Daily Murli for Friday 2 June 2023

02-06-2023 praatahmurli om shanti "baapdaada"' madhuban

“meethe bachche - service ki nai-nai yuktiyaan nikaalte raho। bhaarat ko daivi svaraajya banaane mein baap ka poora-poora madadgaar bano''

prashn:- baap bachchon ko kaun-si smriti dilaakar ek aash rakhte hain?

uttar:- baba smriti dilaate - bachche, tum kalpa-kalpa maayaajeet jagatjeet bane ho। tumne maat-pita ke takhta par jeet paai hai isliye abhi tumhein maaya ke toofaanon se darna nahin hai। kabhi bhi maaya ke vash hokar kul kalankit nahin banna hai। laadle bachche, is boodhe baap ki daadhi ki laaj rakhna। aisa koi kaam na ho jo baap ka naam badnaam ho jaaye। tum yog bal se vikaaron ko bhagaate raho, baap samaan niraakaari, nirhankaari bano।

geet:- dar par aaye hain kasam le ke…

om shanti। meethe-meethe sikeeldhe bachche achhi reeti jaan gaye hain ki behad ke baap se bachchon ko pyaar milta hai zaroor। jaise had ke laukik baap apne rache hue bachchon ko pyaar karte hain। achhi tarah se sambhaalte hain, unki seva karte hain ki hamaara kul vriddhi ko paaye। bhakti maarga mein bhi behad ke baap ko sabhi yaad karte hain। zaroor kabhi baap se milna hota hai। yahaan bhi baap to kehte hain - main tumhaara baap bhi hoon, shiksha dene vaala bhi hoon arthaat drama ke aadi, madhya, ant ki knowledge dene vaala bhi hoon। isko hi gyaan kaha jaata hai। baaki shaastron mein hai bhakti maarga ka gyaan। usse koi mukti-jeevanmukti nahin mil sakti। baap kehte hain sarva ka mukti-jeevanmukti daata main hoon। mujhe hi mukti-jeevanmukti dene ke liye aana padta hai। to kalpa-kalpa, kalpa ke sangam par mujhe hi aana padta hai। drama anusaar maaya 5 vikaar tumko duhkhi bana dete hain। tum jaante ho abhi duhkh ke pahaad girne hain। vinaash hona hai। usi samay khooni naahek khel ka part bajna hai। kitni khoon ki nadiyaan bahengi aur satayug mein ghi ki nadiyaan bahni hain। khoon ki nadiyaan bahti hain phir usi samay haahaakaar ho jaata hai। bahut duhkhi honge। ab bachchon ko achhi tarah baba ki service bhi badhaani hai। tum madadgaaron se hi bhaarat svarga banta hai। tum jaante ho ham hi sikeeldhe brahman kul bhooshan bachche bhaarat ko phir se daivi svaraajya banaate hain। baba se daivi svaraajya ka varsa lete hain। baba kehte hain - bachche, service ki yuktiyaan nikaalte raho। baba ka bhi khyaal chalta hai na। isko hi svadarshan chakra kaha jaata hai। yeh bahut achhi cheez hai, isse tum service bahut achhi kar sakte ho। yeh raajdhaani sthaapan karne mein athva bhaarat ko raavan raajya se badal raam raajya sthaapan karne mein koi kharcha nahin hai। tum ho hi non-violence, ahinsak। sarva gun sampanna, 16 kala sampoorn, sampoorn nirvikaari, ahinsa parmodharma vaale tum bante ho।

