Daily Murli for Friday 3 April 2020

03-04-2020 praatahmurli om shanti "baapdaada"' madhuban

“ meethe bachche - apni avastha dekho meri ek baap se hi dil lagti hai ya kisi karma sambandhon se dil lagi hui hai ''

prashn:- apna kalyaan karne ke liye kin do baaton ka potaamel roz dekhna chaahiye?

uttar:- “yog aur chalan'' ka potaamel roz dekho। check karo koi dis-service to nahin ki? sadaiv apni dil se poochho ham kitna baap ko yaad karte hain? apna samay kis prakaar saphal karte hain? doosron ko to nahin dekhte hain? kisi ke naam-roop se dil to nahin lagi hui hai?

geet:- mukhda dekh le …

om shanti। yeh kisne kaha? behad ke baap ne kaha he aatmaayen। praani maana aatma। kehte hain na - aatma nikal gai yaani praan nikal gaye। ab baap sammukh baith samjhaate hain he aatmaayen yaad karo, sirf is janma ko nahin dekhna hai parantu jabse tum tamopradhaan bane ho, to seedhi neeche utarte patit bane ho। to zaroor paap kiye honge। ab samajh ki baat hai। kitna janma-janmaantar ka paap sir par raha hua hai, yeh kaise pata pade। apne ko dekhna hai hamaara yog kitna lagta hai! baap ke saath jitna yog achha lagega utna vikarma vinaash honge। baba ne kaha hai mere ko yaad karo to guarantee hai tumhaare vikarma vinaash honge। apni dil andar har ek dekhe hamaara baap ke saath kitna yog rehta hai? jitna ham yog lagaayenge, pavitra banenge, paap katte jaayenge, yog badhta jaayega। pavitra nahin banenge to yog bhi lagega nahin। aise bhi kai hain jo saare din mein 15 minute bhi yaad mein nahin rehte hain। apne se poochhna chaahiye - meri dil shivbaaba se hai ya dehdhaari se? karma sambandhiyon aadi se hai? maaya toofaan mein to bachchon ko hi laayegi na! khud bhi samajh sakte hain meri avastha kaisi hai? shivbaaba se dil lagti hai ya koi dehdhaari se hai? karma sambandhiyon aadi se hai to samajhna chaahiye hamaare vikarma bahut hain, jo maaya khadde mein daal deti hai। student andar mein samajh sakte hain, ham paas honge ya nahin? achhi reeti padhte hain ya nahin? nambarvaar to hote hain na। aatma ko apna kalyaan karna hai। baap direction dete hain, agar tum punya aatma ban oonch pad paana chaahte ho to usmein pavitrata hai first। aaye bhi pavitra phir jaana bhi pavitra bankar hai, patit kabhi oonch pad pa na saken। sadaiv apni dil se poochhna chaahiye - ham kitna baap ko yaad karte hain, ham kya karte hain? yeh to zaroor hai pichhaadi mein baithe hue student ki dil khaati hai। purushaartha karte hain oonch pad paane ke liye। parantu chalan bhi chaahiye na। baap ko yaad kar apne sir se paapon ka bojha utaarna hai। paapon ka bojha sivaae yaad ke ham utaar hi nahin sakte। to kitna baap ke saath yog hona chaahiye। oonch te oonch baap aakar kehte hain mujh baap ko yaad karo to vikarma vinaash honge। time najdeek aata jaata hai। shareer par bharosa nahin hai। achaanak hi kaise-kaise accident ho jaate hain। akaale mrityu ki to full season hai। to har ek ko apni jaanch kar apna kalyaan karna hai। saare din ka potaamel dekhna chaahiye - yog aur chalan ka। hamne saare din mein kitne paap kiye? mansa, vaacha mein pahle aate hain phir karmana mein aate hain। ab bachchon ko righteous buddhi mili hai ki hamko achhe kaam karne hain। kisko dhokha to nahin diya? phaaltu jhooth to nahin bola? dis service to nahin ki? koi kisi ke naam-roop mein phansate hain to yagya pita ki ninda karaate hain।

