Daily Murli for Saturday 7 January 2023

07-01-2023 praatahmurli om shanti "baapdaada"' madhuban

“meethe bachche - tumhein baap dvaara baap ki leela arthaat drama ke aadi-madhya-ant ka gyaan mila hai, tum jaante ho ab yeh naatak poora hota hai, ham ghar jaate hain''

prashn:- svayan ko baap ke paas register karaana hai to uske liye kaunsa kaayda hai?

uttar:- baap ke paas register hone ke liye 1- baap par poora poora bali chadhna padta। 2-apna sab kuchh bhaarat ko svarga banaane ki seva mein saphal karna hota। 3- sampoorn nirvikaari banne ka kasam uthaana padta aur phir rahkar bhi dikhaana hota। aise bachchon ka naam almighty government ke register mein aa jaata hai। unhein nasha rehta ki ham bhaarat ko svarga va raajasthaan bana rahe hain। ham bhaarat ki seva ke liye baap par bali chadhte hain।

geet:- om namo shivaae…

om shanti। jiski mahima mein yeh geet hai vahi baithkar apne rachna ki mahima sunaate hain। jisko leela bhi kaha jaata hai। leela kaha jaata hai naatak ko aur mahima hoti hai gunvaan ki। to unki mahima sabse nyaari hai। manushya to jaante nahin। bachche jaante hain ki us parampita paramatma ka hi itna gaayan hai jiski shiv jayanti bhi ab najdeek hai। shiv jayanti ke liye yeh geet bhi achha hai। tum bachche uski leela ko aur unki mahima ko jaante ho, barobar yeh leela hai। isko naatak (drama) bhi kaha jaata hai। baap kehte hain ki devtaaon se bhi meri leela nyaari hai। harek ki alag-alag leela hoti hai। jaise government mein president ka, minister ka martaba alag-alag hai na। agar paramatma sarvavyaapi hota to sabki ek act ho jaati। sarvavyaapi kahne se hi bhookh mare hain। koi bhi manushya na baap ko, na baap ki aparmaapaar mahima ko jaante hain। jab tak baap ko na jaanen tab tak rachna ko bhi jaan na saken। abhi tum bachchon ne rachna ko bhi jaana hai। brahmaanda, sookshm vatan aur manushya srishti ka chakra buddhi mein phirta rehta hai। yeh hai leela athva rachna ke aadi-madhya-ant ki knowledge। is samay duniya ke manushya hain naastik। kuchh bhi nahin jaante aur gapode kitne lagaate hain। saadhu log bhi conference aadi karte rehte hain, bichaaron ko yeh pata hi nahin ki ab naatak poora hota hai। abhi kuchh touch hota hai। jabki naatak poora hone ko aaya hai। abhi sab kehte hain raamraajya chaahiye। Christian ke raajya mein aise nahin kehte the ki naya bhaarat ho। abhi bahut duhkh hai। to sabhi aavaaj karte hain ki he prabhu duhkh se chhudaao। kaliyug ant mein zaroor jaasti duhkh hoga। din-pratidin duhkh vriddhi ko paata jaayega। woh samajhte hain sabhi apna-apna raajya karne lag padenge। parantu yeh vinaash to hona hi hai। yeh koi jaante nahin।

