Daily Murli for Wednesday 7 June 2023

07-06-2023 praatahmurli om shanti "baapdaada"' madhuban

meethe bachche, tumhein deh sahit is saari puraani duniya ka tyaag karna hai, kyonki tumhein guide dvaara sachcha raasta mil gaya hai“

prashn:- eeshvareey plan ke anusaar kis karttavya mein kalyaan samaaya hua hai?

uttar:- yeh mahaavinaash ka jo karttavya hai, jismen saari behad ki puraani duniya khatma honi hai, ismen kalyaan samaaya hua hai। manushya samajhte yeh bahut bada akalyaan hai, lekin baap kehte mainne yeh gyaan yagya jo racha hai, ismen saari puraani duniya ki aahuti padegi, phir nai duniya aayegi।

geet:- om namo shivaae …

om shanti। bachchon ne geet suna। yeh mahima kiski thi? tum maat-pita arthaat parampita paramatma ki mahima। oonch te oonch bhagwan, vahi hai oonch te oonch god father। eeshvar ko father kaha jaata hai। kiska father? saari manushya srishti ka father। woh hai behad ka baap। jab unko baap kaha jaata hai to rachayita bhi hai। manushya srishti ka rachayita hai। vaastav mein sabhi manushya maatra ke do baap hain - ek laukik, doosra paarlaukik hua aatmaon ka baap। aatma ko jisma dene vaala hai laukik baap। aatma to niraakaar hi hai। aatmaon ka nivaas sthaan niraakaari duniya mein hai, jisko brahmalok bhi kaha jaata hai। yahaan sabhi aatmaon ko yeh shareer mila hua hai part bajaane। drama ke raaz ko bhi achhi reeti samajhna hai। tum jaante ho ki god father ki mahima sabhi se nyaari hai। gaate bhi hain O god father। manushya srishti ka beej roop hai। yeh hai ulta jhaad। beej baap oopar mein hai। jab kehte hain - O god father, to oopar mein nazar jaati hai। sabhi aatmaon ka father ek parampita paramatma hai। unki mahima hai sabhi se oonchi। parantu manushya bilkul nahin jaante hain। sabhi aatmaon ka father woh niraakaar baap aur phir saakaar baap prajaapita brahma, jisko aadi dev, mahaaveer, Adam bhi kehte hain। jis dvaara niraakaar parampita paramatma manushya srishti rachte hain। father ko to kabhi beanta nahin kaha ja sakta। jaise laukik father rachna rachte hain, stri ko adopt kar phir unse bachche paida karte hain, to usko father kaha jaata hai। father ko kabhi sarvavyaapi va beanta nahin kahenge। baap se hi bachchon ko varsa milta hai। to niraakaar param-pita paramatma hai sabhi aatmaon ka behad ka baap। yeh samajhna hai। god is one, father is one। abhi aatma apne father ko bhool gai hai। father ko bhoolne kaaran sabhi manushya-maatra orphan ban gaye hain। father ko na jaanne kaaran bahishta ko yaani rachna ko athva bhaai-behen ko yaad karte rehte hain। father ko bhool aapas mein hi ladte-jhagadte rehte hain। nidhan ke ban pade hain। varsa milta hi hai us baap se। brahma-vishnu-shankar bhi unki rachna hain। brahma-vishnu-shankar hain sookshmavtanvaasi। sookshm vatan ke oopar hai mool vatan, jahaan parampita paramatma rehte hain। ham aatma bhi vahaan ki rahvaasi hain। aatma kahegi woh hai sweet god fatherly hom, niraakaari duniya। in vatnon ko jaanna hai। teen lok kehte hain। mool vatan, sookshm vatan aur sthoolavtan। oonch te oonch hai baap। karnakraavanhaar, creator, director parampita paramatma hai। pahle brahma-vishnu-shankar ko create karte hain। phir brahma dvaara brahma mukhvanshaavli brahmaakumaar-kumaariyon ko adopt karte hain। delvaada mandir mein bhi aadi dev dikhaaya hai। neeche tapasya kar rahe hain। tumhaara hi yaadgaar khada hai। jinhonne bhaarat ko patit se paavan banaaya hai, unhon ka yaadgaar khada hai। sabhi sajniyon ka saajan ek hi hai। barobar mandir mein jagat amba aur jagatpita baithe hain। raajayog ki tapasya kar rahe hain। bhagvaanuvaach - main brahma tan dvaara baith tumko raajayog sikhlaata hoon। jagat amba bhi hai। prajaapita brahma bhi hai aur brahmaakumaar-kumaariyaan bhi hain। adhar kumaariyaan bhi hain। mandir vaale khud nahin jaante ki kumaariyaan kaun, adharkumaariyaan kaun hain? zaroor jagat amba, jagat pita ke bachche honge। un sabko baith raajayog sikhaate hain। pahle-pahle brahma ko kaise rachte hain? woh bhi bataate hain। saadhaaran tan mein, vaanaprastha avastha mein pravesh karta hoon। to yeh aadi dev hua na। prajaapita brahma jisko mahaaveer kehte hain - woh kiska bachcha hai? baap baith samjhaate hain ki main is brahma tan mein pravesh karta hoon। mera naam hai shiv। aise nahin, baba aate hi nahin hai। gaaya hua hai yada yadaahi.... is samay yeh hai hi patit duniya। paavan duniya kaise banti hai - woh samajhna chaahiye। baba samjhaate hain - main hi sadgati daata hoon। ganga nadi ko gati-sadgati daata nahin kah sakte। patit-paavan parampita paramatma hi hai। woh heavenly god father hi svarga ki sthaapna karte hain। jabki unki santaan hain to phir kyon nahin god father se svarga ka varsa milna chaahiye। samajh ki baat hai na। delvaada mandir mein bhi poora yaadgaar hai। neeche tapasya mein baithe hain, oopar mein svarga ka yaadgaar hai। devi-devtaayen bhaarat mein hi the। zaroor baap aate hain patiton ko paavan banaane। kehte hain - main kalpa-kalpa, kalpa ke sangamayuge-yuge aata hoon। sangamayug hai auspicious yug। jabki kaliyug ke ant mein main aakar satayug ki sthaapna karta hoon। yeh baap baith samjhaate hain। woh janma-maran rahit hai। manushya ko bhagwan nahin kaha ja sakta। manushya to 84janma lete hain।

