Daily Murli for Wednesday 1 March 2023

01-03-2023 praatahmurli om shanti "baapdaada"' madhuban

“meethe bachche - behad drama ke aadi-madhya-ant ko samajhna hai, jo past hua vahi ab phir present hona hai, abhi sangamayug present hai phir satayug aana hai''

prashn:- shreemat par apne aapko perfect banaane ki vidhi kaun si hai?

uttar:- apne aapko perfect banaane ke liye vichaar saagar manthan karo। apne aapse baaten karo। baba aap kitne meethe ho, ham bhi aap jaisa meetha banenge। ham bhi aapke samaan master gyaan saagar ban sabko gyaan denge। kisi ko bhi naaraaz nahin karenge। shanti hamaara svadharma hai, ham sada shant rahenge। ashareeri banne ka abhyaas karenge। aisi-aisi svayan se baaten kar svayan ko perfect banaana hai।

geet:- maata O maata, jeevan ki daata…

om shanti। shiv bhagvaanuvaach। sirf bhagvaanuvaach kahne se manushya kuchh nahin samajh sakenge। naam zaroor lena padta hai। geeta sunaane vaale jo bhi hain woh kehte hain krishna bhagvaanuvaach। woh past mein ho gaye hain। samajhte hain shreekrishna aaya tha aur geeta sunaai thi va raajayog sikhaaya tha। ab jo past ho gaya woh phir present zaroor hona hai। jo present hai woh phir past hona hai। jo past ho jaayega usko kahenge beet gai। to ab shivbaaba aaya hai zaroor hokar gaya hai। shiv bhagvaanuvaach, jo oonch te oonch hai, woh sabka baap hai, jisko sarvashaktimaan kaha jaata hai, woh baith samjhaate hain। tum unke bachche shiv shaktiyaan ho। shiv shakti ki mahima geet mein suni na। shiv shakti jagat amba hokar gai hai, jiska yeh yaadgaar hai। hokar gaye hain phir aane hain zaroor। jaise satayug past hua, ab kaliyug hai phir satayug aane vaala hai। abhi hai puraani duniya aur nai duniya ka sangam। zaroor nai duniya hokar gai hai, ab puraani duniya hai। jo satayug past hua hai phir bhavishya mein aana hai। yeh samajh ki baat hai। gyaan hai hi samajh। woh hai bhakti, yeh hai gyaan। srishti ka chakra kaise phirta hai woh samajhna hai। unko samajhne bigar manushya kuchh bhi samajh nahin sakte। drama ke aadi madhya ant ko samajhna hai। us had ke drama ke aadi madhya ant ko to jaante hain। yeh hai behad ka drama, isko manushya samajh nahin sakte। baap jo behad ka maalik hai, vahi khud aakar samjhaate hain। shiv bhagvaanuvaach hai na ki shreekrishna bhagvaanuvaach। krishna ko bhi shri kehte hain kyonki unko shreshtha banaane vaala baap hai। bhaaratvaasi bichaare yeh nahin jaante hain ki krishna hi naaraayan bante hain। ham abhi kehte hain bichaare besmajh hain। sab gareeb duhkhi patit hain। ham bhi the parantu abhi ham paavan ban rahe hain। patit-paavan baap ab hamko mila hua hai। krishna ko patit-paavan nahin kaha jaata hai। nai paavan duniya banaane vaala rachayita baap hi hai, jisko parampita paramatma sarvashaktimaan kaha jaata hai। vo hi patit duniya ko paavan banaane vaala hai, patit srishti ko paavan banaane vaala hai। patit saari srishti hai, raavan patit banaate hain। patit-paavan ek hi eeshvar hai। manushya patit se paavan bana nahin sakte, koi bhi haalat mein। saari duniya ka savaal hai na। samjho karke sannyaasi ek do karod paavan hon phir bhi 5-6 sau karod patit hain to zaroor isko patit duniya