Daily Murli for Thursday 21 May 2020

21-05-2020 praatahmurli om shanti "baapdaada"' madhuban

“meethe bachche - tum behad ke baap se behad ka varsa lene aaye ho, yahaan had ki koi baat nahin, tum bade umang se baap ko yaad karo to puraani duniya bhool jaayegi”

prashn:- kaun-si ek baat tumhein baar-baar apne se ghot kar pakki karni chaahiye?

uttar:- ham aatma hain, ham paramatma baap se varsa le rahe hain। aatmaayen hain bachche, paramatma hai baap। abhi bachche aur baap ka mela hua hai। yeh baat baar-baar ghot-ghot kar pakki karo। jitna aatma-abhimaani bante jaayenge, deh-abhimaan mit jaayega।

geet:- jo piya ke saath hai…

om shanti। bachche jaante hain ki ham baba ke saath baithe hue hain - yeh hai bade te bada baba, sabka baba hai। baba aaya hua hai। baap se kya milta hai, yeh to savaal hi nahin uthta। baap se milta hi hai varsa। yeh hai sabka behad ka baap, jisse behad ka sukh, behad ki property milti hai। woh hai had ki milkiyat। koi ke paas hazaar, koi ke paas 5 hazaar hogi। koi ke paas 10-20-50 karod, arab honge। ab woh to sab hain laukik baabaayen aur had ke bachche। yahaan tum bachche samajhte ho ham behad ke baap paas aaye hain behad ki property lene। dil mein aash to rehti hai na। sivaae school ke aur satsang aadi mein koi aash nahin rehti। kahenge shanti mile, woh to mil nahin sakti। yahaan tum bachche samajhte ho ham aaye hain vishwa nai duniya ka maalik banne। nahin to yahaan kyon aayen। bachche kitni vriddhi ko paate rehte hain! kehte hain baba ham to vishwa ka maalik banne aaye hain, had ki koi baat hi nahin। baba aapse ham behad svarga ka varsa lene aaye hain। kalpa-kalpa ham baap se varsa lete hain phir maaya billi chheen leti hai isliye isko haar-jeet ka khel kaha jaata hai। baap baith bachchon ko samjhaate hain। bachche bhi nambarvaar samajhte hain, yeh koi saadhu-santa nahin hai। jaise tumko kapde pade hain vaise inko pade hain। yeh to baba hai na। koi poochhenge kiske paas jaate ho? kahenge ham baapdaada ke paas jaate hain। yeh to family ho gai। kyon jaate, kya lene jaate? yeh to aur koi samajh na sake। kah na sake ki ham baapdaada ke paas jaate hain, varsa unse milta hai। daade ki property ke sab hakdaar hain। shivbaaba ke avinaashi bachche (aatmaayen) to ho hi phir prajaapita brahma ke banne se unke potre-potriyaan ho। abhi tum jaante ho ham aatma hain। yeh to bahut pakka ghotna chaahiye। ham aatmaayen paramatma baap se varsa lete hain। ham aatmaayen baap se aakar mile hain। aage to shareer ka bhaan tha। phalaane-phalaane naam vaale hi property lete hain। abhi to hain aatmaayen, paramatma se varsa lete hain। aatmaayen hain bachche, paramatma hai baap। bachche aur baap ka bahut samay ke baad mela lagta hai। ek hi baari। bhaktimaarga mein phir anek artificial mele lagte rehte hain। yeh hai sabse wonderful mela। aatmaayen, paramatma alag rahe bahukaal...... kaun? tum aatmaayen। yeh bhi tum samajhte ho ham aatmaayen apne sweet silence hom mein rahne vaali hain। abhi yahaan part bajaate-bajaate thak gaye hain। to sannyaasi guru aadi ke paas jaakar shanti maangate hain। samajhte hain woh gharbaar chhod jangal mein jaate hain, unse shanti milegi। parantu aise hai nahin। abhi to sabhi shahar mein aa gaye hain। jangal mein guphaayen khaali padi hain। guru bankar baithe hain। nahin to unhon ko nivritti maarga ka gyaan de pavitrata sikhlaani hai। aajkal to dekho shaadiyaan karaate rehte hain।

