Daily Murli for Friday 9 October 2020

09-10-2020 praatahmurli om shanti "baapdaada"' madhuban

“meethe bachche - savere-savere uth baba se meethi-meethi baaten karo, vichaar saagar manthan karne ke liye savere ka time bahut achha hai''

prashn:- bhakta bhi bhagwan ko sarvashaktimaan kehte hain aur tum bachche bhi, lekin donon mein antar kya hai?

uttar:- woh kehte bhagwan to jo chaahe woh kar sakta hai। sab kuchh uske haath mein hai। lekin tum jaante ho baba ne kaha hai main bhi drama ke bandhan mein baandha hua hoon। drama sarvashaktimaan hai। baap ko sarvashaktimaan isliye kaha jaata kyonki unke paas sarva ko sadgati dene ki shakti hai। aisa raajya sthaapan karta jise kabhi koi chheen nahin sakta।

om shanti। kisne kaha? baba ne। om shanti - yeh kisne kaha? daada ne। ab tum bachchon ne yeh pahchaana hai। oonch te oonch ki mahima to bahut bhaari hai। kehte hain sarvashaktimaan hai to kya nahin kar sakte। ab yeh bhakti maarga vaale to sarvashaktimaan ka arth bahut bhaari nikaalte honge। baap kehte hain drama anusaar sab kuchh hota hai, main kuchh bhi karta nahin hoon। main bhi drama ke bandhan mein baandha hua hoon। sirf tum baap ko yaad karne se sarvashaktimaan ban jaate ho। pavitra banne se tamopradhaan se satopradhaan ban jaate ho। baap sarvashaktimaan hai, unko sikhlaana hota hai। bachche, mujhe yaad karo to vikarma vinaash ho jaayenge phir sarvashaktimaan ban vishwa par raajya karenge। shakti nahin hogi to raajya kaise karenge। shakti milti hai yog se isliye bhaarat ka praacheen yog bahut gaaya jaata hai। tum bachche nambarvaar yaad kar aur khushi mein aate ho। tum jaante ho ham aatmaayen baap ko yaad karne se vishwa par raajya praapta kar sakte hain। koi ki taakat nahin jo chheen sake। oonch te oonch baap ki mahima sab karte hain parantu samajhte kuchh nahin। ek bhi manushya nahin jisko yeh pata ho ki yeh naatak hai। agar samajhte ho ki naatak hai to shuru se ant tak woh yaad aana chaahiye। nahin to naatak kehna hi wrong ho jaata hai। kehte bhi hain yeh naatak hai, ham part bajaane aaye hain। to us naatak ke aadi-madhya-ant ko bhi jaanna chaahiye na। yeh bhi kehte hain ham oopar se aate hain tab to vriddhi hoti rehti hai na। satayug mein to thode manushya the। itni sab aatmaayen kahaan se aai, yeh koi samajhte nahin ki yeh anaadi bana-banaaya avinaashi drama hai। jo aadi se ant tak repeat hota rehta hai। tum bioscope shuru se ant tak dekho phir dubaara repeat karke agar dekhenge to chakra zaroor hoobhu repeat hoga। zara bhi farka nahin hoga।