tum bachche jaante ho yeh hai mrityulok। satayug ko kaha jaata hai amarlok। yeh hai raurav narka। manushyamaatra sab ek do ko kaatte rehte hain। bhaarat hi paavan tha, jismen devi-devtaayen raajya karte the। baap aate hi hain patit duniya, patit shareer mein। zaroor jo pahle satayug mein aaye honge, unke hi antim janma ke tan mein baap aaye honge। gaaya bhi jaata hai aatma-paramatma alag rahe bahukaal...poora hisaab ho gaya na। pahle-pahle aadi sanaatan devi-devta dharma vaale hi the। 84 janma bhi unhon ke hi hain। islaami, bauddhi aadi 84 janma nahin le sakte hain। bhaarat hai hi parampita paramatma ka birth place। sab khandon se oonch hai bhaarat khanda। parantu abhi hai kaliyug। baba ne samjhaaya hai woh hai avinaashi world drama। iska kabhi vinaash nahin hota। world ki history-geography repeat hoti hai। jo is knowledge ko jaan svadarshan chakradhaari bante hain, vo hi chakravarti raaja banenge। bhaarat mein jab devi-devtaaon ka raajya tha to aur koi dharma nahin tha। naye bhaarat mein nai raajdhaani devi-devtaaon ki thi। world almighty authority ka raajya tha। un par koi jeet pa na sake। shri lakshmi-naaraayan saare vishwa ke maalik the। unhon ko vishwa ka maalik banaane vaala zaroor vishwa ka rachayita hi hoga। woh hai parampita paramatma, god father। is samay devi-devtaaon ka naam-nishaan nahin hai। devi-devtaaon ke sirf chitra hain। parantu unke occupation ko koi bhi jaante nahin। is samay government mein bhi koi taakat nahin rahi hai। apne dharma ka pata nahin hai। kaha jaata hai religion is might। religion sthaapan karne vaala hai baap। unko hi sarvashaktimaan kaha jaata hai। to god father, father bhi hai, phir unko knowledgeful kaha jaata hai to teacher bhi hai aur phir unko patit-paavan kaha jaata hai to satguru bhi hai। unka koi father nahin। woh hai supreme father, supreme teacher kyonki knowledgeful hai। aur koi bhi manushya drama ke aadi-madhya-ant ki knowledge ko nahin jaante। sadgati daata bhi sabka woh ek hai। unka koi guru nahin। vahi behad ka baap, behad ka teacher aur behad ka satguru hai।

