Daily Murli for Saturday 16 May 2020

16-05-2020 praatahmurli om shanti "baapdaada"' madhuban

“meethe bachche - abhi drama ka chakra poora hota hai, tumhein ksheerkhanda bankar nai duniya mein aana hai, vahaan sab ksheerkhanda hain, yahaan loonpaani hain”

prashn:- tum trinetri bachche kis knowledge ko jaan kar trikaaldarshi ban gaye ho?

uttar:- tumhein abhi saare world ki history-geography ki knowledge mili hai, satayug se lekar kaliyug ant tak ki history-geography tum jaante ho। tumhein gyaan ka teesra netra mila ki aatma ek shareer chhod doosra leti hai। sanskaar aatma mein hain। ab baap kehte hain - bachche, naam-roop se nyaara bano। apne ko aatma ashareeri samjho।

geet:- dheeraj dhar manuva…

om shanti। kalpa-kalpa bachchon ko kaha jaata hai aur bachche jaante hain, dil hoti hai ki jaldi satayug ho jaae to is duhkh se chhoot jaayen। parantu drama bahut dheere-dheere chalne vaala hai। baap dheeraj dete hain baaki thode roz hain। bado-badon dvaara bhi aavaaz sunte rahenge duniya badalni hai। jo bhi bade-bade hain pope jaise woh bhi kehte hain duniya badalne vaali hai। achha phir pees kaise hogi? is samay sab loonpaani hain। abhi ham ksheerkhanda ho rahe hain। us taraph din-pratidin loonpaani hote jaate hain। aapas mein lad jhagad kar khatma hone vaale hain, taiyaariyaan ho rahi hain। yeh drama ka chakra ab poora hota hai। puraani duniya poori hoti hai। nai duniya ki sthaapna ho rahi hai। nai duniya so puraani, puraani so nai duniya phir banegi। isko duniya ka chakra kaha jaata hai jo phirta rehta hai। aise nahin, laakhon varsha baad puraani duniya nai hogi। nahin। tum bachche achhi reeti jaan chuke ho, bhakti bilkul hi alag hai। bhakti ka connection raavan ke saath hai। gyaan ka connection raam ke saath hai। yeh tum abhi samajh rahe ho। abhi baap ko bulaate bhi hain - he patit-paavan aao, aakar nai duniya sthaapan karo। nai duniya mein zaroor sukh hota hai। ab bachche chhote athva bade sab jaan gaye hain ki abhi ghar chalna hai। yeh naatak poora hota hai। ham phir se satayug mein jaayenge phir 84 janmon ka chakra lagaana hai। sva aatma ko darshan hota hai - srishti chakra ka arthaat aatma ko gyaan ka teesra netra mila hai, usko kaha jaata hai trinetri। abhi tum trinetri ho aur sabhi manushyon ko yeh sthool netra hain। gyaan ka netra koi ko nahin hai। trinetri banen tab trikaaldarshi banen kyonki aatma ko gyaan milta hai na। aatma hi ek shareer chhod doosra leti hai। sanskaar aatma mein rehte hain। aatma avinaashi hai। ab baap kehte hain naam-roop se nyaara bano। apne ko ashareeri samjho। deh nahin samjho। yeh bhi jaante ho ham aadhaakalpa se paramatma ko yaad karte aaye hain। ismen jab jaasti duhkh hota hai tab jaasti yaad karte hain, abhi kitna duhkh hai। aage itna duhkh nahin tha। jabse baahar vaale aaye hain tab se yeh raajaayen log bhi aapas mein lade hain। juda-juda hue hain। satayug mein to ek hi raajya tha।

abhi ham satayug se lekar kaliyug ant tak history-geography samajh rahe hain। satayug-treta mein ek hi raajya tha। aise ek hi dynasty koi ki hoti nahin। Christian mein bhi dekho phoot hai, vahaan to saara vishwa ek ke haath mein rehta hai। woh sirf satayug-treta mein hi hota hai। yeh behad ki history-geography abhi tumhaari buddhi mein hai। aur koi satsang mein history-geography akshar nahin sunenge। vahaan to raamaayan, mahaabhaarat aadi hi sunte hain। yahaan woh baaten hain nahin। yahaan hai world ki history-geography। tumhaari buddhi mein hai oonch te oonch hamaara baap hai। baap ka shukriya hai jisne saara gyaan sunaaya hai। ek aatmaon ka jhaad hai, doosra hai manushyon ka jhaad। manushyon ke jhaad mein oopar mein kaun hain? great-great grand father brahma ko hi kahenge। yeh jaante hain brahma mukhya hai parantu brahma ke peechhe kya history-geography hai, yeh koi nahin jaante। abhi tumhaari buddhi mein hai - oonch te oonch baap rehte bhi hain paramdham mein। phir sookshm vatan ka bhi tumko maaloom hai। manushya hi farishta bante hain, isliye sookshm vatan dikhaaya hai। tum aatmaayen jaati ho, shareer to sookshm vatan mein nahin jaayega। jaate kaise hain, unko kaha jaata hai teesra netra, divya-drishti athva dhyaan bhi kehte hain। tum dhyaan mein brahma-vishnu-shankar ko dekhte ho। log dikhlaate hain - shankar ke aankh kholne se vinaash ho jaata hai। ab inse to koi samajh na sake। abhi tum jaante ho vinaash to drama anusaar hona hi hai। aapas mein ladkar vinaash ho jaayenge। baaki shankar kya karte hain! yeh drama anusaar naam rakh diya hai। to samjhaana padta hai। brahma-vishnu-shankar teen hain। sthaapna ke liye brahma ko rakha hai, paalna ke liye vishnu ko, vinaash ke liye shankar ko rakh diya hai। vaastav mein yeh bana banaaya drama hai। shankar ka part kuchh bhi hai nahin। brahma aur vishnu ka part to saare kalpa mein hai। brahma so vishnu, vishnu so brahma। brahma ke bhi 84 janma poore hue to vishnu ke bhi poore hue। shankar to janma-maran se nyaara hai isliye shiv aur shankar ko phir mila diya hai। vaastav mein shiv ka to bahut part hai, padhaate hain।

