Daily Murli for Monday 28 March 2022

28-03-2022 praatahmurli om shanti "baapdaada"' madhuban

“meethe bachche - manushya mat par to tum aadhaakalpa chalte ho, ab meri shreemat par chal paavan bano to paavan duniya ke maalik ban jaayenge''

prashn:- behad ka baap bachchon ko kaun si aasheervaad dete hain aur woh aasheervaad kinhon ko praapta hoti hai?

uttar:- baap aasheervaad dete bachche tum 21 janma sada sukhi rahenge, amar rahenge। tumhein kabhi kaal nahin khaayega, akaale mrityu nahin hogi। kaamdhenu maata tumhaari sab manokaamnaayen poorn kar degi। parantu tumhein is vish (vikaar) ko chhodna padega। yeh aasheervaad unhein hi praapta hoti hai jo shreemat par is antim janma mein pavitra bante aur banaate hain। baba kehte bachche, duniya badal rahi hai isliye paavan zaroor bano।

geet:- om namo shivaae…

om shanti। bhagwan ke bachchon ne geet suna। ab bhagwan ke bachche to sabhi hain। jo bhi manushya maatra hain, sab bhagwan ko baba kehte hain। woh sarva ka ek hi baap hai। laukik baap ko sarva ka baap nahin kahenge। behad ka baap sarva ka hi baap hai। sarva ka sadgati daata hai aur koi ki mahima ho nahin sakti। sabhi us niraakaar baap ko hi yaad karte hain। tumhaari aatma bhi niraakaar hai to baap bhi niraakaar hai। unki hi tumne mahima suni hai। parampita paramatma shivbaaba aap oonche te oonche ho, sarva ke sadgati daata ho। sabki sadgati karte ho to woh svarga ke maalik devi-devta ban jaate hain। manushya, manushya ki sadgati kar na saken। manushya ki koi mahima hai nahin। abhi tum bachchon ko behad ke baap dvaara varsa milta hai। aadhaakalpa tum praalabdha bhogte ho। usko raamraajya kaha jaata hai phir dvaapar se raavanraajya shuru hota hai। 5 vikaaron roopi bhoot pravesh hote hain। jaise woh bhoot (ashuddha aatma) jismen pravesh karte hain to woh betaala ban jaata hai। vaise in bhooton mein number one bhoot kaam mahaashatru hai। aadhaakalpa is bhoot ne tumko bahut duhkhi kiya hai। ab in par jeet praapta kar pavitra bano to pavitra duniya ke maalik ban jaayenge। baap hi sabse pratigya karaate hain। baap kehte hain tum paavan banne ki raakhi baandho to 21 janma ke liye svarga pavitra duniya ke tum maalik ban jaayenge। main aaya hoon patiton ko paavan banaane। bhaarat paavan tha jab devi-devtaaon ka raajya tha। naam hi sukhdhaam tha। abhi hai duhkhadhaam। ek to kaam kataari chalaate hain doosra ladte jhagadte rehte hain, dekho kitna duhkh hai। baap aate hi hain sangam par। yeh hai kalyaankaari sangam yug। tum bachche sukhdhaam mein chalne ke liye apna kalyaan karne aaye ho। baap kehte hain ab meri shreemat par chalo। manushya mat par to tum aadhaakalpa chalte rahe। sadgati daata to ek baap hi hai, unki shreemat se hi tum svarga ke maalik ban jaate ho। baaki yeh shaastra to padhte-padhte ab kaliyug ka ant aa gaya hai। tamopradhaan ban gaye hain। apne ko eeshvar kahlaakar apni hi baith pooja karaate hain। shaastron mein prahlaad ki baat dikhaai hai। dikhaate hain ki thambha se narsinh bhagwan nikla, usne aakar hiranyaakashyap ko maara। ab thambha se to koi nikalta nahin hai। baaki sabhi ka vinaash to hona hi hai। baap kehte hain in saadhu santa, mahaatma, ajaamil jaisi paap aatmaon ka bhi udvaar main aakar karta hoon।

