Daily Murli for Monday 21 March 2022

21-03-2022 praatahmurli om shanti "baapdaada"' madhuban

“meethe bachche - tumhaare paas jo kuchh hai, use eeshvareey seva mein lagaakar saphal karo, college kam hospital kholte jaao''

prashn:- tum bachchon ka shivbaaba se kaun sa ek sambandh bahut ramneek aur guhya hai?

uttar:- tum kehte ho shivbaaba hamaara baap bhi hai to bachcha bhi hai, parantu baap so phir bachcha kaise hai, yeh bahut ramneek aur guhya baat hai। tum unhein baalak bhi samajhte ho kyonki un par poora balihaar jaate ho। saara varsa pahle tum unko dete ho। jo shivbaaba ko apna vaaris banaate hain, vahi 21 janmon ka varsa paate hain। yeh bachcha (shivbaaba) kehta hai ki mujhe tumhaara dhan nahin chaahiye। tum sirf shreemat par chalo to tumhein baadshaahi mil jaayegi।

geet:- maata O maata…

om shanti। om shanti, kisne kaha? shareer ne kaha va aatma ne kaha? yeh bachchon ko achhi reeti samajhna chaahiye। ek hai aatma, doosra hai shareer। aatma to avinaashi hai। yeh aatma svayan apna parichay deti hai ki main bhi aatma bindu swaroop hoon। jaise paramatma baap apna parichay dete hain ki mujhe paramatma kyon kehte hain? kyonki main sabka baap hoon। sabhi kehte hain ki he parampita paramatma, he bhagwan, yeh sab samajhne ki baaten hain। andhashraddha ki baat nahin। jaise aur jo sunaaya woh sat nahin, manushya jo eeshvar ke liye batlaate hain woh sab asatya hai। ek eeshvar hi sat hai। woh sat batlaayega। baaki sabhi manushya-maatra unke liye jhooth batlaayenge isliye baap ko sat (truth) kaha jaata hai, sachkhanda sthaapan karne vaala। bhaarat hi sachkhanda tha। baap kehte hain mainne hi sachkhanda banaaya tha। us samay bhaarat ke sivaae aur koi khanda nahin tha। yeh sab sat baap hi batla sakte hain। rishi, muni aage vaale sab kehte gaye ki ham eeshvar rachayita aur rachna ke aadi madhya ant ko nahin jaante। neti-neti karte gaye। koi bhi parichay de na sake। baap ka parichay baap hi dete hain। main tumhaara baap hoon। main hi aakar nai duniya ki sthaapna kar puraani duniya ka vinaash karaata hoon - shankar dvaara। nai srishti brahma dvaara rachta hoon। main hi tumko apna satya parichay deta hoon। baaki jo mere liye tumko sunaayenge woh jhooth hi sunaayenge। jo hokar gaye hain, unhein koi nahin jaante। satayugi lakshmi-naaraayan oonche te oonche the। nai duniya jo oonchi thi, uske maalik the। baaki itni oonchi duniya kisne banaayi aur uska maalik kisne banaaya? yeh koi nahin jaante। baap jaante hain jinhonne svarga ki raajaai ka varsa liya hoga, unki buddhi mein hi yeh baaten baithengi। gaate bhi hain tum maat-pita ham baalak tere, tumhaari kripa se sukh ghanere। yeh kiske liye gaate hain? laukik ke liye ya paarlaukik ke liye? laukik ki to yeh mahima ho na sake। satayug mein bhi yeh mahima kiski ho na sake। tum yahaan aaye ho us maat pita se 21 janmon ke sukh ghanere ka varsa lene, raajya-bhaagya ka varsa lene। bhagwan hai hi rachayita to unke saath maata bhi hogi na। yahaan tum bachche kehte ho ham maat-pita ke paas aaye hain। yahaan koi guru gosaai nahin hai। baap kehte hain tum mere se phir se svarga ka varsa le rahe ho। satayug mein lakshmi-naaraayan hi raajya karte the। shreekrishna ko sab pyaar karte hain, bhala raadhe ko kyon nahin karte? lakshmi-naaraayan chhotepan mein kaun hain? yeh koi nahin jaante। log samajhte hain yeh dvaapar yug mein hue hain। maaya raavan ne bilkul tuchchha buddhi bana diya hai। tum bhi pahle pattharbuddhi the। baba ne tumko paarasbuddhi banaaya hai। paarasbuddhi banaane vaala ek baap hi hai। svarga mein sone ke mahal honge। yahaan sona to kya taamba bhi nahin milta। paise taambe ke bhi nahin banaate। vahaan to taambe ki koi keemat nahin। yeh jo gaaya hua hai, kinki dabi rahi dhool mein, kinki raaja khaae, woh phir hona hai zaroor। barobar aag lagi thi। vinaash hua tha so phir hona hai zaroor 5 hajaar varsha poorva samaan phir se daivi svaraajya sthaapan ho raha hai। tum bachchon ko raajaai deta hoon, ab jitna jo padhe। vichaar karna chaahiye ki yeh satayug mein lakshmi-naaraayan raaja raani tatha praja kahaan se aaye? unhonne raajya kahaan se liya? ek do se lete hain va sooryavanshiyon se chandravanshiyon ne liya! chandravanshiyon se phir vikaari raajaayen lete hain, raajaaon se phir congress sarkaar ne liya। ab to koi raajaai nahin hai। lakshmi-naaraayan svarga ke maalik the na - 8 gaddiyaan chaleen। treta mein seetaaraam ka raajya chala। phir maaya ka raajya