Daily Murli for Monday 24 April 2023

24-04-2023 praatahmurli om shanti "baapdaada"' madhuban

“meethe bachche - apni dil se poochho ham gyaan ki khushbu phailaane vaale khushboodaar phool bane hain, sada achhi khushbu phailaate raho''

prashn:- kin bachchon ki avastha bahut masta rehti hai? gallop karne ka aadhaar kya hai?

uttar:- jo achhe-achhe phool hain, jinki buddhi mein gyaan ka manthan chalta rehta hai unki avastha bahut masta rehti hai। gyaan aur yog ki shiksha de khushbu phailaane vaale bachche bahut praphullit rehte hain। gallop karne ka aadhaar hai sachche parvaane banna। maaya ke toofaanon se sada bachkar rehna। shreemat par chalte rehna hai।

geet:- mahphil mein jal uthi shama…

om shanti। chaitanya parvaanon ne geet suna। parvaane kaho va phool kaho, baat ek hi hai। bachche samajhte hain ham sachmuch parvaane bane hain ya pheri lagaakar chale jaate hain, shama ko bhool jaate hain। harek ko apni dil se poochhna hai ki ham kahaan tak phool bane hain? aur gyaan ki khushbu phailaate hain? apne jaisa phool kisko banaaya hai? yeh to bachche jaante hain gyaan ka saagar woh baap hai। unki kitni khushbu hai! jo achhe phool va parvaane hain unki zaroor achhi khushbu aayegi। woh sadaiv khush rahenge, auron ko bhi aap samaan phool va parvaane banaayenge। phool nahin to kali banaayenge। poore parvaane woh hain jo jeete ji marte hain। bali chadhte hain athva eeshvareey aulaad bante hain। koi saahookaar kisi gareeb ke bachche ko god mein lete hain to bachche ko us saahookaar ki god mein aane se phir woh maa-baap hi yaad aate rehte hain। phir gareeb ki yaad bhool jaayegi। jaante hain ki hamaare gareeb maa-baap bhi hain parantu yaad saahookaar maa-baap ko karenge, jisse dhan milta hai। sannyaasi-saadhu aadi hain woh bhi saadhna karte hain muktidhaam mein jaayen। sabhi mukti ke liye hi purushaartha karte hain। parantu mukti ka arth nahin samajhte। koi kehte jyoti-jyot samaayenge, koi samajhte paar nirvaan jaate hain। nirvaandhaam mein jaane ko jyoti mein samaana va mil jaana nahin kaha jaata hai। yeh bhi samajhte hain ham doordesh ke rahne vaale hain। is gandi duniya mein rahkar kya karenge।

bachchon ko samjhaaya hai jab koi se milte ho to yeh samjhaana hai ki yeh bana banaaya drama hai। satayug, treta, dvaapar, kaliyug, yeh hai sangamayug। satayug ke baad treta ka bhi sangam hota hai। vahaan yug badalta hai parantu yahaan kalpa badalta hai। baap koi yuge-yuge nahin aate hain। jaise manushya samajhte hain। baap kehte hain jab sab tamopradhaan ban jaate hain, kaliyug ka ant hota hai, aise kalpa ke sangam par main aata hoon। yug poora hota hai to do kala kam hoti hai। yeh to jab poora grahan lag jaata hai tab main aata hoon। main yuge-yuge nahin aata hoon। yeh baap baith parvaanon ko samjhaate hain। parvaanon mein bhi nambarvaar hain। koi to jal marte hain koi pheri pahan chale jaate hain। shreemat par chal nahin sakte। agar kahaan shreemat par nahin chale to phir maaya pachhaadti rahegi। shreemat ka bahut gaayan hai। shreemad bhagvat geeta kaha jaata hai। shaastra to baad mein baith banaaye hain। us samay manushyon ki buddhi rajo tamo hone ke kaaran samajhte hain shreekrishna dvaapar mein aaya। baap kehte hain main aata hi tab hoon jab aadi sanaatan devi-devta dharma vaale manushya gum ho jaate hain। parantu yeh bhool jaate hain ki ham hi devi-devta dharma vaale the। apna hindu dharma kah dete hain। yeh kade se kadi bhool hai। bhaaratvaasi jo devta dharma ke pujaari hain unhon se poochho tum kis dharma ke ho? to kehte hain ham hindu dharma ke hain। are tum poojte kisko ho? bhaarat-vaasi apne dharma ko hi nahin jaante। yeh bhi drama mein noondh hai। jab bhoolen tab to phir se main aakar aadi sanaatan devi-devta dharma ki sthaapna karoon। satayug mein hai hi ek dharma। yeh baaten baap baith samjhaate hain। jo vishwa ke maalik the woh khud hi bhool jaate hain to baaki auron ki baat hi kya।

