Daily Murli for Tuesday 12 April 2022

12-04-2022 praatahmurli om shanti "baapdaada"' madhuban

“meethe bachche - tum duhkh harta sukh karta baap ke bachche ho, tumhein mansa-vaacha-karmana kisi ko bhi duhkh nahin dena hai, sabko sukh do''

prashn:- tum bachche manushya se devta bante ho isliye tumhaari mukhya dhaarna kya honi chaahiye?

uttar:- tumhaare mukh se jo bhi bol niklen - woh ek-ek bol manushyon ko heere jaisa bana den। tumhein bahut meetha banna hai, sabko sukh dena hai। kisi ko bhi duhkh dene ka khyaal na aaye। tum abhi aisi satayugi svarga ki duniya mein jaate ho jahaan sada sukh hi sukh hai। duhkh ka naam nishaan nahin। to tumhein baap ki shreemat mili hai bachche, baap samaan duhkh harta sukh karta bano। tumhaara dhandha hi hai sabke duhkh harkar sukh dena।

geet:- is paap ki duniya se …

om shanti। bachchon ne yeh geet suna। bachche jaante hain ki ham purushaartha karte hain - aisi duniya mein jaane ke liye, jahaan ek to maaya nahin hoti aur kabhi bhi mansa-vaacha-karmana koi ko koi bhi duhkh nahin dete isliye unka naam hi hai svarga, paradise, vaikuntha aur barobar vahaan ke maalik lakshmi-naaraayan ka chitra bhi dikhaate hain। praja ka to chitra nahin dikhaayenge। lakshmi-naaraayan ka chitra hai, jisse siddha hota hai ki unhon ki raajdhaani mein zaroor aise hi manushya honge। bhaarat mein hi yeh svarga ke maalik the, jahaan duhkh ka naam nishaan nahin rehta। mansa-vaacha-karmana koi bhi kisko duhkh nahin dete। baap bhi kabhi kisko duhkh nahin dete hain। unka naam baala hai - duhkh harta sukh karta। woh baith tum bachchon ko padhaate hain। is duniya mein sabhi mansa-vaacha-karmana ek do ko duhkh dene vaale hain। vahaan mansa-vaacha-karmana sab sukh dene vaale hain। parampita paramatma ke sivaae koi bhi svarga ka maalik bana nahin sakta। barobar svarga tha। yahaan bhi dekho science se kya-kya banta rehta hai। aeroplane, motor, mahal aadi kaise ban jaate hain। vahaan bhi science saari kaam mein aati hai। aise nahin jameen se koi baikuntha nikal aayega। jaise dikhaate hain dvaarika samudra ke neeche chali gai। jo samudra ke neeche jaayegi woh to galkar khatma ho jaayegi। nayesir sab kuchh banna hai to baap se jabki ham baadshaahi praapta kar rahe hain to mansa-vaacha-karmana kiske prati buddhi mein duhkh dene ka khyaal nahin aana chaahiye। bhal yeh hai hi maaya ka raajya। mansa toofaan to aayenge। baaki dil mein kisko duhkh dene ka khyaal bhi nahin aana chaahiye। is samay sab ek do ko duhkh hi dete hain। samajhte sukh hain, parantu woh hai duhkh। baap se sabko bemukh karte hain। yeh bhakti maarga bhi drama mein hai। drama ko koi bhi jaante hi nahin। woh log samajhte hain ham yeh shaastra aadi sunaate hain, yeh bhi gyaan dete hain। jap tap aadi karne se manushya mukti jeevanmukti ko pa lenge। anek prakaar ke raaste bataate hain। kahenge bahut samay se bhakti karte aaye hain tab to bhagwan aaya hai। ham bhi kehte hain bhakti ka jab ant hota hai tab bhagwan ko aana hota hai, aakar bhakti ka phal dete hain। to woh sab bhakti ki line mein chale jaate hain। isko gyaan nahin kahenge। shaastron ke gyaan se sadgati nahin hoti। srishti ke aadi madhya ant ka gyaan to unhon ko hai hi nahin। yeh tum jaante ho praacheen gyaan aur yog se bhaarat svarga bana tha, so zaroor bhagwan hi sikhlaayega। manushya to raajayog sikhla na sake। bhagwan ne jo sahaj raajayog sikhlaaya unka baad mein shaastra banaaya hai। yahaan to bhagwan khud baith knowledge samjhaate hain। geeta mein sirf ek bhool ki hai jo naam badli kar diya hai aur samay bhi doosra likh diya hai।

