Daily Murli for Friday 16 October 2020

16-10-2020 praatahmurli om shanti "baapdaada"' madhuban

“meethe bachche - tumhein sangam par seva karke gaayan laayak banna hai phir bhavishya mein purooshottam banne se tum pooja laayak ban jaayenge''

prashn:- kaun si beemaari jad se samaapta ho tab baap ki dil par chadhenge?

uttar:- 1. deh-abhimaan ki beemaari। isi deh-abhimaan ke kaaran sabhi vikaaron ne mahaarogi banaaya hai। yeh deh-abhimaan samaapta ho jaae to tum baap ki dil par chadho। 2. dil par chadhna hai to vishaal buddhi bano, gyaan chita par baitho। roohaani seva mein lag jaao aur vaani chalaane ke saath-saath baap ko achhi reeti yaad karo।

geet:- jaag sajniyaan jaag…

om shanti। meethe-meethe roohaani bachchon ne geet suna - roohaani baap ne is saadhaaran puraane tan dvaara mukh se kaha। baap kehte hain mujhe puraane tan mein puraani raajdhaani mein aana pada। abhi yeh raavan ki raajdhaani hai। tan bhi paraaya hai kyonki is shareer mein to pahle se hi aatma hai। main paraaye tan mein pravesh karta hoon। apna tan hota to uska naam padta। hamaara naam badalta nahin। mujhe phir bhi kehte hain shivbaaba। geet to bachche roz sunte hain। navayug arthaat nai duniya satayug aaya। ab kisko kehte hain jaago? aatmaon ko kyonki aatmaayen ghor andhiyaare mein soi padi hain। kuchh bhi samajh nahin। baap ko hi nahin jaante। ab baap jagaane aaye hain। abhi tum behad ke baap ko jaante ho। unse behad ka sukh milna hai naye yug mein। satayug ko naya kaha jaata hai, kaliyug ko puraana yug kahenge। vidvaan, pandit aadi koi bhi nahin jaante। koi se bhi poochho naya yug phir puraana kaise hota hai, to koi bhi bata nahin sakenge। kahenge yeh to laakhon varsha ki baat hai। abhi tum jaante ho ham naye yug se phir puraane yug mein kaise aaye hain arthaat svargavaasi se narkavaasi kaise bane hain। manushya to kuchh bhi nahin jaante, jinki pooja karte hain unki biography ko bhi nahin jaante। jaise jagdamba ki pooja karte hain ab woh amba kaun hai, jaante nahin। amba vaastav mein maataaon ko kaha jaata hai। parantu pooja to ek ki honi chaahiye। shivbaaba ka bhi ek hi avyabhichaari yaadgaar hai। amba bhi ek hai। parantu jagat amba ko jaante nahin। yeh hai jagat amba aur lakshmi hai jagat ki mahaaraani। tumko pata hai ki jagat amba kaun hai aur jagat mahaaraani kaun hai। yeh baaten kabhi koi jaan na sake। lakshmi ko devi aur jagat amba ko braahmani kahenge। brahman sangam par hi hote hain। is sangamayug ko koi nahin jaante। prajaapita brahma dvaara nayi purooshottam srishti rachi jaati hai। purooshottam tumko vahaan dekhne mein aayenge। is samay tum brahman gaayan laayak ho। seva kar rahe ho phir tum pooja laayak banenge। brahma ko itni bhujaayen dete hain to amba ko bhi kyon nahin denge। unke bhi to sab bachche hain na। maa-baap hi prajaapita bante hain। bachchon ko prajaapita nahin kahenge। lakshmi-naaraayan ko kabhi satayug mein jagatpita jagat maata nahin kahenge। prajaapita ka naam baala hai। jagat pita aur jagat maata ek hi hai। baaki hain unke bachche। ajmer mein prajaapita brahma ke mandir mein jaayenge to kahenge baba kyonki hai hi prajaapita। had ke pitaayen bachche paida karte hain to woh had ke prajaapita thahre। yeh hai behad ka। shivbaaba to sab aatmaon ka behad ka baap hai। yeh bhi tum bachchon ko contrast likhna hai। jagat amba sarasvati hai ek। naam kitne rakh diye hain - durga, kaali aadi। amba aur baba ke tum sab bachche ho। yeh rachna hai na। prajaapita brahma ki beti hai sarasvati, unko amba kehte hain। baaki hain bachche aur bachchiyaan। hain sab adopted। itne sab bachche kahaan se aa sakte hain। yeh sab hain mukh vanshaavli। mukh se stri ko create kiya to rachta ho gaya। kehte hain yeh meri hai। mainne inse bachche paida kiye hain। yeh sab hai adoption। yeh phir hai eeshvareey, mukh dvaara rachna। aatmaayen to hain hi। unko adopt nahin kiya jaata hai। baap kehte hain tum aatmaayen sadaiv mere bachche ho। phir abhi main aakar prajaapita brahma dvaara bachchon ko adopt karta hoon। bachchon (aatmaon) ko nahin adopt karte, bachche aur bachchiyon ko karte hain। yeh bhi badi sookshm samajhne ki baaten hain। in baaton ko samajhne se tum yeh lakshmi-naaraayan bante ho। kaise banen, yeh ham samjha sakte hain। kya aise karma kiye jo yeh vishwa ke maalik banen। tum pradarshani aadi mein bhi poochh sakte ho। tumko maaloom hai inhon ne yeh svarga ki raajdhaani kaise li। tumhaare mein bhi yathaartha reeti har koi nahin samjha sakte। jinmen daiveegun honge, is roohaani service mein lage hue honge woh samjha sakte hain। baaki to maaya ki beemaari mein phanse rehte hain। anek prakaar ke rog hain। deh-abhimaan ka bhi rog hai। in vikaaron ne hi tumko rogi banaaya hai।

