Daily Murli for Monday 18 July 2022

18-07-2022 praatahmurli om shanti "baapdaada"' madhuban

“meethe bachche - abhi tum baap ki nazar se nihaal hote ho, nihaal hona arthaat svarga ka maalik banna''

prashn:- aur sang tod ek sang jod… is direction ko amal mein kaun la sakta hai?

uttar:- jinki buddhi mein em object clear hai। tumhaari em-object hai muktidhaam mein jaane ki, uske liye shareer se bhi buddhiyog nikaalna pade। talkie, movie se bhi pare silence mein rahne ka abhyaas karo kyonki tumko silence athva nirvaan mein jaana hai।

geet:- jale na kyon parvaana....

om shanti। bachche jaante hain ham kiski nazar ke saamne baithe hain, tum apne paarlaukik parampita paramatma ki nazar ke saamne baithe ho। tum jaante ho is baba ki nazar ke saamne aane se ham 21 janma svarga ka varsa paate hain। kabhi koi saadhu-santa ke paas jaate hain to kehte hain yeh to nazar se nihaal kar dete hain। ab nazar se nihaal ka arth to tum braahmanon ke sivaae koi samajh nahin sakte। nazar ke saamne ab tum baithe ho। baap ki nazar mein bachche, bachchon ki nazar mein baap hai। bachche nihaal hote hain baap ki nazar se। baap se hi varsa milta hai। tum ho behad ke bachche। tum nazar ke saamne baithe ho। barobar do akshar sun rahe ho। mujhe nirantar yaad karo to tum nihaal ho jaayenge arthaat svarga ke maalik ban jaayenge। barobar second mein nazar se nihaal kar mukti aur jeevanmukti de dete hain। woh hai niraakaar parampita paramatma। jaante hain yeh hamaare bachche aakar bane hain, jinko pakka nishchay hai ki ham parampita paramatma ki santaan hain, woh zaroor svarga ke maalik banenge। nazar se nihaal bhi hona hai aur svarga ke maalik bhi banna hai, svarga mein hai baadshaahi। yahaan sab narka ke maalik hain arthaat narka ke nivaasi hain। usmein bhi nambarvaar pad hain। bhal abhi raajaai nahin hai - parantu woh bhi dil mein samajhte hain na ki ham jaypur ke maalik the। likhte bhi hain mahaaraaja aaph jaypur, mahaaraaja aaph patiyaala... kahne mein to aata hai na। woh khud bhi jeete hain, unki vanshaavli bhi jeeti hai। abhi woh bhi praja mein aa gaye hain। ab tum jaante ho ham shreemat par phir se daivi svaraajya sthaapan kar rahe hain। baap ne samjhaaya hai yahi bhaarat paavan tha, ab patit ban pada hai। tumko ab teesra netra mila hai। aatma jaanti hai ki abhi ham ek parampita paramatma ko yaad karte hain aur unse hi varsa milta hai। bhagvaanuvaach bhi hai ki mujhe yaad karo aur sang todo। apne shareer se bhi todo, ashareeri bano। pahle tum ashareeri aaye the। aatmaayen sab ashareeri hoti hain। mool vatan mein ashareeri hone kaaran aavaaj nahin hota hai, isliye unko nirvaandhaam kaha jaata hai। sookshm vatan mein movie hoti hai। talkie, movie aur silence। aage movie naatak bhi the, ab talkie ban gaye hain। tum bachchon ko silence sikhaai jaati hai। tum apne svadharma mein tiko, ghar ko yaad karo। talk chhodna hai। bhun-bhun bhi nahin karni hai। andar mein raam-raam kehte hain, ab baap kehte hain bachche yeh bhi chhodo। tumko vaani se pare jaana hai - yahaan rehte talkie aur movie se pare jaana hai। yeh em object buddhi mein clear hai ki hamko muktidhaam jaana hai। baba mukti-jeevanmukti dete hain। pahle aatmaayen sabhi silence mein jaati hain phir har ek ko apna-apna part bajaane aana hai। devi devta dharma vaalon ka apna part, islaami, bauddhi dharma vaalon ka apna part। yeh sab baaten tum bachchon ki buddhi mein hain। baap ke paas yeh saari knowledge hai jab tumko saari knowledge sunaate hain, aap samaan banaate hain। tum phir auron ko aap samaan banaao। gyaani aur yogi banaao। jo knowledge mere paas hai vahi tumko deta hoon। aatma hi grahan karti hai। nambarvaar purushaartha anusaar knowledgeful ban jaate hain। koi to poore knowledgeful ban jaate hain। koi kam purushaartha se itne knowledgeful nahin bante hain। em object to yahi lakshmi-naaraayan hai। abhi tum knowledgeful bante ho। ab tum jaante ho ham kahaan se aaye। ab kahaan jaana hai? yeh chakra kaise phirta hai? ismen sab kuchh aa jaata hai। jaise beej se jhaad nikalta hai, inki aayu kitni badi ho jaati hai, phir unko jadajdeebhoot avastha kaha jaata hai। apne paas bhi jhaad tha woh ekdam saara jadajdeebhoot ho gaya to kaatna pada। banyan tree ka misaal। yeh bhi variety dharmo ka jhaad dikhaaya hai। pichhaadi tak thode-thode aate rehte hain। pahle jo patte nikalte hain woh bahut shobhte hain kyonki satopradhaan hote hain। phir rajo tamo ban jaate hain। aadhaakalpa tum raajya karte ho phir dheere-dheere tum neeche aate ho। utarti kala aur chadhti kala hoti hai। chadhte phat se hain। poori raajdhaani sthaapan hone mein thoda samay to lagta hai।