tum bachche to apne yogbal se apni karmendriyon ko vash mein karte ho। karmendriyaan yogbal se sheetal ho jaayengi। karmendriyon mein chanchalta hoti hai na। ab karmendriyon par jeet paani hai, jo koi chanchalta na chale। sivaae yogbal se karmendriyon ka vash hona impossible hai। baap kehte hain karmendriyon ki chanchalta yogbal se hi tootegi। yogbal ki taakat to hai na। ismen badi mehnat lagti hai। aage chalkar karmendriyon ki chanchalta nahin rahegi। satayug mein to koi gandi beemaari nahin hoti। yahaan tum karmendriyon ko vash kar jaate ho to koi bhi gandi baat vahaan hoti nahin। naam hi hai svarga। unko bhool jaane kaaran laakhon varsha kah dete hain। abhi tak bhi mandir banaate rehte hain। agar laakhon varsha hue ho to phir baat hi yaad na ho। yeh mandir aadi kyon banaate? to vahaan karmendriyaan sheetal rehti hai। koi chanchalta nahin rehti। shivbaaba ko to karmendriyaan hain nahin। baaki aatma mein gyaan to saara hai na। vahi shanti ka saagar, sukh ka saagar hai। vo log kehte karmendriyaan vash nahin ho sakti। baap kehte hain yogbal se tum karmendriyon ko vash karo। baap ki yaad mein raho। koi bhi bekaayde kaam karmendriyon se nahin karna hai। aise lovely baap ko yaad karte-karte prem mein aansu aane chaahiye। aatma paramatma mein leen to hoti nahin। baap ek hi baar milte hain, jab shareer ka loan lete hain to aise baap ke saath kitna pyaar se chalna chaahiye। baba ko uchhal aai na। oho! baba vishwa ka maalik banaate hain phir yeh dhan maal kya karenge, chhodo sab। jaise paagal hote hain na। sab kahne lage inko baithe-baithe kya hua। dhandha aadi sab chhodkar aa gaye। khushi ka paara chadh gaya। saakshaatkaar hone lage। raajaai milni hai parantu kaise milegi, kya hoga? yeh kuchh bhi pata nahin। bas milna hai, us khushi mein sab chhod diya। phir dheere-dheere knowledge milti rehti hai। tum bachche yahaan school mein aaye ho, em object to hai na। yeh hai raajayog। behad ke baap se raajaai lene aaye ho। bachche jaante hain ham unse padhte hain, jisko yaad karte the ki baba aakar hamaare duhkh haro sukh do। bachchiyaan kehti hain hamko krishna jaisa bachcha mile। are woh to baikuntha mein milega na। krishna baikuntha ka hai, unko tum jhulaate ho to un jaisa bachcha to baikuntha mein hi milega na। abhi tum baikuntha ki baadshaahi lene aaye ho। vahaan zaroor prince-princess hi milenge। pavitra bachcha mile, yeh aash bhi poori hoti hai। yoon to prince-princess yahaan bhi bahut hain parantu narkavaasi hain। tum chaahte ho svargavaasi ko। padhaai to bahut sahaj hai। baap kehte hain tumne bahut bhakti ki hai, dhakke khaaye hain। tum kitna khushi se teerthon aadi par jaate ho। amarnaath par jaate hain, samajhte hain shankar ne paarvati ko amraktha sunaai। amarnaath ki sachchi katha tum abhi sunte ho। yeh to baap baith tumko sunaate hain। tum aaye ho - baap ke paas। jaante ho yeh bhaagyashaali rath hai, isne yeh loan par liya hai। ham shivbaaba ke paas jaate hain, unki hi shreemat par chalenge। kuchh bhi poochhna ho to baba se poochh sakte ho। kehte hain - baba ham bol nahin sakte। yeh to tum purooshaartha karo, ismen baba kya kar sakte hain।

baap tum bachchon ko shreshtha banne ka sahaj raasta bataate hain - ek to karmendriyon ko vash karo, doosra daiveegun dhaaran karo। koi gussa aadi kare to suno nahin। ek kaan se sun doosre se nikaal do। jo evil baat pasanda na aaye, use suno hi nahin। dekho pati krodh karta hai, maarta hai to kya karna chaahiye? jab dekho pati gussa karta hai to un par phool barsaao। hansate raho। yuktiyaan to bahut hain। kaameshu, krodheshu hote hain na। ablaayen pukaarti hain। ek dropdi nahin, sab hain। ab baap aaye hain nangan hone se bachaane। baap kehte hain is mrityulok mein yeh tumhaara antim janma hai। ham tum bachchon ko shantidham le jaane aaya hoon। vahaan patit aatma to ja na sake, isliye main aakar sabko paavan banaata hoon। jisko jo part mila hua hai woh poora kar ab sabko vaapis jaana hai। saare jhaad ka raaz buddhi mein hai। baaki jhaad ke patte thode hi koi ginti kar sakte hain। to baap bhi mool baat samjhaate hain - beej aur jhaad। baaki manushya to dher hain। ek-ek ke andar ko thode hi baith jaanenge। manushya samajhte hain bhagwan to antaryaami hai, harek ke andar ki baat ko jaante hain। yeh sab hai andhashraddha।