tum kehte ho hamko baba ka madadgaar bankar bhaarat ko heere jaisa banaana hai। kalpa-kalpa ham yeh service karte rehte hain। abhi ham hain god fatherly service par। god fatherly student bhi hain, god fatherly children bhi hain। hamaare oopar bahut badi responsibility hai। bachche jo bante hain un par responsibility rehti hai। baba kehte hain khabardaar rehna, koi bhool chook nahin karna। baba kisma-kisma ki service bataate hain। kis prakaar bhaaratvaasiyon ko behad ke baap se varsa lene ka raasta bataayen। samjhaaya jaata hai yeh varsa to 21 janma satayug ka janma-siddha adhikaar hai। satayugi deity sovereignty is your god fatherly birth right। baap hai hi svarga ki sthaapna karne vaala। purushaartha yahaan karna hai। aise nahin satayug mein karenge। baba ko samjhaana padta hai to sabhi bachche sunen। yeh gola hai svadarshan chakra, yeh iron seat par bade-bade banvaakar phir bade-bade sthaanon par rakho। neeche sab kuchh likha hua hai। jo dekhenge, samjhenge yeh to right baat hai। samay najdeek hota jaayega। manushyon ko yeh dil andar aayega barobar ab satayug najdeek hai। samay prati samay bachchon ko service prati raay dete rehte hain। aise karo to service badhegi। harek apne ghar mein bhi yeh board lagaao। shivbaaba ka chitra bhi ho, yeh hai geeta ka bhagwan। phir likha hua ho deity world sovereignty aapka janma siddha adhikaar hai। harek apne ghar par board laga de। tum gyaan gangaayen ho na। board dekhkar bahut aayenge। unko samjhaana hai। tum aatmaon ka baap woh niraakaar hai। tum bhaai-bhaai ho। ham us baap se varsa le rahe hain। aage chalkar bahut dhoomdhaam hogi ki vahi bhagwan aakar padhaare hain। naam to hai brahmaakumaar-kumaari। shivbaaba ka bhi naam hai। aage chalkar manushya samjhenge raajdhaani to zaroor sthaapan hogi। yagya mein vighna padte hain kyonki raaja-raani to koi hai nahin। praja ka praja par raajya hai। koi ko samjhaao aur woh brahmaakumaariyon ka taraph le to bhi hangaama kar denge। samajhte hain sab dharma mil ek ho jaayen। ab jo dharma bhinna-bhinna hain, woh sab ek kaise honge। khud kehte hain ham koi dharma ko nahin maante। apne dharma ko bhoolna, yeh bhi drama hai। aur dharma sthaapan hote hain to devi-devta dharma praayahlop ho jaata hai isliye sab apne ko hindu kah dete hain। devta dharma lop hai, tab baba kehte hain phir se ham devi-devta dharma ki sthaapna karne aaye hain। anek dharmon ka vinaash bhi saamne khada hai। baaki kitna samay thahrenge। aaphten bhi aani hain। manushya to kehte hain satayug aane mein laakhon varsha hain। tum jaante ho aaj narka mein hain, kal svarga mein jaayenge। ham aatmaayen daud rahi hain। abhi 84 janma poore hue। duhkh ka part poora hua। bas baba, abhi ham aaye ki aaye। yeh antim janma hai। baba saajan aaya hua hai। kehte hain abhi pavitra duniya ke laayak bano to saath le jaaoonga। yog se laayak nahin banenge to saja khaayenge। phir pad bhi kam ho jaayega। baat to bahut sahaj hai। behad ke baap se behad ka sukh milta hai, isliye behad ke baap ko aur behad sukh ke varse ko yaad karna hai। jitna chaahiye yaad karo, jitna yaad karenge vaisa pad milega। aath ghanta zaroor yaad karna chaahiye। purushaartha karna hai। yeh bhi jaante hain kalpa pahle muaaphik hi bachche purushaartha karte hain। isko saakshi ho dekha jaata hai - kaun kitna purushaartha karte hain, most beloved baap se varsa lene। kalpa-kalpaantar vahi lene liye adhikaari banenge।

