Daily Murli for Sunday 19 September 2021

19-09-21 praatahmurli om shanti ''avyakt-baapdaada'' revise 23-03-88 madhuban

dilaaraam baap ke diltakhta-jeet dilrooba bachchon ki nishaaniyaan

aaj dilaaraam baap apne dilrooba bachchon se milne aaye hain। dilaaraam baap ke har ek dilrooba arthaat jiski dil mein sada dilaaraam ki yaad ke madhur saaj svatah hi bajte rehte, aise dilrooba dilaaraam baap ki dil ko apne sneh ke saaj se jeetne vaale hain। dilaaraam baap bhi aise bachchon ke gun gaate hain। to baap ke dil-jeet so svatah maayaajeet, jagat-jeet hain hi। jaise koi had ke raajya ke takhta ko jeette hain to jeetna arthaat takhtansheen banna। aise jo baap ke diltakhta ko jeet lete hain, woh svatah hi sada takhtansheen rehte hain। unki dil mein sada baap hai aur baap ki dil mein sada aisa vijayi bachcha hai। aise dil-jeet bachche shvoson shvaans arthaat har second sivaae baap aur seva ke aur koi geet nahin gaate hain। sada ek hi geet bajta ki ‘mera baba aur main baap ka'। isko kehte hain dilaaraam baap ke diltakhta jeet dilrooba।

baapdaada har ek dilrooba bachchon ke sada madhur saaj sunte rehte hain ki bhinna-bhinna saaj hai ya ek hi saaj hai? kabhi koi apni kamjori ke bhi geet gaate hain aur kabhi baap ke bajaae apne geet bhi gaate hain। baap ki mahima ke saath apni mahima bhi aap karte hain। baap mein aap hain arthaat baap ki mahima mein aap ki mahima hai hi। yathaartha saaj baap ke geet gaana hi shreshtha saaj hai। jo diltakhta-jeet bachche hain unke har kadam mein, drishti mein, bol mein, sambandh-samparka mein har ek ko baap hi dikhaai dega। chaahe mukh uska ho lekin shaktishaali sneh bhare bol svatah hi baap ko pratyaksha karenge ki yeh bol aatma ke nahin hain। lekin shreshtha authority arthaat sarvashaktimaan ke bol hain। inke drishti ki roohaaniyat roohon ko baap ki anubhooti karaane vaali hain, inke kadam mein parmaatma shreshtha mat ke kadam hain, yeh saadhaaran vyakti nahin lekin avyakt pharishte hai - aisi anubhooti karaane vaale ko kehte hain dil-jeet so jagat-jeet।

vaani se anubhav karaana yeh saadhaaran vidhi hai। vaani se prabhaav daalne vaale duniya mein bhi anek hain। lekin aapke vaani ki visheshta yahi hai ki aapka bol baap ki yaad dilaaye। baap ko pratyaksha karne ki siddhi aatmaon ko sadgati ki raah dikhaaye। yeh nyaaraapan hai। agar aapki mahima kar li ki bahut achha hai, bolne ka art hai ya authority ke bol hain - yeh to aur aatmaon ki bhi mahima hoti hai। lekin aapke bol baap ki mahima anubhav karaayen। yahi visheshta pratyakshata ka parda kholne ka saadhan hai। to jiski dil mein sada dilaaraam hai, unke mukh dvaara bhi dil ka aavaaj dilaaraam ko svatah hi pratyaksha karega। to yeh check karo ki har kadam mein, bol mein mere dvaara baap ki pratyakshata hoti hai, mera bol baap se sambandh jodne vaala bol hai? kyonki abhi last seva ka part hi hai pratyakshata ka jhanda lahraana। mera har karma shreshtha karma ki gati sunaane vaale baap ko pratyaksha karne vaala hai? jiski dil mein sada baap hai, woh svatah hi ‘san shows father' (baap ko pratyaksha karne vaala bachcha) karne vaala sameep arthaat samaan bachcha hai।

