Daily Murli for Monday 21 September 2020

21-09-2020 praatahmurli om shanti "baapdaada"' madhuban

''meethe bachche - sangam par tumhein pyaar ka saagar baap pyaar ka hi varsa dete hain, isliye tum sabko pyaar do, gussa mat karo''

prashn:- apne register ko theek rakhne ke liye baap ne tumhein kaun sa raasta bataaya hai?

uttar:- pyaar ka hi raasta baap tumhein batlaate hain, shreemat dete hain bachche har ek ke saath pyaar se chalo। kisi ko bhi duhkh nahin do। karmendriyon se kabhi bhi koi ulta karma nahin karo। sada yahi jaanch karo ki mere mein koi aasuri gun to nahin hain? moody to nahin hoon? koi baat mein bigadta to nahin hoon?

geet:- yeh vakta ja raha hai…

om shanti। meethe-meethe roohaani bachchon ne geet suna। din-pratidin apna ghar athva manzil nazdeek hoti jaati hai। ab jo kuchh shreemat kehti hai, usmein gaphlat na karo। baap ka direction milta hai ki sabko message pahunchaao। bachche jaante hain laakhon karodon ko yeh message dena hai। phir koi samay aa bhi jaayenge। jab bahut ho jaayenge to bahuton ko message denge। baap ka message milna to sabko hai। message hai bahut sahaj। sirf bolo apne ko aatma samajh baap ko yaad karo aur koi bhi karmendriyon se mansa-vaacha-karmana koi bura kaam nahin karna hai। pahle mansa mein aata hai tab vaacha mein aata hai। abhi tumko right-wrong samajhne ki buddhi chaahiye, yeh punya ka kaam hai, yeh karna chaahiye। dil mein sankalp aata hai gussa karen, ab buddhi to mili hai-agar gussa karenge to paap ban jaayega। baap ko yaad karne se punya aatma ban jaayenge। aise nahin achha abhi hua phir nahin karenge। aise phir-phir kehte rahne se aadat pad jaayegi। manushya aisa karma karte hain to samajhte hain yeh paap nahin hai। vikaar ko paap nahin samajhte hain। abhi baap ne bataaya hai - yeh bade se bada paap hai, in par jeet paana hai aur sabko baap ka message dena hai ki baap kehte hain mujhe yaad karo, maut saamne khada hai। jab koi marne par hote hain to unko kehte hain - god father ko yaad karo। rimembar god father। woh samajhte hain yeh god father paas jaate hain। parantu vo log yeh to jaante nahin ki god father ko yaad karne se kya hoga? kahaan jaayenge? aatma ek shareer chhod doosra leti hai। god father ke paas to koi ja na sake। to ab tum bachchon ko avinaashi baap ki avinaashi yaad chaahiye। jab tamopradhaan duhkhi ban jaate hain tab to ek-do ko kehte hain god father ko yaad karo, sab aatmaayen ek-do ko kehti hain, kehti to aatma hai na। aise nahin ki paramatma kehte hain। aatma, aatma ko kehti hai - baap ko yaad karo। yeh ek common rasam hai। marne samay eeshvar ko yaad karte hain। eeshvar ka dar rehta hai। samajhte hain achhe va bure karmon ka phal eeshvar hi dete hain, bura karma karenge to eeshvar dharmaraaj dvaara bahut saza denge isliye dar rehta hai, barobar karmon ki bhogna to hoti hai na। tum bachche abhi karma-akarma-vikarma ki gati ko samajhte ho। jaante ho yeh karma akarma hua। yaad mein rah jo karma karte hain woh achhe karte hain। raavan raajya mein manushya bure karma hi karte hain। raam raajya mein bura kaam kabhi hota nahin। ab shreemat to milti rehti hai। kahaan bulaava hota hai, yeh karna chaahiye va nahin karna chaahiye - har baat mein poochhte raho। samjho koi pulis ki naukri karte hain to unhein bhi kaha jaata-tum pahle pyaar se samjhaao। sachchi na kare to baad mein maar। pyaar se samjhaane se haath aa sakte hain parantu us pyaar mein bhi yogbal bhara hoga to us pyaar ki taakat se koi ko bhi samjhaane se samjhenge, yeh to jaise eeshvar samjhaate hain। tum eeshvar ke bachche yogi ho na। tumhaare mein bhi eeshvareey taakat hai। eeshvar pyaar ka saagar hai, unmein taakat hai na। sabko varsa dete hain। tum jaante ho svarga mein pyaar bahut hota hai। abhi tum pyaar ka poora varsa le rahe ho। lete-lete nambarvaar purushaartha karte-karte pyaare ban jaayenge।