baap kehte hain main tumko pavitra devta banaata hoon। tum sarvagun sampanna......pavitra the। abhi patit ban gaye ho। behad ka baap aise kahenge। ismen ninda ki baat nahin, yeh samjhaane ki baat hai। bhaaratvaasiyon ko behad ka baap kehte hain main yahaan bhaarat mein aata hoon। bhaarat ki mahima to aparmaapaar hai। yahaan aakar narka ko svarga banaate hain, sabko shanti dete hain। to aise baap ki bhi mahima aparmaapaar hai। paaraavaar nahin। jagat amba aur unki mahima ko koi bhi nahin jaante। inka bhi contrast tum bata sakte ho। yeh jagat amba ki biography, yeh lakshmi ki biography। vahi jagat amba phir lakshmi banti hai। phir lakshmi so 84 janmon ke baad jagat amba hogi। chitra bhi alag-alag rakhne chaahiye। dikhaate hain lakshmi ko kalash mila parantu lakshmi phir sangam par kahaan se aai। woh to satayug mein hui hai। yeh sab baaten baap samjhaate hain। chitra banaane ke oopar jo mukrar hain unko vichaar saagar manthan karna chaahiye। to phir samjhaana sahaj hoga। itni vishaal buddhi chaahiye tab dil par chadhe। jab baba ko achhi reeti yaad karenge, gyaan chita par baithenge tab dil par chadhenge। aise nahin ki jo bahut achhi vaani chalaate hain, woh dil par chadhte hain। nahin, baap kehte hain dil par ant mein chadhenge, nambarvaar purooshaartha anusaar jab deh-abhimaan khatma ho jaayega।

