Daily Murli for Sunday 18 October 2020

18-10-20 praatahmurli om shanti ''avyakt-baapdaada'' revise 07-04-86 madhuban

tapasvi-moorta, tyaag moorta, vidhaata hi vishwa-raajya adhikaari

aaj roohaani shama apne roohaani parvaanon ko dekh rahe hain। sabhi roohaani parvaane shama se milan manaane ke liye chaaron or se pahunch gaye hain। roohaani parvaanon ka pyaar roohaani shama jaane aur roohaani parvaane jaane। baapdaada jaante hain ki sabhi bachchon ke dil ka sneh aakarshan kar is alaukik mele mein sabhi ko laaya hai। yeh alaukik mela alaukik bachche jaanen aur baap jaane! duniya ke liye yeh mela gupta hai। agar kisi ko kaho roohaani mele mein ja rahe hain to woh kya samjhenge? yeh mela sada ke liye maalaamaal banaane ka mela hai। yeh parmaatma-mela sarva praapti swaroop banaane vaala hai। baap-daada sabhi bachchon ke dil ke umang-utsaah ko dekh rahe hain। har ek ke man mein sneh ke saagar ki lahren lahra rahi hain। yeh baapdaada dekh bhi rahe hain aur jaante bhi hain ki lagan ne vighna vinaashak banaae madhuban nivaasi bana liya hai। sabhi ki sab baaten sneh mein samaapta ho gai। ever ready ki rehearsal kar dikhaai। ever ready ho gaye ho na। yeh bhi sweet drama ka sweet part dekh baapdaada aur brahman bachche harshit ho rahe hain। sneh ke peechhe sab baaten sahaj bhi lagti hain aur pyaari bhi lagti। jo drama bana woh drama vaah! kitni baar aise daude-daude aaye hain। train mein aaye hain ya pankhon se udke aaye hain? isko kaha jaata hai jahaan dil hai vahaan asambhav bhi sambhav ho jaata hai। sneh ka swaroop to dikhaaya, ab aage kya karna hai? jo ab tak hua woh shreshtha hai aur shreshtha rahega।