baap kehte hain kisko bhi duhkh na do। ek baap ki yaad mein raho। yeh bahut jabardasta phikraat mili hui hai। agar ham yaad mein nahin rah sakte hain to kya gati hogi! is samay gaphlat mein rahenge to pichhaadi ko bahut pachhtaana padega। yeh bhi samajhte hain jo halka pad paane vaale hain, woh halka pad hi paayenge। buddhi se samajh sakte hain hamko kya karna hai। sabko yahi mantra dena hai ki baap ko yaad karo। lakshya to bachchon ko mila hai। in baaton ko duniya vaale samajh nahin sakte। pahli-pahli mukhya baat hai hi baap ko yaad karne ki। rachayita aur rachna ki knowledge to mil gai। roz-roz koi na koi nai-nai points bhi samjhaane ke liye di jaati hain। jaise viraat roop ka chitra hai, is par bhi tum samjha sakte ho। kaise varnon mein aate hain - yeh bhi seedhi ke baaju mein rakhne ka chitra hai। saara din buddhi mein yahi chintan rahe ki kaise kisko samjhaaoon? service karne se bhi baap ki yaad rahegi। baap ki yaad se hi vikarma vinaash honge। apna bhi kalyaan karna hai। baap ne samjhaaya hai tumhaare par 63 janmon ke paap hain। paap karte-karte satopradhaan se tamopradhaan ban pade ho। ab mera bankar phir koi paap karma nahin karo। jhooth, shaitaani, ghar phitaana, suni sunaai baaton par vishvaas karna - yeh dhooteepna bada nuksaankaarak hai। baap se yog hi tuda deta hai, to kitna paap ho gaya। government ke bhi dhoote hote hain, government ki baat kisi dushman ko sunaae bada nuksaan karte hain। to phir unhon ko badi kadi saja milti hai। to bachchon ke mukh se sadaiv gyaan ratna nikalne chaahiye। ulta sulta samaachaar bhi ek-do se poochhna nahin chaahiye। gyaan ki baaten hi karni chaahiye। tum kaise baap se yog lagaate ho? kaise kisko samjhaate ho? saara din yahi khyaal rahe। chitron ke aage jaakar baith jaana chaahiye। tumhaari buddhi mein to knowledge hai na। bhakti maarga mein to anek prakaar ke chitron ko poojte rehte hain। jaante kuchh bhi nahin। blind faith, idol worship (moorti pooja) in baaton mein bhaarat mashhoor hai। abhi tum yeh baaten samjhaane mein kitni mehnat karte ho। pradarshani mein kitne manushya aate hain। bhinna-bhinna prakaar ke hote hain, koi to samajhte hain, yeh dekhne samajhne yogya hai। dekh lenge, phir centre par kabhi nahin jaate। din-pratidin duniya ki haalat bhi kharaab hoti jaati hai। jhagde bahut hain, vilaayat mein kya-kya ho raha hai - baat mat poochho। kitne manushya marte hain। tamopradhaan duniya hai na। bhal kehte hain bombs nahin banaane chaahiye। parantu woh kehte tumhaare paas dher rakhe hain to phir ham kyon na banaayen। nahin to gulaam hokar rehna pade। jo kuchh mat nikalti hai vinaash ke liye। vinaash to hona hi hai। kehte hain shankar prerak hai parantu ismen prerna aadi ki to baat nahin। ham to drama par khade hain। maaya badi tej hai। hamaare bachchon ko bhi vikaaron mein gira deti hai। kitna samjhaaya jaata hai ki deh ke saath preet mat rakho, naam-roop mein mat phanso। parantu maaya bhi tamopradhaan aisi hai, deh mein phansa deti hai। ekdam naak se pakad leti hai। pata nahin padta hai। baap kitna samjhaate hain - shreemat par chalo, parantu chalte nahin। raavan ki mat jhat buddhi mein aa jaati hai। raavan jel se chhodta nahin।