baap kehte hain-kisko bhi duhkh nahin dena hai, nahin to duhkhi hokar marenge। baap pyaar ka raasta bataate hain। mansa mein aane se woh shakla mein bhi aa jaata hai। karmendriyon se kar liya to register kharaab ho jaayega। devtaaon ki chaal-chalan ka gaayan karte hain na isliye baba kehte hain-devtaaon ke pujaariyon ko samjhaao। woh mahima gaate hain aap sarvagun sampanna, 16 kala sampoorn ho aur apni chaal-chalan bhi sunaate hain। to unko samjhaao tum aise the, ab nahin ho phir honge zaroor। tumko aisa devta banna hai to apni chaal aisi rakho, to tum yeh ban jaayenge। apni jaanch karni hai-ham sampoorn nirvikaari hain? hamaare mein koi aasuri gun to nahin hain? koi baat mein bigadta to nahin hoon, moodi to nahin banta hoon? anke baar tumne purooshaartha kiya hai। baap kehte hain tumko aisa banna hai। banaane vaala bhi haazir hai। kehte hain kalpa-kalpa tumko aisa banaata hoon। kalpa pahle jinhonne gyaan liya hai woh zaroor aakar lenge। purooshaartha bhi karaaya jaata hai aur bephikra bhi rehte hain। drama ki noondh aisi hai। koi kehte hain-drama mein noondh hogi to zaroor karenge। achha chart hoga to drama karaayega। samjha jaata hai - unki takdeer mein nahin hai। pahle-pahle bhi ek aise bigda tha, takdeer mein nahin tha-bola drama mein hoga to drama hamko purooshaartha karaayega। bas chhod diya। aise tumko bhi bahut milte hain। tumhaara em object to yeh khada hai, badge to tumhaare paas hai, jaise apna potaamel dekhte ho to badge ko bhi dekho, apni chaal-chalan ko bhi dekho। kabhi bhi criminal okhen na hon। mukh se koi evil baat na nikle। evil bolne vaala hi nahin hoga to kaan sunenge kaise? satayug mein sab daiveegun vaale hote hain। evil koi baat nahin। inhonne bhi praalabdha baap dvaara hi paai hai। yeh to sabko bolo baap ko yaad karo to vikarma vinaash ho jaayenge। ismen nuksaan ki koi baat nahin hai। sanskaar aatma le jaati hai। sanyaasi hoga to phir sanyaas dharma mein aa jaayega। jhaad to unka badhta rehta hai na। is samay tum badal rahe ho। manushya hi devta bante hain। sab koi ikatthe thode hi aayenge। aayenge phir nambarvaar, drama mein koi bigar samay actor thode hi stage par aa jaayenge। andar baithe rehte hain। jab samay hota hai to baahar stage par aate hain part bajaane। woh hai had ka naatak, yeh hai behad ka। buddhi mein hai ham actors ko apne samay par aakar apna part bajaana hai। yeh behad ka bada jhaad hai। nambarvaar aate jaate hain। pahle-pahle ek hi dharma tha sabhi dharma vaale to pahle-pahle aa na saken।

