheenchate hain। jo jaisa hai aisi searchlight lene ki kashish karte hain। khushboodaar, gunvaan bachchon ko dekh pyaar mein khushi mein nayan geele ho jaate hain। kuchh takleeph hoti hai to baba searchlight dete hain।

baba samjhaate hain meethe bachche, tumhein is puraani duniya mein koi bhi aasha nahin rakhni hai। ab to ek hi shreshtha aash rakhni hai ki ham to chalen sukhdhaam। kahaan bhi thaharna nahin hai। dekhna nahin hai। aage badhte jaana hai। ek taraph hi dekhte raho tab hi achal-adol sthir avastha rahegi। ab yeh duniya khatma honi hi hai, iski bahut serious haalat hai। is samay sabse adhik gussa prakriti ko aata hai isliye sab khalaas kar deti hai। tum jaante ho yeh prakriti abhi apna gussa jor se dikhaayegi। saari puraani duniya ko dubo degi। earthquake mein makaan aadi sab gir padenge। anek prakaar se maut honge। yeh sab drama ka plan bana hua hai। ismen dosh kisi ka bhi nahin hai। vinaash to hona hi hai isliye tumhein isse buddhi ka yog hata dena hai। tumne to apna sab kuchh insure kar diya hai isliye tumhein kisi bhi prakaar ki chinta nahin। tumhaara sab kuchh saphal ho raha hai।

ab tum kahenge vaah satguru vaah! jisne hamko yeh raasta bataaya hai। vaah takdeer vaah! vaah drama vaah! tumhaare dil se nikalta - shukriya baba aapka jo hamaare do mutthi chaaval lekar humein safety se bhavishya mein sauguna return dete ho। parantu ismen bhi bachchon ki badi vishaal buddhi chaahiye। bachchon ko athaah gyaan dhan ka khajaana milta rehta to apaar khushi honi chaahiye na। jitna hriday shuddh hoga to auron ko bhi shuddh banaayenge। yog ki sthiti se hi hriday shuddh banta hai। tum bachchon ko yogi banne banaane ka shauk hona chaahiye। agar deh mein moh hai, deh-abhimaan rehta hai to samjho hamaari avastha bahut kachchi hai। dehi-abhimaani bachche hi sachcha diamond bante hain isliye jitna ho sake dehi-abhimaani banne ka abhyaas karo। baap ko yaad karo। baba akshar sabse bahut meetha hai। baap bade pyaar se bachchon ko palkon par bithaakar saath le jaayenge। aise baap ki yaad ke nashe mein chaknaachoor hona chaahiye। baap ko yaad karte-karte khushi mein thande thaar ho jaana chaahiye। jaise baap apkaariyon par upkaar karte hain - tum bhi follow father karo। sukhdaai bano।

tum bachche is padhaai se kitni oonchi kamaai karte ho। tum padmaapdam pati bante ho। baba tumhein kitna dhanvaan banaate hain। baap tumko akhut khajaane mein aisa vazan karte hain jo 21 janma saath rahega। vahaan duhkh ka naam nahin। kabhi akaale mrityu nahin hoga। maut se kabhi darenge nahin। yahaan kitna darte hain, rote hain। tumko to khushi hai - yeh puraana shareer chhod jaae nai duniya mein prince banenge। tum is puraani duniya se mamatva mitaate raho, is deh ko bhi bhoolte jaao। ham aatma independent hain। bas ek baap ke sivaae aur kisi ki yaad na aaye। jeete ji jaise ki maut ki avastha mein rehna hai। is duniya se mar gaye। kehte bhi hain na - aap muye mar gai duniya। shareer ke bhaan ko udaate raho। ekaanta mein baith yeh abhyaas karo - baba bas abhi ham aapki god mein aaye ki aaye। ek ki yaad mein shareer ka ant ho - isko kaha jaata hai ekaanta।