baap samjhaate hain main hi sangam par aakar daivi raajya sthaapan karta hoon। sooryavanshi aur chandravanshi gharaana abhi hi sthaapan hota hai jo phir nai duniya amarlok mein aakar apna raajya bhaagya karte hain, inko hi sangamayug kaha jaata hai। doosra koi sangam par nahin aata hai, sirf ek baap hi aate hain। yeh baat koi shaastron mein nahin hai ki phir se kab aata hoon। yeh koi ko pata nahin pad sakta hai। yeh sirf tum bachchon ko hi pata padta hai। kalpa-kalpa yeh part chalta hai। saara jhaad puraana hota hai phir sangamayug par inka foundation lag raha hai। yeh hai patit duniya। satayug hai paavan duniya। gaate bhi hain ki ham patiton ko paavan banaane ke liye aao। ab sabhi paavan ban rahe hain। phir jab aayenge to paavan hi honge। parantu sabko ikattha to nahin aana hai। baap kitna achhi reeti samjhaate hain। abhi yeh principal baitha hai, to kyon na yeh knowledge sabko deni chaahiye। to sab jaan jaayen ki world ki history geography kya hai, yeh kaise repeat hoti hai? yeh kisko pata nahin hai, god is one। aur koi creator hai nahin, na oopar koi duniya hai, na neeche koi duniya hai। yeh jo kehte hain aakaash-paataal, yeh sab gapode hain। samajhte hain stars ke oopar bhi duniya hai। parantu vahaan kisi ki raajdhaani nahin hai, baba principal bachche ko bhi kehte hain ki jo achhe students hain, unko yeh history-geography samjhaao। gavarnmenta ko bhi eproch karo। bade-bade officers ko samjhaao। parantu badi yukti se samjhaana hai ki satayug mein aadi sanaatan devi-devta dharma ki raajdhaani thi। unhonne yeh raajya kaise praapta kiya? shaastron mein dikhaaya hai devtaaon aur daityon ki ladaai lagi, phir devtaaon ne jeet liya। mahaabhaarat ki ladaai ek hi lagti hai। uske baad phir koi ladaai lagi hi nahin। baap kehte hain school mein bachchon ko yeh knowledge do। koi invention nikalti hai to pahle raaja ko dikhaate hain phir un dvaara vriddhi ko paati hai। yeh aatma ko srishti chakra ke aadi madhya ant ka gyaan milta hai jisse 21 janmon ke liye chakravarti raaja bante hain।

tumhaare mein bhi bahut hain jo padhe-likhe nahin hain। baba kehte hain - bahut achha। bahut padhe-likhe bhi the parantu yeh imtihaan paas nahin kar sake। yahaan to second ki baat hai। satayug mein lakshmi-naaraayan ka raajya tha। treta mein raam-seeta ka raajya shuru hota hai, aadha kalpa ke baad bhakti maarga shuru hota hai, dhakke khaane padte hain। manushya kehte bhi hain O god father। to zaroor unse heaven ka varsa milna chaahiye। manushya jab marta hai, poochha jaata hai kahaan gaya? kehte hain svarga sidhaara। woh samajhte hain, aasmaan mein svarga hai। kitne besmajh ban gaye hain। yeh hai hi kaanton ka jangal। bhaarat hi phoolon ka bageecha hai। ab tum flower ban rahe ho।

