Daily Murli for Friday 26 May 2023

26-05-2023 praatahmurli om shanti "baapdaada"' madhuban

“he meethe laal - raat ko jaagkar most beloved baap ko yaad karo, dehi-abhimaani bano, shreemat kehti hai baap samaan nirhankaari bano''

prashn:- shivbaaba ke saath brahma ki mat bahut naameegraami hai - kyon?

uttar:- kyonki brahma baba shivbaaba ka ek hi murabbi bachcha hai। ise apni mat ka ahankaar nahin hai। sadaiv kehte hain - tum hamesha baap ki hi shreemat samjho, ismen hi tumhaara kalyaan hai। baba dekho kitna nirhankaari hai, maataaon ko kehte hain vande maatram। maataayen gyaan ganga hain, shakti sena hain, inhen aage rakhna hai, regard dena hai। ismen deh-abhimaan nahin aana chaahiye।

geet:- jo piya ke saath hai…

om shanti। geet ki pahli line bachchon ne suni। kehte hain jo piya ke saath hai....। parantu saath mein ikatthe rahne ka question hi nahin uthta। jo baap ke bane hain ve saath hain hi। jo baap ke bante hain ve brahman bhal kahaan bhi rahen unke liye to gyaan barsaat hai। jo shivbaaba ke potre-potriyaan ban pratigya karte hain - baba, ham sada pavitra rahenge, gyaan amrit piyenge - unke liye hi gyaan ki barsaat hai। amrit koi jal nahin, zahar ki bhent mein gyaan ko amrit kaha gaya hai। to tum ho paandav sampradaay। yaadav sampradaay, kaurav sampradaay ka gaayan hai na - kya karat bhaye। tum paandavon par hai gyaan amrit ki barsaat। baaki jo kaurav-yaadav hain un par gyaan amrit ki barsaat nahin hai। yeh bhi bachche jaante hain - yaadav-kaurav bahut hain। paandav bahut thode hain। gaaya bhi jaata hai raam gayo, raavan gayo.. jinki bahut sampradaay hai। raam ki sampradaay paandav bahut thode hain। yeh hai paandav government, shreemat par chalne vaale। yeh jaise bhagwan ki government hai। parantu hai gupta। tum jaante ho ham shreemat par chal bhaarat ka beda paar kar rahe hain। jo shreemat par chalte hain ve apna beda paar karte hain। yaadav aur kaurvon ke paas kitne mahal hain। tum bachchon ko kuchh bhi nahin। teen pair prithvi ke bhi tumhaare nahin। sab unhon ka hai। yeh bhi gaaya hua hai, jinko teen pair prithvi ke nahin milte the unhon ki vijay hui aur woh vishwa ke maalik ban gaye। paandav shakti sena gupta hai। shaastron mein bhi dikhaate hain jua khela, paandavon ka raajya tha phir jua mein haraaya, abhi na to hai raajya, na hai jua ki baat। yeh sab jhooth hai। tum barobar paandav ho। shivbaaba hai roohaani panda। bachchon ko roohaani yaatra sikhlaane aaya hai। is brahma tan se shreemat dete hain। jaise shivbaaba ki shreemat gaai hui hai, vaise brahma ki bhi gaai hui hai kyonki phir bhi shivbaaba ka ek hi murabbi bachcha hai। is dvaara kitne mukhvanshaavli rache jaate hain। pavitrata ka kangan bandhavaakar kehte hain - jitna meri mat par chalenge utna most beloved banenge। tumhaara heere jaisa jeevan banega। shivbaaba kehte hain - inka (brahma ka) aur tumhaara connection mere saath hai। heere jaisa janma tumko milta hai isliye ab dehi-abhimaani bano। jitna shiv-baba ko yaad karenge utna dehi-abhimaani banenge to maaya vaar nahin karegi।

