Daily Murli for Wednesday 1 December 2021

01-12-2021 praatahmurli om shanti "baapdaada"' madhuban

“meethe bachche - krodh bhi bahut bada kaanta hai, isse bahuton ko duhkh milta hai isliye is kaante ko nikaal sachche-sachche phool bano''

prashn:- kaante se phool banne vaale bachchon ko baap kaun si aathat (dhairya) dete hain?

uttar:- bachche, abhi tak kaante se phool banne mein jo maaya vighna daalti hai - yeh vighna ek din khatma ho jaayenge। tum sab svarga mein chale jaayenge। yeh kaliyugi kaante khatma ho jaayenge। baap ne tumhein sangam-yugi pot mein daala hai। maaya bhal murjha deti hai lekin gyaan ka beej avinaashi hai - yeh beej vinaash nahin ho sakta।

geet:- na woh hamse juda honge…

om shanti। shivbaaba brahma ke tan se meethe-meethe sikeeldhe roohaani bachchon prati guhya raaz va gyaan samjha rahe hain। ek to bachchon ne geet suna ki baba ham aapke oopar bali chadhenge, bhal kitne bhi sitam sahan karne paden। sitam kyon hote hain? kyonki manushyon ko zahar (vikaar) nahin milta। yeh to bachche jaante hain ki ham na aatma ko, na paramatma ko jaante the। na apne aapko, na baap ko jaante the isliye jaise jaanvar buddhi the। laukik sambandh mein to apne ko jaante hain। baap ko bhi jaante hain। is samay ke manushya apne ko aur paarlaukik baap ko bilkul hi nahin jaante hain। kah dete hain paramatma ka to koi naam roop desh kaal hai hi nahin। to phir aatma ka bhi nahin hona chaahiye। aatma ko bhi ve log jaante hi nahin। kah dete aatma so paramatma। abhi tumne jaana hai। woh to sirf naam maatra kah dete hain aatma aur jeev hai। aatma avinaashi hai, jeev vinaashi hai। achha aatma kya cheez hai, unka roop rang kya hai। naam to jaante hain ki aatma hai parantu woh kaisi hai, kya karti hai? kaise-kaise part bajaati hai? kitna samay part bajaati hai? is aatma ki knowledge ka koi varnan kar na sake। abhi tum jaante ho aatma chhota star hai। aatma mein hi saara 84 janmon ka part avinaashi noondha hua hai। shankaraachaarya ki aatma bhi apna part baja rahi hai। yeh bhi koi nahin jaante ki aatma kaise satopradhaan phir sato rajo tamo mein aati hai। sirf kah dete hain bhrakuti ke beech chamakta hai azab sitaara। bas aur kuchh nahin jaante। aatma ko nahin jaana goya paramatma ko nahin jaana। is samay yeh hai kaanton ka jangal। sab kaante hain। na rachayita parampita paramatma ko jaante hain, na rachna ke aadi madhya ant ko jaante hain। tum bachche aatma aur paramatma ko jaante ho so bhi nambarvaar purooshaartha anusaar। bahut bachche hain jo yathaartha reeti nahin jaante। deh-abhimaan mein rahne ke kaaran poori dhaarna nahin hoti hai। nambarvaar to hain na। poochhte hain - baba aise kyon hai? baba kehte hain bachche yeh raajdhaani sthaapan ho rahi hai। ismen sab prakaar ke zaroor chaahiye। pattharbuddhi hon tab to kam se kam pad paayen। agar khud jaante ho to auron ko bhi samjhaayen। tum kahenge aage chalkar samjhaane lag padenge, parantu aise bhi koi chaahiye tab to kam pad milega na। kahaan raaja kahaan praja, kitna farka hai। yahaan to raaja praja sabko duhkh hai। satayug mein na raaja ko duhkh, na praja ko, parantu martabe mein farka hai। poori dhaarna na hone ke kaaran kisko samjha nahin sakte hain। phir koi na koi kaanta lagta rahega। kabhi lobh ka, kabhi moh ka ... bhooton ki praveshta hoti rahegi। yeh bhi hona hai zaroor।

