Daily Murli for Sunday 24 May 2020

24-05-20 praatahmurli om shanti ''avyakt-baapdaada'' revise 15-01-86 madhuban

sasta sauda aur bachat ka budget

ratnaagar baap apne bade te bade sauda karne vaale saudaagar bachchon ko dekh muskara rahe hain। sauda kitna bada aur karne vaale saudaagar duniya ke antar mein kitne saadhaaran, bhole-bhaale hain। bhagwan se sauda karne vaali kaun aatmaayen bhaagyavaan baneen। yeh dekh muskara rahe hain। itna bada sauda ek janma ka jo 21 janma sada maalaamaal ho jaate। dena kya aur lena kya hai। anginat padmon ki kamaai va padmon ka sauda kitna sahaj karte ho। sauda karne mein samay bhi vaastav mein ek second lagta hai। aur kitna sasta sauda kiya? ek second mein aur ek bol mein sauda kar liya - dil se maana mera baba। is ek bol se itna bada anginat khajaane ka sauda kar lete ho। sasta sauda hai na। na mehnat hai, na manhaga hai। na samay dena padta hai। aur koi bhi had ke saude karte to kitna samay dena padta। mehnat bhi karni padti aur manhaga bhi din-pratidin hota hi jaata hai। aur chalega kahaan tak? ek janma ki bhi guarantee nahin। to ab shreshtha sauda kar liya hai va abhi soch rahe ho ki karna hai? pakka sauda kar liya hai na? baapdaada apne saudaagar bachchon ko dekh rahe the। saudaagron ki list mein kaun-kaun naameegraami hain। duniya vaale bhi naameegraami logon ki list banaate hain na। vishesh directory bhi banaate hain। baap ki directory mein kinhon ke naam hain? jinmen duniya vaalon ki okh nahin jaati, unhonne hi baap se sauda kiya aur parmaatma naynon ke sitaare ban gaye, noore ratna ban gaye। naaummeend aatmaon ko vishesh aatma bana diya। aisa nasha sada rehta hai? parmaatma directory ke vishesh vi.aai.pi. ham hain isliye hi gaayan hai bholon ka bhagwan। hai chatur-sujaan lekin pasanda bhole hi aate hain। duniya ki baaharmukhi chaturaai baap ko pasanda nahin। unhon ka kaliyug mein raajya hain, jahaan abhi-abhi lakhapti abhi-abhi kakhapti hain। lekin aap sabhi sada ke liye padmaapdamti ban jaate ho। bhay ka raajya nahin। nirbhay hain।

aaj ki duniya mein dhan bhi hai aur bhay bhi hain। jitna dhan utna bhay mein hi khaate, bhay mein hi sote। aur aap bephikar baadshaah ban jaate। nirbhay ban jaate ho। bhay ka bhi bhoot kaha jaata hai। aap us bhoot se bhi chhoot jaate ho। chhoot gaye ho na? koi bhay hai? jahaan meraapan hoga vahaan bhay zaroor hoga। “mera baba”। sirf ek hi shivbaaba hai jo nirbhay banaata hai। unke sivaae koi bhi sona hiran bhi agar mera hai to bhi bhay hai। to check karo mera mera ka sanskaar brahman jeevan mein bhi kisi bhi sookshm roop mein rah to nahin gaya hai? silver jubilee, golden jubilee mana rahe ho na। chaandi va sona, real tabhi banta hai jab aag mein galaakar jo kuchh mix hota hai usko samaapta kar dete hain। real silver jubilee, real golden jubilee hai na। to jubilee manaane ke liye real silver, real gold banna hi padega। aise nahin jo silver jubilee vaale hain woh silver hi hain। yeh to varshon ke hisaab se silver jubilee kehte hain। lekin ho sabhi golden ej ke adhikaari golden ej vaale। to check karo real gold kahaan tak bane hain? sauda to kiya lekin aaya aur khaaya। aise to nahin? itna jama kiya jo 21 peedhi sada sampanna rahen? aapki vanshaavli bhi maalaamaal rahe। na sirf 21 janma lekin dvaapar mein bhi bhakta aatma hone ke kaaran koi kami nahin hogi। itna dhan dvaapar mein bhi rehta hai jo daan-punya achhi tarah se kar sakte ho। kaliyug ke ant mein bhi dekho, antim janma mein bhi bhikhaari to nahin bane ho na! daal-roti khaane vaale bane na। kaala dhan to nahin hai lekin daal-roti to hai na। is samay ki kamaai va sauda poora hi kalpa bhikhaari nahin banaayega, itna ikattha kiya hai jo antim janma mein bhi daal-roti khaate ho, itna bachat ka hisaab rakhte ho? budget banaana aata hai? jama karne mein hoshiyaar ho na! nahin to 21 janma kya karenge? kamaai karne vaale banenge ya raajya adhikaari ban raajya karenge? royal family ko kamaane ki jaroorat nahin hoti। praja ko kamaana padega। usmein bhi number hain। saahookaar praja aur saadhaaran praja। gareeb to hota hi nahin hai। lekin royal family purushaartha ki praarabdha raajya praapta karti hai। janma-janma royal family ke adhikaari bante hain। raajya takhta ke adhikaari har janma mein nahin bante lekin royal family ka adhikaar janma-janma praapta karte hain। to kya banenge? ab budget banaao। bachat ki scheme banaao।

