Daily Murli for Saturday 21 August 2021

21-08-2021 praatahmurli om shanti "baapdaada"' madhuban

“meethe bachche - tum apne yogbal se is puraani duniya ko parivartan kar naya banaate ho, tum prakat hue ho roohaani seva ke liye''

prashn:- eemaandaar sachche purooshaarthi bachchon ki nishaaniyaan kya hongi?

uttar:- eemaandaar bachche kabhi bhi apni bhool ko chhipaayenge nahin। phauran baba ko sunaayenge। woh bahut-bahut nirhankaari hote hain, unki buddhi mein sada yahi khyaal rehta ki jaisa karma ham karenge…। 2- woh kisi ki dis-service ka gaayan nahin karte। apni service mein lage rehte hain। woh kisi ka bhi avgun dekh apna maatha kharaab nahin karte।

geet:- dheeraj dhar manuva...

om shanti। meethe-meethe roohaani bachchon prati roohaani baap dheeraj dete hain। jaise laukik baap bhi dhairya dete hain na। koi beemaar hota hai to unko aathat dete hain। tumhaari beemaari ke duhkh ke din badalkar sukh ke din aayenge। woh had ka baap had ka dhairya dete hain। ab yeh to hai behad ka baap। bachchon ko behad ka dhairya de rahe hain। bachche abhi tumhaare sukh ke din aa rahe hain। baaki yeh thode din hain। ab tum baap ki yaad mein rah auron ko bhi sikhlaao। tum bhi shiv shaktiyaan ho na। shivbaaba ki shakti sena phir se prakat hui hai। yeh (gop) bhi aatmaayen hain। yeh sab shiv se shakti lete hain। tum bhi shakti lete ho। baap ne samjhaaya hai ismen kripa va aasheervaad ki koi baat nahin hai। yaad mein rah shakti lete jaao। yaad se hi tumhaare vikarma vinaash honge aur tum shaktivaan bante jaayenge। shiv ki shakti sena itni sarvashaktivaan thi jo puraani duniya ko palat naya bana diya। tum jaante ho yogbal se ham is puraani duniya ko paltaate hain। anguli se bhi manushya aisa ishaara karte hain ki allaah ko, god ko yaad karo। bachche abhi samajhte hain - baap ki yaad se yeh pattharon ke pahaad arthaat duniya badal jaayegi। abhi ham paristaan sthaapan kar rahe hain। baap bachchon ko samjhaate hain - pradarshani par khoob service karo, mehnat karo jo samay mile usmein baithkar seekho। hai bahut sahaj। bachchon ko har prakaar ki shiksha milti rehti hai। har ek ke karmo ka hisaab hai। kanyaaon ke karma achhe hain। jinki shaadi ki hui hai woh kehti hain - is samay ham agar kanya hoti to in sab janjeeron se chhooti hui, free bird hoti। kanyaayen free birds hain। parantu kharaab sang mein nuksaan ho jaata hai। stri ko puroosh bachchon aadi ki kitni janjeeren hain, ismen rasam-rivaaj aadi ke kitne bandhan rehte hain। kanyaaon ko koi bandhan aadi nahin hai। abhi baambe mein bhi kanyaayen taiyaar ho rahi hain। kehti hain ham apne praanta ko