pahle to devi-devta dharma vaale hi aayenge part bajaane, so bhi nambarvaar। jhaad ke raaz ko bhi samajhna hai। baap hi aakar saare kalpa vriksha ka gyaan sunaate hain। inki bhent phir niraakaari jhaad se hoti hai। ek baap hi kehte hain manushya srishti roopi jhaad ka beej main hoon। beej mein jhaad samaaya hua nahin hai lekin jhaad ka gyaan samaaya hua hai। har ek ka apna-apna part hai। chaitanya jhaad hai na। jhaad ke patte bhi nambarvaar niklenge। is jhaad ko koi bhi samajhte nahin hain, inka beej oopar mein hai isliye inko ulta vriksha kaha jaata hai। rachayita baap hai oopar mein। tum jaante ho hamko jaana hai ghar, jahaan aatmaayen rehti hain। abhi hamko pavitra bankar jaana hai। tumhaare dvaara yogbal se saari vishwa pavitra ho jaati hai। tumhaare liye to pavitra srishti chaahiye na। tum pavitra bante ho to duniya bhi pavitra banaani pade। sab pavitra ho jaate hain। tumhaari buddhi mein hai, aatma mein hi man-buddhi hai na। chaitanya hai। aatma hi gyaan ko dhaaran kar sakti hai। to meethe-meethe bachchon ko yeh saara raaz buddhi mein hona chaahiye-kaise ham punarjanma lete hain। 84 ka chakra tumhaara poora hota hai to sabka poora hota hai। sab paavan ban jaate hain। yeh anaadi bana hua drama hai। ek second bhi thaharta nahin hai। second by second jo kuchh hota hai, so phir kalpa baad hoga। har ek aatma mein avinaashi part bhara hua hai। woh actors karke 2-4 ghante ka part bajaate hain। yeh to aatma ko natural part mila hua hai to bachchon ko kitni khushi honi chaahiye। ateendriy sukh abhi sangam ka hi gaaya hua hai। baap aate hain, 21 janmon ke liye ham sada sukhi bante hain। khushi ki baat hai na। jo achhi reeti samajhte aur samjhaate hain woh service par lage rehte hain। koi bachche khud hi agar krodhi hain to doosre mein bhi praveshta ho jaati hai। taali do haath ki bajti hai। vahaan aise nahin hota। yahaan tum bachchon ko shiksha milti hai - koi krodh kare to tum un par phool chadhaao। pyaar se samjhaao। yeh bhi ek bhoot hai, bahut nuksaan kar denge। krodh kabhi nahin karna chaahiye। sikhlaane vaale mein to krodh bilkul nahin hona chaahiye। nambarvaar purushaartha karte rehte hain। kiska teevra purooshaartha hota hai, kiska thanda। thande purooshaartha vaale zaroor apni badnaami karenge। koi mein krodh hai to jahaan jaate hain vahaan se nikaal dete hain। koi bhi badachlan vaale rah nahin sakte। imtahaan jab poora hoga to sabko pata padega। kaun-kaun kya bante hain, sab saakshaatkaar hoga। jo jaisa kaam karte hain, unki aisi mahima hoti hai।