ab samay pramaan sarva snehi, sarvashreshtha bachchon se baapdaada aur vishesh kya chaahte hain? vaise to poori season mein samay prati samay ishaare dete hain। ab un ishaaron ko pratyaksha roop mein dekhne ka samay aa raha hai। snehi aatmaayen ho sahayogi aatmaayen ho, sevaadhaari aatmaayen bhi ho। abhi mahaatpasvi aatmaayen bano। apne sangathit swaroop ke tapasya ki roohaani jvaala se sarva aatmaon ko duhkh ashaanti se mukta karne ka mahaan kaarya karne ka samay hai। jaise ek taraph khoone-naahak khel ki lahar badhti ja rahi hai, sarva aatmaayen apne ko beshaare anubhav kar raheen hain, aise samay par sabhi sahaare ki anubhooti karaane ke nimitta aap mahaatpasvi aatmaayen ho। chaaron or is tapasvi swaroop dvaara aatmaon ko roohaani chain anubhav karaana hai। saare vishwa ki aatmaayen prakriti se, vaayumandal se, manushya aatmaon se, apne man ke kamjoriyon se, tan se bechain hain। aisi aatmaon ko sukh-chain ki sthiti ka ek second bhi anubhav karaayenge to aapka dil se baar-baar shukriya maanenge। vartamaan samay sangathit roop ke jvaala swaroop ki aavashyakta hai। abhi vidhaata ke bachche vidhaata swaroop mein sthit rah har samay dete jaao। akhanda mahaan langar lagaao kyonki royal bhikhaari bahut hain। sirf dhan ke bhikhaari, bhikhaari nahin hote lekin man ke bhikhaari anek prakaar ke hain। apraapta aatmaayen praapti ke boond ki pyaasi bahut hain isliye abhi sangathan mein vidhaataapan ki lahar phailaao। jo khajaane jama kiye hain woh jitna master vidhaata ban dete jaayenge utna bharta jaayega। kitna suna hai। abhi karne ka samay hai। tapasvi moorta ka arth hai - tapasya dvaara shanti ke shakti ki kirnen chaaron or phailti hui anubhav mein aaven। sirf svayan ke prati yaad swaroop ban shakti lena va milan manaana woh alag baat hai। lekin tapasvi swaroop auron ko dene ka swaroop hai। jaise soorya vishwa ko roshni ki aur anek vinaashi praaptiyon ki anubhooti karaata hai। aise mahaan tapasvi roop dvaara praapti ke kirnon ki anubhooti karaao। iske liye pahle jama ka khaata badhaao। aise nahin yaad se va gyaan ke manan se svayan ko shreshtha banaaya, maayaajeet vijayi banaaya, isi mein sirf khush nahin rehna। lekin sarva khajaanon mein saare din mein kitnon ke prati vidhaata banen। sabhi khajaane har roj kaarya mein lagaaye va sirf jama ko dekh khush ho rahe hain। abhi yeh chart rakho ki khushi ka khajaana, shanti ka khajaana, shaktiyon ka khajaana, gyaan ka khajaana, gunon ka khajaana, sahayog dene ka khajaana kitna baanta arthaat kitna badhaaya, isse woh common chart jo rakhte ho woh svatah hi shreshtha ho jaayega। par-upkaari banne se sva-upkaari svatah hi ban jaate। samjha - abhi kaun-sa chart rakhna hai? yeh tapasvi swaroop ka chart hai - vishwa kalyaankaari banna। to kitne ka kalyaan kiya? va sva-kalyaan mein hi samay ja raha hai? sva kalyaan karne ka samay bahut beet chuka। abhi vidhaata banne ka samay aa gaya hai isliye baapdaada phir se samay ka ishaara de rahe hain। agar ab tak bhi vidhaataapan ki sthiti ka anubhav nahin kiya to anek janma vishwa raajya adhikaari banne ke padmaapdam bhaagya ko praapta nahin kar sakenge, kyonki vishvaraajan vishwa ke maat-pita arthaat vidhaata hain। ab ke vidhaataapan ka sanskaar anek janma praapti karaata rahega, agar abhi tak lene ke sanskaar, koi bhi roop mein hain। naam levta, shaan levta va kisi bhi prakaar ke levta ke sanskaar vidhaata nahin banaayenge।

tapasya swaroop arthaat levta ke tyaagmoorta। yeh had ke levta, tyaag moorta, tapasvi moorta banne nahin dega isliye tapasvi moorta arthaat had ke ichchha maatram avidya roop। jo lene ka sankalp karta woh alpakaal ke liye leta hai lekin sadaakaal ke liye ganvaata hai isliye baapdaada baar-baar is baat ka ishaara de rahe hain। tapasvi roop mein vishesh vighna roop yahi alpakaal ki ichchha hai isliye abhi vishesh tapasya ka abhyaas karna hai। samaan banne ka yeh saboot dena hai। sneh ka saboot diya yeh to khushi ki baat hai। abhi tapasvi moorta banne ka saboot do। samjha। variety sanskaar hote hue bhi vidhaata-pan ke sanskaar anya sanskaaron ko daba denge। to ab is sanskaar ko emerge karo। samjha। jaise madhuban mein bhaag kar pahunch gaye ho aise tapasvi sthiti ki manzil taraph bhaago। achha- bhale padhaare। sabhi aise bhaage hain jaise ki abhi vinaash hona hai। jo bhi kiya, jo bhi hua baapdaada ko priy hai, kyonki bachche priy hain। har ek ne yahi socha hai ki ham ja rahe hain। lekin doosre bhi aa rahe hain, yeh nahin socha। sachcha kumbha mela to yahaan lag gaya hai। sabhi antim milan, antim tubbi dene aaye hain। yeh socha ki itne sab ja rahe hain to milne ki vidhi kaisi hogi! is sudh-budh se bhi nyaare ho gaye! na sthaan dekha, na reservation ko dekha। abhi kabhi bhi yeh bahaana nahin de sakenge ki reservation nahin milti। drama mein yeh bhi ek rehearsal ho gai। sangam yug par apna raajya nahin hai। svaraajya hai lekin dharni ka raajya to nahin hai, na baapdaada ko sva ka rath hai, paraaya raajya, paraaya tan hai isliye samay pramaan nai vidhi ka aarambha karne ke liye yeh season ho gai। yahaan to paani ka bhi sochte rehte, vahaan to jharnon mein nahaayenge। jo bhi jitne bhi aaye hain, baapdaada sneh ke respond mein sneh se svaagat karte hain।

