Daily Murli for Wednesday 26 August 2020

26-08-2020 praatahmurli om shanti "baapdaada"' madhuban

“meethe bachche - baba aaye hain tumhein king oph flower banaane, isliye vikaaron ki koi bhi badbu nahin honi chaahiye''

prashn:- vikaaron ka ansh samaapta karne ke liye kaun-sa purooshaartha karna hai?

uttar:- nirantar antarmukhi rahne ka purooshaartha karo। antarmukh arthaat second mein shareer se detach। is duniya ki sudh-budh bilkul bhool jaae। ek second mein oopar jaana aur aana। is abhyaas se vikaaron ka ansh samaapta ho jaayega। karma karte-karte beech-beech mein antarmukhi ho jaao, aisa lage jaise bilkul sannaata hai। koi bhi churpur nahin। yeh srishti to jaise hai hi nahin।

om shanti। yahaan har ek ko bithaaya jaata hai ki ashareeri ho baap ki yaad mein baitho aur saath-saath yeh jo srishti chakra hai unko bhi yaad karo। manushya 84 ke chakra ko samajhte nahin hain। samjhenge hi nahin। jo 84 ka chakra lagaate hain vahi samajhne aayenge। tumko yahi yaad karna chaahiye, inko svadarshan chakra kaha jaata hai, jisse aasuri khyaalaat khatma ho jaayenge। aise nahin ki koi asur baithe hain jinka gala kat jaayega। manushya svadarshan chakra ka bhi arth nahin samajhte hain। yeh gyaan tum bachchon ko yahaan milta hai। kamal phool samaan grihastha vyavhaar mein rah pavitra bano। bhagvaanuvaach hai na। yeh ek janma pavitra banne se bhavishya 21 janma tum pavitra duniya ka maalik banenge। satayug ko kaha jaata hai shivaalay। kaliyug hai veshyaalay। yeh duniya badalti hai। bhaarat ki hi baat hai। auron ki baat mein jaana hi nahin chaahiye। bole jaanavron ka kya hoga? aur dharmon ka kya hoga? bolo, pahle apna to samjho, peechhe auron ki baat। bhaaratvaasi hi apne dharma ko bhool duhkhi hue hain। bhaarat mein hi pukaarte hain tum maat-pita… vilaayat mein maat-pita akshar nahin kehte। woh sirf god father kehte hain। barobar bhaarat mein hi sukh ghanere the, bhaarat svarga tha - yeh bhi tum jaante ho। baap aakar kaanton ko phool banaate hain। baap ko baagvaan kehte hain। bulaate hain - aakar kaanton ko phool banaao। baap phoolon ka bageecha banaate hain। maaya phir kaanton ka jangal banaati hai। manushya to kah dete hain - eeshvar teri maaya badi prabal hai। na eeshvar ko, na maaya ko samajhte hain। koi ne akshar kaha bas repeat karte rehte hain। arth kuchh nahin। tum bachche samajhte ho yeh drama ka khel hai - raamraajya ka aur raavan raajya ka। raam raajya mein sukh, raavan raajya mein duhkh hai। yahaan ki hi baat hai। yeh koi prabhu ki maaya nahin hai। maaya kaha jaata hai 5 vikaaron ko, jisko raavan kehte hain। baaki manushya to punarjanma le 84 ke chakra mein aate hain। satoguni se tamopradhaan banna hai। is samay sab vikaar se paida hote hain - isliye vikaari kaha jaata hai। naam bhi hai vicious duniya phir viceless duniya arthaat puraani duniya se nai kaise banti hai, yeh to samajhne ki common baat hai। new world mein pahle heaven tha। bachche jaante hain svarga ki sthaapna karne vaala parampita paramatma hai, usmein sukh ghanere hue hain। gyaan se din, bhakti se raat kaise hoti hai - yeh bhi koi samajhte nahin hain। kahenge brahma tatha brahma mukh vanshaavli braahmanon ka din phir unheen braahmanon ki raat। din aur raat yahaan hota hai, yeh koi nahin samajhte। prajaapita brahma ki raat, to zaroor unke brahma mukh vanshaavli braahmanon ki bhi raat hogi। aadhaakalpa din, aadhaakalpa raat।