chaaron or abhi yeh aavaaj goonje ki ‘hamaara baba'; brahmaakumaariyon ka baba nahin, hamaara baba। jab yeh aavaaj goonjega tabhi sweet-hom (paramdham) ka get khulega kyonki jab hamaara baba kahen tab mukti ka varsa mile aur aapke va baap ke saath-saath chaahe baraati banke chalen lekin sabko vaapis jaana hi hai, le hi jaana hai। ‘hamaara baba aa gaya' - kam se kam yeh aavaaj kaanon se sunne, buddhi se jaanne ke adhikaari to banen। koi bhi vanchit na rah jaaye। vishwa ka baap hai, to vishwa ki aatmaon ko itni anchali to deni hai na। aapne saagar ko hap kiya lekin woh ek boond ke pyaase, unhon ko boond to praapta karaayenge na। iske liye kya karna pade? har kadam, har bol, baap ko pratyaksha karne vaale hon, tab yeh aavaaj goonjega। to aise baap ko pratyaksha karne vaale bachchon ko hi dilaaraam ke dilrooba kehte hain jiski dil se ek hi baap ke saaj bajte hain। to aise dilrooba bane ho na?

ek geet gaao to doosre geet svatah hi samaapta ho jaayenge। sirf do shabdon mein khushkhabri sunaao - O.ke.। roohrihaan karo। aur geet sunaane liye time na do, na lo। khushkhabri sunaane mein samay nahin lagta hai lekin raamaktha sunaane mein time lagta hai। baapdaada aisi baaton ko raam-katha kehte hain, krishna katha nahin kehte। yeh 14 kala vaalon ki katha hai, 16 kala vaalon ki nahin। raam-katha karne vaale to nahin ho na?

abhi seva bahut rahi hui hai। abhi kiya hi kya hai? socho, saadhe paanch sau karod aatmaayen hain, kam se kam ek boond hi do lekin dena to hai। chaahe aapke bhakta banen, chaahe aapki praja banen। devta banenge to bhi dena hi hai। bhakti mein dev banke pooje jaayenge na। to denge tab to devta samajh poojenge। praja bhi tab maanegi jab koi praapti hogi। aise hi kaise maanegi ki aap maat-pita ho? raaja bhi maat-pita hi hain। donon hi reeti se ‘daata' ke bachche daata ban dena hai। lekin dete hue daata ki yaad dilaani hai। samjha, kya karna hai? yeh nahin samjho videsh mein athva desh mein itne centres khul gaye, bahut ho gaya। lekin merciful baap ke bachche ho na। sabhi apne pyaase, bhatakte hue bhaai-bahnon ke oopar raham karna hai, kisi ka ulhana nahin rehna chaahiye। achha!

videsh se bhi bahut aashik aa gaye hain। jab bahut aate hain to baantana to padega na। samay bhi baantana pade। raat ko din to banaate hi hain, aur kya karenge। ismen bhi mahaadaani bano। baap ka sneh nambarvaar hote bhi sabse number one hai। kabhi bhi yeh nahin samajhna ki mere se baap ka pyaar kam hai, aur kisi se jyaada hai। nahin। sabse jyaada hai। mukh ke bol mein kabhi kisi se jyaada bhi bol lete hain, kabhi kam bhi hota। lekin dil ka pyaar bol mein nahin bantata hai। baap ki najron mein har ek bachcha number one hai। abhi number out kahaan hue hain? jab tak out ho, tab tak har ek number one hai, koi bhi number one ho sakta hai। sunaaya na - number one to brahma sada hai hi। lekin first division - baap ke saath first number mein aana arthaat first division। unhon ko bhi number one kahenge। to jab tak final result out nahin hui hai, tab tak baapdaada chaahe jaante bhi hai ki vartamaan samay ke pramaan last hain lekin phir bhi last nahin samajhte। kabhi bhi last so first ban sakta hai, margin hai। kabhi-kabhi kya hota hai - jo bahut tej chalte hain, woh najdeek pahunchne par thak jaate hain, to rook jaate hain aur jo dheere-dheere chalte hain, kabhi rukte nahin, tareeke se chalte hain। to woh pahunch jaate hain isliye abhi baap ki nazar mein sab number-one hain। jab result out hogi tab kahenge - yeh last hai, yeh first hai। abhi nahin kah sakte isliye sirf apne mein nishchay rakh udte chalo।