baap samjhaate hain bhaarat ab kangaal patit hai। patit banaati hai maaya raavan। abhi bhaarat aasuri raajasthaan hai। satayug mein daivi raajasthaan tha, jisko svarga, heaven kaha jaata hai। bhaarat hi oonch se oonch avinaashi khanda hai। avinaashi baap ka yeh birth place hai। bhaarat khanda kabhi vinaash ko nahin paayega aur sab khatma ho jaayenge। to baap ka bhi is drama mein part hai, jo is patit srishti ko paavan banaakar aadi sanaatan dharma ki sthaapna karte hain। shankar dvaara anek dharmo ka vinaash। yeh vinaash koi akalyaankaari nahin hai। yeh hai rudra gyaan yagya, jisse vinaash jvaala prajjavlit hui hai। baap kehte hain geeta ka rachayita main niraakaar parampita paramatma hoon। manushyon ne phir shreekrishna ka naam daal diya hai। bhagvaanuvaach - main tumko raajayog sikhlaata hoon। tum raajayogi ho। tumhein saari puraani srishti ka, deh sahit jo kuchh hai sabka tyaag karna hai। main guide ban sabko vaapis le chalne aaya hoon। baap hi duhkhon se liberate karte hain। aadha kalpa hai bhakti arthaat raavan raajya aur aadha kalpa hai raam raajya। yeh baap baith samjhaate hain। koi manushya nahin samjhaate। abhi baap aatmaon se baat karte hain। samjhaate hain - bachche, tumhaara yeh hai pravritti maarga। bhaarat mein purity thi to pees prosperity bhi thi। abhi purity nahin to pees prosperity bhi nahin। sab rogi, duhkhi hain। abhi bhaarat duhkhadhaam hai। bhaarat hi sukhdhaam tha। ab baap kehte hain - bachche, mere saath yog lagaao। pahle to nishchay hona chaahiye ki ham aatma hain, na ki paramatma। paramatma ki to mahima bahut bhaari hai। tum bhi satayug mein sab pavitra the। ab apvitra ban gaye ho। brahman, devta, kshatriy, vaishya, shoodra - yeh varna hain na। tum ho prajaapita brahma ki aulaad brahman। adi dev brahma ko kisne janma diya? baap kehte hain mainne ismen pravesh kar inka naam brahma rakha। inko adopt kiya। yeh bhaageerath hai। inke dvaara main tumhein maaya par jeet praapta karaata hoon। baaki koi yuddha aadi ka maidaan nahin hai। tum ho ahinsak। hinsa double hoti hai - ek to kaam kataari ki hinsa, doosri phir ek do ko maarne ki hinsa। baba kehte hain yeh kaam mahaashatru hai, inse tumne aadi-madhya-ant duhkh paaya hai। raavan raajya dvaapar se shuru hota hai। jabki brahma ki raat shuru hoti hai। yeh sangamayug hi sabse kalyaankaari hai। peechhe to neeche utarte jaate hain। devta se kshatriy, kshatriy se vaishya, shoodra varna mein aana hi hai। jo brahman dharma ke honge vo hi aakar brahmaakumaar, brahmaakumaariyaan banenge। baap samjhaate hain - bhaarat jeevanmukta tha, abhi jeevanbandha hai। baba aakar second mein jeevanmukti dete hain। baap se bhaarat ko kalpa-kalpa behad sukh ka varsa milta hai। mukti-jeevanmukti ka varsa manushya, manushya ko de na sake। paar le jaane vaala ek hi satguru hai। tum vishwa ke rachayita baap dvaara vishwa ke maalik ban rahe ho। baap kehte hain main to nishkaam hoon। brahma dvaara tumko vishwa ka maalik banaakar main vaanaprastha mein baith jaata hoon। gaaya jaata hai duhkh mein simran sab karen, sukh mein kare na koi.... ab sab bhakta ek bhagwan ko yaad karte hain। phir sarvavyaapi kah dete hain, to bhakta kaise thahre? yeh ulta gyaan hai। baap to rachte hain mukh vanshaavli। tum ho prajaapita brahma ki mukhvanshaavli। woh brahman hain kukh vanshaavli। ve jismaani pande, tum ho roohaani pande।

baap sab aatmaon ko kehte hain - ab tum mujh baap ko yaad karo। baap ko thode-hi bhoolna chaahiye। baap ko bhoola to varsa kaise milega। baap kehte hain maamekam yaad karo। baaki sab hain rachna, unse varsa nahin mil sakta। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) drama ke raaz ko achhi reeti jaankar part bajaana hai। abhi ham dhani baap ke bane hain, kab aapas mein ladna-jhagadna nahin hai।

2) baap guide ban sabko lene aaya hai, ab deh sahit sab kuchh bhool ek baap ko hi yaad karna hai।

vardaan:- 'mera baba’ is sankalp dvaara har kadam mein madad ka anubhav karne vaale nishchaybuddhi bhav

draamaanusaar jo pakke nishchaybuddhi hain, dil mein sankalp kar lete hain ki baap mera, main baap ka, to aise bachchon ko svatah madad milti hai। sirf sachchi dil se kaho ''mera baba“ to har kadam mein madad ki anubhooti hoti rahegi। jin bachchon ka ek baap ke saath atoot pyaar hai unhein koi bhi baat rok nahin sakti। baap ka pyaar sab baaton se paar kara deta hai। ve udte rehte hain।

slogan:- sada baap ki light might ke andar raho to maaya aapke aage thahar nahin sakti।