baap ne samjhaaya hai brahm gyaani, brahm mein leen hone ki mehnat karte hain parantu aise koi leen ho nahin sakta। baaki mehnat karte hain, uttam pad paate hain। aise-aise mahaatma bante hain jo unko platinum mein vazan karte hain kyonki brahm mein leen hone ki mehnat to karte hain na। to mehnat ka bhi phal milta hai। baaki mukti-jeevanmukti nahin mil sakti। tum bachche jaante ho ab yeh puraani duniya gai ki gai। itne bombs banaaye hain - rakhne ke liye thode hi banaaye hain। tum jaante ho puraani duniya ke vinaash liye yeh bombs kaam aayenge। anek prakaar ke bombs hain। baap gyaan aur yog sikhlaate hain phir raaj-raajeshvar double sirtaaj devi-devta banenge। kaun-sa oonch pad hai। brahman choti hain oopar mein। choti sabse oopar hai। abhi tum bachchon ko patit se paavan banaane baap aaye hain। phir tum bhi patit-paavni bante ho - yeh nasha hai? ham sabko paavan banaae raaj-raajeshvar bana rahe hain? nasha ho to bahut khushi mein rahen। apni dil se poochho ham kitne ko aapasmaan banaate hain? prajaapita brahma aur jagat-amba donon ek jaise hain। braahmanon ki rachna rachte hain। shoodra se brahman banne ki yukti baap hi bataate hain। yeh koi shaastron mein nahin hai। yeh hai bhi geeta ka yug। mahaabhaarat ladaai bhi barobar hui thi। raajayog ek ko sikhaaya hoga kya। manushyon ki buddhi mein phir arjun aur krishna hi hain। yahaan to dher padhte hain। baithe bhi dekho kaise saadhaaran ho। chhote bachche alpha be padhte hain na। tum baithe ho tumko bhi alpha be padha rahe hain। alpha aur be, yeh hai varsa। baap kehte hain mujhe yaad karo to tum vishwa ke maalik banenge। koi bhi aasuri kaam nahin karna hai। daiveegun dhaaran karne hain। dekhna hai hamaare mein koi avgun to nahin hain? main nirgun haare mein koi gun naaheen। abhi nirgun aashram bhi hai parantu arth kuchh bhi nahin। nirgun arthaat mere mein koi gun nahin। ab gunvaan banaana to baap ka hi kaam hai। baap ke title ki topi phir apne oopar rakh di hai। baap kitni baaten samjhaate hain। direction bhi dete hain। jagat amba aur lakshmi ka contrast banaao। brahma-sarasvati sangam ke, lakshmi-naaraayan hain satayug ke। yeh chitra hain samjhaane ke liye। sarasvati brahma ki beti hai। padhte hain manushya se devta banne ke liye। abhi tum brahman ho। satayugi devta bhi manushya hi hain parantu unhon ko devta kehte, manushya kahne se jaise unki insult ho jaati hai isliye devi-devta va bhagwan-bhagavti kah dete hain। agar raaja-raani ko bhagwan-bhagavti kahen to phir praja ko bhi kehna pade, isliye devi-devta kaha jaata hai। trimoorti ka chitra bhi hai। satayug mein itne thode manushya, kaliyug mein itne bahut manushya hain। woh kaise samjhaayen। iske liye phir gola bhi zaroor chaahiye। pradarshani mein itne sabko bulaate hain। kastam collector ko to kabhi koi ne nimantran nahin diya hai। to aise-aise vichaar chalaane paden, ismen badi vishaalbuddhi chaahiye।

