Daily Murli for Thursday 4 July 2019

04-07-2019 praatahmurli om shanti "baapdaada"' madhuban

“meethe bachche - service samaachaar sunne, padhne ka bhi tumhein shauk chaahiye, kyonki isse umang-utsaah badhta hai, service karne ka sankalp uthta haiˮ

prashn:- sangamayug par baap tumhein sukh nahin dete hain lekin sukh ka raasta bataate hain - kyon?

uttar:- kyonki baap ke sab bachche hain, agar ek bachche ko sukh den to yeh bhi theek nahin। laukik baap se bachchon ko baraabar hissa milta hai, behad ka baap hissa nahin baantate, sukh ka raasta bataate hain। jo us raaste par chalte hain, purooshaartha karte hain, unhein oonch pad milta hai। bachchon ko purooshaartha karna hai, saara madaar purooshaartha par hai।

om shanti। bachche jaante hain baap murli bajaate hain। murli sabke paas jaati hai aur jo murli padhkar service karte hain unhon ka samaachaar magazine mein aata hai। ab jo bachche magazine padhte hain, unhein centres ke service samaachaar ka maaloom padega - phalaani-phalaani jagah aisi service ho rahi hai। jo padhenge hi nahin to unko kuchh bhi samaachaar ka maaloom nahin padega aur purooshaartha bhi nahin karenge। service ka samaachaar sunkar dil mein aata hai main bhi aisi service karoon। magazine se maaloom padta hai, hamaare bhaai-behen kitni service karte hain। yeh to bachche samajhte hain - jitni service, utna oonch pad milega isliye magazine bhi utsaah dilaati hai service ke liye। yeh koi phaaltu nahin banti hai। phaaltu woh samajhte hain jo khud padhte nahin hain। koi kehte ham akshar nahin jaante, are raamaayan, bhaagvat, geeta aadi sunne ke liye jaate hain, yeh bhi sunni chaahiye। nahin to service ka umang nahin badhega। phalaani jagah yeh service hui। shauk ho to kisko kahen woh padhkar sunaaye। bahut centres par aise bhi hoga jo magazine nahin padhte honge। bahut hain jinke paas to service ka naam-nishaan bhi nahin rehta। to pad bhi aisa paayenge। yeh to samajhte hain raajdhaani sthaapan ho rahi hai, usmein jo jitni mehnat karte hain, utna pad paate hain। padhaai mein attention nahin denge to fail ho jaayenge। saara madaar hai is samay ki padhaai par। jitna padhenge aur padhaayenge utna apna hi faayda hai। bahut bachche hain jinko magazine padhne ka khyaal bhi nahin aata hai। vo paai-paise ka pad pa lenge। vahaan yeh khyaalaat nahin rehti ki isne purooshaartha nahin kiya hai to yeh pad mila hai। nahin। karma-vikarma ki baaten sab yahaan buddhi mein hain।

kalpa ke sangamayug par hi baap samjhaate hain, jo nahin samajhte hain woh to jaise pattharbuddhi hain। tum bhi samajhte ho ham tuchchha buddhi the phir usmein bhi percentage hoti hain। baba bachchon ko samjhaate rehte hain, abhi kaliyug hai, inmen apaar duhkh hote hain। yeh-yeh duhkh hain, jo sensible honge woh jhat samajh jaayenge ki yeh to theek bolte hain। tum bhi jaante ho kal ham kitne duhkhi the, apaar duhkhon ke beech the। abhi phir apaar sukhon ke beech mein ja rahe hain। yeh hai hi raavan raajya kaliyug - yeh bhi tum jaante ho। jo jaante hain lekin auron ko nahin samjhaate hai to baba kahega kuchh nahin jaante hain। jaante hain tab kahen jab service karen, samaachaar magazine mein aaye। din-pratidin baba bahut sahaj points bhi sunaate rehte hain। vo log to samajhte kaliyug ajun bachcha hai, jab sangam samjhen tab bhent kar saken - satayug aur kaliyug mein। kaliyug mein apaar duhkh hain, satayug mein apaar sukh hain। bolo, apaar sukh ham bachchon ko baap de rahe hain jo ham varnan kar rahe hain। aur koi aise samjha na sake। tum nai baaten sunaate ho aur koi to yeh poochh na sake ki tum svargavaasi ho ya narkavaasi ho? tum bachchon mein bhi nambarvaar hain, itni points yaad nahin kar sakte hain, samjhaane samay deh-abhimaan aa jaata hai। aatma hi sunti va dhaaran karti hai। parantu achhe-achhe mahaarthi bhi yeh bhool jaate hain। deh-abhimaan mein aakar bolne lag padte hain, aise sabka hota hai। baap to kehte hain sab purooshaarthi hain। aise nahin ki aatma samajh baat karte hain। nahin, baap aatma samajh gyaan dete hain। baaki jo bhaai-bhaai hain, woh purooshaartha kar rahe hain - aisi avastha mein thaharne ka। to bachchon ko bhi samjhaana hai, kaliyug mein apaar duhkh hain, satayug mein apaar sukh hain। abhi sangamayug chal raha hai। baap raasta bataate hain, aise nahin baap sukh dete hain। sukh ka raasta bataate hain। raavan bhi duhkh dete nahin hain, duhkh ka ulta raasta bataate hain। baap na duhkh dete hain, na sukh dete hain, sukh ka raasta bataate hain। phir jo jitna purooshaartha karenge utna sukh milega। sukh dete nahin hain। baap ki shreemat par chalne se sukh paate hain। baap to sirf raasta bataate hain, raavan se duhkh ka raasta milta hai। agar baap deta ho to phir sabko ek jaisa varsa milna chaahiye। jaise laukik baap bhi varsa baantate hain। yahaan to jo jaisa purooshaartha kare। baap raasta bahut sahaj bataate hain। aise-aise karenge to itna oonch pad paayenge। bachchon ko purooshaartha karna hota hai - ham sabse jaasti pad paayen, padhna hai। aise nahin yeh bhal oonch pad paayen, main baitha rahoon। nahin, purooshaartha first। drama anusaar purooshaartha zaroor karna hota hai। koi teevra purooshaartha karte hain, koi dull। saara purooshaartha par madaar hai। baap ne to raasta bataaya hai - mujhe yaad karo। jitna yaad karenge utna vikarma vinaash honge। drama par chhod nahin dena hai। yeh to samajh ki baat hai।

