Daily Murli for Wednesday 15 February 2023

15-02-2023 praatahmurli om shanti "baapdaada"' madhuban

“meethe bachche - tumhaare liye yog ki bhatthi most valuable hai, kyonki is bhatthi se hi tumhaare vikarma bhasma hote hain''

prashn:- kin bachchon ki buddhi mein beej aur jhaad ki knowledge spashta baith sakti hai?

uttar:- jo vichaar saagar manthan karte hain। vichaar saagar manthan ke liye amritvele ka time bahut achha hai। amritvele uth-kar buddhi se ek baba ko yaad karo। tumhaara ajpaajaap chalta rahe। sookshm va sthool mein shivbaaba, shivbaaba kahne ki darkaar nahin। buddhi se yaad karna hai।

om shanti। roohaani baap baithkar roohon ko samjhaate hain arthaat bachchon ko samjhaate hain। baap kehte hain mujhe bhi jisma hai tab to baat kar sakta hoon। tum bhi aise samjho main aatma hoon, is jisma dvaara sun raha hoon। yeh knowledge achhi reeti dhaaran karni hai। jaise baap ke paas dhaaran ki hui hai। aatma ki buddhi mein dhaarna hoti hai। tumhaari buddhi mein aisi dhaarna honi chaahiye jaise baap ki buddhi mein hai। beej aur jhaad ki samjhaani to bahut sahaj hai। maali ko knowledge rehta hai na ki phalaana beej bone se itna bada jhaad niklega। bas, baba bhi aise hi samjhaate hain, yeh buddhi mein dhaaran karna hai। jaise meri buddhi mein hai vaise tumhaari buddhi mein rehna chaahiye। woh rahega tab jab vichaar saagar manthan karenge। vichaar saagar manthan karne ka samay savere ka bahut achha hai। us samay dhandha aadi koi nahin rehta। bhakti bhi manushya savere karte hain। yahaan vahaan jaate rehte hain va baithkar koi naam japte rehte hain va geet gaate hain, aavaaj karte, koi to andar hi raam-raam ratte hain। yeh bhakti ka ajpaajaap hota hai। koi maala bhi pherte rehte hain। tumko shiv-shiv kehna nahin hai। jo log bhakti mein karte woh gyaan mein nahin hona chaahiye। bahuton ko aadat padi hui hai, shiv-shiv simran karte honge। tumko shiv-shiv na sthool mein, na sookshm mein japna hai। tum bachche jaante ho ki hamaara baap aaya hua hai। aayega bhi zaroor koi shareer mein। unka koi apna shareer to hai nahin। woh punarjanma rahit hai। punarjanma manushya srishti mein hota hai। vishnu ke do roop lakshmi-naaraayan hain। dev-dev mahaadev kehte hain। brahma aur vishnu ka aapas mein connection hai। shankar ka koi connection nahin, isliye unko bada rakhte hain। unka punarjanma nahin, unko sookshm shareer milta hai। shivbaaba ko sookshm shareer bhi nahin hai isliye woh sabse oonche te oonch hai। woh hai behad ka baap। bachche jaante hain behad ke baap se ham behad sukh ka varsa lete hain। baap ki shreemat par tumko poora chalna hai। jo khud yaad karte hain, auron ko yaad karaate hain, woh jaise baba ke madadgaar hain। baap aur varse ko yaad karna hai। bachchon ko samjhaate rehte hain - tumhaare ab 84 janma poore hue hain। baaki thoda time hai। naatak mein actor samajhte hain - abhi baaki aadha ghanta hai phir ham ghar jaayenge। time dekhte rehte hain। tumhaari to behad ki bahut badi ghadi hai। samjhaaya hai ki ab ghar chalna hai। baap ko yaad karne se tumhaare vikarma vinaash honge aur koi shaastron mein aisa sahaj yog hai nahin। woh to bahut hathayog karte hain, bahut mehnat karte hain, jo tum maataayen kar na sako। tumko hathayogiyon ke muaaphik aasan nahin lagaana hai। haan sabha mein theek hokar baithna hai। tumhaara raajayog hai - taang par taang chadhaakar baithna। aise raajayog mein baithne se nasha chadhega। hathayog mein donon taang chadhaate hain। baba tumko takleeph nahin dete hain। sirf thoda farka rakhna chaahiye। common baithne mein aur yog mein baithne mein। tum raajayog seekh rahe ho। to aise baithna chaahiye jo manushya samjhen yeh raajayog mein baithe hain। yeh hamaara raajaai ka dhang hai। tum behad ke baap dvaara raajaaon ka raaja ban rahe ho। aise baap ko ghadi-ghadi yaad karna hai। satayug mein baap ko yaad nahin kiya jaata hai। apne ko kiya jaata hai। kaliyug mein na baap ko jaante, na apne ko jaante hain। sirf baap ko pukaarte hain। abhi tum achhi reeti jaan gaye ho। aur koi aise nahin samajhte hain ki baap bindi hai। ati sookshm bhi kehte hain phir kehte hain hajaaron sooryon se bhi teekha hai। to baat milti nahin hai। jab kehte hain naam-roop se nyaara hai phir hajaaron soorya se teekha kyon kehna chaahiye? pahle tum bhi aise samajhte the। baap kehte hain - drama mein yeh samjhaani deri se milni thi। sookshm te sookshm guhya baaten samajhkar samjhaai jaati hain। aise nahin khyaal aana chaahiye ki pahle hajaaron sooryon se tejomay kehte the ab phir bindi kyon kehte? jab aai.si.S. padhenge tab aai.si.S. ki baaten karenge, pahle kaise karenge? ismen moonjhane ki darkaar nahin hai। drama mein jab baba ko samjhaana hai tab samjhaate hain, inke baad bhi ajun kya-kya samjhaayenge, kyonki baap ka bhi prabhaav to nikalna hai na। jaise tumhaari aatma hai vaise woh bhi aatma hai। paramdham mein rehte hain। unko param aatma kehte hain। yahaan jab aate hain to knowledge dete hain।