yeh ek hi baap hai jo aakar duhkhadhaam se nikaal sukhdhaam ka maalik banaate hain। tum kahenge abhi ham narka ke maalik hain। duniya ko tamopradhaan to banna hi hai। sab patit hain tab to paavan ke aage jaakar namaste karte hain। manushya sannyaasiyon aadi ko guru banaate hain kyonki woh paavan hain, samajhte hain guru dvaara paavan nahin banenge to sadgati kaise hogi। parantu follow to karte nahin। guru log phir unko kehte bhi nahin ki tum follow kahaan karte ho, pavitra kahaan bante ho। yahaan to baap kehte hain agar tum paavan nirvikaari bante ho to mere follower ho, nahin bante ho to tum follower nahin ho। oonch gati ko pa nahin sakenge। sannyaasi aise nahin kahenge ki follow karo, nahin to saja khaani padegi। yeh baap kehte hain - shreemat par chalo nahin to bahut traahi-traahi karna padega। woh to samajhte aatma nirlep hai, parantu nahin। aatma hi sukh-duhkh dekhti hai। yeh koi bhi samajhte nahin। baba baar-baar samjhaate hain - bachche, manzil bahut bhaari hai। is samay tum purushaartha karte ho jabki duhkhi ho। tum jaante ho satayug mein ham bahut sukhi rahenge। vahaan yeh pata nahin rahega ki hamko phir duhkhadhaam mein jaana hai। ham sukh mein kaise aaye, kitne janma lenge - kuchh bhi nahin jaante। abhi tum jaante ho ki oonch kaun thahre? tum eeshvar ki aulaad hone ke kaaran jaise eeshvar knowledgeful hai, tum bhi knowledge-full thahre। abhi tum eeshvar ke bachche ho। devtaayen thode hi eeshvar ke bachche kahlaayenge। abhi tum eeshvareey aulaad ho parantu number-vaar। koi to bade masta hain। samajhte hain ham to baba ki mat par chalte rehte hain। jitna mat par chalenge utna shreshtha banenge।

baap sammukh baith bachchon ko samjhaate hain - bachche, deh-abhimaan chhodo, dehi-abhimaani bano, nirantar yaad karo। parantu sadaiv yaad kar nahin sakenge। yaad rahegi nambarvaar purushaartha anusaar। so bhi result ant mein niklegi। baap to hai hi sukh daata। aise nahin ki duhkh bhi baap hi dete hain। baap kabhi bachche ko duhkh nahin dete। bachche apni ulti chalan se duhkh paate hain। baap duhkh nahin de sakte। kehte hain - he bhagwan, bachcha do to kul vriddhi ko paayega। bachche ko bahut pyaar karte hain। baaki duhkh apne karmon ka hi paate hain। ab bhi baap to bachchon ko bahut sukhi banaate hain। kehte hain shreemat par chalo। aasuri mat par chalne se tum duhkh paate ho। bachche baap aur teacher athva badon ki aagya na maanne se duhkhi hote hain। duhkhadaai khud bante hain। maaya ke ban padte hain। eeshvar ki mat tumko ab hi milti hai। eeshvareey mat ki result 21 janma tak chalti hai। phir aadha kalpa maaya ki mat par chalte hain। eeshvar ek hi baar aakar mat dete hain। maaya to aadha kalpa se hai hi hai। mat deti hi rehti hai। maaya ki mat par chalte 100 percent durbhaagyashaali ban padte hain।