baap kehte hain apne ko aatma samjho, baap ko yaad karo। bas ab to ham gaye। aadhaakalpa ke rog se ham chhootte hain। vahaan to hai hi nirogi kaaya। yahaan to kitne rogi hain। yeh raurav narka hai na। bhal vo log garud puraan padhte hain parantu padhne athva sunne vaalon ko samajh kuchh bhi nahin hai। baba khud kehte hain aage bhakti ka kitna nasha tha। bhakti se bhagwan milega, yeh sunkar khush ho bhakti karte rehte the। patit bante hain tab to pukaarte hain - he patit-paavan aao। bhakti karte ho yeh to achha hai phir bhagwan ko yaad kyon karte! samajhte hain bhagwan aakar bhakti ka phal denge। kya phal denge - woh kisko pata nahin। baap kehte hain geeta padhne vaalon ko hi samjhaana chaahiye, vahi hamaare dharma ke hain। pahli mukhya baat hi hai geeta mein bhagvaanuvaach। ab geeta ka bhagwan kaun? bhagwan ka to parichay chaahiye na। tumko pata pad gaya hai - aatma kya hai, paramatma kya hai? manushya gyaan ki baaton se kitna darte hain। bhakti kitni achhi lagti hai। gyaan se 3 kos door bhaagte hain। are, paavan banna to achha hai, ab paavan duniya ki sthaapna, patit duniya ka vinaash hona hai। parantu bilkul sunte nahin। baap ka direction hai - hear no evil....... maaya phir kehti hai hear no baba ki baaten। maaya ka direction hai shivbaaba ka gyaan mat suno। aisa jor se maaya chamaat maarti hai jo buddhi mein thaharta nahin। baap ko yaad kar hi nahin sakte। mitra sambandhi, dehdhaari yaad aa jaate hain। baba ki aagya nahin maante। baap kehte hain maamekam yaad karo aur phir naapharmaanbardaar ban kehte hain hamko phalaane ki yaad aati hai। yaad aayegi to gir padenge। in baaton se to naphrat aani chaahiye। yeh bilkul hi chhi-chhi duniya hai। hamaare liye to naya svarga sthaapan ho raha hai। tum bachchon ko baap ka aur srishti chakra ka parichay mila hai to us padhaai mein hi lag jaana chaahiye। baap kehte hain apne andar ko dekho। naarad ka bhi misaal hai na। to baap bhi kehte hain - apne ko dekho, ham baap ko yaad karte hain? yaad se hi paap bhasma honge। koi bhi haalat mein yaad shivbaaba ko karna hai, aur koi se lav nahin rakhna hai। ant mein shivbaaba ki yaad ho tab praan tan se niklen। shivbaaba ki yaad ho aur svadarshan chakra ka gyaan ho। svadarshan chakradhaari kaun hai, yeh bhi kisko pata thode hi hai। braahmanon ko bhi yeh knowledge kisne di? braahmanon ko yeh svadarshan chakradhaari kaun banaate hain? parampita paramatma bindi। to kya woh bhi svadarshan chakradhaari hai? haan, pahle to woh hain। nahin to ham braahmanon ko kaun banaaye। saari rachna ke aadi, madhya, ant ka knowledge usmein hai। tumhaari aatma bhi banti hai, woh bhi aatma hai। bhakti maarga mein vishnu ko chakradhaari bana diya hai। ham kehte hain paramatma trikaaldarshi, trimoorti, trinetri hai। woh hamko svadarshan chakradhaari banaate hain। woh bhi zaroor manushya tan mein aakar sunaayenge। rachna ke aadi-madhya-ant ka gyaan zaroor rachta hi sunaayenge na। rachta ka hi kisko pata nahin hai to rachna ka gyaan kahaan se mile। abhi tum samajhte ho shivbaaba hi svadarshan chakradhaari hai, gyaan ka saagar hai। woh jaante hain ham kaise is 84 ke chakra mein aate hain। khud to punarjanma lete nahin। unko knowledge hai, jo hamko sunaate hain। to pahle-pahle to shivbaaba svadarshan chakradhaari thahra। shivbaaba hi hamko svadarshan chakradhaari banaate hain। paavan banaate hain kyonki patit-paavan woh hai। rachta bhi woh hai। baap bachche ke jeevan ko jaante hain na। shivbaaba brahma dvaara sthaapna karaate hain। karnakraavanhaar hai na। tum bhi seekho, sikhlaao। baap padhaate hain phir kehte hain auron ko bhi padhaao। to shivbaaba hi tumko svadarshan chakradhaari banaate hain। kehte hain mujhe srishti chakra ka knowledge hai tab to sunaata hoon। to 84 janma kaise lete ho - yeh 84 janmon ki kahaani buddhi mein rahni chaahiye। yeh buddhi mein rahe to bhi chakravarti raaja ban sakte hain। yeh hai gyaan। baaki yog se hi paap katte hain। saare din ka potaamel nikaalo। yaad hi nahin karenge to potaamel bhi kya nikaalenge! saare din mein kya-kya kiya - yeh to yaad rehta hai na। aise bhi manushya hain, apna potaamel nikaalte hain - kitne shaastra padhe, kitna punya kiya? tum to kahenge - kitna samay yaad kiya? kitna khushi mein aakar baap ka parichay diya?