aajkal ke jamaane mein vesta se best banaate hain। vesta ko hi bachaate hain। to aap sab bhi bachat ka khaata sada smriti mein rakho। budget banaao। sankalp shakti, vaani ki shakti, karma ki shakti, samay ki shakti kaise aur kahaan kaarya mein lagaani hai। aise na ho yeh sab shaktiyaan vyartha chali jaaen। sankalp bhi agar saadhaaran hain, vyartha hain to vyartha aur saadhaaran donon bachat nahin hui। lekin ganvaaya। saare din mein apna chart banaao। in shaktiyon ko kaarya mein lagaakar kitna badhaaya! kyonki jitna kaarya mein lagaayenge utna shakti badhegi। jaante sabhi ho ki sankalp shakti hai lekin kaarya mein lagaane ka abhyaas, ismen nambarvaar hain। koi phir, na to kaarya mein lagaate, na paap karma mein ganvaate। lekin saadhaaran dincharya mein na kamaaya na ganvaaya। jama to nahin hua na। saadhaaran seva ki dincharya va saadhaaran pravritti ki dincharya isko budget ka khaata jama hona nahin kahenge। sirf yeh nahin check karo ki yathaashakti seva bhi ki, padhaai bhi ki। kisko duhkh nahin diya। koi ulta karma nahin kiya। lekin duhkh nahin diya to sukh diya? jitni aur jaisi shaktishaali seva karni chaahiye utni ki? jaise baapdaada sada direction dete hain ki main-pan ka, merepan ka tyaag hi sachchi seva hai, aise seva ki? ulta bol nahin bola, lekin aisa bol bola jo kisi na-ummeend ko ummeendavaar bana diya। himmatheen ko himmatvaan banaaya? khushi ke umang, utsaah mein kisko laaya? yeh hai jama karna, bachat karna। aise hi do ghanta, 4 ghanta beet gaya, woh bachat nahin hui। sab shaktiyaan bachat kar jama karo। aisa budget banaao। yeh saal budget banaakar kaarya karo। har shakti ko kaarya mein kaise lagaaven, yeh plan banaao। eeshvareey budget aisa banaao jo vishwa ki har aatma kuchh na kuchh praapta karke hi aapke gun gaan kare। sabhi ko kuchh na kuchh dena hi hai। chaahe mukti do, chaahe jeevanmukti do। manushya aatmaayen to kya prakriti ko bhi paavan banaane ki seva kar rahe ho। eeshvareey budget arthaat sarva aatmaayen prakriti sahit sukhi va shant ban jaaven। woh government budget banaati hai itna paani denge, itne makaan denge, itni bijli denge। aap kya budget banaate ho? sabhi ko anek janmon tak mukti aur jeevanmukti deven। bhikhaareepan se, duhkh ashaanti se mukta karen। aadhaakalpa to aaraam se rahenge। unhon ki aash to poorn ho hi jaayegi। woh log to mukti hi chaahte hain na। jaante nahin hain lekin maangate to hain na। to svayan ke prati aur vishwa ke prati eeshvareey budget banaao। samjha kya karna hai! silver aur golden jubilee donon isi varsha mein kar rahe ho na। to yeh mahatva ka varsha hai। achha।