baap aakar gyaan amrit ka kalash maataaon par rakhte hain। maata guru bigar kiski sadgati ho na sake। jagat amba hai kaamdhenu, sabhi ki manokaamna poorn karne vaali। unki tum bachchiyaan ho। ab baap kehte hain koi bhi manushya maatra ki baat nahin suno। patiton ko paavan banaane vaala ek baap hi hai। to zaroor koi patit banaane vaale bhi honge। raavan-raajya mein sabhi patit hain। abhi woh patit-paavan baap aaya hai svarga ka varsa dene ke liye। kehte hain 21 janma tum sada sukhi rahenge। aasheervaad dete hain na। laukik maat-pita bhi aasheervaad karte hain। woh hai alpakaal sukh ke liye। yeh hai behad ka maat-pita, kehte hain bachche tum sadaiv amar raho। vahaan tumko kaal nahin khaayega। akaale mrityu nahin hoga, sada sukhi rahenge। kaamdhenu maata tumhaari sarva kaamnaayen poorn karti hai। sirf vish ko chhodna hoga kyonki apvitra to vahaan chal nahin sakenge। baap kehte hain main tumko vaapis le chalne aaya hoon, sirf paavan bano। aise nahin ki bachche ko shaadi karaani hai। na apne ko patit karna hai, na doosron ko patit hone dena hai। is mrityulok mein antim janma pavitra zaroor banna hai tab amarlok chalenge। baap baith aatmaon ko samjhaate hain। aatma hi dhaaran karti hai। baap kehte hain tum hamaare bachche ho। tum aatmaayen paramdham mein rehti thi, ab phir le chalne aaya hoon। jo pavitra banenge unko saath le chaloonga। phir vahaan se tumko svarga mein bhej doonga। meera ne bhi vish ka tyaag kiya to unka naam kitna baala hai। baap kehte hain bachche ab puraani duniya badal nai banne vaali hai। nai duniya mein devtaayen raajya karte the। main brahma dvaara tumko raajayog sikhlaata hoon। tumko shreemat deta hoon, shreshtha devta banne ke liye। krishnapuri mein chalna hai। shreekrishna ki dekho kitni mahima hai। woh hai sarvagun sampanna। hamaari mat par chalenge to aisa lakshmi-naaraayan banenge। jinhonne kalpa pahle varsa liya hoga woh shreemat par chalenge। nahin to aasuri manmat par chalte rahenge। yeh baba bhi us niraakaar se hi mat lete hain। shivbaaba brahma ke tan mein pravesh kar tumko mat dete hain। kehte hain tum sab sajniyaan athva bhaktiyaan ho। ek hai saajan athva bhagwan। manushya ko kabhi bhi bhagwan nahin kah sakte। yeh ulti mat tumko mili hui hai isliye tumhaari aisi durgati hui hai। main hi ek paar karne vaala hoon। yeh guru log mere dhaam ko hi nahin jaante to mere paas le kaise aayenge, manushya to jahaan bhi jaayenge to maatha tekenge isliye main svayan hi lene ko aaya hoon phir tumko svargadhaam mein bhej doonga। woh hai vishnupuri, sooryavanshi। treta ko kaha jaata hai raamraajya। uske baad shuru hota hai raavan raajya dvaapar mein। to bhaarat shivaalay se veshyaalay ban jaata hai। yahi bhaarat sampoorn nirvikaari tha, yahi bhaarat poorn vikaari ban gaya hai। ab tum bachche raajayog seekh saare vishwa par jeet praapta kar lete ho। do bandaron ki kahaani। woh aapas mein ladte hain, vishwa roopi maakhan tumko milta hai। tum keval shiv-baba aur svarga ko hi yaad karo। ghar grihastha mein rehte hue pavitra bano to pavitra duniya ke maalik ban jaayenge। pavitrata par hi atyaachaar hote hain। kalpa pahle bhi hue the, abhi bhi honge zaroor kyonki tum ab jahar nahin dete ho। gaaya bhi hua hai - amrit chhod vish kaahe ko khaae। amrit peete-peete tum manushya se devta ban jaate ho। jo pakke brahman honge - woh to kahenge chaahe kuchh bhi ho parantu ham vish nahin denge। kitna sahan bhi karte hain tab to oonch pad paate hain। shivbaaba ko yaad karte-karte praan bhi chhod dete hain। shivbaaba ka pharmaan hai। pharmaan to sabko hai isliye kehte hain mujhe yaad karo to mere paas paramdham mein aa jaayenge। shivbaaba is mukh dvaara tum aatmaon se baat karte hain। yeh bhi manushya hai। manushya kabhi bhi manushya ko paavan nahin bana sakte। baap ko bulaate hain ki patiton ko aakar paavan banaao। to mujhe zaroor patit duniya mein hi aana pade kyonki yahaan koi paavan to hai nahin। ab baap kehte hain main tumko is shreekrishna jaisa paavan svarga ka maalik banaata hoon। agar koi kehta hai ki main bandhan mein hoon to baba kya kare। tumko to gyaan milta hai ki grihastha vyavhaar mein rehte shreemat par chalo to tum shreshtha banenge। tum sab eeshvareey parivaar ke ho। shivbaaba, brahma daada, tum brahman, braahmaniyaan potre aur potriyaan। tum sabko svarga ka varsa, baadshaahi milti hai। baap deta hai svarga ka varsa to ham baap ke vaaris thahre। to zaroor ham svarga mein hone chaahiye। phir ham abhi narka mein kyon? baap samjhaate hain raavan raajya ke kaaran tum narka mein pade ho। ab main aaya hoon tumko svarga mein le chalne ke liye। baap hai khivaiya, sabko us paar le jaate hain। shreekrishna koi sabka baap nahin hai। yaad ek ko hi karna hai। anekon ko yaad karna maana bhakti maarga। ek baap ko yaad karenge to ant mati so gati ho jaayegi। ek baap ki hi shreemat gaai hui hai, na ki anek guru gosaaiyon ki। woh to kah dete hain bhagwan naam roop se nyaara hai। parantu naam roop se nyaari vastu koi hoti nahin। aakaash, polaar hai phir bhi naam to hai na। abhi yeh bhaarat kitna kangaal hai, devaala maara hua hai। baap kehte hain jab aisi haalat ho jaati hai to main aakar bhaarat ko sone ki chidiya banaata hoon। bhambhor ko aag to lagni hi hai। puraani duniya saari khalaas ho nai banegi।

