Daily Murli for Friday 18 December 2020

18-12-2020 praatahmurli om shanti "baapdaada"' madhuban

“meethe bachche - roz vichaar saagar manthan karo to khushi ka paara chadhega, chalte-phirte yaad rahe ki ham svadarshan chakradhaari hain''

prashn:- apni unnati karne ka sahaj saadhan kaun-sa hai?

uttar:- apni unnati ke liye roz potaamel rakho। check karo - aaj saara din koi aasuri kaam to nahin kiya? jaise student apna register rakhte hain, aise tum bachche bhi daivi gunon ka register rakho to unnati hoti rahegi।

geet:- door desh ke rahne vaala…

om shanti। bachche jaante hain door desh kisko kaha jaata hai। duniya mein ek bhi manushya nahin jaanta। bhal kitna bhi bada vidvaan ho, pandit ho inka arth nahin samajhte। tum bachche samajhte ho। baap, jisko sab manushyamaatra yaad karte hain ki he bhagwan... woh zaroor oopar mool vatan mein hai, aur kisko bhi yeh pata nahin hai। is drama ke raaz ko bhi abhi tum bachche samajhte ho। shuru se lekar abhi tak jo hua hai, jo hone ka hai, sab buddhi mein hai। yeh srishti chakra kaise phirta hai, woh buddhi mein rehna chaahiye na। tum bachchon mein bhi nambarvaar samajhte hain। vichaar saagar manthan nahin karte hain isliye khushi ka paara bhi nahin chadhta hai। uthte-baithte buddhi mein rehna chaahiye ki ham svadarshan chakradhaari hain। aadi se ant tak mujh aatma ko saare srishti ke chakra ka maaloom hai। bhal tum yahaan baithe ho, buddhi mein mool vatan yaad aata hai। woh hai sweet silence hom, nirvaandhaam, silence dhaam, jahaan aatmaayen rehti hain। tum bachchon ki buddhi mein jhat aa jaata hai, aur koi ko pata nahin। bhal kitne bhi shaastra aadi padhte sunte rahe, phaayda kuchh bhi nahin। woh sab hain utarti kala mein। tum abhi chadh rahe ho। vaapis jaane ke liye khud taiyaari kar rahe ho। yeh puraana kapda chhod hamko ghar jaana hai। khushi rehti hai na! ghar jaane ke liye aadhaakalpa bhakti ki hai। seedhi neeche utarte hi gaye। abhi baba hamko sahaj samjhaate hain। tum bachchon ko khushi honi chaahiye। baba bhagwan hamko padhaate hain - yeh khushi bahut rahni chaahiye। baap sammukh padha rahe hain। baba jo sabhi ka baap hai, woh hamko phir se padha rahe hain। anek baar padhaaya hai। jab tum chakra lagaakar poora karte ho to phir baap aate