sada shreshtha sauda smriti mein rakhne vaale, sada jama ka khaata badhaane vaale, sada har shaktiyon ko kaarya mein lagaae vriddhi karne vaale, sada samay ke mahatva ko jaan mahaan banne aur banaane vaale, aise shreshtha dhanvaan, shreshtha samajhdaar bachchon ko baapdaada ka yaadapyaar aur namaste।

kumaaron se:- kumaar jeevan bhi lucky jeevan hai kyonki ulti seedhi chadhne se bach gaye। kabhi sankalp to nahin aata hai ulti seedhi chadhne ka! chadhne vaale bhi utar rahe hain। sabhi pravritti vaale bhi apne ko kumaar kumaari kahlaate hain na। to seedhi utre na! to sada apne is shreshtha bhaagya ko smriti mein rakho। kumaar jeevan arthaat bandhanon se bachne ki jeevan। nahin to dekho kitne bandhanon mein hote hain। to bandhanon mein khinchane se bach gaye। man se bhi svatantra, sambandh se bhi svatantra। kumaar jeevan hai hi svatantra। kabhi svapna mein bhi khyaal to nahin aata- thoda koi sahayogi mil jaae! koi saathi mil jaae! beemaari mein madad ho jaae- aise kabhi sochte ho! bilkul khyaal nahin aata? kumaar jeevan arthaat sada udte panchhi bandhan mein phanse hue nahin। kabhi bhi koi sankalp na aave। sada nirbandhan ho teevragti se aage badhte chalo।

kumaariyon se:- kumaariyon ko seva mein aage badhne ki lift mili hui hai। yeh lift hi shreshtha gift hai। is gift ko use karna aata hai na! jitna svayan ko shaktishaali banaayengi utna seva bhi shaktishaali karengi। agar svayan hi kisi baat mein kamjor hongi to seva bhi kamjor hogi isliye shaktishaali ban shaktishaali sevaadhaari ban jaao। aisi taiyaari karti chalo। jo samay aane par saphalta-poorvak seva mein lag jaao aur number aage le lo। abhi to padhaai mein time dena padta hai phir to ek hi kaam hoga isliye jahaan bhi ho training karti raho। nimitta bani hui aatmaon ke sang se taiyaari karti raho। to yogya sevaadhaari ban jaayengi। jitna aage badhegi utna apna hi phaayda hai।

sevaadhaari - teachers bahnon se

1. sevaadhaari arthaat sada nimitta। nimitta bhaav- seva mein svatah hi saphalta dilaata hai। nimitta bhaav nahin to saphalta nahin। sada baap ke the, baap ke hain aur baap ke hi rahenge - aisi pratigya kar li hai na। sevaadhaari arthaat har kadam baap ke kadam par rakhne vaale। isko kehte hain follow father karne vaale। har kadam shreshtha mat par shreshtha banaane vaale sevaadhaari ho na। seva mein saphalta praapta karna, yahi sevaadhaari ka shreshtha lakshya hai। to sabhi shreshtha lakshya rakhne vaale ho na। jitna seva mein va sva mein vyartha samaapta ho jaata hai utna hi sva aur seva samartha banti hai। to vyartha ko khatma karna, sada samartha banna। yahi sevaadhaariyon ki visheshta hai। jitna svayan nimitta bani hui aatmaayen shaktishaali hongi utna seva bhi shaktishaali hogi। sevaadhaari ka arth hi hai seva mein sada umang-utsaah laana। svayan umang-utsaah mein rahne vaale auron ko umang utsaah dila sakte hain। to sada pratyaksha roop mein umang utsaah dikhaai de। aise nahin ki main andar mein to rehti hoon lekin baahar nahin dikhaai deta। gupta purushaartha aur cheej hai lekin umang-utsaah chhip nahin sakta hai। chehre par sada umang-utsaah ki jhalak svatah dikhaai degi। bole na bole lekin chehra hi bolega, jhalak bolegi। aise sevaadhaari ho?