bhagwan ko kaha jaata hai knowledgeful। agar woh prerna se kaarya karta to srishti chakra ka gyaan kaise deta! isliye baap samjhaate hain - bachche, prerna ki to koi baat hi nahin। baap ko to aana padta hai। baap kehte - bachche, mere mein srishti chakra ka gyaan hai। mere ko yeh part mila hua hai isliye mujhe hi gyaan saagar knowledgeful kehte hain। knowledge kisko kaha jaata hai, woh to jab mile tab pata pade। mila hi nahin hai to arth ka kaise maaloom pade। aage tum bhi kehte the eeshvar prerna karte hain। woh sab kuchh jaante hain। ham jo paap karte hain, eeshvar dekhte hain। baba kehte hain yeh dhandha main nahin karta hoon। yeh to jaisa karma karte hain uski khud hi saza bhogte hain, main kisko nahin deta hoon। na koi prerna se saza doonga। main prerna se karoon to jaise mainne saza di। koi ko kehna ki inko maaro, yeh bhi dosh hai। kahne vaala bhi phans pade। shankar prerna de to woh bhi phans jaae। baap kehte hain main to tum bachchon ko sukh dene vaala hoon। tum meri mahima karte ho - baba aakar duhkh haro। main thode hi duhkh deta hoon।

ab tum bachche baap ke sammukh baithe ho to kitni khushi honi chaahiye! yahaan direct bhaasna aati hai। baba hamko padhaate hain। inko mela kaha jaata hai। centres par tum jaate ho vahaan koi aatmaon, paramatma ka mela nahin kahenge। aatmaon paramatma ka mela yahaan lagta hai। yeh bhi tum jaante ho mela laga hua hai। baap bachchon ke beech mein aaye hain। aatmaayen sab yahaan hai। aatma hi yaad karti hain ki baap aaye। yeh sabse achha mela hai। baap aakar sab aatmaon ko raavan raajya se chhuda dete hain। ye mela achha hua na, jisse manushya paarasbuddhi bante hain। un melon par to manushya maile ho jaate hain। paise barbaad karte rehte hain, milta kuchh bhi nahin। unko maayaavi, aasuri mela kaha jaayega। yeh hai eeshvareey mela। raat-din ka farka hai। tum bhi aasuri mele mein the। abhi ho eeshvareey mele mein। tum hi jaante ho baba aaya hua hai। sab jaan jaaen to pata nahin kitni bheed ho jaae। itne makaan aadi rahne ke liye kahaan se laayenge! pichhaadi mein gaate hain na - aho prabhu teri leela। kaun-si leela? srishti ke badalne ki leela। yeh hai sabse badi leela। puraani duniya khatma hone se pahle nai duniya ki sthaapna hoti hai isliye hamesha kisko bhi samjhaao to pahle sthaapna, vinaash phir paalna kehna hai। jab sthaapna poori hoti hai tab phir vinaash shuru hota hai, phir paalna hogi। to tum bachchon ko yeh khushi rehti hai - ham svadarshan chakradhaari brahman hain। phir ham chakravarti raaja bante hain। yeh koi ko pata nahin, in devtaaon ka raajya kahaan gaya। naam-nishaan gum ho gaya hai। devta ke badle apne ko hindu kah dete hain। hindustaan mein rahne vaale hindu hain। lakshmi-naaraayan ko to aise kabhi nahin kahenge। unhon ko to devta kaha jaata hai। to ab is mele mein drama anusaar tum aaye ho। yeh drama mein noondh hai। dheere-dheere vriddhi hoti rahegi। tumhaara jo kuchh part chal raha hai phir kalpa baad chalega। yeh chakra phirta rehta hai। phir raavan raajya mein aasuri paalna hogi। tum abhi eeshvareey bachche ho phir daivi bachche phir kshatriy banenge। tum jo apvitra pravritti vaale ban gaye the so phir pavitra pravritti vaale bante ho। hain to yeh bhi daivi gun vaale manushya na। baaki itni bhujaayen aadi de di hain, vishnu kaun hain, yeh koi bata na sake। mahaalakshmi ki bhi pooja karte hain। jagat amba se kabhi dhan nahin maangate hain। dhan jaasti mil gaya to kahenge lakshmi ki pooja ki isliye usne bhandaara bhar diya। yahaan to tum jagat amba se pa rahe ho parampita paramatma shiv dvaara, dene vaala woh hai। tum bachche baapdaada se bhi lucky ho। dekho, jagdamba ka kitna mela lagta hai, brahma ka itna nahin। brahma ko to ek hi jagah bitha diya hai, ajmer mein bada mandir hai। deviyon ke mandir bahut hain kyonki is samay tumhaari bahut mahima hai। tum bhaarat ki seva karte ho। pooja bhi tumhaari jaasti hoti hai। tum lucky ho। jagat amba ke liye aise kabhi nahin kahenge ki woh sarvavyaapi hai। tumhaari mahima hoti rehti hai। brahma, vishnu, shankar ko bhi sarvavyaapi nahin kehte, mujhe kah dete kan-kan mein hai, kitni glaani karte hain।

