Daily Murli for Thursday 28 April 2022

28-04-2022 praatahmurli om shanti "baapdaada"' madhuban

“meethe bachche - ab vaapis ghar chalna hai isliye deh ka bhaan chhodte jaao, main itna achha hoon, dhanvaan hoon, yeh sab chhod apne ko aatma samjho''

prashn:- kis nishchay va dhaarna ke aadhaar par tum bachche apni bahut oonchi takdeer bana sakte ho?

uttar:- pahla nishchay chaahiye ki ham aatma hain। abhi humein shareer chhodkar vaapis ghar jaana hai, isliye is duniya se dil nahin lagaani hai। 2. hamko padhaane vaala aur saath le jaane vaala shivbaaba hai, unki shreemat par humein chalna hai। shreemat par chal apna va apne mitra sambandhiyon ka kalyaan karna hai। jo bachche shreemat par nahin chalte ya jinhen padhaane vaale baap mein nishchay nahin woh koi kaam ke nahin। woh chalte-chalte gum ho jaate hain। oonch takdeer bana nahin sakte।

geet:- om namo shivaae…

om shanti। bachche baithe ho aur jaante ho ki baba ke saamne baithe hain। koi sannyaasi, udaasi mitra sambandhi aadi ke saamne to nahin baithe hain। jaante ho ki ham barobar ati meethe baap jisko ham janma-janmaantar yaad karte hain, unke sammukh baithe hain। ham bhi unke jeete ji bachche bane hain। sannyaasiyon ke to followers bante hain। rehte to apne ghar mein hain na। woh followers kahlaate hain, parantu follow nahi karte hain। tum bachchon ko follow karna hai। buddhi mein yeh yaad rahe ki ham aatma hain, jahaan baba jaayenge vahaan ham jaayenge। niraakaar baba paramdham se yahaan aaye hain patiton ko paavan banaane। aayenge to patit duniya mein, patit shareer mein। jo pahle number mein paavan tha, jisne 84 janma bhoge hain, unmein hi baithkar yeh sab samjhaate hain। yahaan bahut bachche baithe hain। teacher koi ek ko padhaayenge kya? bhagvaanuvaach sirf arjun prati, aisa to ho na sake। bachche jaante hain ham aatmaayen baap ke saamne baithi hain। aur koi bhi satsang mein aisa nahin samjhenge। tumko samjhaaya jaata hai ki tumhein abhi vaapis chalna hai। shareer ko to yahaan hi chhodna hai, isliye deh ka bhaan chhodte jaao। main itni achhi hoon, dhanvaan hoon, yeh sab chhodna hai। main aatma hoon, yeh nishchay karna hai। baap ko yaad karte-karte baap ke saath chal padna hai। shivbaaba kehte hain mujhe to deh ka abhimaan ho na sake kyonki mujhe apni deh to hai nahin। tumko bhi pahle yeh deh-abhimaan thode hi tha। jab tum aatma mere paas thi phir tumne 84 janma part bajaaya। tum kahenge hamne raajya bhaagya liya tha, phir haraaya। ab phir tumko mukti-dhaam vaapis le chalne aaya hoon। shareeron ko to nahin le jaaoonga। yeh puraana shareer hai, iska bhaan to buddhi se todna hai। rehna bhi apne grihastha vyavhaar mein hai। yeh koi sannyaas math nahin hai। apne gharbaar ko bhi sambhaalna hai, woh to chhod karke jaate hain। baap bachchon se chhudaate nahin hain। baap kehte hain tum apne bachchon ko yaad dilaao ki shivbaaba ko yaad karo। samjhaate raho to unko bhi shivbaaba se pyaar ho jaae। shiv-baba kitna meetha aur pyaara hai। sabko yahaan bitha deve to bachchon ko kaun sambhaalega। aise yahaan bahut bachche hain - jo yahaan se shareer chhodkar jaate hain phir doosra janma lekar aayenge baap se varsa lene, milenge bhi। yeh nishchay hona chaahiye ki ham aatma hain। yeh shareer chhodkar vaapis jaana hai। yahaan hamaari dil nahin lagti। sannyaasi log kehte hain brahm tatva mein leen ho jaayenge। anek mat mataantar hain, yahaan to ek hi baap hai। baap aaya hai ham bachchon ko vaapis le chalne। satayug mein yeh sab dharma nahin the। abhi satayug sthaapan ho raha hai। abhi baba reincarnate hua hai। tum abhi rejuvenate ho rahe ho। reincarnation ek ke liye kahenge। bahut bachche likhte hain, baba hamaari jeevan mein achha hi parivartan aaya hai। kabhi thoda krodh aa jaata hai। haan bachche yeh to hoga hi। beemaari koi phat se chhoot jaati hai kya? sab gun nikalte-nikalte nirgun ban gaye ho। abhi sarvagunvaan banna hai। tumko athaah dhan milta hai। vahaan lobh ki to baat hi nahin hai। yahaan lobh vash kitni chori aadi karte hain। officer ki gaphlat se anaaj ke godaam kharaab ho jaate hain, phir jala dete hain। yahaan to manushya bhookh marte hain। tum samajhte ho ki hamko shivbaaba padhaate hain। pahle jab tak kisko yeh nishchay nahin ki shivbaaba hamko padhaate hain to koi kaam ka hi nahin। baba ne samjhaaya tumhaari aatma patit bani hai। abhi paavan ban rahi hai। shreemat par zaroor chalna hai। apni mat nahin chalaani hai। mitra sambandhiyon ka shreemat se kalyaan karna hai। chitthi likhni hai। shreemat se nahin likhenge to akalyaan karenge। bahut hain jo chhipaakar chitthi likhte hain। baba shikshak baithe hain, to baba ko bataana chaahiye। baba tumko aisi chitthi likhni sikhaayenge jo padhne vaale ka romaanch khada ho jaae। baba mana nahin karte hain, tod nibhaana hai। nahin to charity begins at hom kaise honge। kai hain jo shreemat par nahin chalte to gum ho jaate hain। takdeer mein nahin hai to chal na saken। aise bahut purush aate hain - jinki striyaan nahin aati hain। maanti nahin hain। shivbaaba likhte hain tum to kamjor ho। unko bhi samjhaao। tumne to pratigya ki thi ki aagya maanengi। tum apni stri ko hi vash nahin kar sakte ho to vikaaron ko vash kaise kar sakenge। tumhaara pharja hai stri ko apne haath mein rakhna, pyaar se samjhaana। shaastron mein yeh sab is samay ki baaten likhi hui hain। tum brahman bhi pahle buddhu the। ab baba ne buddhivaan banaaya hai।