baap meethe-meethe bachchon ko kaise baith samjhaate hain। kitna meetha baap hai। baba aap kitne meethe ho। baba bas, abhi to ham chalte hain apne sukhdhaam mein। abhi yeh maaloom pada hai ki aatma paavan ban jaayegi to doodh bhi vahaan paavan milega। shreshthaachaari maataayen bahut meethi hoti hain, samay par bachche ko aapehi doodh pilaati hain। bachche ko rone ki darkaar nahin hoti। aise-aise yeh bhi vichaar saagar manthan karna hota hai। subah ko baba se baaten karne se bada maja aata hai। baba aap kitni achhi yukti bataate ho, shreshthaachaari raajya sthaapan karne ki। phir ham shreshthaachaari maataaon ki god mein jaayenge। anek baar ham hi us nai srishti mein gaye hain। abhi hamaare khushi ke din aate hain। yeh khushi ki khuraak hai isliye gaayan bhi hai ateendriy sukh poochhna ho to gop-gopiyon se poochho। ab hamko behad ka baap mila hai। hamko phir se svarga ka maalik shreshthaachaari banaate hain। kalpa-kalpa ham apna raajya-bhaagya lete hain। haar khaate hain phir jeet paate hain। abhi baap ko yaad karne se hi raavan par jeet paani hai phir ham paavan ban jaayenge। vahaan ladaai duhkh aadi ka naam nahin, koi kharcha nahin। bhakti maarga mein janma-janmaantar kitna kharcha kiya, kitne dhakke khaaye, kitne guru kiye hain। ab phir aadhaakalpa ham koi guru nahin karenge। shantidham, sukhdhaam jaayenge। baap kehte hain tum sukhdhaam ke raahi ho। ab duhkhadhaam se sukhdhaam mein jaana hai। vaah hamaara baba, kaise hamko padha rahe hain। hamaara yaadgaar bhi yahaan hai। yeh to bada wonder hai। is delvaada mandir ki to aparmaapaar mahima hai। abhi ham raajayog seekhte hain। uska yaadgaar to zaroor banega na। yeh hoobhu hamaara yaadgaar hai। baba, mama aur bachche baithe hain। neeche yog seekh rahe hain, oopar mein svarga ki raajaai hai। jhaad mein bhi kitna clear hai। baba ne kaise saakshaatkaar karaae phir chitra baith banvaaye hain। baba ne hi saakshaatkaar karaaya aur phir correct bhi kiya। kitna wonder hai। saari nai knowledge hai। kisko bhi is knowledge ka pata nahin hai। baap hi baith samjhaate hain, manushya kitna tamopradhaan bante jaate hain। manushya srishti badhti jaati hai। bhakti bhi vriddhi ko paate-paate tamopradhaan banti jaati hai। yahaan ab tum satopradhaan banne ka purooshaartha karte ho। geeta mein bhi akshar hai man-manaabhav। sirf yeh nahin jaante ki bhagwan kaun hai। ab tum bachchon ko savere-savere uthkar vichaar saagar manthan karna hai ki manushyon ko bhagwan ka parichay kaise den। bhakti mein bhi manushya savere-savere uthkar kothi mein baith bhakti karte hain। woh bhi vichaar saagar manthan hua na। abhi tumko gyaan ka teesra netra milta hai। baap teesra netra dene ki katha sunaate hain। isko hi phir teejri ki katha kah diya hai। teejri ki katha, amraktha, satya naaraayan ki katha bhi mashhoor hai। sunaane vaala ek hi baap hai jo phir bhakti maarga mein chalti hai। gyaan se tum bachche solvent bante ho, isliye devtaaon ko padmapti kehte hain। devtaayen bahut dhanvaan, padmapti bante hain। kaliyug ko bhi dekho aur satayug ko bhi dekho - raat-din ka farka hai। saari duniya ki saphaai hone mein time lagta hai na। yeh behad ki duniya hai। bhaarat hai hi avinaashi khanda। yeh kabhi praayah lop hota nahin। ek hi khanda rehta hai - aadhaakalpa। phir aur khanda emerge honge nambarvaar। tum bachchon ko kitna gyaan milta hai। bolo - world ki history-geography kaise chakra lagaati hai - aakar samjho। praacheen rishi muniyon ka kitna maan hai, parantu woh bhi srishti ke aadi-madhya-ant ko nahin jaante। woh hathayogi hain। haan baaki unmein pavitrata ki taakat hai jisse bhaarat ko thamaate hain। nahin to bhaarat pata nahin kya ho jaata। makaan ko pochi aadi lagaai jaati hai na - to shobha hoti hai। bhaarat mahaan pavitra tha, ab vahi patit bana hai। vahaan tumhaara sukh bhi bahut samay chalta hai। tumhaare paas bahut dhan rehta hai। tum bhaarat mein hi rehte the। tumhaara raajya tha, kal ki baat hai। phir baad mein anya dharma aaye hain। unhonne aakar kuchh sudhaar kar apna naam baala kiya hai। ab woh bhi sab tamopradhaan ban gaye hain। ab tum bachchon ko kitni khushi honi chaahiye। yeh sab baaten naye ko nahin sunaani hain। pahle-pahle to baap ki pahchaan deni hai। baap ka naam, roop, desh, kaal jaante ho? oonch te oonch baap ka part to mashhoor hota hai na। abhi tum jaante ho - woh baap hi hamko direction de rahe hain। tum phir se apni raajdhaani sthaapan kar rahe ho। tum bachche mere madadgaar ho। tum pavitra bante ho। tumhaare liye pavitra duniya zaroor sthaapan honi hai। tum yeh likh sakte ho ki puraani duniya badal rahi hai। phir yeh sooryavanshi-chandravanshi raajya hoga। phir raavan raajya hoga। chitron par samjhaana bahut meetha lagta hai, inmen tithi-taareekh sab likha hua hai। bhaarat ka praacheen raajayog maana yaad। yaad se vikarma vinaash hote hain aur padhaai se status milti hai। daiveegun dhaaran karne hain। haan, itna zaroor hai maaya ke toofaan aayenge। savere uthkar baba se baaten karna bada achha hai। bhakti aur gyaan donon ke liye yeh time achha hai। meethi-meethi baaten karni chaahiye। abhi ham shreshthaachaari duniya mein jaayenge। boodhon ke dil mein to yeh rehta hai na ki ham shareer chhod garbha mein jaayenge। baba kitna nasha chadhaate hain। aisi-aisi baaten baith karo to bhi tumhaara jama ho jaae। shivbaaba hamko narkavaasi se svargavaasi bana rahe hain। pahle-pahle ham aate hain, saara all-round part hamne bajaaya hai। ab baba kehte hain is chhi-chhi chole ko chhod do। deh sahit saari duniya ko bhool jaao। yeh hai behad ka sannyaas। vahaan bhi tum boodhe honge to saakshaatkaar hoga - ham bachcha bante hain। khushi hoti hai। bachpan to sabse achha hai। aise-aise savere baith vichaar saagar manthan karna hai। points niklengi to tumko khushi hogi। khushi mein ghanta dedh ghanta beet jaata hai। jitni practice hoti jaayegi utni khushi badhti jaayegi। bahut maza aayega aur phir ghoomte-phirte yaad karna hai। phursat bahut hai, haan vighna padenge, usmein koi shakya nahin। dhandhe mein manushya ko neend nahin aati। susta log neend karte hain। tum jitna ho sake shivbaaba ko hi yaad karte raho। tumko buddhi mein rehta hai shivbaaba ke liye ham bhojan banaate hain। shivbaaba ke liye ham yeh karte hain। bhojan bhi shuddhi se banaana hai। aisi cheez na ho jisse khitpit ho jaae। baba khud bhi yaad karte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) savere-savere uthkar baba se meethi-meethi baaten karni hain। roz khushi ki khuraak khaate hue ateendriy sukh ka anubhav karna hai।

