Daily Murli for Tuesday 24 May 2022

24-05-2022 praatahmurli om shanti "baapdaada"' madhuban

“meethe bachche - baap hi satguru ke roop mein tum bachchon se guarantee karte hain, bachche main tumhein apne saath vaapas le jaaoonga, yeh guarantee koi dehdhaari kar na sake''

prashn:- tum bachche yeh katha jo sun rahe ho, yeh poori kab hogi?

uttar:- jab tum pharishte ban jaayenge। katha sunaai jaati hai patit ko। jab paavan ban gaye to katha ki darkaar nahin, isliye sookshm vatan mein paarvati ko shankar ne katha sunaai - yeh kehna hi wrong hai।

prashn:- shivbaaba ki mahima mein kaun se shabd right hain, kaun se wrong?

uttar:- shivbaaba ko abhokta, asochta, karnakraavanhaar kehna right hai। baaki akarta kehna right nahin kyonki woh patiton ko paavan banaate hain।

geet:- chhod bhi de aakaash sinhaasan…

om shanti। yeh hai bachchon ki pukaar ki baba abhi aa jaao kyonki ham phir se raavan raajya mein duhkhi hain। phir se maaya ka parchhaaya pad gaya hai arthaat 5 vikaar roopi raavan ne hamko bahut duhkhi kiya hai। respond mein baba kehte hain haan bachche, yeh to mera niyam hai। yeh zaroor aa karke hi kahenge na। haan bachche, jab-jab dharti par bhaaratvaasi bilkul hi bhrashtaachaari duhkhi bane hain, kitne guru karte hain sadgati ke liye, parantu woh kisi ki sadgati to karte nahin। sabhi andhon ki laathi to ek prabhu hi hai। pahle-pahle baap janma dete hain arthaat adopt karte hain, guru sadgati karte hain। abhi na koi sadgati karte hain, na koi baba hai। abhi tum kehte ho parampita paramatma hamaara baba bhi hai, guru bhi hai। us ek ko hi satguru, sat baba kah sakte hain। woh hai sat baba, unko supreme kaha jaata hai। satguru bhi hai। saath mein le jaate hain। guarantee hai aur koi guru guarantee kabhi nahin karenge ki ham tum aatmaon ko vaapis le jaaoonga। woh jaante hi nahin। yeh hain sab nai baaten। tum jab inko dekhte ho to buddhi mein yaad shiv ko karna hai। vahi baap, teacher, guru hai। manushya koi guru karte hain va teacher karte hain to unke shareer ko hi dekhte hain। aatma hi bhinna shareer dhaaran kar, bhinna-bhinna naam-roop, desh, kaal mein jaati hai। achha baba to ek hai aur ek baar aate hain। woh to punarjanma nahin lete। sanskaar to aatma mein hain। woh jab shareer dhaaran karegi tab varnan hoga na। tum bachche baap ki mahima gaate ho - woh niraakaar hai, kabhi saakaar shareer lete nahin hain। shiv ka apna shareer to hota nahin। parantu gyaan ka saagar, patit-paavan hai, satguru hai। baba bhi hai, raajayog bhi sikhaate hain। jo brahmaanda ka, saare vishwa ka maalik hai, vahi svarga ka maalik banaayenge na। shareerdhaari to bana na sake। sivaae bachchon ke baap ko koi jaante nahin। tum kahenge paramatma hamko padhaate hain। to kahenge yeh to koi shaastron mein nahin hai ki niraakaar parampita paramatma shareer mein aate hain। are shiv jayanti gaai jaati hai। geet mein bhi kaha roop badalkar aao। to woh kis shareer, kis roop mein aaya? tumhaara to yeh hai karma bandhan ka shareer। achhe karma se achha pad bure karma se bura pad milta hai, inke liye to aisa nahin kahenge। manushya to punarjanma zaroor lete hain। baap nahin lete। usne is shareer mein pravesh kiya hai। bataate bhi hain shivbaaba brahma dvaara sthaapna karte hain। shiv to niraakaar hua, brahma dvaara kaise karte hain? kya oopar se prerna dete hain? patit duniya mein aate hain to kis shareer mein aaven, jo raajayog sikhaave। tum bachche jaante ho baba aaya hua hai, ham unse sunte hain। woh is brahma mukh se sunaate hain aur sab dehdhaari guru ka naam bataayenge। tum jaante ho niraakaar shiv hamaara baba hai। pahle to baba janma dene vaala chaahiye na। shivbaaba prajaapita brahma dvaara adopt karte hain। prajaapita ko kukh se to itne bachche ho na saken। prajaapita brahma ke to athaah bachche hain। brahman kul bahut bada hai, jo brahman phir devta banenge। jab devta banenge to adoption nahin hogi। adoption abhi hai। kitne brahman hain।