kahenge na। vaastav mein shiv bhagvaanuvaach patit duniya mein ek bhi paavan ho nahin sakta। baap kehte hain tum bachchon ko paavan banaane liye saari srishti ko paavan banaata hoon। patit-paavan ka arth hi hai vishwa ko paavan banaane vaala। shivbaaba khud kehte hain main patit se paavan bana raha hoon। tumko hi paavan duniya ka maalik banna hai। nai duniya mein hai aadi sanaatan devi-devta dharma। yeh bhi koi nahin jaante। shivbaaba ko bhi koi nahin jaante। poochho tum jo niraakaar parampita paramatma shiv ki jayanti manaate ho, woh kab aaya? niraakaar aaya kaise? zaroor niraakaar to shareer mein hi aayega tab to karma kar sake। aatma shareer bigar karma thode hi kar sakegi। paramatma aakar zaroor oonch banaane ka hi karma karenge। saari vishwa ko paavan banaana yeh ek hi ke haath mein hai। manushya to duhkhi hi duhkhi hain। bhakta bhagwan ko bulaate hain to zaroor bhagwan ek hona chaahiye। bhakta anek hain। shiv bhagvaanuvaach, main shiv bhagwan tum bachchon ko raajayog aur srishti chakra ka gyaan samjhaata hoon arthaat ab tumhaari aatma ko srishti chakra ka gyaan hai। jaise mujh baap ko srishti ke chakra ka gyaan hai, main aaya hoon tumko sikhlaane। srishti chakra phirna to zaroor hai। patit se paavan banna hai। koi to nimitta bante hain na। 5 vikaaron roopi jel se liberate karne main aata hoon। main shiv hoon, jo abhi is tan mein baitha hoon। tum kahenge main aatma is shareer mein baitha hoon। mere shareer ka naam phalaana hai। shivbaaba kehte hain mera niraakaari shareer to hai nahin। mujh parampita ka naam shiv hi hai। main parampita param aatma star misal hoon। mera shiv naam ek hi hai। tum hi saaligraam ho, parantu tumhaara naam 84 janmon mein badalta rehta hai। mera to ek hi naam hai। main punarjanma nahin leta hoon। geeta mein jiska naam daal diya hai woh to poore 84 janma lete hain। aise nahin ki shreekrishna ne geeta sunaai। yeh badi samajhne ki baat hai। manushya ke haath mein kuchh nahin hai, jo kuchh karte hain so parampita paramatma karte hain। manushya ko shanti sukh dena - yeh baap ka kaam hai। hamesha mahima ek baap ki hi karni hai aur koi ki mahima hai nahin। lakshmi-naaraayan ki bhi mahima hai nahin। parantu raajya karke gaye hain to samajhte hain yeh svarga ke maalik the। wonder to dekho woh jad chitra aur yahaan chaitanya baithe hain। shiv bhagvaanuvaach tum raajaaon ka raaja poojya bante ho phir pujaari banenge। poojya lakshmi-naaraayan hi phir aapehi pujaari banenge। to jo past ho gaye hain unka phir mandir banaakar poojan karte hain। yeh siddha kar bataana hai, aise nahin ki eeshvar aapehi poojya aapehi pujaari banta hai। nahin। manushya yeh bhi nahin jaante ki main paramatma kahaan nivaas karta hoon। mere jo bachche saaligraam hain woh bhi yeh nahin jaante ki ham kahaan ke rahne vaale hain। aatmaon aur paramatma ka ghar ek hi hai sweet hom। sirf sweet father hom nahin kahenge। abhi tum jaante ho nirvaandhaam hamaara bhi ghar hai। vahaan hamaara father hai। sirf ghar ko yaad karenge to brahm ke saath yog ho gaya, unse vikarma vinaash ho nahin sakte। bhal brahm yogi, tatva yogi hain parantu unke vikarma vinaash nahin ho sakte। haan bhaavna