2) satayugi raajdhaani sthaapan karne mein baap ka poora madadgaar banne ke liye paavan banna hai, yaad se vikarma vinaash karne hain, bhojan bhi shuddhi se banaana hai।

vardaan:- sva sthiti dvaara paristhitiyon par vijay praapta karne vaale sangamayugi vijayi ratna bhav

paristhitiyon par vijay praapta karne ka saadhan hai sva-sthiti। yeh deh bhi par hai, sva nahin। sva sthiti va svadharma sada sukh ka anubhav karaata hai aur prakriti-dharma arthaat par dharma ya deh ki smriti kisi na kisi prakaar ke duhkh ka anubhav karaati hai। to jo sada sva sthiti mein rehta hai woh sada sukh ka anubhav karta hai, uske paas duhkh ki lahar aa nahin sakti। woh sangamayugi vijayi ratna ban jaate hain।

slogan:- parivartan shakti dvaara vyartha sankalpon ke bahaav ka force samaapta karo।

maateshvari ji ke anmol mahaavaakya

“is avinaashi eeshvareey gyaan praapta karne ke liye koi bhi bhaasha seekhni nahin padti''

apna jo eeshvareey gyaan hai, vo bada hi sahaj aur meetha hai, isse janma-janmaantar ke liye kamaai jama hoti hai। yeh gyaan itna sahaj hai jo koi bhi mahaan aatma, ahilya jaisi pattharbuddhi, koi bhi dharma vaala baalak se lekar vriddha tak koi bhi praapta kar sakta hai। dekho, itna sahaj hote bhi duniya vaale is gyaan ko bahut bhaari samajhte hain। koi samajhte hain jab ham bahut ved, shaastra, upnishad padhkar bade-bade vidvaan banen, uske liye phir bhaasha seekhni pade। bahut hathayog karen tab hi praapti ho sakegi lekin yeh to ham apne anubhav se jaan chuke hain ki yeh gyaan bada hi sahaj aur saral hai kyonki svayan paramatma padha raha hai, ismen na koi hathaaidhaya, na jap tap, na shaastravaadi pandit banna, na koi iske liye sanskrit bhaasha seekhne ki jarurat hai, yeh to natural aatma ko apne parampita paramatma ke saath yog lagaana hai। bhal koi is gyaan ko na bhi dhaaran kar sake to bhi sirf yog se bhi bahut phaayda hoga। isse ek to pavitra bante hain, doosra phir karmabandhan bhasmeebhoot hote hain aur karmaateet bante hain, itni taakat hai is sarvashakti-vaan paramatma ki yaad mein। bhal vo apne saakaar brahma tan dvaara humein yog sikhla rahe hain parantu yaad phir bhi direct us jyoti swaroop shiv paramatma ko karna hai, us yaad se hi karmabandhan ki mail utregi। achha। om shanti