hain। is samay tum ho svadarshan chakradhaari। tum vishnupuri ke devta banne ke liye purooshaartha kar rahe ho। duniya mein aur koi bhi yeh knowledge de na sake। shivbaaba hamko padha rahe hain, yeh khushi kitni rahni chaahiye। bachche jaante hain yeh shaastra aadi sab bhakti maarga ke hain, yeh sadgati ke liye nahin। bhakti maarga ki saamagri bhi chaahiye na। athaah saamagri hai। baap kehte hain isse tum girte aaye ho। kitna dar-dar bhatakte hain। abhi tum shant hokar baithe ho। tumhaara dhakka khaana sab chhoot gaya। jaante ho baaki thoda samay hai, aatma ko pavitra banaane ke liye baap vahi raasta bata rahe hain। kehte hain mujhe yaad karo to tum tamopradhaan se satopradhaan ban jaayenge phir satopradhaan duniya mein aakar raajya karenge। yeh raasta kalpa-kalpa anek baar baap ne bataaya hai। phir apni avastha ko bhi dekhna hai, student purooshaartha kar apne ko hoshiyaar banaate hain na। padhaai ka bhi register hota hai aur chalan ka bhi register hota hai। yahaan tumhein bhi daiveegun dhaaran karne hain। roz apna potaamel rakhne se bahut unnati hogi - aaj saara din koi aasuri kaam to nahin kiya? hamko to devta banna hai। lakshmi-naaraayan ka chitra saamne rakha hai। kitna simple chitra hai। oopar mein shivbaaba hai। prajaapita brahma dvaara yeh varsa dete hain to zaroor sangam par brahman-braahmaniyaan honge na। devtaayen hote hain satayug mein। brahman hain sangam par। kaliyug mein hain shoodra varna vaale। viraat roop bhi buddhi mein dhaaran karo। ham abhi hain brahman choti, phir devta banenge। baap braahmanon ko padha rahe hain devta banaane ke liye। to daivi gun bhi dhaaran karne hain, itna meetha banna hai। koi ko duhkh nahin dena hai। jaise shareer nirvaah ke liye kuchh na kuchh kaam kiya jaata hai, vaise yahaan bhi yagya service karni hai। koi beemaar hai, service nahin karte hain to unki phir service karni padti hai। samjho koi beemaar hai, shareer chhod dete hain, tumko duhkhi hone ki va rone ki baat nahin। tumko to bilkul hi shanti mein baba ki yaad mein rehna hai। koi aavaaz nahin। woh to shamshaan mein le jaate hain to aavaaz karte jaate hain raam naam sang hai। tumko kuchh bhi kehna nahin hai। tum silence se vishwa par jeet paate ho। unhon ki hai science, tumhaari hai silence।