se karke alpakaal ke liye sukh milta hai। jitna yaad karenge utna shanti milegi। to baap kehte hain unka yog wrong hai। tumko yaad karna hai ek baap ko। baap kehte hain mujhe yaad karne se tumhaare vikarma vinaash honge। shreekrishna aise kah nahin sakte, woh to vaikuntha ka maalik hai। woh thode hi kahega ashareeri ban shivbaaba ko yaad karo ya mujhe yaad karo। saara madaar geeta ko correct karaane par hai। geeta khandan hone kaaran bhagwan ki hasti gum ho gai hai। kah dete hain eeshvar ka koi naam roop hai nahin। ab naam roop kaal to aatma ka bhi hai। aatma ka naam aatma hai, woh bhi parampita param aatma hai। param arthaat supreme, oonch te oonch। woh janma maran rahit hai, avtaar lete hain। drama mein jiska part hai unmein hi pravesh karte hain aur uska naam brahma rakhte hain। brahma naam kabhi badal nahin sakta hai। brahma dvaara hi sthaapna karte hain। to woh shreekrishna ke tan mein thode hi aayenge। agar woh doosre mein aaye to bhi unka naam brahma rakhna pade। manushya kehte hain doosre koi mein kyon nahin aata। are woh bhi kiske tan mein aaye? woh aate hi hain gyaan dene ke liye। din-pratidin manushya samajhte jaayenge। tumhaari vriddhi hoti jaayegi। avastha badi achhi chaahiye। jaise drama ke actors ko maaloom hota hai ham ghar se stage par part bajaane aaye hain। vaise ham aatma yeh shareer roopi chola lekar part bajaati hai phir vaapis jaana hai, shareer chhodna padta hai। tumhein to khushi honi chaahiye, darna nahin chaahiye। tum bahut kamaai kar rahe ho। shareer chhodne vaale khud bhi samajh sakte hain hamne kitni kamaai ki hai। tum samajhte ho jo shareer chhodkar gaye hain unmein se kiska martaba bada kahen, phalaane bahut service karte the, jaakar doosra shareer liya। in advance gaye hain। unka itna hi part tha। phir bhi kuchh na kuchh gyaan lene liye aa jaayen, ho sakta hai। vaaris to ban gaye na। kiske saath hisaab-kitaab chuktu karna hoga, woh khalaas karne gaye। aatma mein to gyaan ke sanskaar hain na। sanskaar aatma mein hi rehte hain। woh gum nahin ho sakte। kahaan achhi jagah service karte honge। knowledge ke sanskaar le gaye to kuchh na kuchh jaakar service karenge। aise to nahin sab jaate rahenge। nahin। haan itna zaroor hai yog mein rahne se aayu badhti hai। manners bhi bade achhe chaahiye। kehte hain baba aap kitne meethe ho। main bhi aap jaisa meetha banoonga। ham bhi gyaan saagar banenge। baap kehte hain apne ko dekhte raho main master gyaan saagar bana hoon? maat-pita samaan auron ko gyaan deta hoon? hamaare se koi naaraaz to nahin hota hai? shanti ko dhaaran kiya hai? shanti hamaara svadharma hai na। apne ko ashareeri aatma samajhna hai, dekhna hai mere mein koi vikaar to nahin hain? agar koi vikaar hoga to naapaas ho jaayenge। aise-aise apne se baaten karni padti hain। yeh hai vichaar saagar manthan kar apne ko perfect banaana, shreemat se। baaki sab aasuri mat se an-perfect bante jaate hain। ham bhi kitne an-perfect the। koi gun nahin tha। gaate hain na main nirgun haare mein koi gun naahi। akshar kitne achhe hain। mahima saari parampita paramatma ki hi hai। guroonaanak bhi unki mahima karte the। to manushyon ko bhi samjhaana hai।