world ki history-geography repeat hoti hai। to zaroor jo part bajaaya hai vahi bajaana pade। sab dharma phir se apne samay par aayenge। samjho Christian ab 100 karod hain phir itne hi part bajaane aayenge। na aatma vinaash hoti, na unka part kabhi vinaash ho sakta hai। yeh samajhne ki baaten hain। jo samajhte hain to samjhaayenge bhi zaroor। dhan diye dhan na khute। dhaarna hoti rahegi, auron ko bhi saahookaar banaate rahenge lekin takdeer mein nahin hai to phir apne ko bhi bevash samajhte hain। teacher kahenge tum bol nahin sakte to tumhaari takdeer mein paai-paise ka pad hai। takdeer mein nahin to tadbeer kya kar sakte। yeh hai behad ki paathshaala। har ek teacher ki subject apni hoti hai। baap ke padhaane ka tareeka baap hi jaane aur tum bachche jaano, aur koi nahin jaan sakte। tum bachche kitni koshish karte ho to bhi jab koi samjhen। buddhi mein baithta hi nahin hai। jitna nazdeek hote jaayenge, dekhne mein aata hai hoshiyaar hote jaayenge। ab museum, roohaani college aadi bhi kholte hain। tumhaara to naam hi nyaara hai roohaani university। government bhi dekhegi। bolo tumhaari hai jismaani university, yeh hai roohaani। rooh padhti hai। saare 84 ke chakra mein ek hi baar roohaani baap aakar roohaani bachchon ko padhaate hain। drama (film) tum dekhenge phir 3 ghante baad hoobhu repeat hoga। yeh bhi 5 hazaar varsha ka chakra hoobhu repeat hota hai। yeh tum bachche jaante ho। woh to sirf bhakti mein shaastron ko hi right samajhte hain। tumko to koi shaastra nahin hai। baap baith samjhaate hain, baap koi shaastra padha hai kya? woh to geeta padhkar sunaayenge। padha hua to maa ke pet se nahin niklega। behad ke baap ka part hai padhaane ka। apna parichay dete hain। duniya ko to pata hi nahin। gaate bhi hain - baap gyaan ka saagar hai। krishna ke liye nahin kehte gyaan ka saagar hai। yeh lakshmi-naaraayan gyaan saagar hain kya? nahin। yahi wonder hai, ham brahman hi yeh gyaan sunaate hain shreemat par। tum samjhaate ho is hisaab se ham brahman hi prajaapita brahma ki santaan thahre। anek baar bane the, phir honge। manushyon ki samajh mein jab aayega tab maanenge। tum jaante ho kalpa-kalpa ham prajaapita brahma ki santaan adopted bachche bante hain। jo samajhte hain woh nishchaybuddhi bhi ho jaate hain। brahman banne bigar devta kaise banenge। har ek ki buddhi par hai। school mein aisa hota hai - koi to scholarship lete, koi fail ho padte hain। phir nayesir padhna pade। baap kehte hain vikaar mein gire to ki kamaai chat hui, phir buddhi mein baithega nahin। andar khaata rahega।