baap kehte hain - jab patit duniya hogi tab main paavan duniya banaane aaoonga। pukaarte bhi hain he patit-paavan, he duhkh harta sukh-karta aao। woh to sangam par aayega। jab raat poori hogi tab din hoga। puraani duniya ka ant hoga। karmaateet avastha ant mein hogi। tumko rehna bhi grihastha vyavhaar mein hai, chhodna bhi nahin hai। shareer nirvaah arth vyavhaar karte hue kamal phool samaan pavitra rehna hai। devta to hain hi poorn pavitra। parantu kab aur kaise banen! zaroor purushaartha kiya tab to praalabdha paai। purushaartha anusaar praalabdha bani। jaisa karma vaisi praalabdha, yeh to chalta hi rehta hai। abhi to tumko karma sikhlaane vaala baap mila hai। unko achhi reeti yaad karna chaahiye। tum adopted bachche ho। maarvaadiyon mein adoption bahut hoti hai। tumhaari bhi adoption hai। tum inke garbha se nahin nikle ho। adoption mein donon baap yaad rehte hain। ant tak jaante hain ki ham asul kiska tha। ab inki god ke bachche bane hain। tum bhi jaante ho ham kiske the aur kiske bane hain। main adopt hua hoon parampita paramatma ke paas, woh hai svarga ka rachayita। unki rachna kitna samay chalti hai? aadhaakalpa। narka ka rachayita hai raavan, unka bhi aadhaakalpa raajya chalta hai। satopradhaan se tamopradhaan bante hain। yeh samajh ki baat hai। kuchh samajh mein na aaye to poochhna chaahiye। jab soorya chaand ko grahan lagta hai to kehte hain de daan… soorya chaand ko maa-baap kaha jaata hai। yahaan bhi mel female donon ko grahan lagta hai, tab kehte hain 5 vikaaron ka daan de do। woh to varsha mein 1-2 vaari grahan lagta hai। yeh to kalpa ki baat hai। baap aakar ek hi baar daan lete hain। manushya bilkul sampoorn kaale ban gaye hain। iron ej hai। sachche sone mein alloy padne se kaala ho jaata hai। naya ghar, puraana ghar। naye bachche aur boodhe mein farka to hai na। chhota bachcha kitna meetha priy lagta hai। sab unko choomte hain। god mein bithaate hain। puraana jad-jadeebhoot ho jaata hai to kehte hain kahaan shareer chhoote to achha। jyaada duhkh kyon sahan karen। aatma ek shareer chhod jaakar doosra leti hai। yahaan ham beemaar ko marne nahin dete hain phir bhi jitna sune utna achha। shivbaaba aur varse ko yaad karte rahen। beemaari mein jab jyaada peeda hoti hai to sab bhool jaata hai। baaki jiska kismen bhaav hota hai woh saamne aa jaata hai। tumhaara to anjaam (vaayda) hai mera to ek shivbaaba doosra na koi। phir doosre kisko yaad kyon karte ho। baap kehte hain - mere bigar kiski smriti bhi na aaye। gaaya hua hai antakaal jo stri simre... saara shlok kah dete, arth kuchh bhi nahin samajhte। hai saari sangam ki baat jo bhakti mein gaate hain, is samay sirf tumko baap aur varse ko yaad karna hai। shri naaraayan tumhaari praalabdha hai to arth poora buddhi mein hona chaahiye। bigar arth to bahut yaad karte rehte hain। pichhaadi mein jiske saath jaasti preet hoti hai, vahi yaad aate hain। bada khabardaar rehna chaahiye। tumko yaad karna hai ek baap ko।