tum bachche drama ke aadi-madhya-ant ko jaante ho। tum sab antaryaami ho। aatma andar mein jaanti hai - yeh srishti chakra kaise phirta hai। saare srishti ke manushyon ki chaal-chalan ka, sab dharmon ka tumhein gyaan hai। unko kaha jaayega - antaryaami। aatma ko sab maaloom pad gaya। aise nahin, bhagwan ghat-ghat vaasi hai, unko jaanne ki kya darkaar hai? vo to abhi bhi kehte hain jo jaisa purushaartha karenge aisa phal paayenge। mujhe jaanne ki kya darkaar hai। jo karta hai uski saza bhi khud paayenge। aisi chalan chalenge to adham gati ko paayenge। pad bahut kam ho jaayega, us school mein to naapaas ho jaate hain to phir doosre varsha padhte hain। yeh padhaai to hoti hai kalpa-kalpaantar ke liye। ab na padhe to kalpa-kalpaantar nahin padhenge। eeshvareey lottery to poori leni chaahiye na। yeh baaten tum bachche samajh sakte ho। jab bhaarat sukhdhaam hoga tab baaki sab shantidham mein honge। bachchon ko khushi honi chaahiye-ab hamaare sukh ke din aate hain। deepmaala ke din nazdeek hote hain to kehte hain na baaki itne din hain phir naye kapde pahnenge। tum bhi kehte ho svarga aa raha hai, ham apna shrringaar karen to phir svarga mein achha sukh paayenge। saahookaar ko to saahookaari ka nasha rehta hai। manushya bilkul ghor neend mein hain phir achaanak pata padega-yeh to sach kehte the। sach ko tab samjhen jab sach ka sang ho। tum abhi sach ke sang mein ho। tum sat bante ho sat baap dvaara। woh sab asatya bante hain, asatya dvaara। abhi contrast bhi chhapa rahe hain ki bhagwan kya kehte hain aur manushya kya kehte hain। magazine mein bhi daal sakte ho। aakhreen vijay to tumhaari hi hai, jinhonne kalpa pahle pad paaya hai woh zaroor paayenge। yeh certain hai। vahaan akaale mrityu hota nahin। aayu bhi badi hoti hai। jab pavitrata thi to badi aayu thi। patit-paavan paramatma baap hai to zaroor usne hi paavan banaaya hoga। krishna ki baat shobhti nahin। purooshottam sangamayug par krishna phir kahaan se aayega। vahi features vaala manushya to phir hota nahin। 84 janma, 84 features, 84 activity-yeh bana-banaaya khel hai। usmein farka nahin pad sakta। drama kaisa wonderful bana hua hai। aatma chhoti bindi hai, usmein anaadi part bhara hua hai - isko kudrat kaha jaata hai। manushya sunkar wonder khaayenge। parantu pahle to yeh paigaam dena hai ki baap ko yaad karo। vahi patit-paavan hai, sarva ka sadgati daata hai। satayug mein duhkh ki baat hoti nahin। kaliyug mein to kitna duhkh hai। parantu yeh baaten samajhne vaale nambarvaar hain। baap to roz samjhaate rehte hain। tum bachche jaante ho shivbaaba aaya hua hai hamko padhaane, phir saath le jaayenge। saath mein rahne vaalon se bhi baandheliyaan jyaada yaad karti hain। woh oonch pad pa sakti hain। yeh bhi samajh ki baat hai na। baba ki yaad mein bahut tadaphti hain। baap kehte hain bachche yaad ki yaatra mein raho, daiveegun bhi dhaaran karo to bandhan katte jaayenge। paap ka ghada khatma ho jaayega। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki ruhaani bachchon ko namaste।

dhaarna ke liye mukhya saar:-

1) apni chaal-chalan devtaaon jaisi banaani hai। koi bhi evil bol mukh se nahin bolne hain। yeh aankhen kabhi criminal na hon।

2) krodh ka bhoot bahut nuksaan karta hai। taali do haath se bajti hai isliye koi krodh kare to kinaara kar lena hai, unhein pyaar se samjhaana hai।

vardaan:- avyakt swaroop ki saadhna dvaara powerful vaayumandal banaane vaale avyakt pharishta bhav

vaayumandal ko powerful banaane ka saadhan hai apne avyakt swaroop ki saadhna। iska baar-baar attention rahe kyonki jis baat ki saadhna ki jaati hai usi baat ka dhyaan rehta hai। to avyakt swaroop ki saadhna arthaat baar-baar attention ki tapasya chaahiye isliye avyakt pharishta bhav ke vardaan ko smriti mein rakh shaktishaali vaayumandal banaane ki tapasya karo to aapke saamne jo bhi aayega woh vyakta aur vyartha baaton se pare ho jaayega।

slogan:- sarva shaktimaan baap ko pratyaksha karne ke liye ekaagrata ki shakti ko badhaao।