abhi samay diya hai vishesh final imtahaan ke pahle taiyaari karne ke liye। final paper ke pahle time dete hain। chhutti dete hain na। to baapdaada anek raazon se yeh vishesh samay de rahe hain। kuchh raaz gupta hain kuchh raaz pratyaksha hain। lekin vishesh har ek itna attention rakhna ki sada bindu lagaana hai arthaat beeti ko beeti karne ka bindu lagaana hai। aur bindu sthiti mein sthit ho raajya adhikaari ban kaarya karna hai। sarva khajaanon ke bindu sarva prati vidhaata ban sindhu ban sabhi ko bharpoor banaana hai। to bindu aur sindhu yeh do baaten vishesh smriti mein rakh shreshtha certificate lena hai। sada hi shreshtha sankalp ki saphalta se aage badhte rehna। to bindu banna, sindhu banna yahi sarva bachchon prati vardaata ka vardaan hai। vardaan lene ke liye bhaage ho na। yahi vardaata ka vardaan sada smriti mein rakhna। achha!

chaaron or ke sarva snehi, sahayogi bachchon ko sada baap ki aagya ka paalan karne vaale aagyaakaari bachchon ko, sada phraakdil, badi dil se sarva ko sarva khajaane baantane vaale, mahaan punya aatmaayen bachchon ko, sada baap samaan banne ke umang-utsaah se udti kala mein udne vaale bachchon ko vidhaata, vardaata sarva khajaanon ke sindhu baapdaada ka yaadapyaar aur namaste।

avyakt baapdaada ke saath party ki mulaakaat

1- apne ko padmaapdam bhaagyavaan anubhav karte ho! kyonki dene vaala baap itna deta hai jo ek janma to bhaagyavaan bante hi ho lekin anek janma tak yeh avinaashi bhaagya chalta rahega। aisa avinaashi bhaagya kabhi svapna mein bhi socha tha! asambhav lagta tha na? lekin aaj sambhav ho gaya। to aisi shreshtha aatmaayen hain - yeh khushi rehti hai? kabhi kisi bhi paristhiti mein khushi gaayab to nahin hoti! kyonki baap dvaara khushi ka khajaana roj milta rehta hai, to jo cheez roj milti hai woh badhegi na। kabhi bhi khushi kam ho nahin sakti kyonki khushiyon ke saagar dvaara milta hi rehta hai, akhut hai। kabhi bhi kisi baat ke phikar mein rahne vaale nahin। property ka kya hoga, parivaar kya hoga? yeh bhi phikar nahin, bephikar! puraani duniya ka kya hoga! parivartan hi hoga na। puraani duniya mein kitna bhi shreshtha ho lekin sab puraana hi hai isliye bephikar ban gaye। pata nahin aaj hain kal rahenge, nahin rahenge - yeh bhi phikar nahin। jo hoga achha hoga। braahmanon ke liye sab achha hai। bura kuchh nahin। aap to pahle hi baadshaah ho, abhi bhi baadshaah, bhavishya mein bhi baadshaah। jab sada ke baadshaah ban gaye to bephikar ho gaye। aisi baadshaahi jo koi chheen nahin sakta। koi bandook se baadshaahi uda nahin sakta। yahi khushi sada rahe aur auron ko bhi dete jaao। auron ko bhi bephikar baadshaah banaao। achha!