baap kehte hain - manamnaabhav। tum bachche kehte ho baba ham kalpa-kalpa aapse milte hain। yeh gyaan aapse madhuban mein aakar lete hain। yeh hai vasheekran mantra। satguru hai to tumhein mantra bhi aisa deta hai, jo tum amar ban jaao। yeh hai maaya par jeet paane ka mantra। is par gaate hain tulseedaas chandan ghise.... yeh bhi ab ki baat hai jo baad mein gaai jaati hai। tum bachchon ko raajtilak mil raha hai - baap aur varse ko yaad karne se। baap aur baadshaahi ko yaad kar shareer chhodenge to raajaai tilak mil jaayega। ek ko to nahin milega। maala 108 ki bhi hai। 16108 ki bhi hai।

ab to sirf tumko accurate baba ko yaad karna hai। baba ke liye kehte hain - tumhari gat mat tum hi jaano। so barobar hai। sadgati daata woh hai, vahi jaane। aage to sirf gaate the arth rahit। usko kaha jaata hai, anartha। praapti kuchh bhi nahin। manushya daan-punya aadi karte-karte utarte hi aaye hain। praapti kuchh bhi nahin hai। aasuri mat par sab anartha ho gaya hai। yeh bhi naaraayan ki pooja karte the, ab phir pujaari se poojya ban rahe hain - practical mein। ab tum bachche jaante ho shivbaaba hamko padhaate hain। yeh to pakka yaad rakhna hai। nahin to vikarma vinaash nahin honge। yeh yog ki bhatthi most valuable hai। mukti bhi milti hai na। koi kehte hain hamko man ki shanti chaahiye, parantu pahle yeh bataao tumko ashaanta kisne kiya? zaroor pahle shanti thi। abhi ashaanta bane ho, tab to shanti maangate ho। shanti to saari duniya mein chaahiye। ek ko shanti milne se kuchh ho na sake। ek ko shanti milne se saari duniya mein thode hi shanti ho sakegi। ashaanta kisne kiya hai? moonjh pade hain। samjhaaya jaata hai shantidham, sukhdhaam aur yeh hai duhkhadhaam। sukhdhaam mein manushya bahut thode the। us samay baaki sab aatmaayen shantidham mein thi। tumko shanti vahaan milegi। yahaan to mil na sake। yahaan to hai hi duhkhadhaam। duhkh mein ashaanti hoti hai। yeh to bahut sahaj hai, kisko bhi samjhaana। sukh-shanti ka varsa dene vaala ek hi baap hai। satayug mein sukh-shanti donon hi hain। yahaan aatma chaahti hai ki mera man-shant ho। to jaao tum apne ghar paramdham। parantu patit phir ja bhi na saken, isliye baap samjhaate hain mujhe yaad karo to ant mati so gati ho jaayegi। baap aur varse ko yaad karo। parantu maaya aisi hai jo pavitra banne nahin deti hai। ablaaon par dekho kitne atyaachaar hote hain। vish bigar rah na saken। baba ke paas anek prakaar ke samaachaar aate hain। sabse badi hinsa kaam mahaashatru ki hai। baap kehte hain - bachche vish chhodo, kaala munh nahin karo। to kehte hain koshish karenge। yeh jahar hai, aadi-madhya-ant duhkh dene vaala hai। parantu takdeer mein nahin hai to sunte hi nahin hai। aatmaon ko baap baith samjhaate hain - aaj se vikaar mein nahin jaana to munh neeche kar dete hain। are kaam mahaashatru hai। yeh achha thode hi hai। yeh hai hi vicious world, sab patit hain। satayug mein sabhi sampoorn nirvikaari hain। achha!

maat-pita baapdaada ke kalpa athva 5 hajaar varsha ke baad mile hue meethe-meethe sikeeldhe bachchon ko yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) time bahut thoda hai isliye baap ka poora-poora madadgaar bankar rehna hai। baap aur varse ko yaad karna hai aur doosron ko bhi karaana hai।

2) ant samay mein ek baap ki yaad rahe iske liye dil ki preet ek baap se rakhni hai। baap bigar aur koi ki smriti na aaye, iske liye khabardaar rehna hai।

vardaan:- sochna, kehna aur karna in teenon ko samaan banaane vaale baap samaan sampanna bhav

baapdaada ab sabhi bachchon ko samaan aur sampanna dekhna chaahte hain। sampanna banne ke liye sochna, kehna aur karna teenon samaan ho। iske liye sab taiyaari bhi karte ho, sankalp bhi hai, ichchha bhi yahi hai। lekin yeh ichchha poori tab hogi jab aur sab ichchhaaon se ichchha maatram avidya banenge। chhoti-chhoti anek prakaar ki ichchhaayen hi is ek ichchha ko poorn karne nahin deti hain।

slogan:- avyakt va karmaateet sthiti ka anubhav karna hai to kathni, karni aur rahni ko samaan banaao।