tum jaante ho shivbaaba ne 5 hajaar varsha pahle aisa hi part bajaaya hoga। aise hi samjhaaya hoga aur yeh brahma bhi jaan gaye hain। tum abhi purushaartha kar rahe ho। jo achhi reeti service karenge vahi pharishta ban jaayenge। agar hisaab-kitaab rah jaata hai to saja khaani padegi। abhi tum sammukh baithe ho। shivbaaba tumko sunaate hain। aise mat samjho brahma sunaate hain। shivbaaba kehte hain bachche ab naatak poora hone vaala hai। tum mere se yog lagaao to pavitra ban jaayenge। tum jaante ho ab saajan lene aaya hai aur tumko padhaate bhi hain। kitna wonder hai। tum kitne saubhaagyashaali ho to ek ki shreemat par chalna chaahiye na। kehte hain tum sabse shreshtha te shreshtha ho। main shri shri hoon। tumko shri-shri shreshtha banaata hoon। shreshtha duniya banaata hoon। yahaan kitne patit hain aur apne oopar shri ka title rakhaate hain। tum raavan par vijay praapta karte jaate ho। tumhaari aatma roopi sui par kat lag gai hai। ab chumbak aakar saaph karte hain। saaph honge to saath chalenge kat utaarne ke liye baap ko yaad karo। maataayen shreekrishna ke mukh mein maakhan dekhti hain। woh hai svarga roopi maakhan। do bille aapas mein ladte hain, maakhan shreekrishna ko hi milega। shreekrishna akela thode hi raajya karega। sooryavanshi, chandravanshi gharaana chalta hai। uske baad phir raajaaon ka gharaana aa jaata hai। woh bhi bahut puraane chalte rehte hain। peechhe praja ka praja par raajya hota hai।