tum bachche abhi drama ke raaz ko bhi jaante ho - baap tumhein niraakaari, aakaari aur saakaari duniya ka sab samaachaar sunaate hain। aatma kehti hai abhi ham purushaartha kar rahe hain, nai duniya mein jaane ke liye। ham svarga mein chalne laayak zaroor banenge। apna aur doosron ka kalyaan karenge। achha-baap meethe bachchon ko samjhaate hain, baap duhkh harta sukh karta hai to bachchon ko bhi sabko sukh dena hai। baap ka right hand banna hai। aise bachche hi baap ko priy lagte hain। shubh kaarya mein right haath ko hi lagaate hain। to baap kehte har baat mein righteous bano, ek baap ko yaad karo to phir ant mati so gati ho jaayegi। is puraani duniya se mamatva mita do। yeh to kabristaan hai। dhandhaadhori bachchon aadi ke chintan mein mare to muphta apni barbaadi kar denge। shivbaaba ko yaad karne se tum bahut aabaad honge। deh-abhimaan mein aane se barbaadi ho jaati hai। dehi-abhimaani banne se aabaadi hoti hai। dhan ki bhi bahut laalach nahin rakhni chaahiye। usi phikraat mein shivbaaba ko bhi bhool jaate hain। baba dekhte hain sab kuchh baap ko arpan kar phir hamaari shreemat par kahaan tak chalte hain। shuru-shuru mein baap ne bhi trustee ho dikhaaya na। sab kuchh eeshvar arpan kar khud trustee ban gaya। bas eeshvar ke kaam mein hi lagaana hai। vighnon se kabhi darna nahin chaahiye। jahaan tak ho sake service mein apna sab kuchh saphal karna hai। eeshvar arpan kar trustee ban rehna hai। achha!

meethe-meethe sikeeldhe bachchon prati maat pita baapdaada ka yaadapyaar aur good morning। roohaani baap ki roohaani bachchon ko namaste।

srishti parivartan ka aadhaar - sangathit roop mein sabhi ka ek sankalp

(avyakt mahaavaakya -1975)

sangathit rup se sarva braahmanon ke andar raham ki bhaavna, vishwa-kalyaan ki bhaavna, sarva-aatmaon ko duhkhon se chhudaane ki shubh kaamnaaen jab tak har ek ke dil se utpanna nahin hongi tab tak vishwa-parivartan ka kaarya ruka hua hai। ab sangathit rup mein ek sankalp ko apnaao arthaat dridh sankalp ki iktthi anguli sabhi milkar do, tab is kaliyugi parvat ko parivartan kar golden world la sakenge।

to check karo hamaara yeh sangathan ek sankalp vaala kahaan tak bana hai? shaastron mein gaayan hai ki brahma ko sankalp utha ki srishti rachen to srishti rachi gai। yahaan akele brahma ki to baat nahin hai, lekin brahma sahit sab braahmanon ka bhi jab ek saath yeh sankalp uthe ki ab ham sab ever ready hain aur nai duniya ki sthaapna honi hi chaahiye ya hogi hi-aisa dridh sankalp jab braahmanon ke andar utpanna ho tab hi srishti ka parivartan ho arthaat nai srishti ki rachna practical mein dikhaai de। ismen bhi sangathan ka bal chaahiye। ek do ka va sirf aath ka nahin, lekin saare sangathan ka ek sankalp chaahiye। sankalp se srishti rachna, iska rahasya is prakaar se hai। jab sabke andar sankalp utpanna hoga to second mein samaapti ka nagaada bajna shuru ho jaayega।

