Daily Murli for Tuesday 4 April 2023

04-04-2023 praatahmurli om shanti "baapdaada"' madhuban

“meethe bachche - deh sahit deh ke sab sambandhon ke trustee bano, sabki sambhaal karte hue kisi mein bhi mamatva nahin rakho''

prashn:- is drama mein maaya kaun si bhoolen jab kara deti hai tab baap abhul banaane aate hain?

uttar:- pahli bhool yeh ki jo brahm tatva ko hi paramatma samajh liya। tatva se yog lagaana yeh to mithya hai, isse vikarma vinaash ho nahin sakte। 2- hindustaan mein rahne ke kaaran devi-devta dharma ke badle apna hindu dharma kah dena yeh bhi badi bhool hai। is bhool ke kaaran dharma ki taakat nahin rahi hai। ab baap aaye hain tumhein abhul banaane।

geet:- kaun aaya mere man ke dvaare…

om shanti। yeh kaun aaya bachchon ke paas? bachchon ke paas maat-pita hi to aayenge। jiske liye gaayan hai, tum maat-pita ham baalak tere। ab tum baalak ki haisiyat mein baithe ho na। parampita paramatma baith bachchon ko samjhaate hain ki main niraakaar hoon। brahma-vishnu-shankar bhi aise nahin kah sakte। yeh to niraakaar parampita paramatma hi kah sakte hain is shareer dvaara। yeh to jaante ho mera koi sthool va sookshm shareer nahin hai। yeh aatma hi shareer dvaara bol rahi hai। niraakaar parampita paramatma baith bachchon ko padha rahe hain। naya koi sune to kahenge yeh kaise ho sakta hai! haan, shiv bhagvaanuvaach brahma ke shareer dvaara। shivbaaba ko apna shareer to hai nahin। to itne sab bi.ke. kahaan se aaye? woh brahman log koi apne ko brahmaakumaar nahin kahlaate hain। tum kyon kehte ho ham bi.ke. hain? tum siddha kar bata sakte ho is brahma ka baap hai parampita paramatma shiv। unke yeh teen bachche brahma, vishnu, shankar hain। to shivbaaba is brahma mukh se mukh vanshaavli rachkar unko manushya se devta banaate hain। is duniya mein manushya to dher hain। anek prakaar ke bhinna-bhinna dharma, jaatiyaan hain। gujraati, panjaabi, yu.pi., Christian, bauddhi, mahaaraashtriyan aadi kitni jaatiyon ke naam hain। satayug mein itne dharma, jaati hote hi nahin। na anek bhaashaayen, na anek dharma hote hain। kehte bhi hain ek raajya ho। satayug mein hai hi devi-devta dharma। baap kehte hain main aakar ek aadi sanaatan devi-devta dharma ki sthaapna karta hoon। gaaya bhi jaata hai manushya se devta kiye karat na laagi vaar। devtaayen to hote hain satayug mein, treta mein bhi nahin hote। treta mein hai kshatriy varna। shaastron mein bhi likha hua hai brahma ke mukh se brahman nikle। aur braahmanon ko padhaakar phir devta aur kshatriy dharma ki sthaapna karte hain। baaki sab jo bhi anek dharma hain, sabka vinaash hona hai। baap samjhaate hain meethe bachche - main tum aatmaon ka sachcha-sachcha baap hoon। main kabhi badalta nahin hoon। mere ko sadaiv baap ki haisiyat se yaad karte ho। bhakta bhagwan ko yaad karte hain kyonki yeh shiksha sivaae bhagwan ke aur koi de na sake। abhi to anek dharma hain। tum list nahin nikaal sakte ho। kitne manushya hain, baap aakar manushya se devta banaate hain। so bhi sabko to nahin banaayenge। yeh samajhne ki baaten hain। baap kehte hain mere sivaae koi yeh samjhaani de na sake। baap baith tum bachchon ko satayug ke liye padhaate hain। kehte hain bachche abhi jitna purushaartha kar svarga mein oonch pad paana ho so pa lo। har ek manushya apni aajeevika ke liye kitna purushaartha karte hain! koi bhi achha padhe to oonch pad pa sakte hain। yahaan bhi baap kehte hain ablaaon-ganikaaon ko bhi purushaartha se vishwa ka sooryavanshi raajya mil sakta hai।