abhi tum jaante ho ki baba ne hamko part bajaane bheja tha। svarga mein ham bahut sukhi the। 21 janma ka varsa bhaarat mein hi gaaya jaata hai। woh kanyaayen 21 janmon ke liye varsa dilaati hain। baba kitni achhi reeti samjhaate hain to bhi kisi-kisi ke puraane sade hue avgun nikalte nahin hain। baba bada martial bhi hai। baba ke saath dharmaraaj bhi hai। agar shreemat par na chale to unka right hand dharmaraaj bhi hai। baba ki god mein janma liya phir vahaan jaakar mar jaate hain, to kitna ghaata pad jaata hai। shreemat par nahin chalte to mar jaate hain। kitna samjhaate hain ki sirf buddhi se samjho baba ham aapke hain। is samay duniya saari pattharbuddhi hai। yeh baba bhi kehte hain hamne shaastra aadi padhe the, jaante kuchh nahin the। agar koi kahe mujhe yeh shiksha guru se mili hai to kya guru se shiksha ek ko hi milti hai kya? guru ke followers to bahut hote hain। agar guru ki shiksha li hoti to guru ki padvi bhi li hoti। yeh to baat hi niraali hai। shivbaaba inke dvaara shiksha de, sabse buddhiyog hatvaate hain। ek hi dhak se sab kuchh chhuda diya। bahut bachchon ne bhi aise hi kiya। bhatthi banni thi, paakistaan mein bachchon ki kitni sambhaal hui। buddhivaanon ki buddhi baba baitha tha। ham paakistaan government ko kehte the anaaj achha nahin milta। jhat officer kah dete jo chaahiye so pasanda kar le jaao। buddhi ka taala kholne vaala baba tha। sahan to kuchh karna hota hai। kumaariyaan kitni maar khaati hain। kitna yaad karti hain। baba kamaal hai aapki ki hamko eeshvareey lottery milti hai। kitna bachchon ko meetha banna hai, pyaar se chalna hai। ghar vaalon ko bhi uthaana hai। rachayita agar bhaag jaay to rachna ka kya haal hoga। yahaan sannyaasiyon ka yeh part tha, us samay pavitrata ki darkaar thi। yeh saara khel bana hua hai। saari raajdhaani yahaan sthaapan ho rahi hai। satayug mein patiton ko paavan nahin banaayenge। yeh sagammayug hi mashhoor hai। baba kehte hain mainne aage bhi kaha tha ki kalpa, kalpa ke sangamayuge aata hoon। unhonne phir yuge-yuge, kachchha machchha avtaar likh diya hai। manushya bhi sat sat karte rehte hain। raavan-raajya hai na। sannyaasi sadaiv shanti maangate hain, sukh ko nahin maanenge। kahenge gyaan theek nahin hai। duniya mein sukh hai kahaan। raam tha to raavan bhi tha। krishna tha to kans bhi tha, aur svarga mein apaar sukh tha। krishna ko itna pyaar karte hain। woh to svarga mein hi milega। yeh to abhi tumhaari manokaamna poorn hoti hai। tum jaante ho baba krishnapuri mein le chalne ke liye purushaartha kara rahe hain। to baba ke saath sachchaai-saphaai bahut chaahiye। chhipaane se bahut nuksaan hota hai। na sunaane ke kaaran bhool vriddhi ko paati rehti hai। baba kadam-kadam par shreemat dete hain phir bhi koi raay par na chale to baba kya kare।

baba samjhaate hain tum eeshvareey santaan mein badi royalty aur sayaanaapan chaahiye। bahut pyaar se tumhein sabko baap ki pahchaan deni hai। poochhte hain parampita paramatma ke saath tumhaara kya sambandh hai? woh to svarga ka rachayita hai to svarga ke maalikapne ka varsa hona chaahiye। tumko varsa tha, hara diya phir tumko dete hain। yeh lakshmi-naaraayan yahaan ka lakshya hai। baap zaroor satayug ka hi raajya bhaagya denge। tum bachchon ko service karni chaahiye। sabko jeeydaan dena hai - 21 janma ke liye। tum hi mahaan punya aatma ho। tumhaare jaisi punya aatma koi ho na sake। punya ki duniya mein tum chalne vaale ho, bahut meetha banna hai। yeh hai patit-paavan baap aur daada। bachchon ko veshyaalay se nikaal shivaalay mein le chalne liye aaye hain, inko raurav narka bhi kehte hain। yahaan duhkh hi duhkh hai। baba aaya hai duhkhadhaam se nikaal sukhdhaam mein le chalne ke liye। ham aise paarlaukik maat-pita se sada sukh lene ke liye, milne ke liye aaye hain। yeh bahut khushi ki baat hai। tumhaare ko khushi hai ki ham shivaalay sthaapan karne vaale bholaanaath bhandaari baba ke paas jaate hain। yaad bhi shiv ko karna hai, rath ko nahin karna hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ke saath sada sachcha rehna hai, kuchh bhi chhipaana nahin hai। bahut-bahut royalty aur samajhdaari se chalna hai।

2) 21 janmon ke liye har ek ko jeeydaan dene ki seva kar punya aatma banna hai। aatma roopi sui par jo kat chadhi hui hai। use yaad ki yaatra mein rah utaarna hai।

vardaan:- sneh ki udaan dvaara sameepta ka anubhav karne vaale paas with honour bhav

sneh ki shakti se sabhi bachche aage badhte ja rahe hain। sneh ki udaan tan se, man se va dil se baap ke sameep laati hai। gyaan, yog, dhaarna mein yathaashakti nambarvaar hain lekin sneh mein har ek number one hain। sneh mein sabhi paas hain। sneh ka arth hi hai paas rehna aur paas hona va har paristhiti ko sahaj hi paas kar lena। aise paas rahne vaale hi paas with honour bante hain।

slogan:- maaya aur prakriti ke toofaanon mein safe rehna hai to diltakhtansheen ban jaao।