baap samjhaate hain koi ko bhi duhkh nahin dena hai। duhkh diya to duhkhi hokar marenge। oonch pad pa nahin sakenge। tum jaante ho ham baba ke paas aaye hain sada sukh ka varsa paane। tum brahman bane ho। brahman sabse oonch gaaye jaate hain। braahmanon ki nishaani hai choti। achha brahma ka baap kaun? woh hai niraakaar shiv। shivbaaba aur prajaapita brahma hai saakaar। ab shivbaaba ki nishaani kya rakhen? parampita paramatma to star hai, parantu na jaanne kaaran bada ling bana dete hain। bindi ki pooja kaise karen? roodra pooja bhi hoti hai। roodra shiv ko bada banaate hain aur saaligraam chhote-chhote banaate hain। kehte bhi hain bhrakuti ke beech mein star hai। aatma ka bhi saakshaatkaar hota hai। jaise aakaash mein taara tootta hai to saara saphed ho jaata hai, vaise aatma bhi bindi hai। aakar itne bade shareer mein pravesh karti hai phir kitna kaam karti hai। aatma itni chhoti jab shareer se nikal jaati hai to phir shareer koi kaam nahin kar sakta। kahenge mar gaya। ek shareer chhod doosra shareer le part bajaate hain phir usmein rone ki koi darkaar hi nahin hai। parantu jab drama ko jaanen tab aise kahen, ab tumko yeh gyaan hai ki ham yeh puraana shareer chhod apne nirvaan-dhaam mein jaayenge। yeh knowledge bhi tumko yahaan hai phir to bade-bade school, college mein jaakar badon-badon ko yeh knowledge do। to bhaarat mein sooryavanshi, chandravanshiyon ka raajya tha, jo ab nahin hai। phir zaroor hoga। yeh anaadi world drama hai, inki knowledge bachchon mein zaroor honi chaahiye। yeh knowledge hone se bhaarat svarga ban jaata hai। abhi knowledge nahin hai to bhaarat kangaal hai। phir is knowledge se bhaarat ko svarga banaate hain। kyon na bachche bhi yeh knowledge lekar heaven ke laayak banen। tum bhi bano। kisko bhi chhodna nahin chaahiye। baba service ki yuktiyaan to bahut bataate hain। karna to bachchon ko hai। baap to nahin jaayega। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne svadharma mein sthit rah silence ka anubhav karna hai kyonki ab vaani se pare nirvaandhaam mein jaane ka samay hai।

2) sukh daata ke bachche hain isliye sabko sukh dena hai। kisi ko bhi duhkh nahin dena hai। sachcha flower banna hai। kaanton ko phool banaane ki seva karni hai।

vardaan:- sarva shaktiyon se sampanna ban har shakti ko kaarya mein lagaane vaale master sarvashaktimaan bhav

jo bachche sarva shaktiyon se sada sampanna hain vahi master sarvashaktimaan hain। koi bhi shakti agar samay par kaam nahin aati to master sarvashaktimaan nahin kah sakte। ek bhi shakti kam hogi to samay par dhokha de degi, fail ho jaayenge। aise nahin sochna ki hamaare paas sarva shaktiyaan to hain, ek kam hui to kya harja hai। ek mein hi harja hai, ek hi fail kar degi isliye ek bhi shakti kam na ho aur samay par woh shakti kaam mein aaye tab kahenge master sarvashaktimaan।

slogan:- praaptiyon ko bhoolna hi thakna hai isliye praaptiyon ko sada saamne rakho।

maateshvari ji ke anmol mahaavaakya

jab ham om shabd ka uchchaaran karte hain to om ka arth hai main aatma hoon aur paramatma ka bachcha hoon। yeh shiv naam sirf ek hi paramatma ka hai, is shabd par bahut hi manushya aisa prashn poochhte hain paramatma to saari duniya ka maalik athva baap hai, use phir shiv naam se kyon bulaate hain? ab is raaz ko duniya nahin jaanti। paramatma ka naam hai shiv kyoki duniya mein anek dharma hai to har ek dharma vaale paramatma ko apna-apna naam dekar bulaate hain। koi god kahkar bulaayenge, koi khuda, koi allaah, koi phir shiv kahkar bulaate hain। vaise bhaarat mein paramatma shiv ke naam se gaaya hua hai, to saari duniya vilaayat vaale shiv naam se paramatma ko kaise maanenge? ab is par samjhaaya jaata hai, vaastav mein paramatma ka naam shiv hai vo jyoti swaroop hai, unki yaadgaar pratima shivling roop mein pooji jaati hai। so bhi khaas karke bhaarat mein pooja jyaada hoti hai kyonki paramatma ka janma bhaarat khanda mein hua, to zaroor is desh ka hi naam padega। zaroor paramatma ek hi jagah aayega na। agar vilaayat ke taraph aayega to bhaaratvaasi kaise maanenge parantu bhaarat khanda ka naam bada mashhoor hai, yeh avinaashi akhanda gaaya jaata hai isliye yahaan khud paramatma padhaar gaye hain aur paramatma ke mahaavaakya hain ki jab bhaarat par ati dharma glaani hoti hai tab hi main adharma ka vinaash aur satdharma ki sthaapna karne aata hoon aur yeh saara kaarya main ek baar avtaar dhaaran karke karta hoon, to paramatma ka avatran bhi bhaarat mein hua, jahaan kalpa pahle aaye the vahaan hi phir aana hota hai isliye bhaarat ko avinaashi khanda kehte hain। bhaarat khanda paramatma ka janma sthaan bhi hai aur devtaaon ke raajya ka sthaan bhi hai। achha - om shanti।