aapehi sambhaalengi। sabhi apne praanta ke liye kitni mehnat karte hain। kehte hain hamaara gujraat, hamaari yu.pi.... tum abhi apna svaraajya lete ho, ismen main phalaana hoon, phalaane praanta ka hoon, yeh bhi na rahe। tumhein kisi se bhi eershya nahin rakhni chaahiye। koi ka avgun aadi dekh maatha kharaab nahin hona chaahiye। apne ko dekhna chaahiye hamne kitni aatmaon ko, bahnon bhaaeeyon ko sukh ka raasta bataaya hai! agar raasta nahin bataaya to woh koi kaam ka nahin। dil par chadh nahin sakta। baapdaada ke dil par nahin chadha to takhta par nahin baith sakta। baba jaante hain - koi-koi bachche ko service ka bahut shauk hai। jara bhi deh ka abhimaan nahin hai। koi-koi to bada ahankaar mein rehte hain। samajhte hain apne oopar nahin, baap par kripa ki hai। kabhi bhi kiske avgun ko nahin dekhna chaahiye। phalaana aisa hai, yeh karte hain। aajkal aise bhi sayaane hain jo ek do ki dis-service ka gaayan karte hain। phalaana yeh karta hai, aisa hai। are tum apni service karo। brahman bachchon ka kaam hai service mein lag jaana। baap baitha hai, baap ke paas sab samaachaar aate hain। har ek ki avastha ko baap jaante hain। service dekh mahima bhi karte hain। bachchon mein service ka josh aana chaahiye। har ek ko apna kalyaan karna hai - is roohaani service se। woh dhandha aadi to janma-janmaantar karte aaye। yeh dhandha koi virla vyaapaari kare। baap tareeka bahut sahaj samjhaate hain service ka। kabhi bhi doosre ki ninda nahin karo। aise bahut karte hain। achhe-achhe mahaarthiyon ko bhi maaya naak se pakad leti hai। baba ko yaad nahin kiya to maaya pakad legi। baap bhi kehte hain na - mujhe saadhaaran tan mein aaya hua dekh pahchaan nahin sakte hain। baba ko bhi raay dete hain aise-aise karna chaahiye। avastha aisi hai jo baba thoda bhi aise karenge to traitor ban jaayenge। baba ko bhi apni mat bhej dete hain। kahaavat hai na - choohe ladi....(choohe ko haldi ki gaanth mili to samjha pansaari hoon) yeh nahin samajhte ki ham dis-service karte hain। bhoolen to bahuton se hoti rehti hain। kabhi avastha oonch, kabhi neench, yeh chalta aaya hai। har ek apni avastha ka dekhe। eemaandaar bachche apni avastha jhat batlaate hain। koi to apni bhoolen chhipa lete hain, ismen bada nirhankaareepna chaahiye। service ko badhaane mein lag jaana chaahiye। hamesha yeh khyaal rehna chaahiye - jaise karma ham karenge hamko dekh aur karenge। main kiski ninda karoonga to aur bhi karne lag padenge। bahuton ko yeh khyaal nahin aata hai। baap samjhaate hain - tum apni service mein lag jaao। nahin to bahut pachhtaayenge। dushman bhi bahut bante hain।