tumhaari main kitni mahima badhaata hoon। bhaarat maata ki jay kehte hain na। bhaarat maata to tum ho na। dharni nahin। dharni aadi jo ab tamopradhaan hai, satayug mein satopradhaan ho jaati hai isliye kehte hain devtaaon ke pair patit duniya mein nahin aate। jab satopradhaan dharni hoti hai tab aate hain। abhi tumko satopradhaan banna hai। shreemat par chalte baap ko yaad karte rahenge to oonch pad paayenge। yeh khyaal rakhna hai। yaad karenge to vikarma vinaash honge। shreemat milti rehti hai। satayug mein to tumhaari aatma pavitra kanchan ho jaati hai to shareer bhi kanchan milta hai। sone mein khaad padti hai to phir jevar bhi aisa banta hai। aatma jhoothi to shareer bhi jhootha। khaad padne se sone ka moolya bhi kam ho jaata hai। tumhaara moolya ab kuchh bhi nahin hai। pahle tum vishwa ke maalik 24 carat the। abhi 9 carat kahenge। yeh baap bachchon se roohrihaan karte hain। bachchon ko baith bahlaate hain, jo tum sunte-sunte change ho jaate ho। manushya se devta ban jaate ho। vahaan heere-javaahraaton ke mahal honge, svarga to phir kya! vahaan ke shoobeeras aadi bhi tum peekar aate ho। vahaan ke phal hi itne bade-bade hote hain। yahaan to mil na saken। sookshm vatan mein to kuchh hai nahin। abhi tum practical mein jaate ho। yeh hai aatma aur paramatma ka mela, inse tum ujjaval bante ho।

tum bachche jab yahaan aate ho to free ho, ghar-baar dhandhe aadi ka koi phurna nahin hai। to yahaan tumko yaad ki yaatra mein rahne ka chance achha hai। vahaan to ghar-ghaat aadi yaad aata rahega। yahaan to kuchh hai nahin। raat ko do baje uth-kar yahaan baith jaao। centres par to raat ko tum ja nahin sakte। yahaan to sahaj hai। shivbaaba ki yaad mein aakar baitho, aur koi yaad na aaye। yahaan tumko madad bhi milegi। savere (jaldi) so jaao phir savere utho। 3 se 5 baje tak aakar baitho। baba bhi aa jaayenge, bachche khush honge। baba hai yog sikhlaane vaala। yeh bhi seekhne vaala hai to donon baap aur daada aa jaayenge phir yahaan aur vahaan yog mein baithne ke farka ka bhi pata padega। yahaan kuchh bhi yaad nahin padega, ismen phaayda bahut hai। baba raay dete hain - yeh bahut achha ho sakta hai। ab dekhen bachche uth sakte hain? kaiyon ko savere uthne ka abhyaas hai। tumhaara sanyaas hai 5 vikaaron ka aur vairaagya hai saari puraani duniya se। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) abhi srishti badalne ki leela chal rahi hai isliye svayan ko badalna hai। ksheerkhanda hokar rehna hai।

2) savere uthkar ek baap ki yaad mein baithna hai, us samay aur koi bhi yaad na aaye। puraani duniya se behad ka vairaagi ban 5 vikaaron ka sanyaas karna hai।

vardaan:- kinaara karne ke bajaae har pal baap ka sahaara anubhav karne vaale nishchay buddhi vijayi bhav

vijayi bhav ki vardaani aatma har pal svayan ko sahaare ke neeche anubhav karti hai। unke man mein sankalpamaatra bhi beshaare va akelepan ka anubhav nahin hota। kabhi udaasi ya alpakaal ke had ka vairaagya nahin aata। ve kabhi kisi kaarya se, samasya se, vyakti se kinaara nahin karte lekin har karma karte hue, saamna karte hue, sahayogi bante hue behad ki vairaagya vritti mein rehte hain।

slogan:- ek baap ki company mein raho aur baap ko hi apna companion banaao।