to jo achhe-achhe phool hain woh isi khushi mein sadaiv masta rahenge। nambarvaar to hain na। parvaane koi to baap ke ban shreemat par chal padte hain। aksar karke gareeb hi apna poora potaamel likhte hain। saahookaaron ko to dar rehta hai ki kahaan hamaare paise na le lenve। saahookaaron ke liye bada mushkil hai। baap kehte hain main gareeb nivaaz hoon। daan bhi hamesha gareeb ko hi kiya jaata hai। sudaama ki baat hai na। chaaval chapti le unko mahal de die। tum ho gareeb, samjho koi ke paas 25-50 roopaya hai unse ek do aana dete hain। saahookaar 50 hazaar den to bhi equal ho jaata hai, isliye gareeb nivaaz kaha jaata hai। saahookaar log to kehte hamko phursat nahin milti kyonki poora nishchay nahin hai। tum ho gareeb। gareebon ko dhan milne se khushi hoti hai। baba ne samjhaaya hai yahaan ke gareeb vahaan saahookaar ban jaate hain aur yahaan ke saahookaar vahaan bahut gareeb ban padte hain। koi kehte ham yagya ka khyaal rakhen ya kutumba ka rakhen? baba kehte tum apne kutumba ki bahut achhi sambhaal karo। achha hai, jo tum is samay gareeb ho। saahookaar hote to baap se poora varsa le nahin sakte। sannyaasi aise nahin kahenge, woh to paise lekar apni jaageer banaate hain। shivbaaba thode hi banaayenge। yeh makaan aadi sab tum bachchon ne apne liye banaaye hain। yeh kiski jaageer nahin hai। yeh to tempory hai kyonki ant samay bachchon ko yahaan aakar rehna hai। hamaara yaadgaar bhi yahaan hai। to pichhaadi mein yahaan aakar vishraam lenge। baap ke paas bhaagenge woh, jo yog-yukta honge। unhon ko madad bhi milegi। baap ki bahut madad milti hai। tum jaante ho hamko yahaan baith vinaash dekhna hai। jaise shuru mein baba ne tum bachchon ko bahlaaya hai to pichhaadi vaalon ka bhi hak hai। us samay aise feel karenge jaise vaikuntha mein baithe hain। bahut nazdeek hote jaayenge।

yeh to samajhte hain ham yaatra par hain। thode samay baad vinaash hoga। ham jaakar prince princess banenge। kisam-kisam ke phool hain। harek bachche ko samajhna chaahiye main kitne ko gyaan ki khushbu de raha hoon! kisko gyaan aur yog ki shiksha deta hoon! jo service karte hain woh andar mein praphullit rehte hain। baba jaan jaate hain yeh kis avastha mein rehte hain। inki avastha kahaan tak gallop karegi। gallop unki avastha karegi jo parvaana ban chuka hoga। baap samjhaate hain maaya ke toofaan to aayenge, unse apne ko bachaana hai। sannyaasi kabhi nahin kahenge ki stri-purush grihastha mein rehte pavitra ho dikhaao। woh aisa sannyaas kara na saken। unka hai hi rajopradhaan sannyaas, nivritti maarga ka। hathayog sannyaas to manushya, manushya ko sikhlaate aaye hain। abhi yeh raajayog parampita paramatma aakar aatmaon ko sikhlaate hain। aatma ko gyaan hai - main aatma apne is (aatma) bhaai ko samjhaata hoon। jaise paramatma baap ham aatmaon (bachchon) ko samjhaate hain। ham bhi aatma hain। baba hamko sikhlaate hain। ham phir in aatmaon ko samjhaata hoon। parantu yeh aatma-pane ka nishchay na hone se apne ko manushya samajh manushya ko samjhaate hain। baap kehte hain ham to aatmaon se hi baat karte hain। main param aatma tum aatmaon se baat karta hoon। tum kahenge ham aatma sunti hain। aatma ko sunaati hain। aise tum dehi-abhimaani ho kisko sunaayenge to woh teer jhat lagega। agar khud hi dehi-abhimaani nahin rah sakte hain to dhaarna kara nahin sakenge। yeh badi oonchi manzil hai। buddhi mein yeh rehna chaahiye ham in organs se sunte hain। baap kehte hain - ham aatmaon se baat karte hain। bachche kahenge ham aatmaayen brothers se baat karte hain। baap kehte hain ham aatmaon ko samjhaata hoon। baba ka pharmaan hai - bachche, ashareeri arthaat dehi-abhimaani bano। deh-abhimaan chhodo, mujhe yaad karo। yeh buddhi mein aana chaahiye - ham aatma se baat karta hoon, na ki shareer se। bhal female hai, unki bhi aatma se baat karta hoon। tum bachche samajhte ho ham baba ke to ban gaye parantu nahin, ismen badi sookshm buddhi chalti hai। main aatma samjhaata hoon, yeh buddhi mein aata hai। aise nahin ki main phalaani ko samjhaata hoon। nahin, yeh hamaara bhaai hai, inko raasta bataana hai। yeh aatma samajh rahi hai। aise samjho tab aatma ko teer lage। deh ko dekhkar sunaate hain to aatma sunti nahin hai।