baapdaada ki hamesha bachchon par nazar rehti hai। agar bachche kuchh bhi bekaayde chalte hain to baapdaada ka naam badnaam karte hain। to shiksha deni padti hai - aise kaam nahin karna। naam badnaam karne vaale ke liye kaha jaata hai satguru ka nindak thaur na paaye। aisa koi ulta kartavya nahin karna hai। tum bachche jaante ho - jitna baba ko yaad karenge utna vikarma vinaash honge। yaad mein rahne vaale ko hi dehi-abhimaani kaha jaata hai। deh-abhimaan hone se maaya ka vaar jor se hoga। badi manzil hai। scholarship lete hain। kitne brahman banne vaale hain। gaaya jaata hai 33 karod devi-devtaayen। vijay maala mein woh aate hain jo dehi-abhimaani bante hain। deh-abhimaani banna maana maaya ka vaar hona। dehi-abhimaani banna maana baap ka banna। yeh baat badi sookshm hai। purushaartha kar baap ko yaad karna hai। woh baap bhi hai, saajan bhi hai। apaar sukh dene vaala hai। kehte hain tum bachchon ke liye hatheli par bahishta le aaya hoon। sirf tum shreemat par chalo। shreemat kehti hai dehi-abhimaani bhav। deh-abhimaan ne tumhaara beda garka kiya hai। maaya tumko deh-abhimaani banaati hai। roohaani baap ko sab bhoole hue hain। abhi baap ne aakar parichay diya hai। tum apne ko ashareeri aatma samjho। mera to shivbaaba aur varsa (svarga ki raajaai) bas। deh-abhimaan mein aakar mera kaha to svarga ka raajya le nahin sakenge। ham aatma hain - yeh pakka nishchay karo। yeh jo aatma so paramatma ka bhoosa buddhi mein bhara hua hai, woh nikaal do। abhi dehi-abhimaani bano। baap ko yaad karo to tumhaara beda paar hoga। shreemat par chalo। dehi-abhimaani nahin banenge to maaya beda garka kar degi। aise bahuton ka beda maaya ne garka kiya hai kyonki shreemat par nahin chalte hain। yuddha ka maidaan hai। tumhein kisi bhi baat mein haar nahin khaani hai। kaam ka bhoot to ekdam purja-purja (tukda-tukda) kar deta hai। second number hai krodh ka bhoot। krodh se ek do ko maarkar khalaas karte hain। yaadvon ka krodh badhega। ekdam jaise devil ban jaayenge। krodh bhi bada bhaari dushman hai। kaam ko nahin jeeta to pavitra duniya ka maalik ban nahin sakenge। krodh dushman bhi aisa hai jo khud ko bhi aur auron ko bhi duhkh dete hain। yeh bhi hai bhaavi। ab yaadav, kaurav, paandav kya karte hain? yeh tum hi jaante ho। yeh hai paandav government। ab tum dekhte ho paandavon ka raajya to hai nahin। teen pair prithvi ke bhi nahin milte hain। unhon ka to dekho kitna dabadba hai। tum bachchon mein bahut thode hain jo naaraayni nashe mein rehte hain। nashe sabhi mein hai nuksaan। deh-abhimaan mein aane se bada nuksaan hai। to baap samjhaate hain tum sadaiv shivbaaba ko yaad karo। aise mat samjho yeh brahma gyaan dete hain। samjhaate hain shiv baba ko yaad karo। shivbaaba kehte hain mere saath yog lagaao। yeh brahma bhi mere saath yog lagaate hain। mujhe yaad karenge to main madad karta rahoonga। deh-abhimaani banne se maaya vaar karti rahegi। aur phir ek do ko duhkh dete rahenge। ismen bhi do hain bade dushman। nambarvaar to hote hain na। kaam-krodh hai pratyaksha vikaar। moh-lobh aadi to gupta hain। to in bhooton par vijay paani hai।