shuru hua। vikaari raajaayen, nirvikaari raajaaon ke mandir banaakar pooja karne lage। poojya the vahi pujaari banen। abhi to vikaari raajaayen bhi nahin hain। ab phir nai duniya ki history repeat hogi। nai duniya ke liye baap ne tumko raajayog sikhlaaya tha। behad ke baap se varsa lena hai। jo imtahaan paas karenge vahi kalpa-kalpa oonch pad paayenge। yeh hai padhaai, geeta paathshaala। vaastav mein inko god fatherly university kehna chaahiye kyonki inse hi bhaarat svarga banta hai। parantu is baat ko sabhi samajhte nahin hain। kuchh deri hai। aage chalkar prabhaav niklega। yeh sab shivbaaba hi samjhaate hain। shivbaaba kahen ya shiv baalak kahen? shivbaaba bhi hai to maa bhi hai। agar shiv bhagwan maa na hoti to tum aise kyon pukaarte - tum maat-pita ham baalak tere। buddhi kaam karti hai। shiv bhagwan baap bhi hai to maa bhi hai। ab bataao shiv ko maa hai? shiv tumhaara bachcha hai? jo kehte hain shiv hamaara baap bhi hai, bachcha bhi hai woh haath uthaayen! yeh bahut ramneek aur guhya baat hai। baap so phir bachcha kaise ho sakta hai? vaastav mein krishna ne to geeta sunaai nahin। woh to maa baap ka ek hi bachcha tha। satayug mein to matki aadi phodne ki baat nahin hai। geeta sunaai hai shiv ne। unko baalak bhi samajhte hain kyonki un par balihaar bhi jaate hain। saara varsa unko dete hain। tum gaate bhi the shivbaaba aap aayenge to ham balihaar jaayenge। ab baap kehte hain tum mujhe vaaris banaayenge to main tumko 21 janmon ke liye vaaris banaaoonga। laukik bachcha tumse lega, dega kuchh bhi nahin। yeh to phir dete dekho kitna hain। haan apne bachchon ko bhi bhal sambhaalo parantu shreemat par chalo। is samay ke bachche baap ke dhan se paap hi karenge। yeh bachcha kehta hai - mujhe tumhaara dhan kya karna hai। main to tumko baadshaahi dene aaya hoon, sirf shreemat par chalo। yog se 21 janmon ke liye tandarusti, to padhaai se raajaai milegi। aisi college kam hospital kholo। shivbaaba to daata hai, main lekar kya karoonga! haan, yukti bataate hain ki eeshvar arth seva mein lagaao। shreemat par chalo। shreekrishna ke arth arpan karte hain, woh to prince tha, woh koi bhookha thode hi tha। shivbaaba tumko badle mein bahut kuchh deta hai। bhagwan bhakti ka phal dete hain। woh hai duhkh harta sukh karta। tumhaari sadgati karne vaala aur koi hai nahin। main tum bachchon ki sadgati karta hoon। achha baba, bhala durgati kaun karte hain? haan bachche, raavan ki praveshta hone ke kaaran, raavan ki mat par sab tumhaari durgati hi karte aaye hain। raavan ki mat par ekdam bhrashtaachaari ban pade hain। ab main tumko shreshthaachaari banaae svarga ka maalik banaata hoon। yahaan jo kuchh tum karenge so aasuri mat par hi karenge। ab devta banna hai to aur sang tod ek mujh sang jodo। jitna meri mat par chalenge utna oonch pad paayenge। padhenge nahin to praja mein bhi kam pad paayenge। ek baar suna, dhaaran kiya to svarga mein aayenge parantu pad kam paayenge। din pratidin upadrav bahut honge। jo manushya bhi samjhenge ki barobar yeh to vahi samay hai। parantu bahut deri se aane se itna oonch pad to pa nahin sakenge। yog bigar vikarma vinaash nahin honge। abhi sabki kayaamat ka samay hai। hisaab-kitaab chuktu karna hai। yahaan tumhaare karma vikarma bante jaate hain। satayug mein karma akarma ban jaate hain। karma to zaroor sab karenge। karma bigar to koi rah nahin sakenge। aatma kehti hai - main yeh karma karti hoon। raat ko thak jaane ke kaaran vishraam leta hoon। is organs ko alag samajh so jaata hoon, jisko neend kaha jaata hai। ab baap kehte hain he aatma main tumko sunaata hoon, so dhaaran karo। grihastha vyavhaar mein rehte padhaai bhi karo। padhaai se hi oonch pad milega। pavitra banne bigar yeh gyaan buddhi mein nahin baithega। maaya buddhi ko apvitra banaati hai isliye baba ka naam hai patit-paavan। gaate hain tum maat-pita ham baalak tere.. parantu tum ab practical mein baithe ho, jaante ho is sahaj raajayog ke bal se 21 janmon ke liye ham svarga ke maalik banenge isliye hi tum aaye ho। bhakti maarga mein tum gaate the, ab gaayan band hua। svarga mein gaayan hota hi nahin phir bhakti mein hoga। baap kehte hain main tumhaara maat-pita ban tumko svargavaasi banaata hoon। maaya phir narkavaasi banaati hai। yeh khel hai। isko samajhkar marne ke pahle baap se varsa le lo। nahin to raajya bhaagya ganva denge। patit varsa le na saken। woh phir praja mein chale jaayenge। unmein bhi nambarvaar martabe hain।