tum samajhte ho is janma mein jo paap kiye hain, unka to sabko pata hai। baaki aage janmon mein kya kiya hai woh to yaad nahin hai। paap kiye zaroor hain। jo punya aatma the vahi phir paap aatma bante hain। hisaab-kitaab baap baith samjhaate hain। bahut bachche hain, bhool jaate hain, padhte nahin hain। agar padhen to zaroor padhaayen bhi। koi dull buddhi hoshiyaar buddhi ban jaate, kitni badi padhaai hai। is baap ki padhaai se hi sooryavanshi-chandravanshi gharaana banne ka hai। woh is janma mein hi padhkar aur martaba pa lete hain। tum to jaante ho is padhaai ka pad phir nai duniya mein milna hai। woh koi door nahin hai। jaise kapda badla jaata hai aise hi puraani duniya ko chhod jaana hai nai duniya mein। vinaash bhi hoga zaroor। ab tum nai duniya ke ban rahe ho। phir yeh puraana chola chhod jaana hai। nambarvaar raajdhaani sthaapan ho rahi hai, jo achhi reeti padhenge vahi pahle svarga mein aayenge। baaki peechhe aayenge। svarga mein thode hi aa sakenge। svarga mein jo daas-daasiyaan honge woh bhi dil par chadhe hue honge। aise nahin ki sab aa jaayenge। ab roohaani college aadi kholte rehte hain, sab aakar purooshaartha karenge। jo padhaai mein oonche teekhe jaayenge, woh oonch pad paayenge। dull buddhi kam pad paayenge। ho sakta hai, aage chal dull buddhi bhi achha purooshaartha karne lag pade। koi samajhdaar buddhi neeche bhi chale jaate hain। purooshaartha se samjha jaata hai। yeh saara drama chal raha hai। aatma shareer dhaaran kar yahaan part bajaati hai, naya chola dhaaran kar naya part bajaati hai। kab kya, kab kya banti hai। sanskaar aatma mein hote hain। gyaan baahar mein zara bhi kisi ke paas nahin hai। baap jab aakar padhaayen tab hi gyaan mile। teacher hi nahin to gyaan kahaan se aaye। woh hain bhakta। bhakti mein apaar duhkh hain, meera ko bhal saakshaatkaar hua parantu sukh thode hi tha। kya beemaar nahin padi hogi। vahaan to koi prakaar ke duhkh ki baat hoti hi nahin। yahaan apaar duhkh hain, vahaan apaar sukh hain। yahaan sab duhkhi hote hain, raajaaon ko bhi duhkh hai na, naam hi hai duhkhadhaam। woh hai sukhdhaam। sampoorn duhkh aur sampoorn sukh ka yeh hai sangamayug। satayug mein sampoorn sukh, kaliyug mein sampoorn duhkh। duhkh ki jo variety hai sab vriddhi ko paati rehti hai। aage chal kitna duhkh hota rahega। athaah duhkh ke pahaad girenge।

woh log to tumhein bolne ka time bahut thoda dete hain। do minute deven to bhi samjhaao, satayug mein apaar sukh the jo baap dete hain। raavan se apaar duhkh milte hain। ab baap kehte hain kaam par jeet pahno to jagat jeet banenge। is gyaan ka vinaash nahin hota hai। thoda bhi suna to svarga mein aayenge। praja to bahut banti hai। kahaan raaja, kahaan rank। har ek ki buddhi apni-apni hai। jo samajhkar auron ko samjhaate hain, vahi achha pad paate hain। yeh school bhi most uncommon hai। bhagwan aakar padhaate hain। shreekrishna to phir bhi daivi gunon vaala devta hai। baap kehte hain main daivi gunon aur aasuri gunon se nyaara hoon। main tumhaara baap aata hoon padhaane। roohaani knowledge supreme rooh hi deta hai। geeta ka gyaan koi dehdhaari manushya va devta ne nahin diya। vishnu devta namah kehte, to krishna kaun? devta krishna hi vishnu hai - yeh koi jaante nahin। tumhaare mein bhi bhool jaate hain। khud poora samjha hua ho to auron ko bhi samjhaaye। service karke saboot le aaye tab samjhen ki service ki isliye baba kehte hain lambe-chaude samaachaar na likho, woh phalaana aane vaala hai, aise kahkar gaya hai… yeh likhne ki darkaar nahin hai। kam likhna hota hai। dekho, aaya, thaharta hai? samajhkar aur service karne lage tab samaachaar likho। koi-koi apna show bahut karte hain। baba ko har baat ki result chaahiye। aise to bahut aate hain baba ke paas, phir chale jaate hain, unse kya faayda। unko baba kya kare। na unhein faayda, na tumhein। tumhaare mission ki vriddhi to hui nahin। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi baat mein bevash nahin hona hai। svayan mein gyaan ko dhaaran kar daan karna hai। auron ki bhi takdeer jagaani hai।

2) kisi se bhi baat karte samay svayan ko aatma samajh aatma se baat karni hai। zara bhi deh-abhimaan na aaye। baap se jo apaar sukh mile hain, vo doosron ko baantane hain।

vardaan:- anaadi swaroop ki smriti dvaara santushtata ka anubhav karne aur karaane vaale santushtamni bhav

slogan:- apne anaadi aur aadi swaroop ko smriti mein laao aur usi smriti swaroop mein sthit ho jaao to svayan bhi svayan se santushta rahenge aur auron ko bhi santushtata ki visheshta ka anubhav kara sakenge। asantushtata ka kaaran hota hai apraapti। aapka slogan hai - paana tha vo pa liya। baap ka banna arthaat varse ka adhikaari banna, aisi adhikaari aatmaayen sada bharpoor, santushtamni hongi।

slogan:- baap samaan banne ke liye - samajhna, chaahna aur karna in teenon ki samaanta ho।