tum ho prajaapita brahmaakumaar kumaariyaan। prajaapita ka baap kaun? shivbaaba। baaki shiv ka baap koi hota nahin। yeh brahma vishnu shankar bhi shiv ki rachna hain। to sab ho gai aatmaayen। parampita paramatma ek hai। brahma vishnu shankar athva lakshmi-naaraayan aadi koi bhi manushya aatma se kabhi gati sadgati ka varsa mil nahin sakta। manushya na aatma ko yathaartha jaante hain, na paramatma ko jaante hain। ek parampita paramatma hi aatma ka realisation kara sakte hain। gyaan se sadgati hoti hai। gyaan to ek baap hi dete hain। koi-koi bachche phir yagya ki sthool seva bhi bahut karte hain। is subject se bhi marks milti hain। ab tum bachchon ko baap amraktha, teejri ki katha sunaate hain। yeh vaastav mein katha nahin hai। yeh hai roohaani gyaan। apne ko aur baap ko jaanna। woh to kah dete hain jaise paani se budbuda nikalta hai phir sama jaata hai। ham brahm se paida ho part bajaae phir brahm mein leen ho jaate hain ya brahm hi ban jaate hain। aur koi rachna aur rachta ka gyaan hai hi nahin। gyaan to baap hi aakar samjhaate hain। inka naam hai shiv। phir unko koi roodra bhi kehte hain, koi paap kateshvar bhi kehte hain। anek naam rakh pooja ki saamagri badha di hai। jo jo paramatma ne kartavya kiya hai us par bhinna-bhinna naam rakh bahut mandir bana diye hain। ab baap kehte hain yeh hai kaanton ki duniya, vishay saagar। yeh bhi sabse likhaaya jaata hai ki eeshvar sarvavyaapi nahin hain। baap to aakar bhaarat ko svarga banaate hain। to saari duniya svarga ban jaati hai। yeh bhi kiski buddhi mein nahin aata। shaastra sab hain bhakti ke। baaki har ek ko apne-apne kaam ka gyaan hai। vaadhe (carpenter) ko vaadhe ka gyaan hai। doctor ko doktari ka gyaan hai। yeh hai roohaani gyaan। jo to ek paramatma hi aakar dete hain। manushyon ko yeh pata hi nahin ki paramatma kisko kaha jaata hai। geeta mein shreekrishna ka naam daal diya hai। mukhya baat hai hi yeh। maai baap ko khandan kar diya hai to baaki sab shaastra jhoothe ho gaye। jhoothe pattharon ki bhi khaaniyaan hoti hain। yeh bhi jaise jhoothe patthar hain। paaras-buddhi vaale rehte hain paaraspuri satayug mein। yeh to hai narka। bulaate hain he patit-paavan aao to zaroor patit hain। narka aur svarga donon bhaarat mein hi hain। koi marte hain to kehte hain svarga gaya। yeh buddhi mein nahin aata ki svarga to satayug ko kaha jaata hai। paramatma svarga ki sthaapna karte hain, na ki narka ki। raavan raajya kab se shuru hota hai, yeh bhi kisko pata nahin hai। bhal shaastra bahut padhte hain, brahmacharya mein bhi rehte hain parantu paida to vikaar se hote hain na। saadhu-sannyaasi bhi saadhna karte hain। baap se mukti maangate hain kyonki chhi-chhi duniya mein rahne nahin chaahte hain। ab baap kehte hain pahle aatma ko jaano ki kaise janma-maran mein aati hai। kaise sachche sone mein khaad padti hai, kaise 84 janmon ka part bajaati hai। sabse jaasti part tumhaara hai jo devi-devta the vahi poore 84 janma lete hain। lakshmi-naaraayan ne raajya kiya phir kahaan gaye? unki aatma ne zaroor janma to liya hoga na। ab woh kahaan hai? koi jaanta nahin। Christian log jaante hain ki Christ is samay beggary part mein hoga। tum to achhi reeti jaante ho lakshmi-naaraayan jo svarga ke maalik the, unhon ko hi punarjanma le 84 janma poore karne hain। sabhi aatmaayen 84 janma nahin lengi। yeh bhi gyaan buddhi mein dhaaran karne ka hai। yog mein rahne ke sivaae kaanton se phool ban nahin sakte। yog se hi vikarma vinaash honge aur satopradhaan phool banenge। jab tak yahaan hain tab tak kuchh na kuchh kaante-pane ka ansh rehta hai। phool ban gaye phir tum yahaan rah nahin sakenge। phoolon ka bageecha satayug ko kaha jaata hai। abhi tum kaanton ke jangal athva raavan ke raajya mein ho। sab kaante hi kaante hain। jo bahut kaanton ko phool banaate hain unhein hi sachcha khushboodaar phool kahenge। ek phool hota hai king oph flower, saphed hota hai। table par rakha jaata hai, phir khilta rehta hai। khushbu badhti rehti hai। aisa phool koi hota nahin। ab king phool hai to queen bhi chaahiye। (raat ki raani) gulaab, motiya aadi achhe-achhe phool hain। flower show dikhaate hain। vahaan sab achhe-achhe phool le aate hain। jo achhe-achhe phool laate hain unko inaam bhi milta hai। tum bhi phoolon ka bageecha banaate ho na। shiv par phool chadhaate hain, usmein ratan jyot, ak ke phool bhi chadhaate hain। baba ne samjhaaya hai main yahaan tum bachchon ko phool banaane ka part bajaata hoon। main jaanta hoon kaun gulaab ke phool hain, kaun motiya hai, kaun ratnajyot hai। kaun ak hai। sabse chhi-chhi hota hai ak। unki chalan hi kaanton misal hoti hai। koi-koi bahut teekhe kaante hain। krodh bhi ek kaanta hai। bahuton ko duhkh dete hain। abhi tum kaanton ki duniya se kinaare mein ho। sangam par ho । kaanton se phool ban rahe ho। jaise maali kaanton ko nikaal, phoolon ko alag pot mein rakhte hain। tumko bhi baba ne alag kar diya hai। tum sangam par ho। tumhaari marammat hoti rehti hai। phir bhi maaya kaanta bana deti hai phir bhi ek baar hamaara ban gaya na.. to yeh maaya ke vighna bhi ek din khatma ho jaayenge। phir yeh jo pot mein lage hue phool hain woh sab svarga mein chale jaayenge। kaliyugi kaanten sab bhasma ho jaayenge। tum kitne thode phool ho। tumhein sangamayugi pot mein daala hai। beej boya hua hai। maaya ka toofaan lagta hai to murjha deta hai। phir bhi avinaashi gyaan ka beej ek baar daala hai to woh vinaash nahin hota hai।