bachche jaante hain ham shivbaaba ke paas aaye hain। vahi knowledgeful hai। kehte hain main tum bachchon ko hi yeh knowledge sunaata hoon। mera apna shareer to hai nahin। shiv jayanti manaate hain parantu kaise shiv baba aaya, yeh koi nahin jaante। kehte bhi hain shiv raatri। raatri mein krishna ka bhi janma dikhaate hain। shiv jayanti ke baad phat se shreekrishna ka janma hota hai। shiv ka janma to hai sagamm par। brahma ki raat poori ho phir din shuru hota hai। usi sangam par baap aate hain। yeh hai behad ki raatri, woh hai had ki। aadhaakalpa din, aadhaakalpa raat। bhakti maarga mein dhakke hi khaate rehte hain, bhagwan milta nahin to andhiyaara thahra na। bilkul hi buddhiheen hain। gaate hain parampita paramatma oopar hai.. phir kehte hain teertha yaatra par bhi bhagwan milega। daan-punya se bhi milega। kitna samay tumne dhakke khaaye hain। anek maten hain isliye kaha jaata hai bhakti maarga hai brahma ki raat। dhakke khaate-khaate durgati ko paakar paap aatma ban padte hain। vikaar se paida hone vaalon ko hi paap aatma kaha jaata hai। tum aise to nahin kahenge ki shreekrishna koi vikaar se paida hue। nahin, woh to yogbal se paida hote hain। in baaton ko tum bhaaratvaasi grihastha dharma vaale jaante ho। sannyaasi nahin jaante, na maante hain।

baap kehte hain laadle bachche satayug mein tum pavitra pravritti maarga mein the phir punarjanma lete patit bhi bante ho। bhaarat pavitra tha, devtaaon ka raajya tha। vahaan shanti bhi thi, yoon shantidham, nirvaandhaam hai parantu satayug mein bhi tumko varsa mila hua hai, isliye vahaan kabhi ashaanta hote nahin। ek do ko duhkh de kabhi ashaanta nahin karte। koi bhi kisko duhkh nahin dete। yahaan to bachche bhi maa baap ko duhkh de ashaanta kar dete hain। abhi tum shanti ke saagar se varsa le rahe ho। vahaan koi ladaai jhagda nahin hota hai। yahaan bhi tumhaari woh avastha chaahiye। aapas mein loonpaani nahin hona chaahiye। pahle-pahle to yeh nishchay chaahiye - behad ka baap aaya hua hai, hamko duhkh ki duniya se le jaayenge ghar। satayug mein to baap aate nahin। yahaan aakar in khidkiyon se (naynon se) tumko dekhte hain। inki aatma bhi dekhti hai, shivbaaba bhi dekhte hain। ek shareer mein do aatmaayen kaise ho sakti, manushya nahin maanenge। are tum brahman khilaate ho, pati ki athva baap ki aatma ko bulaate ho, woh aakar bolti hai। unse poochhte hain to do aatmaayen hui na। baba kehte hain woh aatmaayen aakar baithti nahin hain। yeh ho na sake। baap ko to apna shareer hai nahin। woh to aa sakta hai na। 5 hajaar varsha pahle bhi hamne aise kaha tha ki saadhaaran boodhe tan mein bhaageerath arthaat bhaagyashaali rath mein aata hoon। zaroor manushya ke tan mein aayega na ki bail par aayega? sookshm vatan mein shankar ke aage bail kahaan se aaya? agar shankar ki athva shankar paarvati ki pooja karte hain to main saakshaatkaar kara deta hoon। baaki yeh dikhaaya hai shankar ne paarvati ko katha sunaai, yeh hai jhooth। shankar kyon katha sunaayenge? sookshm vatan mein to darkaar hi nahin। tum pharishte ban jaayenge to katha poori hogi। katha sunaai jaati hai patit ko paavan banaane ke liye। baba amraktha sunaate hain amarlok mein le jaane, laayak banaate hain। amarlok satayug ko kaha jaata hai। yeh hai mrityulok।