baapdaada ka aage udaane ka dil ka pyaar sabhi se hai। kabhi do shabd kisse kam bola to kam pyaar nahin hai। dil mein bhi baap ke pyaar ki shreshtha shubh kaamnaayen sada bhari hui hain। do bol bhi kehte - “udte chalo'', to ismen bhi pyaar ka saagar samaaya hua hai। koi nahin kah sakta ki baba mujhe jyaada pyaar karta। agar koi kehta hai to kaho - mujhe aapse bhi jyaada karta! aur karte hain, aise hi nahin kehte। sirf dil khush karne ke liye nahin kehte। baap to jaante hain ki kitne bhatke hue, thake hue, uljhe hue phir se 5000 varsha ke baad mile hain! baap ne dhoondh-dhoondh kar to nikaala hai। south, north, east, vesta - sabse nikaala hai। to jisko dhoondh kar nikaala ho to usse kitna pyaar hoga! nahin to dhoondhate hi nahin। aur saagar ke paas pyaar ki kami hai kya? yeh to dilaaraam jaane ki har ek ka dil se pyaar kitna hai! kya bhi ho lekin pyaar mein sabhi paas ho। baap se pyaar ka certificate to baap ne pahle hi de diya hai। achha!

chaaron or ke ati sneh bhare dil ke saaj sunaane vaale dilaaraam ke dilroobaaon ko, sada har karma mein ‘san shows father' karne vaale, sada har bol dvaara, baap se sambandh jodne vaale, sada apni roohaani drishti se roohon ko baap ka anubhav karaane vaale, aise baap ko pratyaksha karne vaale, baap ke diltakhta-jeet, maayaajeet, jagat-jeet bachchon ko dilaaraam baap ka yaadapyaar aur namaste।

personal mulaakaat

1- yaad ki shakti sada har kaarya mein aage badhaane vaali hai। yaad ki shakti sada ke liye shaktishaali banaati hai। yaad ke shakti ki anubhooti sarva shreshtha anubhooti hai। yahi shakti har kaarya mein saphalta ka anubhav karaati hai। isi shakti ke anubhav se aage badhne vaali aatma hoon - yeh smriti mein rakh jitna aage badhna chaaho badh sakte ho। isi shakti se vishesh sahayog praapta hota rahega।

2. sada har kaarya karte svayan ko saakshi sthiti mein sthit rakh kaarya karaane vaali nyaari aatma hoon - aisa anubhav karte ho? saaksheepan ki sthiti sada har kaarya sahaj saphal karti hai। saaksheepan ki sthiti kitni pyaari lagti hai! saakshi ban kaarya karne vaali aatma sada nyaari aur baap ki pyaari hai। to isi abhyaas se karma karne vaali alaukik aatma hoon, alaukik anubhooti karne vaali, alaukik jeevan, shreshtha jeevan vaali aatma hoon - yeh nasha rehta hai na? karma karte yahi abhyaas badhaate raho। yahi abhyaas karmaateet sthiti ko praapta kara dega। isi abhyaas ko sada aage badhaate, karma karte nyaare aur baap ke pyaare rehna। isko kehte hain shreshtha aatma।