baap kehte hain is mrityulok mein yeh tumhaara antim janma hai। ab meri mat par chalo to tumhaara beda paar ho jaayega, ismen andhashraddha ki koi baat nahin। padhaai mein kabhi andhashraddha nahin hoti। paramatma padhaate hain। bigar nishchay padhenge kaise? padhte-padhte phir maaya vighna daal deti hai, to padhaai ko chhod dete hain isliye gaaya hua hai aashcharyavat sunanti, kathanti.. phir baba ko phaarakti de dete hain। parantu phir bhi lav hai to aakar milte hain। aage chalkar pachhtaayenge ki baap ke bachche ban phir baap ko chhod diya! maaya ka jaakar bana to un par sajaayen bhi bahut aati hain aur pad bhi bhrashta ho jaata hai। kalpa-kalpaantar ke liye apna raajya bhaagya ganva denge। saja khaakar praja pad paaya, usse phaayda hi kya! baap ke sammukh aakar bahut sunte hain - phir gorakhdhandhe mein jaakar bhool jaate hain। pahle number ka paap hai kaam kataari chalaana isliye baap kehte hain moot paleeti kabhi nahin hona। baap aakar sabka kapda saaph karte hain। baap hi sab patiton ko paavan banaane vaala hai। satayug mein koi patit nahin hoga। tum baap se varsa lekar vishwa ke maalik ban jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ab raavan ki mat chhod shreemat par chalna hai aur sab sang tod ek baap ke sang jodna hai।

2) nishchaybuddhi ban padhaai zaroor padhni hai। kisi bhi vighna se baap ka haath nahin chhodna hai। yog se tandarusti aur padhaai se raajaai leni hai।

vardaan:- gyaan jal mein tairne aur oonchi sthiti mein udne vaale holeehans bhav

jaise hans sada paani mein tairte bhi hain aur udne vaale bhi hote hain, aise aap sachche holeehans bachche udna aur tairna jaante ho। gyaan manan karna arthaat gyaan amrit va gyaan jal mein tairna aur udna arthaat oonchi sthiti mein rehna। aise gyaan manan karne va oonchi sthiti mein rahne vaale holeehans kabhi bhi dilshikasta va naaummeend nahin ho sakte। woh beeti ko bindi lagaae, kya kyon ki jaal se mukta ho udte aur udaate rehte hain।

slogan:- mani ban baap ke mastak ke beech chamakne vaale hi mastakamni hain।