aaj baba ne poochha shivbaaba snaan karte hain? bola, baapdaada karte hain। hamne kaha snaan to daada karte hain na। shiv kyon karega! unko thode hi paakhaane mein jaana hai jo snaan karen। shiv to abhokta hai na। yeh samajh ki baat hai na। woh thode hi apvitra bante hain jo snaan karenge। woh to aate hi hain patiton ko paavan banaane। karnakraavanhaar, abhokta, asochta hai। akarta kehna wrong ho jaata hai। patiton ko paavan karte hain na। karnakraavanhaar hai। (khaansi hui) inki aatma ka yeh shareer roopi baaja defected ho gaya to shivbaaba kya karega? tum aise nahin kahenge ki shivbaaba ke baaje mein defect hua। nahin, yeh shareer unka nahin, loan liya hua hai। loan li hui cheez toot jaati hai to dhani ki tootegi na। shivbaaba is shareer ka dhani nahin। dhani to yeh (brahma) hai। usne yeh kiraaye par liya hai। yeh bhaagyashaali rath hai। bail ek hi hai। phir gau mukh bhi kehte hain। baba kehte hain barobar koi-koi bachchiyaan itni hoshiyaar nahin hain। kisko uthaana hai to main bachchon mein jaakar uthaata hoon। patit duniya mein, patit shareer mein to aana hi hota hai। to kiska kalyaan karne ke liye bhi bachchon mein pravesh karta hoon। bachche nahin samjhenge। unse bhi woh sunne vaale bade teekhe ho jaate hain। yeh baap ki madad milti hai। ek to nishchaybuddhi hain, doosra phir drishti milti hai। baba kehte hain main pravesh kar sakta hoon, aise nahin main sarvavyaapi hoon। mujhe bahuroopi kyon kehte hain? jo jiski pooja karte hain unka saakshaatkaar karaata hoon। saakshaatkaar mein aise dekhte hain ki jaise saamne aa rahe hain। vishnu ka saakshaatkaar hota hai, vishnu chaitanya ho jaata hai। maathe par haath rakhte hain। kehte hain mujhe chaturbhuj ka saakshaatkaar hua। parantu unse phaayda kya? kuchh bhi nahin। sirf dil khush hui - mujhe bhagwan ka deedaar hua। bhakti mein deedaar bahut hote hain, parantu isse sadgati ko nahin paate hain। jabki gaate hain sadgati daata, patit-paavan ek hai। vishnu nahin ho sakta। woh baap thode hi honge। baap ek hai phir unka bachcha bhi ek hai prajaapita brahma। aise kabhi nahin kahenge prajaapita vishnu va shankar। prajaapita ek, phir unse brahman adoption hoti hai। bachche jaante hain ham pahle brahman bante hain phir devta bante hain। braahmanon ki maala accurate ban na sake kyonki adal-badal hoti rehti hai। koi girte, koi marte rehte hain। phir kya karenge! unko nikaal denge? rudra maala ant mein hi accurate banengi। yeh meethi-meethi baaten baap hi sunaate hain aur koi ko pata hi nahin hai। kitne hain jo kehte hain he raam ji sansaar bana hi nahin hai..... ab raamchandra to yahaan se praalabdha le jaate hain, treta mein jaakar raaja bante, unko phir agyaan kahaan se aaya? jo vashishtha unko gyaan de ki sansaar bana hi nahin hai। yeh srishti ka chakra hai। sabhi