baap kehte hain abhi tumko teen pair prithvi ke nahin milte hain, main phir tumko vishwa ka maalik banaata hoon। baap ki hamesha dil hoti hai bachcha naam nikaale। koi poochhe tum kiske bachche ho, to falak se uttar dena chaahiye। oho, baap ne bachchon ko bahut ooncha banaaya hai। laukik bachche hote hain koi engineer, koi barrister, koi kya - to baap khush hote hain। koi-koi bachche to baap ki ijjat lene mein bhi deri nahin karte hain। tumko to baap ki ijjat badhaani hai na। kul kalankit bachche ke liye to baap kahenge mua bhala। yeh baap bhi aise kahenge tum kaami, krodhi bankar eeshvareey kul ko kalank lagaate ho। baap se varsa to poora lena chaahiye। dekhte ho yeh mama-baba pahle number mein lakshmi-naaraayan bante hain। to kyon na ham unke takhta par jeet pa len। barobar tum maa-baap ke takhta ko jeette ho na। bachche takhta par baithenge to khud neeche aa jaayenge। ab raajdhaani sthaapan ho rahi hai। baap kehte hain raajaai praapta karo। praja mein nahin jaana hai। naaraayni nasha rehna chaahiye। bhal praja mein bhi bahut dhanvaan hote hain, parantu phir bhi praja kahenge na। raajaaon se bhi praja mein saahookaar hote hain। is samay government kangaal hai। karja leti hai to praja saahookaar hui na। baap samjhaate hain tum jaante ho bhaarat ki government yeh lakshmi-naaraayan the, ab phir ban rahe hain। baap ki shreemat par chalne se beda paar hota hai। shreshtha banenge। nahin to maaya kha jaayegi। bahuton ko kha gai hai। bhal yahaan se nikle hain, bade lakhapti ban gaye hain। bhaaji (sabji) bechne vaale aaj karodapti ho gaye hain। baba ke paas aate hain, kehte hain baba abhi to paisa bahut ho gaya hai। baba kehte hain tumhaare oopar bojha bahut hai, shivbaaba se tumne paalna bahut li hai। karja hua na, isliye khabardaar rehna। to ve bhi samajhte hain bojha utaar leven। aise bahut milte hain। karaachi mein tum bachchiyaan bhaagi thi। kuchh le aai thi kya? kuchh bhi nahin। shivbaaba ke khajaane se tumhaari paravrish hui। jo koi-koi shivbaaba ke pichhaadi surrender hue unse tum bachchon ki paalna hui। is baba ko thode-hi pata tha ki yeh aapas mein milkar aise aa jaayenge। shivbaaba ne unki buddhi mein daala aur bhatthi banni thi, to sab bhaagkar aa gaye। to paravrish ke liye bhi koi bali chadhe। phir unse kai bhaag gaye। maaya ne haar khila di। maaya bhi koi kam samartha nahin hai। ab us par jeet paani hai baap ki yaad se। yog akshar nahin bolo। kai bachche kehte hain yog mein bithaao। lekin yeh aadat pad jaayegi to chalte-phirte tum yaad nahin kar sakenge। nayon ko bhi yeh nahin sikhaana hai ki yog mein baitho। naye ko tum apne saamne bithaate ho to woh naam-roop mein phans padta hai। anubhav aisa kehta hai, isliye mana ki jaati hai। maa-baap ko ek jagah yaad karna hota hai kya? tum uthte-baithte, service karte baba ko yaad karo। baba ke jo laal honge, ve raat ko jaagkar bhi yaad karte rahenge। aisa most beloved baba jisse vishwa ka maalik bante hain, to kyon na unko yaad karenge।