2. sada apne ko baap ki yaad ki chhatrachhaaya mein rahne vaali shreshtha aatmaayen anubhav karte ho? yeh yaad ki chhatrachhaaya sarva vighnon se safe kar deti hai। kisi bhi prakaar ka vighna chhatrachhaaya mein rahne vaale ke paas aa nahin sakta। chhatrachhaaya mein rahne vaale nishchit vijayi hain hi। to aise bane ho? chhatrachhaaya se agar sankalp roopi paanv bhi nikaala to maaya vaar kar legi। kisi bhi prakaar ki paristhiti aave chhatrachhaaya mein rahne vaale ke liye mushkil se mushkil baat bhi sahaj ho jaayegi। pahaad samaan baaten rooi ke samaan anubhav hongi। aisi chhatrachhaaya ki kamaal hai। jab aisi chhatrachhaaya mile to kya karna chaahiye। chaahe alpakaal ki koi bhi aakarshan ho lekin baahar nikla to gaya isliye alpakaal ki aakarshan ko bhi jaan gaye ho। is aakarshan se sada door rehna। had ki praapti to is ek janma mein samaapta ho jaayegi। behad ki praapti sada saath rahegi। to behad ki praapti karne vaale arthaat chhatrachhaaya mein rahne vaale vishesh aatmaayen hain, saadhaaran nahin। yeh smriti sada ke liye shaktishaali bana degi।

jo sikeeldhe laadle hote hain woh sada chhatrachhaaya ke andar rehte hain। yaad hi chhatrachhaaya hai। is chhatrachhaaya se sankalp roopi paanv bhi baahar nikaala to maaya aa jaayegi। yeh chhatrachhaaya maaya ko saamne nahin aane deti। maaya ki taakat nahin hai - chhatrachhaaya mein aane ki। woh sada maaya par vijayi ban jaate hain। bachcha banna arthaat chhatrachhaaya mein rehna। yeh bhi baap ka pyaar hai jo sada bachchon ko chhatrachhaaya mein rakhte hain। to yahi vishesh vardaan yaad rakhna ki laadle ban gaye, chhatrachhaaya mil gai। yeh vardaan sada aage badhaata rahega।

vidaai ke samay

sabhi ne jaagran kiya! aapke bhakta jaagran karte hain to bhakton ko sikhaane vaale to ishta dev hi hote hain, jab yahaan ishta dev jaagran karen tab bhakta copy karen। to sabhi ne jaagran kiya arthaat apne khaate mein kamaai jama ki। to aaj ki raat kamaane ki season ki raat ho gai। jaise kamaai ki season hoti hai to season mein jaagna hi hota hai। to yeh kamaai ki season hai isliye jaagna arthaat kamaana। to harek ne apne-apne yathaashakti jama kiya aur yahi jama kiya hua mahaadaani ban auron ko bhi dete rahenge aur svayan bhi anek janma khaate rahenge। abhi sabhi bachchon ko parmaatma mele ke golden chance ki golden morning kar rahe hain। vaise to golden se bhi diamond morning hai। svayan bhi diamond ho aur morning bhi diamond hai aur jama bhi diamond hi karte ho to sab diamond hi diamond hai isliye diamond morning kar rahe hain। achha।

vardaan:- sankalp ko bhi check kar vyartha ke khaate ko samaapta karne vaale shreshtha sevaadhaari bhav

shreshtha sevaadhaari woh hai jiska har sankalp powerful ho। ek bhi sankalp kahaan bhi vyartha na jaae kyonki sevaadhaari arthaat vishwa ki stage par act karne vaale। saari vishwa aapko copy karti hai, yadi aapne ek sankalp vyartha kiya to sirf apne prati nahin kiya lekin anekon ke nimitta ban gaye, isliye ab vyartha ke khaate ko samaapta kar shreshtha sevaadhaari bano।

slogan:- seva ke vaayumandal ke saath behad ke vairaagya vritti ka vaayumandal banaao।

soochna:- aaj maas ka teesra ravivaar hai, sabhi raajayogi tapasvi bhaai bahinen saayan 6.30 se 7.30 baje tak, vishesh yog abhyaas ke samay master sarvashaktivaan ke shaktishaali swaroop mein sthit ho prakriti sahit sarva aatmaon ko pavitrata ki kirnen den, satopradhaan banaane ki seva karen।