yeh bhi bachche jaante hain - kalpa pahle jinka sapling laga hai vahi aayenge aur dhaarna karenge। nahin to jaise vaayre-muaaphik (moonjha hua) aaya aur gaya। yahaan to tum jaante ho hamko knowledgeful father ne jo knowledge di hai, woh koi mein bhi nahin hai। ham guptavesh mein hain। phir ham bhavishya mein svarga ke maalik banenge। karma to sab kar rahe hain। parantu manushyon ke karma sab vikarma hote hain kyonki raavan ki mat par karte hain। ham shreemat par karma karte hain, shreemat dene vaala hai baba।

baba ne samjhaaya hai tum ho salvation army। salvation army unko kaha jaata hai jo kiske doobe hue bede ko (naanv ko) paar lagaate hain। duhkhi ko sukhi banaate hain। abhi tum shreemat par sabka beda paar kar rahe ho। balihaari to shivbaaba ki hai na। ham to moorkha the। baap ki mat milne se phir auron ko bhi mat dete hain। baap sammukh aakar shreemat dete hain। raavan to koi cheez nahin jo aaye। maaya vikaaron mein ghaseet leti hai। yahaan to baap mat dete hain। jaise school mein teacher padhaate hain। raavan to koi cheez nahin jo ulta padhaaye। baap to hai gyaan ka saagar। raavan ko saagar ya knowledgeful nahin kahenge। tum ab shreemat par chal rahe ho। tum brahman ban yagya ki seva karte ho। tumko raajayog aur gyaan sikhlaana hai। woh jab yagya rachte hain to shaastra bhi rakhte hain na। roodra yagya rachte hain parantu roodra hai kahaan। yahaan to roodra shivbaaba practical mein hai। present mein roodra gyaan yagya racha hua hai। jo past tha woh ab present hai। manushya past ko hi yaad karte rehte hain to tum ab practical varsa le rahe ho। past so ab present hai phir past ho jaayega। aise hota hi rehta hai। kaliyug bhi past ho phir satayug aana chaahiye। ab sangamayug present hai। past jo hua uska yaadgaar hai, jiska jad yaadgaar hai woh ab present chaitanya mein hai। jo oonch pad paate hain, maala bhi unhon ki bani hai। roodra maala hai na। yeh sabhi hain jad chitra। zaroor kuchh karke gaye hain tab to roodra maala kehte hain na। tum chaitanya mein shivbaaba ki maala nambarvaar ban rahe ho। jitna yog lagaayenge utna najdeek jaakar roodra ke gale ka haar banenge। abhi ham sangam par hai। aise-aise apne se baaten karni chaahiye। tumko to gyaan hai। tumhaare andar yeh chalta rehta hai ham asul shivbaaba ke bachche hain। ham vishwa ke maalik banenge, phir chakra mein aayenge। isko svadarshan chakra kaha jaata hai। kai manushya kehte hain tum auron ki ninda kyon karte ho। bolo, bhagvaanuvaach likha hua hai baaki ham kisi ki ninda nahin karte hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par har karma shreshtha karna hai। sabke doobe hue bede ko shreemat par paar lagaana hai। duhkhiyon ko sukh dena hai।

2) andar svadarshan chakra phiraate roodra maala mein najdeek aane ke liye yaad mein rehna hai। gyaan ka manthan karna hai, apne aapse baaten zaroor karni hai।

vardaan:- brahman jeevan mein sada aanand va manoranjan ka anubhav karne vaale khushanseeb bhav

khushanseeb bachche sada khushi ke jhoole mein jhoolte brahman jeevan mein aanand va manoranjan ka anubhav karte hain। yeh khushi ka jhoola sada ekras tab rahega jab yaad aur seva ki donon rassiyaan tight hon। ek bhi rassi dheeli hogi to jhoola hilega aur jhoolne vaala girega isliye donon rassiyaan majboot ho to manoranjan ka anubhav karte rahenge। sarvashaktimaan ka saath ho aur khushiyon ka jhoola ho to is jaisi khushanseebi aur kya hogi।

slogan:- sabke prati daya bhaav aur kripa drishti rakhne vaale hi mahaan aatma hain।

is maas ki sabhi murliyaan (eeshvareey mahaavaakya) niraakaar paramatma shiv ne brahma mukhakmal se apne brahmaavatson arthaat brahmaakumaar evan brahmaakumaariyon ke sammukh 18-1-1969 se pahle uchchaaran ki thi। yeh keval brahmaakumaareez ki adhikrit teacher bahnon dvaara niymit BK vidyaarthiyon ko sunaane ke liye hain।