baba ne samjhaaya hai is samay harek draupdi pukaarti hai - baba raksha karo, phir dikhaate hain shreekrishna oopar mein baitha hai। saadiyaan dropdi ko milti jaati hain, raksha ho jaati hai। ab aisi baaten to hain nahin। yeh is samay ki baaten hain। baap kehte hain tumko 21 janma nangan hone se bachaate hain। tumhaare vastra koi utaar nahin sakte। yeh hai pravritti maarga, donon ko pavitra banna hai। aadhaakalpa se vikaaron mein hire hue hain to yeh aadat mitti nahin hai। baap aakar tumhein nangan hone se bachaate hain, ismen badi mehnat lagti hai। pavitrata mein rehte phir maaya vaar kar leti hai। ablaaon par to vish ke kaaran bahut atyaachaar hote hain aur bachchon mein moh bhi rehta hai, ismen to poora nashtomoha banna chaahiye। pahle-pahle jab bhatthi bani to bahut himmat rakh bhaage। dekha maar milti hai, hangaama karte hain to jhat tyaag kar liya। sannyaasi bhi bhaagte hain। pahle to unhon ko yaad sataati hai। nashtomoha hone mein mehnat lagti hai kyonki unhon ke paas praapti ki em object kuchh bhi nahin hai। kuchh bhi taakat milti nahin। tumko to taakat milti hai। unko pavitrata ki taakat kahaan se mile? pavitrata ka saagar to ek parampita paramatma hai, unse hi varsa milta hai। woh baap se to yog lagaate nahin। brahm se yog lagaate hain to poora pavitra ban nahin sakte। brahm athva tatva se yog lagaana mithya ho jaata hai। dekho yeh points achhi reeti dhaaran karni hai। bhoolen to bahut ki hain। hindustaan mein rahne vaale hindu dharma kah dete hain। yeh bhi bhool hai। brahm athva tatva ko paramatma kehna yeh bhi bhool hai। drama mein bhi noondh hai। baap aakar samjhaate hain yeh yeh bhoolen maaya karaati hai। baba aakar phir abhul banaate hain। satayug mein ek hi dharma, ek hi bhaasha thi। aise nahin vrindaavan mein rahne vaalon ko vrindaavni kahenge। vahaan dharma hi ek hai। baap kehte hain main aata hoon tumko phir se so devta banaata hoon। tum svarga ke maalik ban jaate ho। baap rachta hi hai svarga phir ham narka ke maalik kyon hain! nai duniya mein zaroor ham svarga ke maalik honge। us samay baaki sab aatmaayen paramdham mein hongi। yeh baaten ab tumhaari buddhi mein hain। jitna-jitna yog hoga utna dhaarna achhi hogi। kahaan bhi mamatva nahin hona chaahiye। apne ko trustee samajh paalna karo। baap ki amaanat hai। deh sahit deh ke sab sambandhon ke ham trustee hain। pareekshaayen bhi aati hain। koi beemaar hua, duhkh hua to sambhaalna pade। yeh hai hi duhkh ki duniya। shivbaaba ko to koi duhkh nahin hoga। woh to trustee hai। koi ko kuchh hua kahenge apna hisaab-kitaab chuktu kar jaakar doosra shareer liya, ismen hamaara kya jaata hai। itne sab manushya shareer chhodenge, shivbaaba ko duhkh hoga kya! aur hi khushi hoti hai। yeh puraana chhi-chhi shareer chhudaae bachchon ko vaapis le jaaoonga। duhkh ki baat hi nahin। aphsos ki koi baat hi nahin। ham uthte-baithte meethe-meethe baap ko yaad karte hain। paramdham mein jaane ke liye ham taiyaari kar rahe hain। baba ko yaad karte-karte shareer chhoot jaayega। aise bahut sannyaasiyon ka hota hai। baithe-baithe apne ko samajhte hain bas ham brahm mein chale jaate hain, jaakar leen honge। aise baithe-baithe shareer chhod dete hain। baba apne anubhav se bataate hain। praanaayaam chadhaate-chadhaate gum ho jaate hain। aise nahin ki woh aatma brahm mein chali jaayegi। aatma to ek shareer chhod phauran doosra leti hai। baaki koi nirvaan mein jaata nahin hai, na jyoti-jyot samaate hain। sabko part bajaana hai zaroor।