baap baith bachchon ko samjhaate hain, tum bachchon ko bahut-bahut nidar banna hai। baba kehte hain ki yeh likh do ki har 5 hajaar varsha ke baad yeh mela, pradarshani ham is sangam par dikhaane aaye hain। yeh to likhna hai ki yeh ladaai 5 hajaar varsha ke baad lagti hai। puraani duniya ko naya banaane ya narkavaasiyon ko svargavaasi banaane। baba direction to bahut dete hain। yuktiyaan to bahut sahaj bataate hain। baap ko yaad karo aur svarga ki baadshaahi lo। manushya to paani mein tubka maarte rehte hain। so bhi saagar mein jaayen na। nadiyaan saagar se nikli hain। nadiyon ka baap saagar hai na। vahaan jaakar snaan karo। parantu woh khaara hai isliye meethi nadiyon mein snaan karte hain। abhi tum ho gyaan saagar ke bachche, gyaan saagar patit-paavan baap hai। tum unke bachche, jo jitni jaasti service karenge to samjha jaayega - yeh achha phool hai। pradarshani mein bhi ghadi-ghadi achhe phoolon ko bulaate hain। samajhte hain phalaane hamse hoshiyaar hain। parantu hoshiyaar ka phir regard bhi rakhna chaahiye। baba hamesha samjhaate hain - kabhi krodh nahin karo। pyaar se samjhaao। krodh koi karta hai to baba samajhte hain ki inmen kada bhoot hai। maa baap par bhi krodh karne mein deri nahin karte hain aur hi durgati ko pa lenge। gareeb nivaaz kab gareebon par krodh karenge kya! gareeb nivaaz baba aaya hi hai gareebon ko saahookaar banaane। yahaan jo padmapti hain, doosre janma mein naukar chaakar banenge। gareeb jo achhi reeti padhenge woh jaakar raaja raani banenge। aise bhi centres par aate hain jo eeshvareey seva mein kuchh nahin dete hain। unko pata hi nahin ki thoda bhi beej bone se hamaara bhavishya kitna ooncha banega। sudaamen ka misaal hai na। eeshvar arth daan karte hain। samajhte hain doosre janma mein phal milega। baba likh dete hain bachche tumko ek eet ke badle mahal mil jaayenge। yahaan kaudiyaan dete ho vahaan heere ban jaate hain isliye chaaval mutthi ka gaayan hai। guroonaanak ke tikaane mein jaate hain, kuchh na kuchh rakhte zaroor hain। parantu yahaan to baap daata hai na। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dharna ke liye mukhya saar:-

1) bahut-bahut nidar ban kaanton ko phool banaane ki seva karni hai। sabmen avinaashi beej bote rehna hai।

2) krodh ka bahut bada kaanta hai, use chhod bahut-bahut pyaara banna hai। pyaar se service karni hai। serviceable ka regard rakhna hai।

vardaan:- sarva ke gun dekhne va santushta karne ki utkantha dvaara sada ekras utsaah mein rahne vaale gunmoorta bhav

sada ekras umang-utsaah mein rahne ke liye jo bhi sambandh mein aate hain unhein santushta karne ki utkantha ho। jisko bhi dekho usse har samay gun uthaate raho। sarva ke gunon ka bal milne se utsaah sadaakaal ke liye rahega। utsaah kam tab hota hai jab auron ke bhinna-bhinna swaroop, bhinna-bhinna baaten dekhte, sunte ho। lekin gun dekhne ki utkantha ho to ekras utsaah rahega aur sarva ke gun dekhne se svayan bhi gunmoorta ban jaayenge।

slogan:- behad ke vairaagya vritti ka foundation majboot ho to second mein ashareeri banna sahaj hai।