baap dvaara jo points mili hain, unka ghadi-ghadi manthan karo। jo gyaan mila hai use buddhi mein yaad rakho, roz murli padho। woh bhi bahut achha hai। murli mein jo points hain unko ghadi-ghadi manthan karna chaahiye। yahaan rahne vaalon se bhi baahar vilaayat mein rahne vaale jaasti yaad mein rehte hain। kitni baandheliyaan hain, baba ko kabhi dekha bhi nahin hai, yaad kitna karti hain, nasha chadha rehta hai। ghar baithe saakshaatkaar hota hai ya anaayaas sunte-sunte nishchay ho jaata hai।

to baap kehte hain andar mein apni jaanch karte raho ki ham kitna oonch pad paayenge? hamaari chalan kaisi hai? koi khaan-paan ki laalach to nahin hai? koi aadat nahin rahni chaahiye। mool baat hai avyabhichaari yaad mein rehna। dil se poochho - ham kisko yaad karta hoon? kitna samay doosron ko yaad karta hoon? knowledge bhi dhaaran karni hai, paap bhi kaatne hain। koi-koi ne aise paap kiye hain jo baat mat poochho। bhagwan kehte hain yeh karo parantu kah dete hain parvash hain arthaat maaya ke vash hain। achha, maaya ke vash hi raho। tumhein ya to shreemat par chalna hai ya to apni mat par। dekhna hai is haalat mein ham kahaan tak paas honge? kya pad paayenge? 21 janma ka ghaata pad jaata hai। jab karmaateet avastha ho jaayegi to phir deh-abhimaan ka naam nahin rahega isliye kaha jaata hai dehi-abhimaani bano। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) koi bhi kartavya aisa nahin karna hai jisse yagya pita ki ninda ho। baap dvaara jo righteous buddhi mili hai us buddhi se achhe karma karne hain। kisi ko bhi duhkh nahin dena hai।

2) ek-do se ulta-sulta samaachaar nahin poochhna hai, aapas mein gyaan ki hi baaten karni hain। jhooth, shaitaani, ghar phitaane vaali baaten yeh sab chhod mukh se sadaiv ratna nikaalne hain। evil baaten na sunni hai, na sunaani hai।

vardaan:- khushiyon ke akhut khajaane se bharpoor sada bephikar baadshaah bhav

khushiyon ke saagar dvaara roz khushi ka akhut khajaana milta hai isliye kisi bhi paristhiti mein khushi gaayab nahin ho sakti। kisi bhi baat ka phikar ho nahin sakta। aise nahin property ka kya hoga, parivaar ka kya hoga। parivartan hi hoga na। puraani duniya mein kitna bhi shreshtha ho lekin sab puraana hi hai isliye bephikar ban gaye। jo hoga achha hoga। braahmanon ke liye sab achha hai, kuchh bhi bura nahin। aapke paas yeh aisi baadshaahi hai jise koi bhi chheen nahin sakta।

slogan:- is sansaar ko ek alaukik khel aur paristhitiyon ko khilauna maankar chalo to kabhi niraash nahin honge।