pahle hi warning do main aatma se baat karta hoon। aatma ko to na mel kahenge, na female kahenge। aatma to nyaari hai। mel-female shareer par naam padta hai। jaise brahma-sarasvati ko mel-female kahenge। shankar paarvati ko mel-female kahenge। shiv baba ko na mel, na female kahenge। to baap aatmaon ko samjhaate hain - yeh badi manzil hai। baba ki aatma inko samjhaati hai। aatma ko injection lagaana hai tab deh-abhimaan tootta hai। nahin to khushbu nahin nikalti hai, taakat nahin rehti। ham aatma se baat karte hain। aatma sunti hai। baap kehte hain tumko vaapis jaana hai, isliye dehi-abhimaani bano, manamnaabhav। phir automatically madhyaaji bhav aa jaata hai। mool baat hai hi manamnaabhav। baap ko yaad karo। bhal kehte to sab hain bhagwan ko yaad karo parantu jaante nahin। khaas kehte eeshvar ko yaad karo। shreekrishna ko va kisi devta ko yaad nahin karna hai। abhi tum bachchon ko badi sookshm buddhi milti hai। savere uth vichaar saagar manthan karna hai। din mein service karni hai kyonki karmayogi ho। likha hua bhi hai neend ko jeetne vaale bano। raat ko jaag kamaai karo। din mein maaya ka bada bakhera hai। amritvele vaayumandal bahut achha rehta hai। baba ko yeh to likhte nahin ki phalaane time par uth vichaar saagar manthan karte hain। ismen badi mehnat hai। vishwa ka maalik bante hain to zaroor thodi mehnat to karni padegi। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dehi-abhimaani banne ki mehnat karni hai, ham aatma, aatma (bhaai) se baat karta hoon, aatma bolti hai, aatma in organs se sunti hai... yeh abhyaas karna hai।

2) oonch gati ke liye paavan nirvikaari banna hai। jeete ji markar poora parvaana banna hai।

vardaan:- ek himmat ki visheshta dvaara sarva ka sahayog praapta kar aage badhne vaali vishesh aatma bhav

jo bachche himmat rakhkar, nirbhay hokar aage badhte hain unhein baap ki madad svatah milti hai। himmat ki visheshta se sarva ka sahayog mil jaata hai। isi ek visheshta se anek visheshtaayen svatah aati jaati hain। ek kadam aage rakha aur anek kadam sahayog ke adhikaari bane। isi visheshta ka auron ko bhi daan aur vardaan dete raho arthaat visheshta ko seva mein lagaao to vishesh aatma ban jaayenge।

slogan:- buddhi se itne halke raho jo baap apni palkon par bithaakar saath le jaaye।