tum abhi shoodra se transfer ho brahma mukh vanshaavli brahman ho gaye। jinmen 5 vikaar hain - woh hain aasuri sampradaay, tum ho daivi sampradaay। tum devta banne ke liye vikaaron par vijay pa rahe ho। devtaayen to yahaan hain nahin। devtaayen honge satayug mein। tum abhi daivi sampradaay ban rahe ho।

tum bachchon ko abhi samjhaane ke liye chance milte hain। pradarshani mein samjhaate raho। pradarshani, mele mein har ek ki nabja ka pata pad jaata hai। projector mein to kisko samjha nahin sakenge। sammukh samjhaane se hi samajh sakenge। pradarshani mela achhi cheez hai, usmein likh bhi sakte hain। pradarshani mele ka shauk hona chaahiye। regular padhne se hi nasha chadhega। baandheli ho to ghar mein rehte baap ko yaad karti raho to vikarma vinaash ho jaayenge। ghar mein baithe bhi yaad karna achha hai। parantu yaad karna - yeh bachchon ke liye badi mushkil baat ho gai hai। baap jisse 21 janma ka varsa milta hai unko yaad nahin karte। achhe-achhe bhaashan karne vaale mahaarthi bhi baap ko yaad nahin karte। na savere uth sakte hain। uthte hain to baithne se jhutke khaate hain। yaad karne ke liye savere ka hi time achha hai। bhakti maarga mein bhi savere uth yaad mein lag jaate hain। unki to utarti kala hai। yahaan to hai hi chadhne ki baat। maaya kitne vighna daalti hai। savere uthkar baap ko yaad nahin karenge to dhaarna kaise hogi, vikarma vinaash kaise honge। baaki sirf murli chalaana - woh to chhote bachche bhi seekhkar samjhaane lag padte hain। yeh padhaai badon ke liye hai। kitni badi university hai। hamko padhaane vaala kaun hai - yeh bachchon ko nasha nahin rehta hai। maaya kisi ko dhokha deti hai to ham unko na dekh apni service mein lage rahen। baap ke paas sab samaachaar aate rehte hain। koi deh-abhimaan mein aakar samajhte hain, yeh aise karte hain, yeh karte hain, auron ki hi ninda karte time vesta karte hain। tumhaara kaam hai service mein rehna। koi bhi baat hai ishaara baap ko de diya bas। parchintan nahin karna chaahiye। service mein bachchon ko din raat lagna chaahiye। tumhaara dhandha hi yeh hai। roz pradarshani mein samjhaao ki yeh shivbaaba, yeh prajaapita brahma। kalpa pahle bhi prajaapita brahma gaaya hua hai। prajaapita brahma dvaara manushya srishti rachte hain। aise nahin ki manushya the hi nahin। manushya srishti rachte hain arthaat kaanton ko phool banaate hain। brahma dvaara srishti rachte hain to oopar mein thode hi srishti rachenge। brahma to yahaan hoga na। kitna clear samjhaaya jaata hai।