tum bachche gyaan aur vigyaan ka bhi yathaartha arth jaante ho। gyaan hai samajh aur vigyaan hai sab kuchh bhool jaana, gyaan se bhi pare। to gyaan bhi hai, vigyaan bhi hai। aatma jaanti hai ham shantidham ke rahne vaale hain phir gyaan bhi hai। roop aur basanta। baba bhi roop-basanta hai na। roop bhi hai aur unmein saare srishti chakra ka gyaan bhi hai। unhonne vigyaan bhavan naam rakha hai। arth kuchh nahin samajhte। tum bachche samajhte ho is samay science se duhkh bhi hai to sukh bhi hai। vahaan sukh hi sukh hai। yahaan hai alpakaal ka sukh। baaki to duhkh hi duhkh hai। ghar mein manushya kitne duhkhi rehte hain। samajhte hain kahaan maren to is duhkh ki duniya se chhooten। tum bachche to jaante ho baba aaya hua hai hamko svargavaasi banaane। kitna gadgad hona chaahiye। kalpa-kalpa baba hamko svargavaasi banaane aate hain। to aise baap ki mat par chalna chaahiye na।

baap kehte hain - meethe bachche, kabhi koi ko duhkh na do। grihastha vyavhaar mein rehte pavitra bano। ham bhaai-behen hain, yeh hai pyaar ka naata। aur koi drishti ja nahin sakti। har ek ki beemaari apni-apni hai, us anusaar raay bhi dete rehte hain। poochhte hain baba yeh-yeh haalat hoti hai, is haalat mein kya karen? baba samjhaate hain bhaai-behen ki drishti kharaab nahin honi chaahiye। koi bhi jhagda na ho। main tum aatmaon ka baap hoon na। shivbaaba brahma tan se bol rahe hain। prajaapita brahma bachcha hua shivbaaba ka, saadhaaran tan mein hi aate hain na। vishnu to hua satayug ka। baap kehte hain main inmen pravesh kar nai duniya rachne aaya hoon। baba poochhte hain tum vishwa ke mahaaraaja-mahaaraani banenge? haan baba, kyon nahin banenge। haan, ismen pavitra rehna padega। yeh to mushkil hai। are, tumko vishwa ka maalik banaate hain, tum pavitra nahin rah sakte ho? lajja nahin aati hai? laukik baap bhi samjhaate hain na - ganda kaam mat karo। is vikaar par hi vighna padte hain। shuru se lekar is par hangaama chalta aaya hai। baap kehte hain - meethe bachchon, is par jeet paani hai। main aaya hoon pavitra banaane। tum bachchon ko right-wrong, achha-bura sochne ki buddhi mili hai। yeh lakshmi-naaraayan hai em object। svargavaasiyon mein daiveegun hain, narkavaasiyon mein avgun hain। abhi raavanraajya hai, yeh bhi koi samajh nahin sakte। raavan ko har varsha jalaate hain। dushman hai na। jalaate hi aate hain। samajhte nahin ki yeh hai kaun? ham sab raavan raajya ke hain na, to zaroor ham asur thahre। parantu apne ko koi asur samajhte nahin। bahut kehte bhi hain yeh raakshas raajya hai। yatha raaja-raani tatha praja। parantu itni bhi samajh nahin। baap baith samjhaate hain raamraajya alag hota hai, raavanraajya alag hota hai। abhi tum sarvagun sampanna ban rahe ho। baap kehte hain mere bhakton ko gyaan sunaao, jo mandiron mein jaakar devtaaon ki pooja karte hain। baaki aise-aise aadmiyon se maatha nahin maaro। mandiron mein tumko bahut bhakta milenge। nabja bhi dekhni hoti hai। doctor log dekhne se hi jhat bata dete hain ki inko kya beemaari hai। dehli mein ek ajmalkhaan vaidya mashhoor tha। baap to tumko 21 janmon ke liye ever healthy, wealthy banaate hain। yahaan to hain hi sab rogi, unhealthy। vahaan to kabhi rog hota nahin। tum ever healthy, ever wealthy bante ho। tum apne yogbal se karmendriyon par vijay pa lete ho। tumhein yeh karmendriyaan kabhi dhokha nahin de sakti hain। baba ne samjhaaya hai yaad mein achhi reeti raho, dehi-abhimaani raho to karmendriyaan dhokha nahin dengi। yahaan hi tum vikaaron par jeet paate ho। vahaan kudrishti hoti nahin। raavan raajya hi nahin। woh hai hi ahinsak devi-devtaaon ka dharma। ladaai aadi ki koi baat nahin। yeh ladaai bhi antim lagni hai, inse svarga ka dvaar khulna hai। phir kabhi ladaai lagti hi nahin। yagya bhi yeh last hai। phir aadhaakalpa koi yagya hoga hi nahin। ismen saara kichda svaaha ho jaata hai। is yagya se hi vinaash jvaala nikli hai, saari saphaai ho jaayegi। phir tum bachchon ko saakshaatkaar bhi karaaya gaya hai, vahaan ke shoobeeras aadi bhi bahut svaadishta first class cheejen hoti hain। us raajya ki abhi tum sthaapna kar rahe ho to kitni khushi honi chaahiye।