ek taraph samaapti ka nagaada, doosri taraph nai duniya ka nazaara saath-saath dikhaai dega। vahaan hi vinaash ki ati hogi aur vahaan hi jalmai ke beech chaaron or vinaash mein ek hissa dharti aur baaki teen hissa jalmai। yeh jo sabhi peechhe-peechhe anek dharmo ke kaaran anek khanda bane hain, woh sab samaapta honge। kuchh desh ek sairgaah ke rup mein jal ke beech ek taapu ke muaaphik ho jaayenge। to ek taraph vinaash ki ati ke nagaade honge, doosri taraph first prince (shreekrishna) ke janma ka aavaaj bulanda hoga, woh patte par nahin aayega। dikhaate hain na jalmai ke baad patte par shreekrishna aaya। iska bhi rahasya hai। bhaarat jab paristaan banta hai to teen hissa jalmai hone ke kaaran usko jalmai dikha diya hai। aise jalmai ke beech pahla patta jo first aatma hai, uske janma ka chaaron aur aavaaj prasiddha hoga ki first prince pratyaksha ho chuka hai, janma ho chuka hai। to woh bhi ati mein hoga arthaat jalmai ke teen hisse ka nazaara hoga aur ek hissa bhaarat-paristaan ke rup mein pragat hoga। jo dikhaate hain ki sone ki dvaarika paani se nikal aayi। lekin paani se nahin, teen hisse paani mein honge aur us paani ke beech soni dvaarika dikhaai degi isliye kehte hain ki sone ki dvaarika paani se nikal aayi। usi samay par first aatma ke janma ki jayjaykaar hogi। aise nazaare saamne aate hain? to puraani duniya ke mahaavinaash ka nagaada aur naye first prince ke janma ka nazaara saath-saath dikhaai dega। jaise nagaada bajaane se pahle nagaade ko garam kiya jaata hai tab aavaaj bulanda hoti hai। to yeh bhi yog agni se nagaada bajne ke pahle taiyaari chaahiye, tab nagaade mein aavaaz bulanda hogi। is intazaam mein lage hue ho na! intazaar karne vaalon ko bhi intazaam mein lagaao tab jayjaykaar ho jaayegi।

jab shareer ko chalaana aa jaayega tab raajya chalaana bhi aa jaayega। shareer ko chalaana arthaat raajya karna। to raajya karne ke sanskaar bharne hain na! knowledgeful kaha jaata hai, to full knowledge mein tan, man, dhan aur jan sab aa jaata hai। agar ek ki bhi knowledge kam hai to knowledgeful nahin kahenge। samjha? sada saphaltaamoorta banne ka aadhaar bhi knowledgeful hai। knowledge nahin to saphaltaamoorta bhi nahin ho sakte। samay ke pramaan purushaartha ki gati bhi teevra honi chaahiye। samay ki raphtaar tej hai aur chalne vaalon ki raphtaar dheeli hai to samay par kaise pahunchenge! ek bal, ek bharosa, yeh hai mukhya subject। har samay ek ki hi yaad mein ekras rehna। isi purushaartha mein hi sada saphal ho to manzil par pahunch jaayenge। jo atoot sneh mein rehte hain unko sahayog bhi svatah praapta hota hai।

murli hai laathi, is laathi ke aadhaar se koi kami bhi hogi to woh bhar jaayegi। yeh aadhaar hi apne ghar tak aur apne raajya tak pahunchaayega lekin lakshya se, niyampoorvak nahin, lekin lagan se। to lagan se murli padhna va sunna arthaat murleedhar ki lagan mein rehna। murleedhar se sneh ki nishaani murli hai। jitna murli se sneh hai utna hi samjho murleedhar se bhi sneh hai। sachche brahman ki parakh murli se hogi। murli se lagan arthaat sachcha brahman। murli se lagan kam arthaat half caste brahman। achha!

vardaan:- apne mastak beech sada baap ki smriti emerge rakhne vaale mastakamni bhav

mastakamni arthaat jiske mastak mein sada baap ki yaad rahe, isi ko hi oonchi stage kaha jaata hai। apne ko sada aisi oonchi stage par sthit rahne vaali shreshtha aatma samajh aage badhte raho। jo is oonchi stage par rehte hain woh neeche ki anek prakaar ki baaton ko sahaj paar kar lete hain। samasyaayen neeche rah jaati hain aur svayan oopar ho jaate। mastakamni ka sthaan hi ooncha mastak hai isliye neeche nahin aana, sada oopar raho।

slogan:- bephikra baadshaah ki sthiti ka anubhav karna hai to mere ko tere mein parivartan kar do।