tum bachchon ko kitna khushi mein rehna chaahiye। tum kisko bhi kah sakte ho ki behad ka baap svarga rachta hai to bachchon ko bhi svarga ki baadshaahi honi chaahiye। bhaaratvaasi khaas isliye yaad karte hain। bhakti karte hain bhagwan se milne chaahte hain। shreekrishnapuri mein jaane chaahte hain, jisko hi svarga kehte hain। parantu yeh nahin jaante ki satayug mein hi shreekrishna ka raajya tha। phir abhi yeh kaliyug poora hoga, satayug aayega tab phir shreekrishna ka raajya hoga। yeh to sabhi jaante hain ki shiv paramatma ki sabhi santaan hain। phir paramatma ne nai srishti rachi hogi। to zaroor brahma ke mukh dvaara rachi hogi। brahma mukh vanshaavli to zaroor brahman kul bhooshan honge, woh samay bhi sangam ka hoga। sangam hai kalyaankaari yug। jab paramatma ne baith raajayog sikhaaya hoga। abhi ham hain brahma mukh vanshaavli brahman। baaki tum kahenge ham kaise maanen ki brahma ke tan mein paramatma aakar raajayog sikhaate hain। tum bhi brahma mukh vanshaavli ban raajayog seekho to aapehi tumko bhi anubhav ho jaayega। ismen banaavat ki va andhashradha ki koi baat hi nahin। andhashradha to saari duniya mein hai, ismen bhi khaas bhaarat mein gudiyon ki pooja bahut hoti hai। idol-prastha bhaarat ko hi kaha jaata hai। brahma ko kitni bhujaayen dete hain। abhi yeh kaise ho sakta। haan brahma ke bahut bachche hain। jaise vishnu ko 4 bhujaayen dikhaate hain do lakshmi ki, do naaraayan ki। vaise brahma ke bhi itne bachche honge। samjho 4 karod bachche ho to brahma ki 8 karod bhuja ho jaayen। parantu aise hai nahin। baaki praja to zaroor hogi। yeh bhi drama mein noondh hai। baap aakar yeh sab baaten samjhaate hain। woh to samajh nahin sakte ki aakhreen kya hona hai। kitne plans banaate hain। kisam-kisam ke plans banaate hain। yahaan baba ka tum bachchon ke liye ek hi plan hai, aur yeh raajdhaani sthaapan ho rahi hai। jo jitni mehnat kar aap samaan banaayenge, utna oonch pad paayenge। baap ko knowledgeful, blissful, merciful kehte hain। baap kehte hain mera bhi drama mein part hai। maaya sab par berahmi kar rahi hai। hamko aakar raham karna padta hai। tum bachchon ko raajayog bhi sikhaata hoon। srishti chakra ka raaz bhi samjhaata hoon। knowledgeful ko gyaan ka saagar kaha jaata hai। tum bachche jaante ho, kisko samjha bhi sakte ho। yahaan andhashradha ki to koi baat hi nahin। ham niraakaar parampita paramatma ko maante hain। pahle-pahle unki mahima karni chaahiye। woh aakar raajayog dvaara svarga rachte hain। phir svargavaasiyon ki mahima karni chaahiye। bhaarat svarga tha to sabhi sarvagun sampanna 16 kala sampoorn… the। 5 hajaar varsha ki baat hai। to paramatma ki mahima sabse nyaari hai। phir hai devtaaon ki mahima। ismen andhashradha ki koi baat nahin। yahaan to sab bachche hain। followers nahin hain। yeh to family hai। ham eeshvar ki family hain। asul mein to ham sab aatmaayen parampita paramatma ke bachche hain to family hui na। woh niraakaar phir saakaar mein aate hain। is samay yeh wonderful family hai, ismen sanshay ki baat hi nahin। shiv ki sabhi santaan hain। prajaapita brahma ki santaan bhi gaaye hue hain। ham brahmaakumaar kumaariyaan hain, nai srishti ki sthaapna ho rahi hai। puraani srishti saamne hai। pahle to baap ki pahchaan deni hai। brahma vanshi banne bigar baap ka varsa mil na sake। brahma ke paas yeh gyaan nahin hai। gyaan saagar shivbaaba hai। unse hi ham varsa paate hain। ham hain mukh vanshaavli। sabhi raajayog seekh rahe hain। ham sabko padhaane vaala shivbaaba hai, jo is brahma tan mein aakar padhaate hain। yeh prajaapita brahma jo vyakta hai, woh jab sampoorn ban jaate hain tab pharishta ban jaate hain। sookshmavtanvaasiyon ko pharishta kaha jaata hai, vahaan haddi maas nahin rehta। bachchiyaan saakshaatkaar bhi karti hain। baap kehte hain bhakti maarga mein alpakaal ka sukh bhi mere dvaara hi tumko milta hai। daata main ek hi hoon, isliye eeshvar arpan karte hain। samajhte hain eeshvar hi phal dete hain। saadhu santa aadi ka kabhi naam nahin lete hain। dene vaala ek baap hai। karke nimitta koi dvaara dilaate hain, unki mahima badhaane ke liye। woh sab hai alpakaal ka sukh। yeh hai behad ka sukh। naye-naye bachche aate hain to samajhte hain jis mat par ham the unko phir ham yeh knowledge samjhaayen। is samay sab maaya ki mat par hain। yahaan to tumko eeshvareey mat milti hai। yeh mat aadhaakalpa chalti hai kyonki satayug treta mein ham iski praalabdha bhogte hain। vahaan ulti mat hoti nahin kyonki maaya hi nahin hai। ulti mat to baad mein hi shuru hoti hai। ab baba hamko aap samaan trikaaldarshi, trilokeenaath banaate hain। brahmaanda ka maalik bhi bante hain, phir srishti ke maalik bhi ham bante hain। baap ne bachchon ki mahima apne se bhi oonch ki hai। saari srishti mein aisa baap kabhi dekha jo bachchon ke oopar itni mehnat kare aur apne se bhi teekha banaaye! kehte hain tum bachchon ko vishwa ki baadshaahi deta hoon, main nahi bhogta। baaki divya drishti ki chaabi main apne haath mein rakhta hoon। bhakti maarga mein bhi mujhe kaam mein aati hai। ab bhi brahma ka saakshaatkaar karaata hoon ki is brahma ke paas jaakar raajayog seekh bhavishya prince bano। yeh to bahuton ko saakshaatkaar hota hai। prince to sabhi taaj sahit hote hain। baaki bachchon ko yeh pata nahin padta ki sooryavanshi prince ka saakshaatkaar hua va chandravanshi prince ka। jo baap ke bachche bante hain woh prince-princess to zaroor banenge phir aage va peechhe। achha purushaartha hoga to sooryavanshi banega nahin to chandravanshi। to sirf prince ko dekh khush nahin hona hai। yeh sab purushaartha par madaar rakhte hain। baba to har baat clear kar samjhaate hain, ismen andhashradha ki baat nahin hai। yeh hai eeshvareey family। is hisaab se to woh bhi eeshvareey santaan hain। parantu woh kaliyug mein hain, tum sangam par ho। kiske paas bhi jaao bolo ham shivvanshi, brahma mukh vanshaavli brahman hi svarga ka varsa pa sakte hain। kisko achhi reeti samjhaane ki mehnat karni padti hai। 100-50 ko samjhaayen tab unse koi ek nikle। jiski takdeer mein hoga woh koto mein koi niklega। aap samaan banaane mein time lagta hai। baaki saahookaar ka aavaaj bada hota hai। minister ke paas jaate hain to pahle woh poochhte hain aapke paas koi minister aata hai? jab sunaate hain ki haan aate hain to kahenge achha ham bhi chalte hain।