paarlaukik baap se athaah sukh ka varsa milta hai। tum abhi se purushaartha karte ho, mehnat karte ho jo phir janma-janmaantar eeshvareey praalabdha tum bhogte ho। aise nahin, vahaan satayug mein tum aise karma karte ho tab raajaai milti hai। nahin, yahaan ke hi purushaartha se praalabdha paate ho। bada bhaari pad hai। aise bahut aaye phir aashcharyavat sunanti, kathanti, phir bhaaganti ho gaye। bahut centres bhi sthaapan karanti, phir bhaaganti, giranti ho gaye.. koi centre sthaapan karke bhi aahiste-aahiste gir padte hain। wonderful maaya hai na। maaya jhat naak se pakad leti hai isliye baap kehte hain nirantar yaad karo। samjho shivbaaba samjhaate hain। inse mama teekhi hai। baba niraakaar, nirhankaari hai। tum bachchon ko bhi samajhna hai, ham niraakaari aatma hain, nirhankaari banna hai tab hi varsa paayenge। deh-abhimaan nahin aana chaahiye। bahut meetha banna hai। vahaan maaya hoti nahin। to kyon na baap se varsa le leven। baba ka right hand ban jaayen। woh kaun bante hain? jo centre sthaapan karte hain। kamaal karte hain, kitnon ka kalyaan karte hain। koi centres sthaapan kar phir chale jaate hain। unka bhi phal mil jaata hai। ek taraph jama, doosre taraph na ho jaati hai। yeh to baap jaante hain। brahma bhi jaan sakte hain। ek hi yeh murabbi bachcha hai। tum sab ho potre potriyaan। tum jaante ho mama number one jaati hai। baba second number mein aate hain। to maataaon ka regard bahut karna pade। baba kehte hain vande maatram। to bachchon ko bhi vande maatram karna pade। maata bigar uddhaar ho na sake। vaastav mein to hain sab seetaayen। sab sajniyaan hain - ek saajan ki athva sab bachche hain ek baap ke। baap khud kehte hain vande maatram। jaise karma main karoonga, mujhe dekh bachche bhi aisa karenge। to maataaon ki sambhaal karni hai। in par atyaachaar bahut hote hain। koi vighna daalte hain to bhi bichaari maataayen baandheli ho jaati hain। paap ka ghada aise bharta hai, asur maarte hain to paapaatma ban padte hain। hai to sab drama anusaar, isko koi mita nahin sakte। kalpa pahle muaaphik harek apna varsa lene vaale hain। saakshaatkaar hota hai - kaun achhe-achhe madadgaar hote hain। shivbaaba kehte hain main to daata hoon, kuchh leta nahin hoon। agar yeh khyaal aata hai ki ham dete hain, ahankaar aaya to yeh mare। shivbaaba to kehte hain tum thikkar-bhittar dekar return mein kitna lete ho! baba hamesha daata hai। shivbaaba ko main deta hoon - yeh buddhi mein kabhi nahin aana chaahiye। main ek paisa dekar laakh leta hoon, 21 janma ke liye raajya-bhaagya leta hoon। baap hai sadgati daata, jholi bharne vaala। gupta daan karna hota hai, baba bhi gupta hai। achha।

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dehi-abhimaani ban maaya par jeet avashya paani hai। raat ko jaagkar bhi most beloved baap ko yaad karna hai।

2) baap samaan niraakaari, nirhankaari banna hai। shivbaaba ko dete hain - yeh to sankalp mein bhi nahin laana hai।

vardaan:- samay ke mahatva ko jaan vyartha ko samartha mein parivartan karne vaali knowledgeful mahaan aatma bhav

63 janma to vyartha ganvaaya abhi samartha banne ka yeh ek janma hai, ise vyartha nahin ganvaana kyonki sangam ki yeh ek-ek ghadi padmon ki kamaai jama karne ki hai, yeh kamaai ki season ka yug hai isliye kabhi bhi samartha ko chhod vyartha taraph nahin jaana। knowledgeful ban jo jitna svayan samartha banenge utna auron ko samartha banaayenge। aisa jo samay ke mahatva ko jaante hain woh svatah mahaan ban jaate hain।

slogan:- ek baap ke pharmaan par chalte chalo to saari vishwa aap par svatah kurbaan jaayegi।