tumhaara naam bhi hai shiv shakti bhaarat maataayen। shiv se tum shakti lete ho sirf yaad se। dhakke khaane ki koi baat nahin। woh samajhte hain jo bhakti nahin karte hain woh naastik hain। tum kehte ho jo baap aur rachna ko nahin jaante hain woh naastik hain, tum abhi aastik bane ho। trikaaldarshi bhi bane ho। teenon lokon, teenon kaalon ko jaan gaye ho। in lakshmi-naaraayan ko baap se yeh varsa mila hai। abhi tum woh bante ho। yeh sab baaten baap hi samjhaate hain। shiv-baba khud kehte hain ki main inmen pravesh kar samjhaata hoon। nahin to main niraakaar kaise samjhaaoon। prerna se padhaai hoti hai kya? padhaane liye to mukh chaahiye na। gau mukh to yeh hai na। yeh badi mama hai na, human maata hai। baap kehte hain main in dvaara tum bachchon ko srishti ke aadi-madhya-ant ka raaz samjhaata hoon, yukti batlaata hoon। ismen aasheervaad ki koi baat nahin। direction par chalna hai। shreemat milti hai। kripa ki baat nahin। kehte hain - baba ghadi-ghadi bhool jaata hai, kripa karo। are, yeh to tumhaara kaam hai yaad karna। main kya kripa karoonga। hamaare liye to sab bachche hain। kripa karoon to sabhi takhta par baith jaaen। pad to padhaai anusaar paayenge। padhna to tumko hai na। purooshaartha karte raho। most beloved baap ko yaad karna hai। patit aatma vaapis ja na sake। baap kehte hain jitna tum yaad karenge to yaad karte-karte paavan ban jaayenge। paavan aatma yahaan rah nahin sakegi। pavitra bane to shareer naya chaahiye। pavitra aatma ko shareer impure mile, yeh law nahin। sanyaasi bhi vikaar se janma lete hain na। yeh devtaayen vikaar se janma nahin lete, jo phir sanyaas karna pade। yeh to oonch thahre na। sachche-sachche mahaatma yeh hain jo sadaiv sampoorn nirvikaari hain। vahaan raavan raajya hai nahin। hai hi satopradhaan raamraajya। vaastav mein raam bhi kehna nahin chaahiye। shivbaaba hai na। isko kaha jaata hai raajasva ashvamedh avinaashi roodra gyaan yagya। roodra va shiv ek hi hai। krishna ka to naam nahin hai। shivbaaba aakar gyaan sunaate hain woh phir roodra yagya rachte hain to mitti ka ling aur saaligraam banaate hain। pooja kar phir tod dete hain। jaise baba deviyon ka misaal bataate hain। deviyon ko sajaakar khilaae pilaae pooja kar phir dubo dete hain। vaise shivbaaba aur saaligraamon ki bade prem aur shuddhi se pooja kar phir khalaas kar dete hain। yeh hai saara bhakti ka vistaar। abhi baap bachchon ko samjhaate hain - jitna baap ki yaad mein rahenge utna khushi mein rahenge। raatri ko roz apna potaamel dekhna chaahiye। kuchh bhool to nahin ki? apna kaan pakad lena chaahiye - baba aaj hamse yeh bhool hui, kshama karna। baba kehte hain sach likhenge to aadha paap kat jaayega। baap to baitha hai na। apna kalyaan karna chaahte ho to shreemat par chalo। potaamel rakhne se bahut unnati hogi। kharcha to kuchh hai nahin। oonch pad paana hai to mansa-vaacha-karmana koi ko bhi duhkh nahin dena hai। koi kuchh kehta hai to suna-ansuna kar dena hai। yeh mehnat karni hai। baap aate hi hain tum bachchon ka duhkh door kar sada ke liye sukh dene। to bachchon ko bhi aisa banna hai। mandiron mein sabse achhi service hogi। vahaan religious minded tumko bahut milenge। pradarshani mein bahut aate hain। projector se bhi pradarshani mele mein service achhi hoti hai। mele mein kharcha hota hai to zaroor phaayda bhi hai na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ne right-wrong ko samajhne ki buddhi di hai, usi buddhi ke aadhaar par daiveegun dhaaran karne hain, kisi ko duhkh nahin dena hai, aapas mein bhaai-behen ka sachcha pyaar ho, kabhi kudrishti na jaae।

2) baap ke har direction par chal achhi tarah padhkar apne aap par aapehi kripa karni hai। apni unnati ke liye potaamel rakhna hai, koi duhkh dene vaali baaten karta hai to suni-ansuni kar dena hai।

vardaan:- sarva sambandhon ka anubhav ek baap se karne vaale athak aur vighna vinaashak bhav

jin bachchon ke sarva sambandh ek baap ke saath hain unko aur sab sambandh nimitta maatra anubhav honge, woh sada khushi mein naachne vaale honge, kabhi thakaavat ka anubhav nahin karenge, athak honge। baap aur seva isi lagan mein magan honge। vighnon ke kaaran rukne ke bajaae sada vighna vinaashak honge। sarva sambandhon ki anubhooti ek baap se hone ke kaaran double light rahenge, koi bojh nahin hoga। sarva complain samaapta hongi। complete sthiti ka anubhav hoga। sahajyogi honge।

slogan:- sankalp mein bhi kisi dehdhaari taraph aakarshit hona arthaat bevpha banna।