baap kehte hain tum hamko bulaate ho ki aakar hamko patit se paavan banaao, raajayog sikhaao। abhi tum raajayog seekh rahe ho। baap kehte hain mujhe yaad karo। baap yeh mat dete hain na। baap ki shreemat aur gat sabse nyaari hai। mat yaani raay, jisse hamaari sadgati hoti hai। vahi ek baap hamaari sadgati karne vaala hai, doosra na koi। is samay hi bulaate hain। satayug mein to bulaate nahin hain। abhi hi kehte hain sarva ka sadgati daata ek raam। jab maala pherte hain to pherte-pherte jab phool aata hai to unko raam kah okhon par lagaate hain। japna hai ek phool ko। baaki hai unki pavitra rachna। maala ko tum achhi reeti jaan gaye ho। jo baap ke saath service karte hain unki yeh maala hai। shivbaaba ko rachta nahin kahenge। rachta kahenge to prashn uthega ki kab rachna ki? prajaapita brahma abhi sangam par hi braahmanon ko rachte hain na। shivbaaba ki rachna to anaadi hai hi। sirf patit se paavan banaane liye baap aate hain। abhi to hai puraani srishti। nai mein rehte hain devtaayen। ab shoodron ko devta kaun banaaye। abhi tum phir se bante ho। jaante ho baba hamko shoodra se brahman, brahman se devta banaate hain। abhi tum brahman bane ho, devta banne ke liye। manushya srishti rachne vaala ho gaya brahma, jo manushya srishti ka head hai। baaki aatmaon ka avinaashi baap shiv to hai hi। yeh sab nai baaten tum sunte ho। jo buddhivaan hain woh achhi reeti dhaaran karte hain। aahiste-aahiste tumhaari bhi vriddhi hoti jaayegi। abhi tum bachchon ko smriti aai hai, ham asul devta the phir 84 janma kaise lete hain। sab raaz tum jaante ho। jaasti baaton mein jaane ki darkaar hi nahin hai।

baap se poora varsa lene ke liye mukhya baat baap kehte hain - ek to mujhe yaad karo, doosra pavitra bano। svadarshan chakradhaari bano aur aap samaan banaao। kitna sahaj hai। sirf yaad thaharti nahin hai। knowledge to badi sahaj hai। abhi puraani duniya khatma honi hai। phir satayug mein nai duniya mein devi-devtaayen raajya karenge। is duniya mein puraane te puraane yeh devtaaon ke chitra hain va inhon ke mahal aadi hain। tum kahenge puraane te puraane ham vishwa ke mahaaraaja-mahaaraani the। shareer to khatma ho jaate hain। baaki chitra banaate rehte hain। abhi yeh thode hi kisko pata hai, yeh lakshmi-naaraayan jo raajya karte the woh kahaan gaye? raajaai kaise li? bidla itne mandir banaate hain, parantu jaante nahin। paise milte jaate hain aur banaate rehte hain। samajhte hain yeh devtaaon ki kripa hai। ek shiv ki pooja hai avyabhichaari bhakti। gyaan dene vaala to gyaan saagar ek hi hai, baaki hai bhakti maarga। gyaan se aadhaakalpa sadgati hoti hai phir bhakti ki darkaar nahin rehti। gyaan, bhakti, vairaagya। ab bhakti se, puraani duniya se vairaagya। puraani ab khatma honi hai, ismen aasakti kya rakhen। ab to naatak poora hota hai, ham jaate hain ghar। woh khushi rehti hai। kai samajhte hain moksha paana to achha hai phir aayenge nahin। aatma budbuda hai jo saagar mein mil jaata hai। yeh sab gapode hain। actor to act karega zaroor। jo ghar baith jaae woh koi actor thode hi hua। moksha hota nahin। yeh drama anaadi bana hua hai। yahaan tumko kitni knowledge milti hai। manushyon ki buddhi mein to kuchh bhi nahin hai। tumhaara part hi hai - baap se gyaan lene ka, varsa paane ka। tum drama mein bandhaaymaan ho। purooshaartha zaroor karenge। aise nahin, drama mein hoga to milega। phir to baith jaao। lekin karma bigar koi rah nahin sakta hai। karma sannyaas ho hi nahin sakta। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yogbal ki taakat se apni karmendriyon ko sheetal banaana hai। vash mein rakhna hai। evil baaten na to sunni hai, na sunaani hai। jo baat pasanda nahin aati, use ek kaan se sun doosre se nikaal dena hai।

2) baap se poora varsa lene ke liye svadarshan chakradhaari banna hai, pavitra ban aap samaan banaane ki seva karni hai।

vardaan:- shaktishaali seva dvaara nirbal mein bal bharne vaale sachche sevaadhaari bhav

sachche sevaadhaari ki vaastavik visheshta hai - nirbal mein bal bharne ke nimitta banna। seva to sabhi karte hain lekin saphalta mein jo antar dikhaai deta hai uska kaaran hai seva ke saadhnon mein shakti ki kami। jaise talvaar mein agar jauhar nahin to woh talvaar ka kaam nahin karti, aise seva ke saadhnon mein yadi yaad ki shakti ka jauhar nahin to saphalta nahin isliye shaktishaali sevaadhaari bano, nirbal mein bal bharkar quality vaali aatmaayen nikaalo tab kahenge sachche sevaadhaari।

slogan:- har paristhiti ko udti kala ka saadhan samajhkar sada udte raho।