baap kehte hain main bilkul saadhaaran hoon। to saahookaar koi virla hi aate hain। aane zaroor hain parantu ant mein। tum bachchon ko bahut nasha rehna chaahiye। unhon ko samjhaana hai ham to bhaarat ki tan-man-dhan se seva karte hain। tum bhaarat ki seva ke liye hi bali chadhe ho na। aisa philanthropist koi hota nahin। woh to paise ikatthe kar makaan aadi banaate rehte hain। aakhir to yeh sab kuchh mitti mein mil jaana hai। tumko to sab kuchh baba par bali chadhaana hai। bhaarat ko svarga banaane ki seva mein hi sab kuchh lagaana hai। to phir varsa bhi tum hi paate ho। tumko nasha chadha hua hai - ham almighty authority ke bachche hain। ham unke paas register ho gaye। baba paas register hone mein bahut mehnat lagti hai। jab sampoorn nirvikaari-pane ka kasam uthaave aur rahkar bhi dikhaaye tab baba use register karte hain। bachchon ko bahut nasha rehna chaahiye ki ham bhaarat ko svarga va raajasthaan bana rahe hain, tab us par raajya karenge। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ham eeshvareey santaan ek eeshvar ki family ke hain। humein abhi eeshvareey mat mil rahi hai, is roohaani nashe mein rehna hai। ulti maton par nahin chalna hai।

2) bhaarat ki seva ke liye brahma baap ke samaan poora-poora bali chadhna hai। tan-man-dhan bhaarat ko svarga banaane mein saphal karna hai। poora-poora philanthropist (daani) banna hai।

vardaan:- parmaatma pyaar ki chhatrachhaaya mein sada safe rahne vaale duhkhon ki lahron se mukta bhav

jaise kamal pushpa keechad paani mein hote bhi nyaara rehta hai। aur jitna nyaara utna sabka pyaara hai। aise aap bachche duhkh ke sansaar se nyaare aur baap ke pyaare ho gaye, yeh parmaatma pyaar chhatrachhaaya ban jaata hai। aur jiske oopar parmaatma chhatrachhaaya hai uska koi kya kar sakta! isliye fakhur mein raho ki ham parmaatma chhatrachhaaya mein rahne vaale hain, duhkh ki lahar humein sparsha bhi nahin kar sakti।

slogan:- jo apne shreshtha charitra dvaara baapdaada tatha brahman kul ka naam roshan karte hain vahi kul deepak hain।