ab baap aaye hain nirvikaari duniya banaane। baap kehte hain - bachche, kaam mahaashatru hai, un par jeet paani hai। sampoorn nirvikaari pavitra banna hai। apvitra hone se tumne paap bahut kiye hain। yeh hai hi paap aatmaon ki duniya। paap zaroor shareer ke saath karenge, tab paap aatma banenge। devtaaon ki pavitra duniya mein paap hota nahin। yahaan tum shreemat se shreshtha punya aatma ban rahe ho। shri shri 108 ki maala hai। oopar mein hai phool, unko kahenge shiv। woh hai niraakaari phool। phir saakaar mein mel-female hain, unki maala bani hui hai। shivbaaba dvaara yeh poojan simran laayak bante hain। tum bachche jaante ho - baba hamko vijay maala ka daana banaate hain। ham vishwa par vijay pa rahe hain yaad ke bal se, yaad se hi vikarma vinaash honge। phir tum satopradhaan ban jaayenge। vo log to bigar samajh kah dete hain prabhu teri maaya prabal hai। kiske paas dhan hoga kahenge inke paas maaya bahut hai। vaastav mein maaya 5 vikaaron ko kaha jaata hai, jisko raavan bhi kaha jaata hai। unhonne phir raavan ka chitra bana diya hai 10 sheesh vaala। ab chitra hai to samjhaaya jaata hai। jaise angad ke liye bhi dikhaate hain, unko raavan ne hilaaya parantu hila na saka। drishtaanta bana diye hain। baaki koi cheez hai nahin। baap kehte hain maaya tumko kitna bhi hilaaye parantu tum sthir raho। raavan, hanoomaan, angad aadi yeh sab drishtaanta bana diye hain, jinka arth tum bachche jaante ho। bhramri ka bhi drishtaanta hai। bhramri aur braahmani raashi milti hai। tum vishta ke keedon ko gyaan-yog ki bhoon-bhoon kar patit se paavan banaate ho। baap ko yaad karo to satopradhaan ban jaayenge। kachhue ka bhi drishtaanta hai। indriyon ko sametkar antarmukh ho baith jaate hain। tumko bhi baap kehte hain bhal karma karo phir antarmukh ho jaao। jaise ki yeh srishti hai nahin। chur-pur banda ho jaati hai। bhakti maarga mein baaharmukhi ban padte hain। geet gaana, yeh karna, kitna hangaama, kitna kharcha hota hai। kitne mele lagte hain। baap kehte hain yeh sab chhod antarmukh ho jaao। jaise ki yeh srishti hai nahin। apne ko dekho ham laayak bane hain? koi vikaar to nahin sataata hai? ham baap ko yaad karte hain? baap jo vishwa ka maalik banaate hain, aise baap ko din-raat yaad karna chaahiye। ham aatma hain, hamaara woh baap hai। andar mein yeh chalta rahe - ham ab nai duniya ke phool ban rahe hain। ak ka va taangar ka phool nahin banna hai। hamko to ekdam king oph flower bilkul khushboodaar banna hai। koi badbu na rahe। bure khyaalaat nikal jaane chaahiye। maaya ke toofaan giraane ke liye bahut aayenge। karmendriyon se koi vikarma nahin karna hai। aise-aise apne ko pakka karna hai। apne ko sudhaarna hai। koi bhi dehdhaari ko mujhe yaad nahin karna hai। baap kehte hain apne ko aatma samajh mujhe yaad karo, shareer nirvaah arth karma bhi bhal karo। unse bhi time nikaal sakte ho। bhojan khaane samay bhi baap ki mahima karte raho। baba ko yaad kar khaane se bhojan bhi pavitra ho jaata hai। jab baap ko nirantar yaad karenge tab yaad se hi bahut janmon ke paap katenge aur tum satopradhaan banenge। dekhna hai kitna sachcha sona bana hoon? aaj kitna ghanta yaad mein raha? kal 3 ghanta yaad mein raha, aaj 2 ghanta raha - yeh to aaj ghaata ho gaya। utarna aur chadhna hota rahega। yaatra par jaate hain to kahaan oonche, kahaan neeche hote hain। tumhaari avastha bhi neeche-oopar hoti rahegi। apna khaata dekhna hai। mukhya hai yaad ki yaatra।