seva ka golden chance yeh bhi shreshtha bhaagya ki nishaani hai। sevaadhaari banne ka bhaagya to praapta ho gaya abhi sevaadhaari number one hain ya number tu hain, yeh bhi bhaagya banaana aur dekhna hai। sirf ek bhaagya nahin lekin bhaagya par bhaagya ki praapti। jitne bhaagya praapta karte jaate utna number svatah hi aage badhta jaata hai। isko kehte hain padmaapdam bhaagyavaan। ek subject mein nahin sab subject mein saphalta swaroop। achha!

2- sabse jyaada khushi kisko hai - baap ko hai ya aapko? kyon nahin kehte ho ki mere ko hai! dvaapar se bhakti mein pukaara aur ab praapta kar liya to kitni khushi hogi! 63 janma praapta karne ki ichchha rakhi aur 63 janmon ki ichchha poorn ho gai to kitni khushi hogi! kisi bhi cheez ki ichchha poorn hoti hai to khushi hoti hai na। yeh khushi hi vishwa ko khushi dilaane vaali hai। aap khush hote ho to saari vishwa khush ho jaati hai। aisi khushi mili hai na। jab aap badalte ho to duniya bhi badal jaati hai। aur aisi badalti hai jismen duhkh aur ashaanti ka naam nishaan nahin। to sada khushi mein naachte raho। sada apne shreshtha karmon ka khaata jama karte chalo। sabhi ko khushi ka khajaana baanto। aaj ke sansaar mein khushi nahin hai। sab khushi ke bhikhaari hain unhein khushi se bharpoor banaao। sada isi seva se aage badhte raho। jo aatmaayen dilshikasta ban gai hain unhon mein umang-utsaah laate raho। kuchh kar sakte nahin, ho nahin sakta… aise dilshikasta hain aur aap vijayi ban vijayi banaane ka umang-utsaah badhaane vaale ho। sada vijay ki smriti ka tilak laga rahe। tilakdhaari bhi hain aur svaraajya adhikaari bhi hain - isi smriti mein sada raho।

prashn:- jo sameep sitaare hain unke lakshan kya honge?

uttar:- unmein samaanta dikhaai degi। sameep sitaaron mein baapdaada ke gun aur kartavya pratyaksha dikhaai denge। jitni sameepta utni samaanta hogi। unka mukhda baapdaada ka saakshaatkaar karaane vaala darpan hoga। unko dekhte hi baapdaada ka parichay praapta hoga। bhale dekhenge aapko lekin aakarshan baapdaada ki taraph hogi। isko kaha jaata hai san shows father। snehi ke har kadam mein, jisse sneh hai uski chhaap dekhne mein aati hai। jitna harshitmoorta utna aakarshan moorta ban jaate hain। achha!

vardaan:- seva dvaara anek aatmaon ki aasheervaad praapta kar sada aage badhne vaale mahaadaani bhav

mahaadaani banna arthaat doosron ki seva karna, doosron ki seva karne se svayan ki seva svatah ho jaati hai। mahaadaani banna arthaat svayan ko maalaamaal karna, jitni aatmaon ko sukh, shakti va gyaan ka daan denge utni aatmaon ke praapti ki aavaaj ya shukriya jo nikalta woh aapke liye aasheervaad ka roop ho jaayega। yeh aasheervaaden hi aage badhne ka saadhan hain। jinhen aasheervaaden milti hain woh sada khush rehte hain। to roz amritvele mahaadaani banne ka programme banaao। koi samay va din aisa na ho jismen daan na ho।

slogan:- abhi ka pratyakshaphal aatma ko udti kala ka bal deta hai।