baap ne raajayog sikhaaya hai svarga ke liye। laukik baap bhi bachchon ki kitni sambhaal karte hain! behad ke baap ko bhi kitni sambhaal karni padti hai। maaya bada hairaan karti hai, beemaar kar deti hai। phir baba aakar davaai dete hain। yeh hai sanjeevni booti, sirf baap aur varse ko yaad karna hai। baap ko yaad karne bigar varse ko yaad nahin kar sakenge। ab bhakti maarga arthaat brahma ki raat poori hoti hai। phir baba aakar din sthaapan karte hain। aadha kalpa hai brahma ka din, aadha kalpa hai brahma ki raat। ghor andhiyaara hai na। ghadi-ghadi bachchiyaan baith samjhaayen to laukik-paarlaukik maat-pita ka achha show karengi। baap rachayita ka kaam hai - stri-bachchon aadi ko apna saathi banaana। apni rachna ko bhi raasta bataana hai। kaam chita ka sauda badal gyaan chita par baithna hai। yeh board bahut achhe ban sakte hain। baap ko to bahut ona rehta hai। baap niraakaar, nirhankaari hai। kaise baith bachchon ki paalna karte hain। kehte hain na vaat vende vaaman phaatho.... (raaste chalte brahman phans gaya) baba ko thode hi pata tha ki aise pravesh karenge, main brahma ban phir shri naaraayan banoonga। kitni gaali khaai hai! baba kehte hain tumhaare se bhi meri glaani jaasti karte hain। tumko to karke ek do gaali dete hain, mujhe to patthar bhittar mein thok diya hai। meri kitni ninda ki hai! raajya-bhaagya paana hai, to gaali khaai to kya badi baat hai। mujhe to aadha kalpa se gaali dete rehte hain। yeh bhi drama ka khel bana hua hai।