bhagvaanuvaach hai to zaroor bachchon ko hi padhaayenge। saari duniya ko kaise padhaayenge। ab bhagwan kisko kaha jaae? krishna to shareerdhaari hai। bhagwan to niraakaar parampita paramatma ko kaha jaata hai। khud kehte hain main saadhaaran tan mein pravesh karta hoon। brahma ka bhi budha tan gaaya hua hai। saphed daadhi moonchh to budhe ki hoti hai na। chaahiye bhi zaroor anubhvi rath। chhote rath mein thode hi pravesh karenge। khud hi kehte hain mujhe koi jaante nahin। woh hai supreme god father athva supreme soul। tum bhi 100 percent pavitra the। abhi 100 percent apvitra bane ho। satayug mein 100 percent purity thi to pees and prosperity bhi thi। mukhya hai purity। dekhte bhi ho purity vaalon ko impure maatha tekte hain, unki mahima gaate hain। sannyaasiyon ke aage aisa kabhi nahin kahenge ki aap sarvagun sampanna...... ham paapi neench hain। devtaaon ke aage aise kehte hain। baba ne samjhaaya hai - kumaari ko sab maatha tekte hain phir shaadi karti hai to sabke aage maatha tekti hai kyonki vikaari banti hai na। abhi baap kehte hain tum nirvikaari banenge to aadhaakalpa nirvikaari ho rahenge। abhi 5 vikaaron ka raajya hi khatma hota hai। yeh hai mrityulok, woh hai amarlok। abhi tum aatmaon ko gyaan ka teesra netra milta hai। baap hi dete hain। tilak bhi mastak par dete hain। abhi aatma ko gyaan mil raha hai, kiske liye? tum apne ko aapehi raajtilak do। jaise bairistari padhte hain to padhkar apne ko aapehi bairistari ka tilak dete hain। padhenge to tilak milega। aasheervaad se thode hi milega। phir to sabke oopar teacher kripa kare, sab paas ho jaaen। bachchon ko apne ko aapehi raajtilak dena hai। baap ko yaad karenge to vikarma vinaash honge aur chakra ko yaad karne se chakravarti mahaaraaja ban jaayenge। baap kehte hain tumko raajaaon ka raaja banaata hoon। devi-devtaayen double sirtaaj bante hain। patit raajaayen bhi unhon ki pooja karte hain। tumko pujaari raajaaon se bhi oonch banaate hain। jo bahut daan-punya karte hain to raajaaon ke paas janma lete hain kyonki karma achhe kiye hain। abhi yahaan tumko mila hai avinaashi gyaan dhan, woh dhaaran kar phir daan karna hai। yeh source oph income hai। teacher bhi padhaai ka daan karte hain। woh padhaai hai alpakaal ke liye। vilaayat se padhkar aate hain, aane se hi heartfail ho jaate hain to padhaai khatma। vinaashi ho gai na। mehnat saari muphta mein gai। tumhaari mehnat aise nahin ja sakti। tum jitna achha padhenge utna 21 janma tumhaari padhaai kaayam rahegi। vahaan akaale mrityu hoti hi nahin। yeh padhaai saath le jaayenge।