baaton mein moonjhe hue hain। koi bhi nahin jaante hain, na samajh sakte hain। shivbaaba ko hi gum kar diya hai। shiv jayanti manaate bhi hain, parantu samajhte nahin। shreekrishna hi saavanra banta hai। baba aate bhi tab hain jab inko saanvare se gora banaana hai। shiv jayanti ke baad jhat shreekrishna ka janma hota hai। shivbaaba aakar raajayog sikhaate hain, kisko? braahmanon ko। prajaapita brahma ke mukh vanshaavli ko। vahi phir raaja raani bante hain। shivbaaba chale jaayenge phir lakshmi-naaraayan ka raajya hoga to baap ne krishna ko aisa banaaya hai। unhonne phir baap ke badle krishna ka naam laga diya hai। krishna ko dvaapar mein le gaye hain। ab shivbaaba raajayog sikhaate hain। tum jaante ho ham svarga ki raajdhaani sthaapan kar rahe hain, aur bhi bahut prince princess bante hain। sangam aur satayug ka kisko pata hi nahin। main aata hi hoon kalpa ke sangam par। unhonne phir yuge-yuge kah diya hai। so bhi 4 yug hote hain। dvaapar ke baad kaliyug hota hai। phir us dvaapar yug mein aakar kya karenge? utarti kala mein sabko jaana hi hai। mera to part hi tab hai jab chadhti kala hoti hai, inko to neeche utarna hi hai। tum bachchon ko 84 janma poore karne hain। oonch te oonch hai brahman varna। brahman phir devta, kshatriy... yeh varna bhi bhaarat mein gaaye jaate hain। viraat roop ka chitra banaate hain, unmein braahmanon ko aur shiv ko gum kar diya hai। yeh baaten koi shaastron mein nahin hain। shivbaaba aakar adopt karte hain brahma dvaara। shoodra se brahman banaate hain। baaki sookshmavtanvaasi brahma woh kaise prajaapita ban sakte। pahle yeh nishchay chaahiye barobar woh baap bhi hai, teacher bhi hai, satguru bhi hai। kehte bhi hain sadgati daata ek hai parantu unka naam roop desh kaal nahin jaante। achha !

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani bachchon ko roohaani baap ki namaste।

dhaarna ke liye mukhya saar:-

1) shanti ke saagar baap se shanti - sukh ka varsa le shant chit rehna hai। kabhi kisi ko duhkh de ashaanta nahin karna hai। loonpaani nahin hona hai।

2) baap samaan andhon ki laathi banna hai। baap ki madad lene ke liye nishchaybuddhi ban seva karna hai।

vardaan:- ek ke paath ko smriti mein rakh tapasya mein saphalta praapta karne vaale nirantar yogi bhav

tapasya ki saphalta ka vishesh aadhaar va sahaj saadhan hai - ek shabd ka paath pakka karo। tapasya arthaat ek ka banna, tapasya arthaat man-buddhi ko ekaagra karna, tapasya arthaat ekaantapriy rehna, tapasya arthaat sthiti ko ekras rakhna, tapasya arthaat sarva praapta khajaanon ko vyartha se bachaana arthaat economy karna। is ek ke paath ko smriti mein rakho to nirantar yogi, sahajyogi ban jaayenge। mehnat se chhoot jaayenge।

slogan:- aagyaakaari vo hain jo man aur buddhi ko manmat se sada khaali rakhte hain।