tum bachche shreemat par svarga ki raajdhaani sthaapan kar rahe ho। yeh hai eeshvareey padhaai। baaki sab hain aasuri padhaai। is padhaai se tum svargavaasi bante ho, us padhaai se tum narkavaasi bante ho। ab daivi jhaad din pratidin badhta jaayega। maaya ke toofaan bhi bahut lagte hain, tab baap kehte hain yeh hai duhkhadhaam। ab tum mujhe yaad karo, paramdham ko yaad karo aur sukhdhaam ko yaad karo to beda paar ho jaayega। baap aate hain duhkhadhaam se shantidham le jaane ke liye। phir sukhdhaam mein bhej denge। ab duhkhadhaam ko bhoolte jaao। baap aur varse ko yaad karo। achha!

meethe meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan aur yog se apne bandhanon ko kaatna hai। is duhkhadhaam ko bhool shantidham aur sukhdhaam ko yaad karna hai।

2) kuchh sahan karna pade, praan bhi tyaagne pade to bhi baap ne jo paavan banne ka pharmaan kiya hai, us par chalna hi hai। patit kabhi nahin banna hai।

vardaan:- brahman so pharishta so jeevan-mukta devta banne vaale sarva aakarshan mukta bhav

sangamayug par braahmanon ko brahman se pharishta banna hai, pharishta arthaat jiska puraani duniya, puraane sanskaar, puraani deh ke prati koi bhi aakarshan ka rishta nahin। teenon se mukta, isliye drama mein pahle mukti ka varsa hai phir jeevanmukti ka। to pharishta arthaat mukta aur mukta pharishta hi jeevanmukta devta banenge। jab aise brahman so sarva aakarshan mukta pharishta so devta banon tab prakriti bhi dil va jaan, sik va prem se aap sabki seva karegi।

slogan:- apne sanskaaron ko easy (saral) bana do to sab kaarya easy ho jaayenge।

maateshvari ji ke anmol mahaavaakya - paramatma karnakraavanhaar kaise hai?

bahut manushya aise samajh baithe hain ki yeh jo anaadi bana banaaya srishti drama chal raha hai vo saara paramatma chala raha hai isliye vo kehte hain ki manushya ke kuchh naaheen haath... karnakraavanhaar svaami... sabkuchh paramatma hi karta hai। sukh duhkh donon bhaag paramatma ne hi banaaya hai। ab aisi buddhi vaalon ko kaunsi buddhi kaha jaayega? pahle pahle unhon ko yeh samajhna jarur hai ki yeh anaadi bani banaai srishti ka khel vo paramatma jo ab banaata hai, vahi chalta hai। jisko ham kehte hain yeh bani banaai ka khel automatic chalta hi rehta hai to phir paramatma ke liye bhi kaha jaata hai ki yeh sabkuchh paramatma hi karta hai, yeh jo paramatma ko karnakraavanhaar kehte hain, yeh naam phir kaunsi hasti ke oopar pada hai? ab in baaton ko samajhna hai। pahle to yeh samajhna hai ki yeh jo srishti ka anaadi niyam hai vo to bana banaaya hai, jaise paramatma bhi anaadi hai, maaya bhi anaadi hai aur yeh chakra bhi aadi se lekar ant tak anaadi avinaashi bana banaaya hai। jaise beej mein understood vriksha ka gyaan hai na, aur vriksha mein understood beej hai, donon combined hain, donon avinaashi hain, baaki beej ka kya kaam hai, beej bona jhaad nikalna। agar beej na boya jaae to vriksha utpanna nahin hota। to paramatma bhi svayan is saari srishti ka beejroop hai aur paramatma ka part hai beej bona। paramatma hi kehta hai main paramatma hoon hi tab jab beej bota hoon। agar beej nahin boya jaae to vriksha kaise niklega! mera naam paramatma hi tab hai jab mera param kaarya hai, meri kaarya hi hai jo main khud paartadhaari ban beej bota hoon। srishti ki aadi bhi karta hoon aur ant bhi karta hoon, main karandhaari ban beej bota hoon। beej bone ka matlab hai rachna karna। puraani srishti ki ant karna aur nai srishti ki aadi karna isko hi kehte hain paramatma sabkuchh karta hai।