ab jaise baap kalyaankaari hai vaise tum bachchon ko bhi kalyaankaari banna hai। sabko raasta bataana hai। baba to raay bahut achhi dete hain। ek hi baat samjhaao ki sarvashreshtha shiromni shreemad bhagvat geeta ki itni mahima kyon hai? bhagwan ki hi shreshtha mat hai। ab bhagwan kisko kaha jaae? bhagwan to ek hi hota hai। woh hai niraakaar, sab aatmaon ka baap, isliye aapas mein bhaai-bhaai kehte hain phir jab brahma dvaara nai srishti rachte hain to behen-bhaai ho jaate hain। is samay tum bhaai-behen ho to pavitra rehna pade। yeh hai yukti। criminal aai ekdam nikal jaae। sambhaal rakhni hai, hamaari aankhen kahaan matvaali to nahin bani? bajaar mein chane dekh dil to nahin hui? aise dil bahuton ki hoti hai, phir kha bhi lete hain। braahmani hai, kisi bhaai ke saath jaati hai woh kehte hain chana khaayengi, ek baar khaane se paap thode hi lag jaayega! jo kachche hote hain woh jhat kha lete hain। is par shaastron mein bhi arjun ka drishtaanta hain। yeh kahaaniyaan baith banaai hain। baaki hain sab is samay ki baaten।

tum sab seetaayen ho। tumko baap kehte hain ek baap ko yaad karo to paap kat jaayenge। baaki aur koi baaten hain nahin। abhi tum samajhte ho raavan koi aisa manushya nahin hai। yeh to vikaaron ki praveshta ho jaati hai to raavan sampradaay kaha jaata hai। jaise koi-koi aisa kaam karte hain to kehte hain - tum to asur ho। chalan aasuri hai। vikaari bachche ko kahenge tum kul kalankit bante ho। yeh phir behad ka baap kehte hain tumko ham kaale se gora banaate hain phir kaala munh karte ho। pratigya kar phir vikaari ban padte ho। kaale se bhi kaala ban jaate hain, isliye pattharbuddhi kaha jaata hai। phir ab tum paarasbuddhi bante ho। tumhaari chadhti kala hoti hai। baap ko pahchaana aur vishwa ka maalik banen। sanshay ki baat ho nahin sakti। baap hai heavenly god father। to zaroor heaven saugaat mein laayenge na, bachchon ke liye। shiv jayanti bhi manaate hain - kya karte honge? vrat aadi rakhte honge। vaastav mein vrat rakhna chaahiye vikaaron ka। vikaar mein nahin jaana hai। inse hi tumne aadi-madhya-ant duhkh paaya hai। ab yeh ek janma pavitra bano। puraani duniya ka vinaash saamne khada hai। tum dekhna bhaarat mein 9 laakh jaakar rahenge, phir shanti ho jaayegi। aur dharma hi nahin rahenge jo taali baje। ek dharma ki sthaapna baaki anek dharma vinaash ho jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) avinaashi gyaan dhan svayan mein dhaaran kar phir daan karna hai। padhaai se apne aapko svayan hi raaj tilak dena hai। jaise baap kalyaankaari hai vaise kalyaankaari banna hai।

2) khaane-peene ki poori-poori parhej rakhni hai। kabhi bhi aankhen dhokha na den - yeh sambhaal karni hai। apne ko sudhaarna hai। karmendriyon se koi bhi vikarma nahin karna hai।

vardaan:- beejroop sthiti dvaara saare vishwa ko light ka paani dene vaale vishwa kalyaankaari bhav

beejroop stage sabse powerful stage hai yahi stage light house ka kaarya karti hai, isse saare vishwa mein light phailaane ke nimitta bante ho। jaise beej dvaara svatah hi saare vriksha ko paani mil jaata hai aise jab beejroop stage par sthit rehte ho to vishwa ko light ka paani milta hai। lekin saare vishwa tak apni light phailaane ke liye vishwa kalyaankaari ki powerful stage chaahiye। iske liye light house bano na ki bulb। har sankalp mein smriti rahe ki saare vishwa ka kalyaan ho।

slogan:- adjust hone ki shakti naajuk samay par paas with honour bana degi।