baap kehte hain main aata hi hoon jab sabhi actors maujood rehte hain kyonki main hoon sab sajniyon ka saajan। mere pichhaadi sab sajniyaan vaapas aa jaayengi। main aaya hoon sabko vaapis le chalne। ab naatak poora hota hai। ab jitna jo purushaartha karenge। sadgati daata ek hi baap hai। abhi baap aaya hai, samjha raha hai - main kab aur kaise aata hoon। phir tum sab aatmaon ko le jaata hoon। chhi-chhi se gul-gul banaata hoon। gul-gul hi bali chadhenge। dikhaate hain shreekrishna ne bhagaaya। parantu kiske liye bhagaaya? shreekrishna ki to baat hai nahin। yeh to baba ne chhudaaya hai। sahaj raajayog sikhlaakar svarga ke mahaaraaja mahaaraani banaane। tumko saakshaatkaar bhi hua hai bhavishya prince princess banne ka। tum jaante ho barobar ham mor-mukutdhaari prince princess banenge। ab tum ho brahman। gaaya jaata hai prajaapita brahma। to unke bachche brahmaakumaar kumaariyaan bante ho। yeh baaten samajhne aur samjhaane ki hain। raajdhaani sthaapan ho rahi hai। to sabhi ko purushaartha karna chaahiye - achhi reeti se। koi takleeph nahin dete hain, sirf kehte hain he aatma mujh baap ko yaad karo aur varse ko yaad karo। vishwa ka maalik banne ke liye itna to yaad karenge। dehi-abhimaani bano। deh-abhimaan aane se hi maaya ghoonsa lagaati hai। ek naatak bhi bana hua hai। maaya aise karti hai, bhagwan aise karta hai। to practical mein dekhte ho kitne baap ka bankar phir mukh mod lete hain! jaakar ninda karte hain। aashcharyavat sunanti, kathanti, bhaaganti ho jaate hain। sat baap, sat teacher, satguru ki ninda karte hain। unko dekh manushya kehte hain eeshvar ko kaise phaarakti dete honge। to aise nindak oonch te oonch thaur nahin pa sakte hain। yeh hai abhi ki baat।

kai bachchon ko nashtomoha banne mein badi mehnat lagti hai। bahuton ka moh nikalta hi nahin hai। baba to kehte hain bachchon ko bhi sambhaalo। unhon ko bhi shivbaaba yaad karaate raho। jo achhe honge woh shivbaaba ko yaad karte rahenge। baap samjhaate hain government bhi purity chaahti hai। to unko samjhaana chaahiye ham bhaarat ko pavitrata mein laane ke liye pavitrata ki pratigya karte hain। ham bhaarat ko svarga zaroor banaayenge। kanyaayen, maata pita ka bhi uddhaar kar sakti hain। baap ko to gareeb-nivaaz kaha jaata hai। saahookaaron ka to saara dhan maal mitti mein mil jaayega। saahookaaron ke liye badi taakat chaahiye kyonki joint stock hote hain na। phir apni cheez surrender kaise kar sakte hain! baap to gareeb-nivaaz hi gaaya hua hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) em object ko buddhi mein rakh pavitra banne ke liye poora nashtomoha banna hai। puraane shareeron se mamatva nikaal dena hai।

2) uthte-baithte baap ki yaad mein rehna hai। kisi bhi baat ka aphsos nahin karna hai। kabhi bhi baap ki ninda karaane vaala koi karma nahin karna hai।

vardaan:- sada sneh aur sahayog dvaara avinaashi ratna ka title praapta karne vaale amar bhav

jo sthaapna ke kaarya mein sada snehi aur sahayogi rehte hain unhein avinaashi ratna ka title mil jaata hai। aise avinaashi ratna jo kabhi koi bhi hila na sake। koi bhi rookaavat rok na sake। aise avinaashi ratna hi amarbhav ke vardaani hain। real gold hain, baap ke saathi hain। ve baap ke kaarya ko apna samajhte hain। sada saath rehte hain isliye avinaashi ban jaate hain।

slogan:- pavitrata ki yathaartha dhaarna hai to har karma yathaartha aur yuktiyukta hoga।