tum jaante ho abhi bhagwan hamko gyaan aur raajayog sikhla rahe hain। srishti ke aadi madhya ant ka gyaan aur koi shaastra mein nahin hai। kalpa ki aayu bhi lambi chaudi kar di hai। manushya to vahi shaastra padhte rehte hain। baap ne samjhaaya hai - yeh srishti roopi jhaad hai। jhaad mein pahle thode patte phir badhte jaate hain। bhinna-bhinna dharma ke patte dikhaaye jaate hain। vaastav mein yeh jo bhi ved shaastra hain woh sab bhagvat geeta ke patte hain arthaat unse nikle hue sab shaastra hain। tum dekhte ho barobar naye jhaad ki sthaapna hoti hai। toofaan aadi mein koi to jhat murjha jaate hain, gir padte hain। tum jaante ho abhi hamaare daivi jhaad ka foundation lag raha hai। aur jo dharma sthaapak hain woh yeh nahin jaante ki ham Christian dharma ka athva phalaane dharma ka foundation lagaate hain। peechhe samajh mein aata hai ki phalaane ne yeh foundation lagaaya। yahaan to kaanton ko phool banaana hota hai। tum jaante ho hamko to devta banna hai। sabko sukh dena hai। kisko duhkh dene ka khyaal bhi nahin aana chaahiye। ek-ek akshar mukh se aisa nikle jo manushya ko heere jaisa bana de। baap bhi hamko gyaan sunaate hain, jisko dhaaran karte-karte ham heere jaisa ban jaate hain। vaastav mein teacher kisko duhkh kyon deve, woh to padhaate hain। haan samjhaaya jaata hai - agar achhi reeti nahin padhenge to 21 janma ke liye ghaata pad jaayega। 21 janmon ke liye ab hi purushaartha karna hai। baap mila hai, jisko hi bhakti maarga mein yaad karte the - he bhagwan। saadhu santa aadi sab yaad karte hain। bhagwan to ek hai। parantu woh kaun hai - yeh nahin jaante। shreekrishna to satayug mein prince tha। unko to aise koi nahin kahenge ki woh sarva ka duhkh harta sukh karta hai। vahi shreekrishna ki aatma jo sukh mein thi, ab duhkh mein hai। bhagwan ke liye aise nahin kahenge na। woh to duhkh sukh se nyaara hai। unko manushya ka tan hai nahin। baap jo sthaapna karte hain, vahaan sukh hi sukh hai। tab gaaya jaata hai duhkh harta sukh karta।

tum jaante ho ham raavan ke raajya mein aadhaakalpa duhkhi the। alpakaal ka sukh rehta hai baaki duhkh hi duhkh hai। jisko sannyaasi log kaag vishta samaan sukh kehte hain kyonki vikaar se paida hote hain na। lekin koi pavitra pravritti maarga bhi hoga, jahaan koi bhi vikaar nahin hoga। barobar woh satayug mein tha। uska naam hi hai svarga। woh hai pavitra maarga, svarga। phir patit bante hain to unko kaha jaata hai narka, bhrashtaachaari maarga। yeh duhkh sukh ka khel bana hua hai। manushyon ko abhi-abhi sukh, abhi-abhi duhkh। unko yeh maaloom hi nahin ki svarga mein sada sukh hota hai, duhkh ka naam nishaan bhi nahin rehta। yahaan phir sukh ka naam-nishaan bhi nahin hai। vikaar mein jaana - yeh to duhkh hi hai, tab to sannyaasi bhi sannyaas karte hain parantu woh hai nivritti maarga। satayug mein pravritti maarga tha, woh tha shivaalay। devi devtaayen, lakshmi-naaraayan aadi ke jad chitra mandiron mein bhi kaise taaj va takhta se saje hue hain। bhaarat hi hai jismen raaja-raani daivi sampradaay the, aur koi dharma mein aise nahin hain। bhal raajaayen to hue hain parantu double taaj nahin hai। satayug mein shuru se hi raajaai chalti hai। aadi sanaatan double sirtaaj devi-devta dharma tha। woh dharma kaise sthaapan hua, yeh sab baaten tum bachche hi jaante ho। shivbaaba ki mat se tum duhkh harta sukh karta bante ho। tumhaara dhandha hi yeh hai - sabka duhkh harkar sukh dena। agar tum bhi kisko duhkh denge to kaun kahega ki yeh duhkh harta sukh karta ki santaan hain। pahle mansa mein khyaalaat aate hain phir act mein aate hain। tum bachchon ko to ati meetha banna hai। bhagwan padhaate hain to jab tak chalan tumhaari daivi nahin hogi to manushya tum par vishvaas kaise karenge। geeta mein bhi likha hai bhagvaanuvaach main tumko nar se naaraayan banaata hoon। bhagwan zaroor sangam par hoga। bhagvaanuvaach - main tumko raajayog sikhaata hoon to zaroor puraani duniya ka vinaash bhi hua hoga। yeh kaam koi krishna ka nahin hai। trimoorti dikhaate hain parantu shiv ko uda diya hai। phir kehte hain brahma ko to 3 mukh hote hain। yeh ek mukh vaala brahma kahaan se aaya। ab manushya ko 3 mukh kaise honge। baap kehte hain tum mere samjhu sayaane bachche ho। tum hi vishwa par raajya karte the। ab baba tumko dehi-abhimaani bana rahe hain। ab apne ko aatma samjho। muktidhaam mein sabko ashareeri banaae bhej dete hain। yahaan aakar tumne yeh shareer dhaaran kiya hai। shareer dhaaran karte-karte tumko deh-abhimaan pakka ho gaya hai। abhi tum apne ko aatma samjho। mujh aatma ne 84 janmon ka part bajaaya hai। abhi yeh antim janma hai, aise-aise apne saath baaten karo। baap kehte hain abhi tum dehi-abhimaani bano, vaapis lautna hai, phir tum svarga mein aayenge। abhi tum mere dvaara svarga ki baadshaahi lene ki mehnat kar rahe ho। baap ko tum bhool jaate ho to khushi ka paara nahi chadhta hai। shaastron mein kitni bhaari bhool kar di hai, shivbaaba ko hi uda diya hai। pooja karte bhi kah dete hain naam roop se nyaara hai। are tab pooja kiski karte ho! yaad kisko karte ho! kehte bhi ho aatma bhrakuti ke beech mein rehti hai। parantu aatma kiski santaan hai - yeh nahin jaante। main aatma bhrakuti ke beech mein rah is shareer dvaara part bajaata hoon, is putle ko nachaata hoon। kathputliyon ka dance hota hai na। woh doosre aadmi baith dance karaate hain। pahle-pahle to dehi-abhimaani banna hai aur baap jo kuchh samjhaate hain usko dhaaran karna hai। pradarshani mein pahle-pahle to baap ka parichay samjhaana hai ki yeh sabka baba hai, woh niraakaar, doosra saakaar prajaapita - do baabaayen hain। tum jaante ho laukik baap bhi hai, paarlaukik baap bhi hai। woh had ka, woh behad ka। ab nai rachna rach rahe hain। ham varsa shivbaaba se lete hain। aisi-aisi baaten apne saath karke pakka kar dena hai। dehi-abhimaani banna hai। ham shivbaaba ke paas padhne jaate hain, parampita paramatma niraakaar hai। saakaar hai prajaapita brahma। tum ho prajaapita brahma ke mukh vanshaavli brahman। tumko brahma ne adopt kiya hai। tum ho gaye nai rachna - brahman। woh hain puraane jismaani brahman। woh jismaani yaatra karaate hain। tum roohaani।