baba kehte hain - laadle bachche, main ismen aaya hua hoon। inki daadhi ka kuchh khyaal rakho। inki daadhi so unki। ab koi kalank nahin lagaana hai। vikaaron ko yogbal se bhagaate raho। kalpa-kalpa tum maaya par jeet paakar jagatjeet bante aaye ho। svarga ka maalik praja bhi banti hai। parantu purushaartha kar maat-pita ke takhta par jeet pahno। yeh hai hi raajayog। baap jaante hain yeh mama-baba pahle number mein jaate hain। mama kuvaanri kanya, yeh adharkumaar hai। ghar mein bachche aisa kuchh kaam karte hain to baap kehte hain hamaare daadhi ki laaz rakho। naam badnaam na karo। achhi reeti ghar-ghar mein board laga hua ho - aakar behad ke baap se varsa lo। raajaaon ko, sannyaasiyon ko pichhaadi mein jagna hai। din-pratidin tum bhi teekhe hote jaate ho। shakti milti jaati hai। dekhte ho saamne vinaash khada hai, ladaaeeyaan lag rahi hain aur yeh hai rudra gyaan yagya। ham brahman hain। brahman phir so devta banenge। jitna purushaartha karenge, utna oonch pad paayenge। din-pratidin bahut sahaj hota jaata hai। baap ka roop bhi to samjhaaya hai। woh star hai। parantu naye ko pahle hi yeh nahin bataana hai। jab achhi reeti samjhen। poochhe itna bada roop hai? tab samjhaana hai। yeh saakshaatkaar to bahuton ko hota hai। parantu matlab kuchh bhi nahin samajhte। jaise aatma chamakta hua star hai, vaise hi baap hai। unko bhi parampita param-aatma kaha jaata hai। to ho gaya paramatma। woh inmen aate hain। aakar baaju mein baith jaate hain। guru ke baaju mein shishya baith jaate hain na। woh sikhlaate hain tum bachchon ko। yeh bhi baaju mein rehte hain। baapdaada combined hai। parantu guhya raaz hai। jab koi poochhe tab samjhaana hai। nahin to baba-baba kehte raho। baba svarga ke liye raajayog sikhlaate hain। yeh to bachche jaante hain is samay tak jo past hua so drama। vighna to padte rahenge। bachchon ko bhi maaya jor se toofaan mein laayegi। parantu haath nahin chhodna hai। maaya ajgar hai। achhe-achhe laal ko bhi kha legi। kalpa pahle bhi hua tha। jo teekhe vishaalbuddhi bachche hain woh har baat ko samajh sakte hain। vichaar saagar manthan karenge - ham aise-aise kisko samjhaayen, daan karen। baba roop-basanta hai। tum bhi roop-basanta ho। baba kehte hain main star hoon, mere mein ye part bhara hua hai। har ek aatma mein part bhara hua hai। yeh baaten science ghamandi samajh na saken। woh record ghis jaaye, toot-phoot jaaye, yeh aatma star immortal hai, jismen immortal part bhara hua hai। iska kabhi and (ant) nahin hota। and nahin to aadi bhi nahin, chalta aata hai। is drama ke raaz ko bhi tum samajhte jaate ho। tum ho - nainheen andhon ki laathi। unhon ko raasta bataana hai। abhi sabki vaanaprastha avastha hai। vaani se pare jaana hai। baba kehte hain main sabko le jaaoonga isliye jitna ho sake baap ko yaad karo to vikarma vinaash honge। isko roohaani yaatra kaha jaata hai। baba kehte hain - he raahi bachche, thak mat jaana। baap aur rachna ko yaad karna hai। rachna ka maalik banna hai। yeh to ati sahaj hai। hamesha shivbaaba ko yaad karte raho। motor chalaate bhi buddhi ka yog kahaan rehna chaahiye? baba apna misaal bataate hain - ham naaraayan ki pooja karne baithta tha to buddhi aur taraph chali jaati thi। phir apne ko chamaat maarta tha। to abhi bhi buddhi daudti hai। purushaartha karte-karte unki yaad mein shareer chhodna hai। manushya bhakti karte hain ki shreekrishna ki yaad mein ham shareer chhoden to krishnapuri pahunch jaayen। parantu shreekrishna to sabhi ka baap nahin hai। sabhi ka baap to ek parampita paramatma hai। sabka sadgati daata raam baap hi aakar sab ki sadgati karte hain। mukti to sabko mil jaati hai phir jo bhi aate hain pahle unko sukh dekhna hai zaroor। nai aatma oopar se aati hai isliye unka maan hota hai। bhal kismen bhi pravesh karti hai to unka naam baala ho jaata hai। tum bachche jaante ho raajdhaani sthaapan ho rahi hai। ham so devi-devta ban rahe hain। sirf tum brahman hi sangamayug par ho, baaki sab hain kaliyug mein। yahaan aane vaale maante jaayenge barobar kaliyug ka ant hai। duniya badal rahi hai isliye hi yeh mahaabhaari mahaabhaarat ladaai hai। tumhaare dvaara sabko knowledge milti hai। maataaon ko lift dene baap aate hain kyonki maataaon par atyaachaar bahut hote hain। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) most beloved baap ko yaad karne ka purushaartha kaun kitna karte hain, yeh saakshi ho dekhte, svayan 8 ghante tak baap ki yaad mein rahne ka abhyaas karna hai।

2) baap samaan roop basanta ban vichaar saagar manthan kar gyaan daan dena hai। andhon ki laathi banna hai।

vardaan:- sada busy rah har kadam mein padmon ki kamaai jama karne vaale maayaajeet bhav

aap bachche brahman bane ho sada busy rahne ke liye, busy rahne vaale hi bade se bade businessman hain jo har kadam mein padmon ki kamaai jama karte hain। saare kalpa mein aisa business koi kar nahin sakta aur jo sada busy rehta hai uske paas maaya nahin aati kyonki uske paas maaya ko receive karne ka time hi nahin hai। to sada isi roohaani nashe mein raho ki hamaare kadam-kadam mein padam hain। lekin jitna nasha utna nirmaan।

slogan:- apni seva ko baap ke aage arpan kar do to saphalta hui padi hai।