baap ka to regard rakhna chaahiye। husen ke ghode ko kitna sajaate hain। patka kitna chhota hota, ghoda kitna bada hota hai। aatma bhi kitni chhoti bindi hai, unka shrringaar kitna bada hai। yeh akaalmoorta ka takhta hai na। sarvavyaapi ki baat bhi geeta se uthaai hai। baap kehte hain main aatmaon ko raajayog sikhlaata hoon phir sarvavyaapi kaise honge। baap-teacher-guru sarvavyaapi kaise honge। baap kehte hain main to tumhaara baap hoon phir gyaan saagar hoon। tumko behad ki history-geography samajhne se behad ka raajya mil jaayega। daiveegun bhi dhaaran karne chaahiye। maaya ekdam naak se pakad leti hai। chalan gandi ho padti phir likhte hain aisi-aisi bhool ho gai। hamne kaala munh kar liya। yahaan to pavitrata sikhaai jaati hai phir agar koi girenge bhi to phir usmein baap kya kar sakte hain। ghar mein koi bachcha ganda ho padta hai, kaala munh kar deta hai to baap kehte hain tum to mar jaate to achha hai। behad ka baap bhal drama ko jaante hain phir bhi kahenge to sahi na। tum auron ko shiksha dekar khud girte ho to hazaar guna paap chadh jaata hai। kehte hain maaya ne thappad maar diya। maaya aisa ghoonsa maarti hai jo ekdam akla hi gum kar deti hai।

baap samjhaate rehte hain, aankhen badi dhokhebaaj hain। kabhi bhi koi vikarma nahin karna hai। toofaan to bahut aayenge kyonki yuddha ke maidaan mein ho na। pata bhi nahin padta ki kya hoga। maaya jhat thappad laga deti hai। abhi tum kitne samajhdaar bante ho। aatma hi samajhdaar banti hai na। aatma hi besmajh thi। ab baap samajhdaar banaate hain। bahut deh-abhimaan mein hain। samajhte nahin ki ham aatma hain। baap ham aatmaon ko padhaate hain। ham aatma in kaanon se sun rahi hain। ab baap kehte hain koi bhi vikaar ki baat in kaanon se na suno। baap tumhein vishwa ka maalik banaate hain, manzil bahut badi hai। maut jab nazdeek aayega to phir tumko dar lagega। manushyon ko marne ke samay bhi mitra-sambandhi aadi kehte hain na - bhagwan ko yaad karo ya koi apne guru aadi ko yaad karenge। dehdhaari ko yaad karna sikhlaate hain। baap to kehte hain maamekam yaad karo। yeh to tum bachchon ki hi buddhi mein hai। baap pharmaan karte hain - maamekam yaad karo। dehdhaariyon ko yaad nahin karna hai। maa-baap bhi dehdhaari hain na। main to vichitra hoon, videhi hoon, ismen baith tumko gyaan deta hoon। tum abhi gyaan aur yog seekhte ho। tum kehte ho gyaan saagar baap dvaara ham gyaan seekh rahe hain, raaj-raajeshvari banne ke liye। gyaan saagar gyaan bhi sikhlaate hain, raajayog bhi sikhlaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) samajhdaar ban maaya ke toofaanon se kabhi haar nahin khaana hai। aankhen dhokha deti hain isliye apni sambhaal karni hai। koi bhi vikaari baaten in kaanon se nahin sunni hain।

2) apni dil se poochhna hai ki ham kitnon ko aapasmaan banaate hain? master patit-paavni ban sabko paavan (raaz-raazeshvar) banaane ki seva kar rahe hain? hamaare mein koi avgun to nahin hai? daiveegun kahaan tak dhaaran kiye hain?

vardaan:- sabhi ko thikaana dene vaale merciful baap ke bachche merciful bhav

merciful baap ke merciful bachche kisi ko bhi bhikhaari ke roop mein dekhenge to unhein raham aayega ki is aatma ko bhi thikaana mil jaae, iska bhi kalyaan ho jaae। unke samparka mein jo bhi aayega use baap ka parichay zaroor denge। jaise koi ghar mein aata hai to pahle use paani poochha jaata hai, aise hi chala jaae to bura samajhte hain, aise jo bhi samparka mein aata hai use baap ke parichay ka paani zaroor poochho arthaat daata ke bachche daata bankar kuchh na kuchh do taaki use bhi thikaana mil jaae।

slogan:- yathaartha vairaagya vritti ka sahaj arth hai - jitna nyaara utna pyaara।