baap kehte hain - main bahut janmon ke ant ke janma mein pravesh kar manushya ko devta banaata hoon। to bachchon ko service mein raat din mehnat karni chaahiye। dhandhe aadi se thoda time nikaal ismen lag jaana chaahiye। aise nahin ki phursat nahin milti। beemaar pad jaao to kya phir kahenge ki phursat nahin! purooshaartha karna chaahiye। prerna se kuchh bhi nahin ho sakta hai। bhagwan se hi prerna dvaara kaam nahin ho sakta to auron se phir kaise hoga। samajhte hain bhagwan kya nahin kar sakta hai। mare hue ko jinda kar sakte hain। are bhagwan ko tum kehte ho, he patit-paavan aakar hamko patit se paavan banaao, bas doosri koi baat nahin। aise thode hi kehte aakar murde ko jinda banaao। woh hai hi patit-paavan। bhaarat paavan tha na। baap kehte hain - main kalpa-kalpa aakar paavan banaata hoon। maaya phir aakar patit banaati hai। ab phir main aaya hoon paavan banaane। kitni sahaj baat batlaate hain। hakeem log badi beemaari ko bhi jadi bootiyon se theek kar dete hain phir unhon ki mahima bhi hoti hai। koi ko bachcha va dhan mila to kahenge guru kripa hui। achha, bachcha mar gaya to kahenge bhaavi। in sab baaton ko abhi tum bachche samajhte ho। sannyaasi log pavitra bante hain to unki maanyata hoti hai। parantu woh hain hath yogi, woh raajayog sikhla na saken। woh sannyaasi, ham grihasthi, phir ham apne ko followers kaise kahla sakte। baap to kehte hain bachchon ko poora follow karna hai - manamnaabhav। mujhe yaad karo to tum pavitra ban jaayenge aur mere saath chalenge। main to ever paavan hoon। manushya patit banaate hain, baap aakar paavan banaate hain। woh pavitrata, shanti, sukh ka saagar hai। tumko bhi aisa bana rahe hain। tum yogbal se aatma ko pavitra banaate ho। jaante ho hamko first class shareer milega। manushya ko devta practical mein banaana hai। aise thode hi sirf devtaai kapda aadi pahan liya, apne par poora dhyaan dena hai। deh-abhimaan na aaye। baba ham to aapse varsa lekar hi chhodenge। tum bhi kehte ho ham bhaarat ko shreshthaachaari banaakar hi chhodenge। nishchay vaale hi kehte hain na। koi to kehte hain itne thode samay mein kaise hoga। vaastav mein kabhi bhi yeh sanshay nahin laana chaahiye। sanshay mein aane se phir service mein dheele ho padte hain। time bahut thoda hai। jitna ho sake purooshaartha khoob karna chaahiye। thoda ladaai aadi ka kahaan hangaama hoga to phir dekhna kitni mehnat karne lag padte hain। samajhte hain na - ham yaad mein poora nahin rehte hain phir us samay kashmaksha to kar nahin sakenge। us samay to bahut aaphten aadi rehti hain isliye baap kehte hain jitna ho sake gallop karte jaao। yeh aatmaon ki race hai। baap kitna achhi reeti samjhaate hain। nishaane par jaakar arthaat baap ke ghar jaakar phir chale aana hai nai duniya mein। badi fine race hai। baap kehte hain- mere ko touch kar arthaat mool vatan mein jaakar phir aana hai। pahle-pahle woh aayenge jo yogayukta honge। chaahte hain ham muktidhaam mein jaayen। to baap kehte hain mujhe yaad karo to chale jaayenge। muktidhaam to sabko pasanda hai phir aayenge part bajaane। moksha kisko milta nahin। eeshvareey history-geography mein moksha ka akshar hai nahin। ek second mein tumko jeevanmukti milti hai, baaki sab mukta ho jaayenge। raavan raajya se mukta hona hi hai, jo purooshaartha karega vahi oonch pad paayega। bachchon ko bada meetha banna hai। svabhaav bada meetha chaahiye। krodhi nahin banna hai, durvaasa ka naam hai na। in raajarishiyon mein bhi koi-koi aise hain। hamesha apni dil par haath rakhna chaahiye ki main kya karta hoon! isse hamko kya pad milega! agar service nahin ki, aap samaan nahin banaaya to kya pad milega। thode mein raazi nahin hona hai। baap kehte hain - main aaya hoon bachchon ko full baadshaahi dene। to himmat rakh karke dikhaana chaahiye। sirf kathni se to ho nahin sakta। baap ki service mein to haddiyaan bhi deni hain। karte bhi hain phir kahaan deh-abhimaan aa jaane se nasha aa jaata aur gir padte hain। maaya bhi kam pahalvaan nahin hai। baap ki shreemat par na chalne se maaya vaar karti hai, to baap ko phaarakti de dete hain। baap sukhdhaam ka maalik banaate hain to apne par taras aana chaahiye। baap raay badi simple dete hain। maaya ke toofaan to bahut aayenge parantu mahaaveer banna hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) service ka shauk rakh apna aur doosron ka kalyaan karna hai। kisi ki dis-service ka gaayan nahin karna hai। parchintan mein apna samay nahin ganvaana hai।

2) eemaandaar aur niranhakaari ban seva ko badhaana hai। savere-savere uthkar baap ko pyaar se yaad karna hai। kathni aur karni samaan banaani hai।

vardaan:- santushtata ke trimoorti certificate dvaara sada saphalta praapta karne vaale oonch pad ke adhikaari bhav

sada saphal hone ke liye baap aur parivaar se theek connection chaahiye। har ek ko teen certificate lene hain - baap, aap aur parivaar। parivaar ko santushta karne ke liye chhoti si baat yaad rakho - ki regard dene ka record nirantar chalta rahe, ismen nishkaam bano। baap ko santushta karne ke liye sachche bano। aur svayan se santushta rahne ke liye sada shreemat ki lakeer ke andar raho। ye teen certificate oonch pad ka adhikaari bana denge।

slogan:- jo chitra ko na dekh chetanya aur charitra ko dekhte hain vahi shreshtha charitravaan hain।