tum bachche abhi shreshtha ban rahe ho। yeh hai hi eeshvareey mission - bhrashtaachaari se shreshthaachaari banne ki। manushya to bana na saken। vaastav mein sachchi-sachchi sadaachaar samiti tumhaari hai। tumhaara leader dekho kaun hai! baap kehte hain main phir se raajayog sikhlaane aaya hoon, yeh vahi sangamayug hai। abhi manushya se devta banaata hoon। tum jaante ho ham shoodra se abhi brahman ban rahe hain। braahmanon ki hai choti। brahma bhi choti hai। brahma mein jo pravesh karte hain, unko in okhon se dekh nahin sakte। baaki to sabko dekhte hain, buddhi se jaante hain, niraakaar baap hamko padhaate hain। brahma ko to brahman yahaan chaahiye। sookshm vatan mein ho na saken। adopt karte hain, vyakta brahma so avyakt banta hai। yeh badi samajhne ki baaten hain। pahle-pahle lakshya ko samajh liya phir bhal kahaan bhi baith padh sakte hain। murli rojaana sunni pade। ek din bhi miss hone se bada ghaata pad jaata hai kyonki points badi guhya, heere ratna nikalte hain। koi first class ratna nikla ho aur miss kar diya to ghaata pad jaae। regular student bade accurate hote hain। achhi reeti purushaartha nahin karenge to oonch pad pa nahin sakenge। yeh to bahut oonchi padhaai hai। sarasvati ko bainjon aur krishna ko murli di hai। vaastav mein krishna ko bhool se de di hai। hai to brahma। tum jaante ho yeh shivbaaba ka mukh hai। krishna ka aur sarasvati ka to koi bhi connection nahin hai। saari moonjh kar di hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) main aatma is shareer roopi putle ko nacha rahi hoon। main isse alag hoon, aisa abhyaas karte-karte dehi-abhimaani banna hai।

2) murli kabhi bhi miss nahin karni hai, regular banna hai। padhaai mein bahut-bahut accurate rehna hai।

vardaan:- maaya aur prakriti ki halchal se sada safe rahne vaale dilaaraam ke diltakhtansheen bhav

sada safe rahne ka sthaan-dilaaraam baap ka diltakhta hai। sada isi smriti mein raho ki hamaara hi yeh shreshtha bhaagya hai jo bhagwan ke diltakhta-nasheen ban gaye। jo parmaatma dil mein samaaya hua athva diltakhtansheen hai woh sada safe hai। maaya va prakriti ke toofaan use hila nahin sakte। aise achal rahne vaalon ka yaadgaar achalghar hai, chanchal ghar nahin, isliye smriti rahe ki ham anek baar achal bane hain aur abhi bhi achal hain।

slogan:- gyaan swaroop, prem swaroop banna hi shikshaaon ko swaroop mein laana hai।