3. sada shreshtha khajaanon se bharpoor aatma hoon - aisa anubhav karte ho? jo akhut khajaanon se bharpoor hoga, usko roohaani nasha kitna hoga! sada sarva khajaanon se bharpoor hoon - is roohaani khushi se aage badhte chalo। sarva khajaanon se aatmaon ko jagaae saathi bana denge to bharpoor aur shaktishaali aatma ban aage badhte rahenge।

4. sada buddhi mein yeh smriti rehti hai na ki baap karaavanhaar kara raha hai, ham nimitta hain। nimitta ban karne vaale sada halke rehte hain kyonki jimmevaar karaavanhaar baap hai। jab ‘main karta hoon' - yeh smriti rehti hai to bhaari ho jaate aur baap kara raha hai - to halke rehte। main nimitta hoon, karaane vaala kara raha, chalaane vaala chala raha hai - isko kehte bephikar baadshaah। to karaavanhaar kara raha hai। isi vidhi se sada aage badhte raho।

5. baap ki chhatrachhaaya mein rahne vaali shreshtha aatma hoon - yahi anubhooti hoti hai। jo abhi chhatrachhaaya mein rehte, vahi chhatradhaari bante hain। to chhatrachhaaya mein rahne vaali bhaagyavaan aatma hoon - yeh khushi rehti hai na। chhatrachhaaya hi safety ka saadhan hai। is chhatrachhaaya ke andar koi aa nahin sakta। baap ki chhatrachhaaya ke andar hoon - yeh chitra sada saamne rakho।

6. sada apna roohaani pharishta-swaroop smriti mein rehta hai? brahman so pharishta, pharishta so devta - yeh paheli hal kar li hai na! paheliyaan hal karna aata hai! second mein brahman so devta, devta so chakra lagaate brahman, phir devta। to ‘ham so, so ham' ki paheli sada buddhi mein rehti hai? jo paheli hal karte unhein hi prize milti hai। to prize mili hai na! jo abhi mili hai, woh bhavishya mein bhi nahin milegi! prize mein kya mila hai? svayan baap mil gaya, baap ke ban gaye। bhavishya ki raajaai ke aage yeh praapti kitna oonchi hai! to sada prize lene vaali shreshtha aatma hoon - isi nashe aur khushi se sada aage badhte raho। paheli aur prize donon smriti mein sada rahen to aage svatah badhte rahenge।

7. sada ‘dridhta saphalta ki chaabi hai' - is vidhi se vriddhi ko praapta karne vaali shreshtha aatma hoon, aisa anubhav hota hai na। dridh sankalp ki visheshta kaarya mein sahaj saphal banaae vishesh aatma bana deti hai aur koi bhi kaarya mein jab vishesh aatma bante hain to sabki duaayen svatah hi milti hain। sthool mein koi duaayen nahin deta lekin yeh sookshm hai jisse aatma mein shakti bharti hai aur sva-unnati mein sahaj saphalta praapta hoti hai। to sada dridhta ki mahaanta se saphalta ko praapta karne vaali aur sarva ki duaayen lene vaali shreshtha aatma hoon - is smriti se aage badhte chalo।

vardaan:- roohaaniyat ki khushbu ke aadhaar par sarva ko parmaatma sandesh dene vaale vishwa kalyaankaari bhav

roohaaniyat ki sarvashaktiyaan svayan mein dhaaran kar lo to roohaaniyat ki khushbu sahaj hi anek aatmaon ko apne taraph aakarshit karegi। jaise mansa shakti se prakriti ko tamopradhaan se satopradhaan banaate ho vaise anya vishwa ki aatmaayen jo aap logon ke aage nahin aa sakengi unko door rehte hue bhi aap roohaaniyat ki shakti se baap ka parichay va mukhya sandesh de sakenge। yeh sookshm machinery jab tej karo tab anek tadaphti hui aatmaon ko anchali milegi aur aap vishwa kalyaankaari kahlaayenge।

slogan:- apne paas shuddh va shreshtha sankalp emerge rakho to vyartha svatah merge ho jaayenge।